The Titanic Syndrome

                                                  The Titanic Syndrome

            April 10, 1912 Kawl rawn eng chuan England khaw pakhat Southampton lawng chawlhhmuna mipui zi luih luihte chu a ti helhhawlh zualin chu zing ni chhuak chu chulaia mite leh English mipuite mai pawh nilo, khawvelin beiseina nen nghakhlel taka a lo thlir reng chu a ni.He ni, April 10,1912 hian khawvel chanchina hming dai tawh ngailo tur lawng ropui leh a hunlai phei chuan khawvela lawng lian leh changkang ber, RMS TITANIC chuan a vawikhatna atan a zinkawng a zawh tan dawn a ni.

            Fehrehsan hun awm velah chuan chu lawng ropuia zinkawng zawh tur, a hunlaia mi hausa leh chu lawnga chuang zinga hausa ber J.J.Astor-a te atanga in leh lo pawh nei mumal lo, chu lawng chhawng hnuaihnung bera chuangte lawng khawl tut ri ruai ruai karah chuan duhthawh takin an chhungkhat laina, anmahni rawn thlahtute chu lawng bathlar atang chuan an vai lawp lawp a,he khawvela an inthen hlenna leh an invailiam tawpna a ni dawn tih hria se zawng,an theihtawpin an invaitawn ngei ang.Titanic chuan a tumhmun New York pan turin tuifinriat cham put maiah chuan a tawlhchhuak ta.

            Chu lawng lian leh ropui, a satu White Star Line leh Harland and Wolff Shipping Company te pawhin an chuan em em, pil theilo tura an duan leh ngaih avanga ‘Pathian meuh pawhin a tipil thei loving(Even God cannot sink this)’ ti hiala an sawi Titanic lawng ropui chuan zinkawng a zawh vawikhatnaah vurtlang suin April 15,1912 zinglam 2:40AM-ah khualzin 1500 chuangte chu New York lam thlenpui lovin Atlantic tuifinriat mawnglam a thlenpui ta thung tlat mai.He chhiatna rapthlak taka damchhuak khualzin 3000 chuang zinga mi 708 te leh lawngin chhiatna a tawhdan chhuichhiangtu ten ngaihdan thuhmun an neih lian tak pakhat leh Titanic-in chhiat a tawh nachhan lian tak pakhata an ngaih chu “Titanic Syndrome” hi a ni.

            Titanic lawng captain E.J.Smith kha lawng leh tuipuia zin lamah chuan tawnhriat ngah berte zinga mi, kum 40 chuang tuipuia lo chetla tawh  niin a hnuhma ropui takte avanga Titanic lawng captain tura rawih pawh a  ni reng a.Titanic lawngin New York a thlen ruala chawl(Pension) tum tawh a ni.Captain Smith-a khan midangte ang bawkin Titanic lawng ropuinaah khan a rinna a nghat lutuk pawh a nit a ve ang, lawng chu a pangngai aia chaka kaltirin 22 knots-a chakin vurtlang hlauhawm a awm thu hriattirna  adawng chung pawhin a kaltir a.Titanic lawng ropuina leh him tawk, pil theilo nia a ngaihna chuan a chung hrilhlawkna zozaite pawh chu a ngaihpawimawh tir lot lat mai..Chubakah, a hunlaia khualzin phur lawngten an ken ngei ngei thin enhlatna(binoculars) pawh an keng lova, tin,chhanchhuahna lawng pawh a khualzin phurh hmun thuma thena hmun khat chauh phur thei tawk an pai bawk.Heng zawng zawng hian khawvel chanchin leh maritime(Tuipuil am) history-ah phei chuan dai tawh ngailo tur chhiatna rapthlak a rawn thlen ta a.Chu lawng ropuina leh rintlak nia an hriat avanga an fimkhur lohna, inthlahdahna leh chu lawng an chuan luattuk avanga an chapona chu ‘The Titanic Syndrome’, khawvel chhiatna rapthlak berte zinga mi thlentu an tih chu a lo nit a a ni.

            Zawlnei Eliza pawh kha he ‘Titanic Syndrome’ avang hian a buai hle a ni tih kan hmu.Pathian tana a lo thawh ve tawhnate, a hnuhma ropui takte leh thil ropui a lo tih ve tawhte chhuangin Pathian a chhal ve ngawt mai a, Lalpa channa chu kan hriat kha! Titanic lawng captain pawh kha tawnhriat ngah tawh tak leh hun hlauhawm leh tuipuia harsatna khirhkhan tak tak lo paltlang tawh thin a ni a, mahse chung zawngza wngte leh a chuan leh rin em em, Titanic lawng chuan a thihna ata a chhanhim zo chuang lo.Keini Lalpa rawngbawltu inti vet e hian enge kan chhuana kan lo ‘Confi’ pui ve thin le? Kan Pathian thu chuan ‘A chhuang apiangin Lalpa chu chhuang rawh se’ tiin min hrilh a.TKP-a kan lo tel rei ve tawhnate, OB,Executive committee member, zaipawl member,conductor etc hun rei tak kan lo nih tawh avang hian kan lo chapovin mi bulah insawitheihnan taka hmana, inthlan a lo hun pawha tlak theih inring ngailo hial khawpa chapo kan lo ni reng tawh mai em? Nge thiamna leh sum leh pai hmachhuana Lalpa aia mahni thiamna leh sanna hmachhuan zawk kan lo ni? Pawl member/hruaitu lo nihrei tawh leh kalhmang hria intihtawk tawhna atanga pawl hruai kan tum a,Pathian aia mahni duhdan leh ngaihdan dahlala, Pathian aia chawimawina dawn tum rawngbawltute hi ‘Titanic Synrome’ natna veite chu an ni. Titanic lawng ropuia mi hausate kha an sum leh pain a chhanhim lova,tawnhriat ngah Captain E.J.Smith meuh pawhin chhiatna lak ata he Titanic Syndrome, chu lawnga rinna nghah luattuk avang chuan a chhanhim zo hek lo.Keini pawh kan rawngbawlnaah hian chuan tur dik,rinna nghahna tur dik leh behchhan tur dik tak behchhana rawng kan bawlloh chuan kan chuan ve lai tak, kan inrintawk vena leh tawnhriat ngah kan intih ve tawhna te hi sualin kan chhandamna lawng a rawn sut pawp theihna nem lai a lo chang their eng mai.Mi eiloh kan hlawh ang a,mahni tha inti em em siin kan rawngbawlna a nung ngai loving a, kan thlarau nun a bawksawp telh telh bawk dawn a ni.He Titanic Syndrome natna hi nang rawngbawltu khan I vei ve em le?