Chhungkaw keh chhia leh cancer thuah hnih pawhin a hneh loh Angel Wallenda By Henry Hurt, Reader’s Digest, January, 2016

            Kum 1990, Vau thla a ni. A incheina dumpawl, a cheimawina êng in a chhun tlet neuh neuh nen chuan Angel Wallanda-i chuan zei takin hrui thlun chu a zawh zel a. A chanve a zawh thleng tep tihah chuan a pai ta! A buktawnna mautlawn (balancing pole) chu a keng ngil hleithei ta lo. Hnuailam atanga thlirtu mi za tam tak te thinphu a ti rang kher mai! Engemaw tak dik lo a awm a ni. Inhumhimna tur len (net) zar  nih loh avangin a hnuai chhuat chara a tla a nih vaih chuan thih a ni mai.

            A hnunglam dawhsan (platform) atang chuan a pasal Steve chuan, ‘A mit zawn atang khan eng (light) kha dah sawn vat rawh u,’ tiin a rawn au chhuak a. Eng an dah sawn hnu chuan Angel-i chuan ngai awh leh in, a hrui chu a zawh chhunzawm leh ta a. Hrui sang taka thlun zawh thin (high wire walker/tight rope walker) chuan ngil taka a inbuk tawnna (balance) hloh lova hrui zawh tur chuan ngil taka ding a, lu kang vahin, a ke in hrui a rah dan atanga chhut chungin hrui chu a zawh tur a ni a. Mahse Angel Wallenda chuan ke dinglam a nei ve lo! A ke dinglam neih chhun chu a khup hnuai chiah zawma a vuah ke lem (artificial leg) chauh chu a ni. Ke lemin hriatna (feeling) a neih ve miau loh avangin Angel-i tan chuan a ke dinglama a rahna tur chiah zel chu zuk en a ngai ta bik a ni! (a awmna san zia a hmu reng dawn tihna a nih chu!). Angel-i chu khawvela ke lem nena hrui thlun sang zawh chhuak thei awm chhun a ni reng bawk a ni. Angel-i chuan inringtawk takin hrui chu a zawh zel a, a tawp leh ta! A ke veilama dingin a ke dinglam chu a khai kang ta va mai le! Kutbeng thawm a ring kher mai. Hrui thlun tawp a thlen a, a lehlam dawhsana a lawnkai chiah phei chuan lawm avanga kut beng leh au ri a ri chhuak nghal hluah hluah a.

            Mahse, chu hmun, Mansfield, Pensylvannia-a a hlawhtlinna ropui tak avanga lawmpuina au thawm karah chuan mipu ite chuan lungngaihna leh lainatna ruk tak an nei theuh a. A chhan chu kum 21 a upa, Angel Wallenda-i chuan kum thum pawh tling lova cancer avanga zaipui a tawh tum lina a tawng zo hlim deuh hlawt a ni a. Tuna a hrui zawh hi a damchhunga mipui hmaa a inlan hnuhnun ber a ni thei tlat a ni. En nawm a zawh hnua Angel leh Steve te nupa in hlim taka autograph ziak leh duhsaktu te chibai chhang let a an hmanhlel lai chuan tam tak te rilruah zawhna pakhat a cham reng mai: “Engtin nge he nu, naupang tak mai hian hun thim tak a hmachhawn mek chu huaisen leh hlim taka a hmachhawn theih tlat le?” tih chu.

Angel Wallenda

            Kum engemawzat liam ta kha chuan Angel Wallanda-i hi khawvel dang daiha cheng, mi dang daih a ni. Elizabeth Pintye (pen-tya tia lam tur), tih hmingpu in 20^th March, 1968 khan a lo piang a. An unau hi pasarih niin, an chhungkua in chutih hunlaia Communist sawrkar awpna hnuaia awm, Hungary ram chu tlansanin, New York khawpui hmar lam daifemah an khawsa a. Pintye in chhung khur chu hlauhna leh inrikrapna-in a khat a ni ber mai. Nitin deuhthaw hi Lizzie (an koh duatna) pa chu a hnathawhna atangin a faten engemaw tak tih sual an neih rinna nen thinrim teuh chung hian a lo haw a. Engmah tihsual an nei lo chung pawhin a din tlar tir a, an kut dawh tir in, a mal te te in a fate chu a kawnghren in an kutphahah a hlap a, na tih avanga an tah hma chu a hlap ta thin a ni.

            Angel-i chuan a lo len deuh hnua a pa in chhuata thut beta a tah hma zawng a hmaia a hlap thin te chu a theihnghilh thei lo. A chang chuan a nu, hrisel lo tak chuan a pasal chu a fate chunga zahngai hram turin han ngen ve thin bawk mahse, chutia a fate thlavang a lo hauh ve deuh apiang chuan nilengin pindanah te a kalh hnan thin bawk si a, a fate chu lainat eng ang mahse a chhan tha ngam bawk si lo. Chutiang chhungkua teh hrepa cheng leh seilian an nih avangin a tawpah chuan thuneitute beng a thleng a, Angeli te unau chu thuneitu ten an inchhung ata chu lachhuakin, fahrah leh naupang rethei te enkawl leh chhawmdawltu pawl pakhat hnenah an hlan ta a. Kum thum a tlin chuan Angeli chu John leh Pat Wilson te nupa, New York-a cheng te chuan an kianga cheng turin an hruai ta a. Mahse, thla 18 lek Wilson chhungkaw kianga a chen hnuah Angeli chu thuneitute chuan an la let leh a. Wilson chhungkaw zinga a chen chhung chu rei lo hle mahse, Angeli chuan a theihnghilh thei lo: “An damchhung zawnga hmangaihna nena enkawl leh hmangaihtu zinga hun hmang tan chuan chhungkaw mal, Wilson chhungkua chauh pawhin mihring nuna danglamna an thlen nasat theih zia hi an hrefiah ve ngai lovang,” a ti hial a ni.

            Hun reilo te chhunga hmangaihna leh duhsakna tlem a dawn ve ringawt pawh chuan Angeli thinlung leh nun chu khawvel hautak tak a hmachhawn leh zel naah chakna nasa takin a thuam zui ta a. Chu ai mah chuan duh duha pawh kawi leh tihnawmnah-a awm kumkhua a tum lohna ruh tak chuan chhelna leh tumruhna nasa zawk a pe zel a. A unaunu Anna, ani aia thla 11 leka upa pawhin a pa in an unaua a hlap chang pawha Angeli tah ve duh ngai loh thu leh chumi avanga midang zawng aia vuak leh hlap a tawrh nasat phah thin thu a sawi hial a ni.

            Kum nga mi lek a nih laia a nu leh pa kianga a chen laiin Angeli chuan bualin-a inkalh hnanin milem bu a en mial mial a. Chutih lai chuan a sirah chuan hmeichhe pakhat kawrfual var vek ha hi a rawn ding ta thut mai a. Angeli chuan chu a thil hmuh chu, “Thil khu var chum chum ang mai hi a ni a. A ke ler atanga a chip thlengin ngun takin ka en a, ka mit chu nghet takin ka chhing leh a,” tiin a sawi. Chu hmeichhia chuan eng thu mah a sawi lo. Mahse, Angeli chuan chu hmeichhia, a bula a lo din lai chuan hahdamna leh thlamuanna mak tak mai, a la hriat leh tawn ngai reng reng loh a nei ta tlat mai. A mit a’n men leh chuan chu hmeichhia chu a lo awm tawh lo. Angeli chuan, “Ka damchhunga a vawikhat nan hlutna leh danglamna tak nei, naupang chumchiap, tumahin an kianga awm tur pawha an duh loh satliah ringawt ni lova inhriatna ka nei ta a. Tun hnuah hian van atanga min veng a, min awmpui tura an rawn tirh vantirhkoh (guardian angel) a nih ka ring ta tlat a ni,” tiin a sawi.

            Angel-i chuan chhungkaw hrang hrang kianga enkawlna chi hran hran hnuaia a awm kual laia engmah hmasawnna nei lova a awm reng chuan a nun a chhe vek dawn tih a hrechiang ta hle a. Chuvang chuan a hmakhua chu amah ngeiin sial leh siam tumin a phak tawkah theihtawp a chhuah ve tan ta a. Thuawih, tawrhchhel leh taimak te zirin, a chenna chhungkua chu eng ang mi pawh nise, naupang hlim leh mahni ke-a din tum tlatna rilru nen a nunkawng siam tumin rilru a siam ta a. Chu chuan amah enkawtu chhungkaw tam tak chu a hneh hle thin reng a ni.

            Chutih rual chuan vawi tam tak Angeli chu a laizawn leh nuta te nen fahrah enkawlna in atang chuan an tlanbo fo thin bawk a. A chang phei chuan kar khat aia rei mah rawl bo daih chang te an nei thin. Ramhnuaiah buk te sa chawpin kawng dunga mi thil paih te chhar a, ei tur bangnawi te khawmin hun an hmang thin a. Tum tam tak manchhuah niin, thuneitu leh police ten fahrah enkawlna ina an dah let leh chang pawh a awm fo thin. Chutianga tih a chin tak fo avang chuan Angeli chu a tawpah a pa hnenah dah kir a ni leh ta a. Tunah erawh chuan a lo lung fing ve ta deuh bawk a ni ang, a pa hremna pumpelh dan kawng hrang hrang a dap chhuak zung zung ta mai- hmun biru taka zana riah bo te, nilenga in ram tawh leh in ruaka tawm bo te a ching ta viau mai a.

            Angeli chu hrehawmna nasa takin a hrual fip tawh a ni bawk a, a tuar pawh a chhel sawt ta hle mai. An thenawmnu Mary Ellen Mihalchik chuan hetiang hian a sawi: “Lizzie ka hmuh hmasak ber chuan kum 14 bawr vel a niin ka hria. A hmai chu nasa taka vuak a nih avangin a duk chur mai a. Ka faten kan inah rawn hruaiin a rawn leng a. Chutiang na hrahawm tak tuar chung si chuan biak a nuamin, hrehawm ti hmel pawh a pu miah lova. Puitling han kawm te chu nuam a tiin, a nun chu a hahdam tlat thung si,” tiin.

            Chutiang khawpa nun hrehawm leh hahthlak kara seilian a ni chung chuan Lizzie chuan amah tiduhdahtu leh tina tu te chu a haw let ngai tlat lo. A pa ngei ngei pawh chu huat zuina reng reng a nei lova, “ Ka pa khan hmangaihna a dawn ngai loh avangin midang te hmangaih awmzia hi a hriat ka ring lova, chumi avanga khatiang taka kan unau chunga che thin kha a nih ka ring,” tiin a khawngaih let hlauh thin zawk a ni.

            Kum 16 a tlinah pawh Lizzie chuan ngaihzawng a la nei mumal lova. Mahse, a chang chuan engtik ni emaw a pasal neih a, fate neih ve chu a suangtuah ve fo thin. Mihalchiks chhungkua in an kianga cheng ve tura an sawm hnuah Lizzie chuan Mohegan Lake, New York-a Dipper Dan Ice Cream Shoppe ah hna a hmu ve ta a. Thahnemngai takin darkar rei tak tak hna a thawk a, a thawh chhuah chhun ang ang te chu nakina a dinhmun siam nan tiin a khawl ve hram hram thin a ni.

            Dipper Dan a a thawh hnu re ivak lovah chuan Lizzie chuan zing tin dawrah chuan pa pakhat awm khawmuang ziah thin chu a hre ta a. “Coffee a lei a, pawisa kir ka pek lai chuan chiang zet hian min lo en thin a. A tawpah chuan amah chu zawh chian mai tha in ka hre ta a ni,” tiin a sawi. Chu pa nen chuan thian tha kawmin an inkawm zui ta a. Mahse, Lizzie chuan chu pa in a melh danah chuan thil danglam engemaw awm tlatin a hre zui ta zel tho va.

            Chumi ni chawhnu lamah chuan Lizzie chuan a thawhna dawr epa shopping centre pakhat parking lot a mi engemaw zat pung khawm chu a hmu a. Enge thil awmzia chian tuma a va kal chuan mipui pung khawm chung lam sang taka mi pakhat hrui thlun zawh chu a han hmu a. A’n enchain chuan chu pa chu Dipper Dan a a hmuh leh a biak ngei kha a ni tih a hre ta a.

            A kianga nu pakhat ding hnenah chuan, “Khi pa khi tunge ni?,” tiin a zawt a. Chu nu chuan, “Wallenda chhungkaw zinga mi a nih khi,” tiin a lo chhang a. Liziie chuan, “Enge Wallenda chu?,” tiin a zawt let a.

            Chu pa chu Steven Wallenda a ni. Steven chu Wallenda chhungkua, kum 200 aia tam mah vansanga ennawm entira chetla thin chhungkaw thlah kal zela mi a ni a. Pa sa tha nelh nawlh, mit meng fiah leh dum kak mai leh nui sang reng mai a ni. Steve hian sang taka hrui thlun zawm hi vawi engemaw zat a lo zawh chhuak tawh thin a. Chung zingah chuan Victoria Falls a zawh chhuah te, “Race to Death” tia an vuah, motor pahnih, darkar khata 100km a chaka tlan laia hrui thlun a zawhchhuah te chu mi hriat a hlawhna langsar zual te an ni. Kum tam tak chhung chu Wallanda chhungkua hi Ringling Brothers leh Barnum & Bailey Circus a mipui hiptu ber an ni thin a. Kum 1978 ah khan an chhungkaw zinga mi Karl Wallenda chu San Juan, Puerto Rico-a inchhawng, chhawng sawma sang inkara hruithlun a zawhnaah chesualin a lo boral phah tawh nghe nghe a  ni.

            Steve pawh hi kum thum a nih atanga hrui zawha ennawm chhuahnaa lo chetla tawh a ni a. Circus performers chhungkua an nihna hian an nunah nghawng a nei thui hle a, midangin tih ena an en loh pawh hi anni chhungkua hi chuan eng teh vakah an ngai lem lo. Thawk khat lai phei chu Steve te chhungkua hian Circus-a an hman thin sakeibaknei khawi fin rual pawh an chenpui tawh a ni!

            Hemi ni a Mohegan Lake a hrui a zawh chhuah hnu hian Steve chuan thlirtu mipui zing atang chuan hrui a zawh leh tura amah zui tura inpe thei an awm leh awm loh a’n zawt a. Chutah chuan a ni, Dipper Dan-a hnathawk tleirawl hmeltha takin a mit a lak tanna chu. Steve chuan Lizzie chu hawihhawm takin a’n sawm a, Lizzie pawh chuan phur takin a lo pawm ve mai a. Hrui a zawh pui hma chuan Steve chuan tih dan tur tlangpui chu a’n hrilh zung zung tak na a, Lizzie chuan a huphurh kher mai. “ Enge ka tih chiah pawh ka in hrethiam lo. Mahse, sang taka hrui thlun han zawh vel chu ka chak tlat mai a ni,” tiin a sawi. A pheikhawk bun chu phelhin, Steve-a darah chuan a vuan a, hrui chu an zawh tan ta a. Lizzie chuan,”Steve ka vawn chhung chu ka chesual dawn lo tih ka inhre mai. A chhan chu amah kha a rinawmin a nghet em em a ni,” tiin a sawi. Hemi nia an intawn hi Steve leh Lizzie tan chuan an nuna hun pawimawh ber te zinga mi a ni zui ta. Steve chuan, “Lizzie ka tawn rual khan ka nupui a ni dawn tih hi ka chiang nghal a ni,” a ti. Chutih lai chuan Lizzie chuan chutiang rilru erawh a lo pu ve lem lova. A rilrua awm chu, “Hetianga hrui thlun zawh hi zir ve ta ila, mite tan ennawm ropui tak ka siam ve thei ngei ngei ang,” tih chiah chu a ni!

            An intawn ni atang chuan Steve leh Angeli te chu an inkawp zui ta chawt a. Steve chuan, “A fingin hmeichhe hlim thei tak a ni a. Chubakah, ani tluka hrehawm nasa tak tuar chhuak thak khawpa tuarchhel hi ka la tawng ngai lo,” a ti hial a ni. A hnu rei vak lovah Steve chuan Lizzie chu a ruala Jamaica-a ennawm a entir na tur hmuna kal ve tur leh rope walker ni tura a zirna kawnga thil tangkai tak a nih tur thu hrilhin a sawm a. Mahse Lizzie chuan chutiang ram hla taka kal chu a zuam ngang loh avangin Steve a sawmna pawh chu a hnar ta a.

            Mahse, Steve-a kal tur nena an han inthlah chu Lizzie chu a hlim lo ru angreng hle mai. Chutiang hun tha, a hma hun siamna atana pawimawh bawk si a han hnar ta mai chu tisual a inti leh hnuhnawh hle a. Chumi piahlamah chuan Steve-a a ngainatna leh a duhna chu a lo thuk hle tawh a lo ni tih a hriatchhuah phah ta zawk a.

            Steve-a New York-a a lo let leh hnuah chuan an pahnih chuan an inzui chhuak ta fo va. “Lizzie chuan, “Steve kha ka nun bul tan tak tak ka duh zia min hriatthiampui takzet tu ka tawn hmasak ber a ni,” tiin a sawi. Steve pawhin Angel-i chu a nuna Pathianin tel ve tura a rawn pek a nih a ring tlat a. “ Vietnam indona atanga ka lo haw hlim kha chuan zu leh damdawi ruih chiah ka ngaihtuah a.Mahse Angeli, nula naupang tak leh a eng zawnga thil thlir tlat thin ka tawn atang chuan ka nun hi a in letling thawk a ni ber mai,” tiin, zu leh drugs a thlah theihna chhan bulpui ber chu Angeli a nih thu a sawi a ni.

            Thil mak ve deuh chu Angeli chuan kum tling lo a nih avangin Steve-a hnenah chuan a kum dik tak a zep a, kum 21 angin a insawi a. Innei tura an inpuahchah laiin Steve chuan Angeli chu kum 17 lek a la ni tih a han hriat chhuah chuan a rilru a buai hle a. Angeli pa chu telephone-a bia in a fanu chu circus performer a nih tawh thu leh nupui atana neih a duh thu leh a remtih leh remtih loh a va zawt a. Angeli pa, a fanu nena kum hnih chuang inbe tawh ngai lo chuan eng atan mah Angeli chu a tih tawh loh thu in a lo chhang a. Angeli’n a pa thusawi a hriat chuan a nui mai a. “Nun thar bul tan tura kawng ka zawh mek hi ka lawm em em a ni,” a ti sam et a.

Hlimni kawl eng...

Angel, Steve Jr & Steve

            Kum 1985, August thlaah chuan Elizabeth Pintye chu Angel Wallenda a lo ni ta. An inneih atang chuan Angeli chuan a pasal Steve-a rope walking performna-ah chuan a tawiawm ve ta fo va. Los Angeles khawpuia thla engemaw zat an chen hnuin, Big Bear City khua, Los Angeles atanga darkar hnih vel kala hlaah chuan an pem a. Chutah chuan Steve chuan a nupui Angeli chu rope walking a zirtir tan ta a ni. A tirah chuan metre hnih khat leka sangah hrui thlungin Angeli chuan a zir tan a. A balancing pole 16kgs a rit hmanga kal a thiam hnuah Steve chuan a hrui thlunna chu a ti sang hret hret a. Vawi tam tak Angeli chu a tlu a, mahse hrui thlun chu a kuta vuanin, a ding a, a ti tha leh thin. Vawi khat mah a zir chhung hian leiah a tla ngai lo. A thil zir chu harsa in, hautak hle mahse, Angeli tan chuan hun rei tak ata tawh a neih tawh loh, ‘hlimna’ petu a ni tlat. “Nitinin thil thar, tih dan thar ka zir zel a, chu chuan min tihlim reng mai a ni,” tiin a sawi.

            Chutih lai chuan, thla engemawzat kal ta atang khan Angeli chuan a âwm chhungah chuan nâ a nei thin a. A rei hnu phei chuan a khuh zawng ten thi te a khuh chhuak ta fo mai a. Test hrang hrang te nei a, an in entir hnuah doctor ten Angeli chu a rai thu an hrilh ta a ni. A khuh zawnga thi a khuh chhuah thin pawh chu a chuapa dawt pakhat pawp vang a nih thu leh, a hlauhthawnawm loh thu an hrilh bawk a. Angeli chuan, “Naute chungchang min hrilh avanga ka lawmna piahlama doctor ten hlauthawng lo tura min han hrilh leh zel phei chu ka thla a muang takzet a. Mahse, ka chhungril lamah hian engemaw dik lo chu a awm tih ka hria a ni,” tiin a sawi. Chutia nau a pai tan mek lai chuan Angeli chu tunhmaa hliam na tak a lo tawrh tawh chuan a rawn ti buai chho leh tan ta tlat mai. Kum 11 a nih lai khan, a kerek dinglam chu na takin a lo ti ulh tawh a. Foster home a amah enkawltu nu chuan a nâ chu ti dera puhin doctor pawh a rawn sak duh lova. Chuta tang chuan ke rek na a neih hlen phah ta a. Pawn lamah chuan hliam hmuh tur awm lo mahse, a ke rek hmalamah chuan a rawn pawng chhuak a. A hnu zelah chulai pawng tak chu na lo te a a tauh palh pawhin a na em em ta thin a ni. Rope walking a zirnaah a ke chu a hmang rim lo thei si lova, a nâ lo chhuak thin chu a buaipuiawm tan ta viau mai a. Tin, a khuh pawh a la thi ta fo mai bawk a. Mahse, X-Ray hmanga an en pawhin a âwm leh kerek ah te chuan engmah dik lo an hmu ngai thung si lo.

            An fapa, Steven Wallenda II pian hnu ah pawh chuan natna chuan Angeli chu a ti buai chhunzawm zel a. Rope walking a zirna hautak tak chu thlah duh chuang lovin a chhunzawm reng tho va. Chutih rual chuan thla tam fe chhung chu doctor te a in entir pah reng bawk. Mahse, chuti chung pawhin a natna chu an hmuchhuak thei chuang si lo. A tawpah chuan Angeli dawhtheihna in a tlin ta ngang lo. Thla tam tak chhunga an in entirna lehkha leh damdawi lehkha zawng zawng chu kengin, San Bernardino County Medical Center a emergency room ah chuan a va kal ta rawih mai a. Doctor leh thawktu te hnenah chuan a natna tak an hriatchhuah hma chuan a haw loh tur thu a hrilh ta khawl mai a ni.

            Doctor te chuan Angeli ke rek ah chuan biopsy an la ta a. A result rawn chhuak chu hriat a nuam lo kher mai. Angeli chuan spindle cell cancer (ti mur cancer chi khat) vang tak mai leiomyosarcoma a lo nei reng mai tih an hmuchhuak ta a.  Chu a cancer natna avang chuan kum 1987, August thlaah phei chuan a ke dinglam chu a khup hnuai chiahah an tan sak ta hial a. Physiotherapy la a, ke lem nena kal a zir a ngai ta. Thla engemawzat chhung ke lem nena kal a zir chhung chuan Angeli chuan engtin nge rope walking a tih leh theih dan tur ni ang tih ringawt chu mut mawh hnar mawhah a nei a. Tumahin ke lem nen rope walking an la ti ngai lo tih pawh a hria. Mahse, chumi avang chuan a tumna erawh a sawh sawn duh chuang miah thung lo.

Hrui zawh lamah a let leh ta...

            A ke an tan sak atanga thla li a ral leh chuan Angeli chu mihring piang tawh tumahin an la tih ngai loh ti turin a inpeih ta. Hrui thlun hnuaiah chuan a pasal Steve chuan thin phu dep depin a lo thlir a. Angeli chuan a ke lem nen chuan a zawh tan ta. “Hrui zawh tur chuan rilru leh ngaihtuahna zawng zawng sawr bing a ngai nasa hle a. Ka ke ni lovin, ka mit chu hrui atanga ka tlak leh tlak loh hril tu a ni tiin keimah leh keimah ka infuih char char a ni,” a ti. Hrui thlun chu harsatna awm lovin a zawh chhuak ta. Cancer dam leh Angeli chuan mihring te la tih theih ngai loh chu a ti ta!

            Mahse, chumi zan chuan Angeli âwm chhung nâ chu a rawn chhuak leh a, thâwk harsa a ti ta hial a. Rang taka damdawiina tlanpui niin, a chuap chuan hna a lo thawk mumal tawh lo tih an hmuchhuak a. Damdawiin atanga a chhuah hnu, kar thum hnuah chutiang bawk chuan awm lehin damdawiin panpui leh a ni a. Chuta tang chuan damdawiin lian zawk, City of Hope Medical Center ah phur phei niin, test hrang hrang an han ti leh ta a. Chuta chuan Angeli chuan chuap cancer a nei tih an hmuchhuak leh ta. Doctor te chuan Angeli chuap veilam hmun khat leh a chanve zet chu an paih sak a. Chu mai pawh chu a la tawk lo. Thla thum hnuah a chuap dinglam thenkhat pawh paih sak a ni leh ta a ni.

                Kar engemaw zah chhung chu in enkawl a ngai leh ta. Angeli tan chuan hrehawm thuah hnih a tuar a ni ber mai. A cancer natna avanga a na tawrh chu kawng khat nise, a fapa leh a pasal te enkawl thei lova khumbeta a na leh ta chuan a rilru a kap nasa in, hrehawm a ti takzet a ni.

            Doctor te chuan Angeli leh Steve te hnenah chuan chemotherapy hmanga enkawl a nih chuan a cancer tai darh zel tur ven theihna chance 40-50% vel a awm mai theih thu te, a taksa chuan a chauh phah tur thu leh chutih ruala, chutiang dinhmun atanga damchhuak leh te pawh an awm thu te an hrilh a. Chutia an sawi lai mek chuan Angeli chuan, “Tuna in sawi zawng zawng kha engmah ka la lovang,” a rawn ti ta bur mai. Doctor chu lawmthu hrilh pahin Angeli chuan, “He hmun hi chhuahsanin kan inah ka haw ang a, hlim takin ka nun ka hmang ang,” a ti ta a.

            Angeli duh ang ngei chuan enkawlna pawh la zui lovin in lamah an haw ta a. An chhungkaw eizawnna rope walking pawh chu Steve chuan a chhunzawm leh a. An fapa Steve Wallenda II pawh chu a kal theih tirh atangin rope walking chu zirtir in, kum li a tlin phei chuan a pa ennawm chhuahna hmunah te a kal a kal ve tawh a ni. Chutih rualin Angeli chuan a fapa chu rei tak a dampui tawh loh tur thu a hrilh thin a. “Tlang takin ka hrilh a, tichuan zawhna a neih te ka chhan sak thin. Pathian leh vanram chungchang te ka hrilh thin a. Zawi zawiin a hrethiam ve hret hret zel,” tiin a sawi.

            A ni tel in Angeli chu a chak lo ve tial tial a. Eng chen nge a dam ang? Chu zawhna chu Angeli chuan doctor te chu vawi khat mah a zawt ngai lo mai ni lovin, hrilh an tum pawhin a ngaithla duh ngai lo. “ Mi zawng zawng hian an hma huna an thil tawn tur te hi hre lawk vek ta se, khawvel buai dan tur hi i ngaihtuah ngai em? Ka hringnun hi ka theihna leh chakna in a tlin chhung chu nuam ti takin ka hmang dawn a ni,” a ti mai thin. Chutiang taka thinlung paukhauh a neih theihna chhan chu a naupan laia a thil tawn leh tawrh chhuah te vang a nih thu Angeli chuan a sawi thin a. “Ka naupan lai khan duat taka min enkawltu te karah lo seilian ni ila chuan, tuna ka chunga thleng te hi ka tuar chhuak zo lo tawp ang,” tiin a sawi thin.

            Natna khuma a mut laia Angeli rilru luah reng thin tu chu a naupan laia inlarna a hmuh kha a ni a. Kha a thil tawn avang khan thlamuanna leh midang te aia danglam bik nia a inhriat thin thu sawiin, “Kha ka thil tawn khan Pathianah rinna min nghah tir bakah, vawiin thlengin inrintawkna min pe a. Engkim hi ka hrethiamin ka hmuthiam vek bik lo. Mahse, thil reng reng hi a nih tur ang takin, a hun takah a rawn in her chhuak zel thin a ni tih hi ka ringhlel ngai lo,” tiin a sawi a ni.

Cancer natna avanga a dam loh hnuah Angeli leh a pasal Steve te chu an inthen a. Pasal dang nei lehin fanu a hring leh a. 3^rd May, 1996 ah kum 28 mi niin, Angel Wallenda, a naupan lai atanga chhungkaw kehchhia in a nghawng tha lo zawng zawng tuar chhuak a, cancer natna vawi hnih a tawrh avanga a ke ding lam leh a chuap tam zawk a hloh chung pawha hnual ngai lo chuan hlim takin a lei hringnun chu a mangtha ta a ni. (A Reader’s Digest adaptation by the Author)