Dawn ni lovin pek lam zawk a ni!

Dawn ni lovin pek lam zawk a ni!

             Thufingah chuan ‘hun leh tuilianin tumah a nghak lo’ tih a ni. Kan tunlai khawvel buai leh hmanhmawh lutuk, mitin mai mahni zawn zawna kan phet buai nuai nuai na khawvelah hi chuan tumah han inngaihsak leh innghak hman pawh kan awm ta meuh lo chu a ni e! Hun a hlut tawhzia te han thlir phei hi chuan tuilian pawh hian hun hi a umpha tawh lo hial zawk ang a tih tur khawpin hun leh ni hi a ral chakin a liam zung zung ta mai chu a nih hi!

             Thal khawro leh nipui ni vanglaiten min em chauh hnep hnuah leh fur ruahtui leh thlipui ten min nuai fep hnua, favang hun thengthaw nuam leh thawveng takin min han chhem harh sawng sawng hnu chuan Kristiante hunpui, a bikin Mizote tan phei chuan kan chin chhuah leh kan hnam ta bil emaw tih mai tur khawpa kan nghahhlelh leh urlawk ‘Krismas’ hun lawmawm chu thlasik khaw vawt vin tuk mai leh boruak thiang hit var maite chuan an rawn chawi thleng leh dawn ta reng mai. December thla laihawl kan han thleng leh ang a, mitin mai, a neinung ber atanga khawtlang chhawmdawl ngai khawpa khawsak harsa te thlengin kum pui lingleta kan lo thawhchhuah ve chhun te te te nen khawpui lamah krismas bazaar turin kan insulpel leh suau suau ang a. Kohhran te leh thlarau miten thlarau boruak nuam tak nena hman tumin ‘rau’ leh ‘rau lo’ an hmufiah leh hle ang a. Chutih laiin a huaikawm bawlho chi lahin hun dang zawng aia ‘nikhualoh’ tumin nawmsip chitin reng bawl dan tur an lo hisap lawk nasa leh tawh ngei ang le! Thingtlang lama mite an nikhualoh dan a changkang lo deuh ang a, khawpuia mite an nikhualo changkang hret ang a; a ni leh ringawt ang! Engpawh chu nise, Krismas a ni miau alawm le!

            Kan Pathian thu sawi thinte leh ziakmite pawhin kan hnamin Krismas kan hmuahdan leh hman dan/ hman tum dan te hian ‘Krismas’ awmzia tak tak a phawkchhuah zawh loh thu an tlangaupui fo tawh. Ni, hla pawh kan tui poh leh kan nawn zing ting mai a, rilrua vei a len poh leh thildang ngaihtuah a har mai a ni. Chuvangin he thupui bawk hi I’n khelin I’n chipnawi lehpek teh ang.

            Krismas hmasa ber a lo thlen theihna tura bul tanna chu ‘pek(give)’ a ni. Johana 3:16 ah chiang takin kan hmu. Krismas lawmtu hmasa te pawhin krismas hmasa bera nausen chibai an buk khan thilpek an pe bawk a nih kha. Tin, khang thilpek petu mifing te leh berampute pawh kha Krismas hmasa ber hmanpui tura Pathianin Mari leh Josefa te a pek ti pawhin kan sawi thei bawk ang.

            I ngaihtuah ve ngai em? Krismas hi a nihna takah chuan dawn hun ni lovin pek hun (a time for giving and not for getting) a ni zawk tih hi. Krismas pawh hi Pathian min ‘pek’ a ni a. Isua pawh kha min ‘pek’ a ni. Krismas hmasa ber hmangtu te pawh khan ‘thilpek’ pein krismas an hmang a nih kha.

            Thil thar kan lei, kan nei, a tha e. Eitur tuihnai ber ber nen kan intuituah a, a lawmawm. Mitinin he hun a lo thlen hi chuan engemaw tak neih thar/ dawn thar kan nei ziah thin, khawvel hmun tina tihdan a ni a, a pawina a awm lem lo. Mahse kan Krismas lawm dan leh hmuah dan en hian ‘Krismas’ tak tak hi kan hmang meuh ang em le? Chawhmeh awm lova mi chaweipui tum ang lek hi kan ni mai lo maw? Krismas min hmanpui tur hian kan Lal Isua hi lo kal ta thut se Mizote zingah hian a hawihai nasa ber mai lovang maw? Mizo thufing pawhin ‘Dawn aiin pekin lukhawng a nei zawk’ a lo ti mathlawn lovin Krismas-a kan inhaivura kan intuituah thur thur hian eng lukhawng leh hamthatna ropui nge maw min hnutchhiah thin chuan le? Kum a thar ang a, fate sikul luhna, ba rulhna etc tur pawisa zawngin thenkhat chu kan vak kual leh du du tho awm si a!

            Chutih rual chuan Mizote zingah pawh nachang hria kan pung ve zel a. Mimal, thian leh pawlho angtea Krismas thilpek sem te, tanpui ngaite tanpui te kan uar chho ve ta zel a, a lawmawm takzet. Sum ka nei lo a ni thei, midangte tanpui turin ka neihin a tlin ve lo I ti maw? Krismas tuka I thenawmpa I chawhmeh neih ang ang I suah te, thenawm hnaia lengkuala Krismas chibai sem ringawt te kha thilpek ropui tak, mite thinlung tilawm theitu a ni tih te hi I ngaihtuah ve ngai em? Mi pangngai I nih chuan Krismas petu che Pathian hnena lawmthu sawi thilpek pek let ve te kha Krismas awmzia chu a nia sin! Mitin mai hian Krismas a lo hnaih hian midangte hnenah, kan chhhungkhat laina te emaw, mi hrang emaw pawh nise, engemaw tal pek tum ran hian lo inpuahchah thin ta ila, eng ang takin Krismas hi nuam ang maw le!

            Krismas hi ‘pek hun’ a ni, thilpek atanga intan a ni si a. Thilpek chu tupawhin engtik lai pawhin lawm takin kan dawng thei. Chutiang bawkin midangte leh Krismas min petu Pathian ngei pawh hian lawm takin nangmah ang tho khan thilpek hi an dawng theiin an dawng chak asin. Krismas a lo thleng leh dawn ta- pe la, dawng rawh le!