Reel Life leh Real Life

Cyberpsychologists te chuan internetin kan nun kil tin min luhchhuah tawhna khawvelah hi chuan mihring hian nun chi hnih kan nei a, pakhat chu kan nun tak tak zawk, real life, kan nihna dik tak lan chhuahtir thintu leh kan lanchhuahna thin hi a ni a, pakhat zawk chu kan suangtuahna leh nun duhthusam anga kan in lantirna leh kan in tar chhuah thinna, reel life hi a ni tiin an sawi thin a. Hei hi a dik thui hle in a lang.

Kan tobul, kan rawn pianchhuahna leh chawr chhuahna chhungkua te, kan nu leh pa leh u leh nau atana Pathianin min pek te ah hian a tha emaw, a chhia emaw, duh kan thlang thei lova. Tin, kan hrisel leh hrisel lovah te, kan rawn seilenna chhungkaw retheih leh hausak thu-ah te pawh duhthlan theihna kan nei lova. Chu ti ang zelin, nitin nuna kan hmaa harsatna leh lawmna rawn inher chhuah dan thu-ah te, a tawi zawngin, hringnun tak tak (real life) a kan hun tawn leh dinhmun tam takah te hi chuan a duangtu in kan chan tura a duan leh a ruahman ang ang te hi a nih ang anga kan dawnsawn a, kan hmachhawn a, kan pal chhuah a ngai thin a. Chu chu nun tak tak, real life nihphung leh awmzia dik tak pawh a ni a, chu chu kan khawvel pakhat zawk chu a ni. Chu tih lai chuan, sawi tawh ang khan, changkanna leh hmasawnna thang chak tak chuan mihring te hi khawvel pakhat dang min rawn dinsak a ni ber mai a, chu chu kan duhthusam khawvel, kan suangtuahna leh kan duh dan ang taka kan nunna hmun, kan nihna bak leh kan nihna ni miah lo thleng pawha kan khawsakna leh intarlanna hmun, reel life khawvel a ni. He khawvelah hi chuan, mi tu te pawh hian kan nihna, kan in tarlan dan, kan in phochhuah dan, a tawi zawngin, kan hringnun chu kan duh dan danin kan din a, kan sawngbawl a, kan thiat leh a, kan siksawi kual vel thin. Chu khawvel chu kan khaikhawm dawn chuan social media khawvel hi a ni ti te pawhin sawi ta ila, a fun kim viau tho awm e. Heng khawvel chi hnihah hian nun pakhat aia tam kan nei thei ta tlat mai a, kan nun tak zawk leh dik tak zawk (real life) a kan neih theih loh leh neih phak loh tur te thlengin kan suangtuah hringnun, kan duhaisam hringnunah chuan kan inpe in, kan nei thei ta thin a. A eng zawk nge kan nun dik tak zawk pawh hriat hran leh thliar hran harsa khawpin kan real life leh reel life te chu a inchawhpawlh kual vek ta vek mai thin a nih hi!

Entirna ang deuhin ka hmelhriat te chanchin han sawi lang lawk ta ila. An hming chu sawi lang lo ila, pa pakhat chu kohhran upa a ni a, an kohhrana an upa senior leh tangkai ber te zinga mi a ni nghe nghe. Chu pa chuan zirtirtu hna a thawk thin a (tunah chuan a chawl ve tawh a), nupui fanau neiin, a nitin hna leh chhungkuaa a mawhphurhna te piahlamah filmah a chang thin bawk a. A channa filmah te hian kohhran upa lemah a chang ngai lo mai pawh ni lovin, chu mi letling chiah zawk chuan, a changin politician corrupt tak lemah te, a changin patling, kawppui nei reng chunga leplerh tak lemah te a chang thin a. Tum khat chu kan titi dun tumin, kohhran upa ni chunga a nihna ni miah lo mai pawh ni lo, kohhran upa tana chan mawi lo lek lek thei hial khawpa filma role a play thin chungchang chu zawtin, amahin engnge a ngaihdan tih te, a nupui fanaute leh kohhran pawhin engnge an ngaihdan tih te thlengin ka zawt a. Chu ta min chhanna chu, ‘reel life leh real life thliar hran thiam hi a pawimawh,’ tih hi a ni a, he article ka ziahchhuah takna chhan pawh hi a ni. Ani ang bawk hian, kan thiannu pakhat chu nula hmeltha tak, film chan lah hnehsawh em em mai a ni a. A nun dik tak chu ruihhlo laka fihlim, mipat-hmeichhiatnaa sawi kaina pakhat mah nei lo, kohhran leh kohhran thalaia inhmang em em mai, bial zaipawl leh ram pum huap zaipawl thlenga tel tura thlan khawpa ni nun thianghlim leh fel a ni. Mahse, film (a reel life)ah chuan, hmeichhe lepchiah leh sihhnip zet lemah te, call girl lemah te changin, a channa scene thenkhat phei chu sexy tak tak te pawh a awm fo mai! Mahse, ani pawh hian a real life leh reel life chu fel takin a thliar hrang thiam a, reel life-a a nun dan avanga real life-a a tlakchhiat phah tak emaw, a reel life avanga miten an zuam tak sawt leh an hmuh nikhua loh phah tak thawm reng reng ka hre lo. Chu tak chu mi tam tak hi chuan kan thiam ta thin lova, kan nun duhaisam chu kan nun tak tak emaw tiin, pha leh pha lova nun phet kan tum a, kan sum leh dinhmunin a tlin lova, kan mizia nen a inmil lova, a tak rama kan nihna dik tak ni ta lo na na na chu dawtin kan nun kan hmang a ni ta ber mai thin a. A lem na na na chu ziktluak thei hek lo le…a tawpah kan nun dik tak (real life) miten an hmu in, an han hre chhuak a, kan suangtuah leh duhaisam nun (reel life) nen a lo inang ta thin si lova, kan reel life chuan kan real life chu rawn vaw chhia in, kan nihna leh dinhmun dik tak aia hniam fe ah kan tlak thlak phah ta thin a ni.

Kan insawi tui ta sa sa…han sawi belh leh lawk teh ang! Khawvel lal ropui sawi apianga sawi hmaih ngai loh, Alexander-Ropuia (Alexander the Great) kha pa lian lem lo tak a ni a, a san zawngah hian historian te sawi dan a inang lo na in, 5 ‘6’ ft atanga 5’9’ft inkar vel ni a ngaih a ni a, Mizo pa ni ta se, palian ti a kan chhiar tur te zinga mi a ni kherin a rinawm lo. Mahse, Alexander khan, a pa, King Phillip thah a nih avangin, kum 20 mi lek a la nih laiin, a duh vang reng pawh ni lovin, a hunlaia lalram lian leh chak te zinga mi, Macedonia ram lalthutthleng a rawn luah a. Lalthutthleng a luah hnua ram a lak dan, Greece, Egypt, Persia leh India ram thleng pawha a lalram a rawn zauh dan chu khawvelin a hriat lar a ni. Heti taka lalram zau luah tur hian Alexander tan khan huaisen leh sipai chak tha tak neih mai kha a tawk lova, fin a ngai a, phakar tel a ngai te pawh ti ila kan sawi uar lutuk em lovang chu! Ram hrang hranga hnam hrang hrang chunga roreltu a ni tih kha a hre chiang a, ani pawh khan tuna nun chi hnih kan sawi, reel life leh real life kha thiam takin a hmang kawp tlat mai a, kha kha lalram ropui leh zau lutuk mai a lak theihna chhan leh ro a rel theihna chhan kha a ni tih hi historian tam tak ten an sawi dan zuk ni tlat a! Entirna atan, Macedonians ho kha chuan an lal te kha chu ti tehchiamin an voh hran lova, lal pawh nise, a sipaite zingah zu in in, mi pangngai nun dan angin a khawsa a, Macedonians ten lal ropui an tih chu ral hrat leh ral rel thiam, indona muala a sipai te hmaa ding a, hmahruai thintu kha a ni a, thuam ropui tak leh lallukhum khuma lalthutthlenga chhiahhlawh te hual vela thu ang kha Macedonian lal te nun dan phung leh mipui ten an beisei dan a ni lova, Alexander ngei pawh kha chu ti ang chuan a nung ngai lo reng a ni. Mahse, Persia lal ram la a, a han awp tan khan, Persian lal te kha chu an lo in ti lal em em mai a lo ni a, a tawi zawngin, hmasang chanchin behchhana siam filma an lal te khawsak dan leh inchei dan kan hmuh ang deuh chiah chiah kha an lo ni tlat mai a. Chu mai chu ni lovin, nupui pakhat aia tam an neih bakah, hmei za tel an la nei cheu bawk a. Alexander khan, chu ti anga in chhek arbawm chiam chu a duh hauh lo nachungin, Persian mipui te zah kai lal a nih dawn chuan an duhaisam leh suangtuahnaa lal anga a inlan tir a ngai tih a hria a, Persian mite hmaah chuan rangkachak leh lunghlua cheimawi lal thuam te inbelin, hmei pawh za tel a kawl a, a tu amah a mutpui ngai lo thung a, Persian mipui ten an lal lo hrawn tawh leh hmuh tawh thin te aia ropui zawka an ngaih ngei tura inlan tir ngei ngei kha a tum a ni a, Persian mite hmuh loh liamah chuan a thuam ropui te chu hlipin, a nun dan dik takin a nung leh mai thin. Tin, Egypt lal ram run a, a awp te khan, a hmaa Persian lal ten an pathian lim te leh an temple te dim baksak lova suasamin, an pathian te an zahsak lova, kha vang khan, Egypt mite khan an haw em em mai a. Chu chu hre ranin, Alexander kha chuan Egyptian te sakhuana leh an Pathian te kha a zahdersak tlat a, an sakhaw puithiam te pawh dinhmun sang takah dahin, an temple-ah te a inthawi hial a, hetia a tih hian Egyptians te chuan an ngaisangin, a lamah an tang dawn tih a hre chiang a, an sakhaw serh leh sang a khawih avang hian an sakhua chu bia in a va zui chuang hauh lova, a sakhaw vawn dik tak, Macedonian te sakhaw zui leh pathian te kha a thlah chuang reng reng lo. A thui lutuk dawn…Alexander pawh khan hmasang khawvelah khan a reel life leh real life kha a thliar hrang thiam tlat mai a, kha kha lalram zau tak a lak leh awp theihna thuruk chu a ni tlat a ni.

Kan reel life leh real life hi kan thliar hrang ve thiam em le?