Krista leh Kohhran tan

Krista leh Kohhran tan

Lal Isuan he khawvel a chhuahsan dawna a zirtirte hnena mawhphurhna a pek, vawiin thlenga thupek ropui (the great commission) tia Kan Kohhran pui pawhin innghahna pawimawh tak atana a hmang angin, tun tum chu midang thusawi ropui tak lachhawngin in chipnawi dawn teh ang.

Nikum MTKP Day zan inkhawm kha ni ta in ka hria. Kan Unit TKP Senior Adviser, Upa C. Laldintluanga’n thuchah a sawi a. Chumi tum chuan a chunga thupuia kan hman, ‘Krista leh Kohhran tan’ tih thu khi thuhmaah tlem a rawn sawi lang a. Chuta a thusawiah chuan TKP te hian ‘Krista tan’a rawngbawl leh thahnem han ngaih hi chu kan harsat vak lo, mahse ‘Kohhran tan’ hian Krista tana thahnem kan ngaih ang hian thahnem kan ngai lo fo thin tih thu a sawi a, rilruah thu a sawi thui khawp mai.

Ni e, TKP te hi khawi kohhranah pawh nise, kohhran kut ke pawimawh ber, kohhran timawitu leh tihmelhemtu ber leh kohhran than zelna atana FOD pawimawh ber pawh a ni ti ila kan sawi sual lutukin ka ring lo. Kan hmalakna pawh a tam, sum lah kan thawkchhuak hnem, kan thawm lah a na! A tawi zawngin kohhran ti kohhran tu kan ni te han ti duah ila, BMP leh BKHP ho beng kan tithlep em lovang chu! Engpawh nise, ka sawi tum tak zawk chu TKP te hi Kohhran tan hian kan pawimawhin, kan hlu em em a ni tih hi a ni. Amaherawhchu, Kohhran hnuaia pawl pakhat anga awm a, kohhran thlazar hnuaia rawngbawl tur kan nih lai hian kan dinchhan ‘Krista leh Kohhran tan’ hian rawng kan bawl em? Sawi tak ang khan, TKP huangchhung, kan tlangnelna, kan thu ve theihna leh kan tuina-ah chuan Krista tana thahnemngai taka ke pen a, hma lak hi TKP member piangthar, a kul a taia inhmang te tan chuan thil har a nih loh thu chu sawi loh, a nuam em em zawk awm e. Mahse, Krista taksa, he leia a rawngbawlna chhunzawm tura thlarauva a din leh a hmangaih em em, a ‘Kohhran’ tan hian tha kan thawhin, TKP member te hian thahnem kan ngai ve em? TKP anga Krista tana ke pen leh hmalak phur em em TKP member te hian Krista tana Kohhran anga thahnemngai taka ke pen a hunah hian thatho takin mite ke pen rual hian ke kan pen ve thei em le?

BC 650 na bawr vel laia Greece ram bung khat Sparta-a cheng, hnam huaisen leh ralbeih thiam hmingthang Spartan ho inkaihhruai dan kha han en lawk teh ang. Spartan society, khawtlang inrelbawlna chu sipai inrelbawlna (militarist administration) anga kalpui a ni a. An khawtlang nun, chhungkaw in enkawl dan leh naupang an chawilen dan thlengin ‘sipai’ tura enkawl an ni tawp mai a ni. Spartan mipa naute lo piangchhuak reng reng chu an pianhlimah an khawtlang hruaitu, Upa thlan bik ten uluk takin an en a, a pianto that leh that loh te, a hrisel leh hrisel loh te leh kawng hrang hranga ngun taka an zirchian hnuah hrisel tawk lo leh chak tawk lova an ngaihte chu Mount Taygetos tlang pangah thi turin an kalsan hmiah mai thin a ni. Naute hrisel tha nia an hriatte chu uluk takin an naupanlai atanga enkawl chhoh an ni a, ziak leh chhiar an thiamtir bak, a dang zawng chu ral bei tura inzirna leh inbuatsaih nan hun an hmantir thin. An hmeichhia te pawh mipa te anga inhrualna hautak tak tak paltlang ve lo mahse, an khawtlang tana an theihna zawng zawng hlan tur leh inpe tura nikhua an hriathlim atanga zirtir leh kaihhruai an ni bawk. Chutiang tak chu Spartan society inkaihhruai leh inthunun dan chu a nih tlat avangin tumahin khawtlang kalphung leh inrelbawl dan chu an duhloh zawng pawh awm se, roreltu ten tul an tih loh chuan kam khat pawh an sawizui ngam lova. Mahse, ral laka khua leh tui te venhim a tul hunah erawh chuan an nun thapin an penchhuak leh thung thin a ni.

Spartan ho chanchin atang hian TKP te hian zir tur pawimawh tak kan nei. KNP a chawm seilen, TKP thanhnan leh thisena Kohhran zungzam intuh tawh TKP member chu engtikawng mahin Kohhran lakah hian a hel thei lova, Kohhran do zawng leh kalh zawngin a khawsa thei lo. A ‘duh loh’ avanga thei lo ni lovin, a ‘theih loh’ avanga thei lo zawk a ni! Eng anga ral lu la tam, huaisen leh kawlhsen pawh ni rawh se, Spartan mipa a nih chhung chuan an khawtlang inkaihhruaina chunga leng tumah an awm lo. Tunlai khawvelah hian TKP member te zingah thiamna lama sang tak tak te, thluak tha tak tak te pawh an kat ve ta nuk mai. Chung ang TKP member te chu Kohhran leh TKP te tan chhenfakawm tak an nih theih laiin, rawngbawlnaa thahnem ngaih luat avang tho si hian Kohhran leh TKP tan an hnawksak ve thei tlat tho nia! Rawngbawlna nia kan ngaih reng laia Kohhrani’n rem hrih lo tia kan hmalakna min lo dan chang te a awm hian, hruaitu leh member thenkhat, kohhran hruaitu te sawisel leh tawng hial duh te hi tunlaiah chuan kan awm tawh tlat a ni. TKP member te hian hei hi i hria ang u. Kohhran hi ‘Krista leh Kohhran’ tan tia TKP puanzar hnuaia thahnemngai taka rawng kan bawl ve theina tur atana kan naupanlai atanga min lo chhawm a, thlarau nun kawnga min lo enkawl seiliantu a ni tih hi.

Tin, kan thutiam “Krista leh Kohhran tan’ tih hi TKP kan over hunah hlei hlei kan rawngbawlna kawng khalh ngiltu atan hian a la pawimawh dawn. Engvangin maw? TKP member kan nih lai chuan TKP huangchhung hi kan vawk lal lenna, kan ngaihtuahna leh tha leh zung te senga kan rawngbawlna hmun a ni. Mahse, kum 40 kan kai hunah erawh inla TKP viau mahla, an khual en du tawh mai ang che! Chutih hunah chuan Kohhran rawngbawltu/Upa, a nih loh vek pawhin BMP/BKHP lamah a khaipa i ni tawh ang a, i nih loh vek pawhin i kumin chu lam rawngbawlna kawng lamah chuan a hnuklut tawh dawn tho tho che a ni. Chutih hunah chuan a dintu leh neitu, Krista aia Kohhran i ruihchilh a, Krista tel lova Kohhran tana thahnem i ngaih rum rut ringawt mai chuan i rawngbawlna khan zung a kai nghet ngai lovang. Chuvangin, ka TKP member pui te u, Krista tan chauh ni lo leh Kohhran tan mai pawh ni lovin ‘Krista leh Kohhran’ tan hian a ral dopui turin kan TKP lai leh theihna kan neih lai hian Lalber sipai, ‘Kristian Spartan’ nih ngei i tum ang u hmiang!