Hringnun Hamrik

 

Nizan chu youtube-ah Holy Biblea Daniela te thianza ho chanchin, AI hmanga animated film an siam ka en a, a thawnthu kalhmang leh kan hmuh tur te a hriat lawk sa vak nachungin, ka rin aiin ka en tui zek mai a. Ka muthilh hnuah ka mangphan zui nge maw ni dawn ni, Lal Nebukadnezar ang deuh khan, mang lamah hringnun hamrik tih article hi ka lo ziak a (thlarau lama sang deuh mi phei chu ni ila, chung lam min pek ti pawhin ka sawi ve hial mahna!), ka han thanharh chuan, ka rilru leh mitthlaah ka article ziah chu chiang fahran hian ka la hre vek mai a, chu chu a tak ngeia ziah chhuah tha in ka hre ta a, ka han thailang ve hrim hrim dawn a ni.

Hringnun hi football khelmual angah hian chan ta ila…kan hriat theuh angin, khelmual chhunga inkhel thiam mi 22 te hian, savun mum an inchuh a ni satliah ringawt lova, awmze neiin, dan leh dun fel tak hnuaiah, inchuh dan phung tur fel tak duan sa hnuaiah leh thir ban leh a kham ding inkara pet luh a, hnehna chan theih dan tur inkaihhruaina fel tak awm sa hnuaiah an inkhel a, an inkhel pumpui chu hamrik hamtu in a hamrik hmangin a enkawl a, a nihna takah chuan, inkhel thiam te inkhel chu hamrikin a thunun/hamrik hmanga thunun a ni tihna a nih ber chu. Inkhelh tan dawnah hamrik hamtu chuan a hamrik chu a han ham a, inkhelh tan a ni a, hamrik a rik hma chuan mahni thu a lo inkhelh tan ve ngawt theih a ni lo. Inkhelh tan hnuah khelmual chhunga inkhel te chuan hnehna chan ngei tumin, an thiamna, theihna leh chakna zawng zawng chhuahin theihtawpin an khel a, hun tawp hamrik a rik huna hnehtu zawk nih ngei tumin thapui chhuahin an inbei a ni. An inkhelh lai chuan, an inkhelh dan tura dan duan sa an zawm loh apiangin hamrik hamtu chuan a hamrik chu a rawn ham thin a, hamrik a rik veleh inkhel chu tihtawp a ni a, hamrik hamtu-in a ham leh veleh an khel tan leh thei chauh zel a. Hamrik a rik tawh chuan, eng ang pawhin goalah va khung mahse, awmzia a nei lova, pawm a ni hek lo. Eng ang pawha tlan laklawhin, eng anga dinhmun thaah pawh ding se, a hamtu-in a hamrik a ham rik tuarh tawh chuan, eng ti kawng zawng pawhin inkhel chu tihtawp lailawk tur a ni tawp mai a, laklawh a sawi theih loh va, arpa chan lai chhuanlam a thiang lova, hamrik a rik rual chuan inkhel chu tih tawp lailawk tur a ni tawp mai a ni. Chu mai chu a la ni lo, hamrikin an inkhel a thunun a ni tih haider lui emaw, theihnghilh palh emaw, runluih avang emawa che mawi lo deuh te phei chuan hamrik hamtu hnen atang chuan vaukhanna (yellow card) an dawng a, chu ta la che over zual te phei chu khelmual atanga hnawh chhuah (red carded) an ni tawh mai thin. Chung zawng zawng chu hamrik hamtu-in inkhel a tan theih tih hriattirna atana hamrik a ham rik atanga inkhel a tawp ta tih hriattirna atana hamrik a ham rik inkar leh chhunga thleng vek a ni a. Mahni duh thu leh phur avang ngawta hamrik ham hmaa inkhel a tan theih loh ang chiahin, mahni duh hun huna inkhel tawpsan leh chawlhsan ngawt a thiang lova, eng ang pawha chau leh peih tawh lo pawh nise, a hamtu-in hun tawp hriattirna hamrik a ham hma chuan khelh a ngai a ni tawp mai a, hamrik hamtu thu leh hamrik ri pawisa lova, mahni thu-a khelmual chhuahsan te chu vaukhanna leh hnawhchhuahna (yellow card/red card) hmanga hrem an ni a, an tan khelmuala awm ve zel emaw, luh leh emaw a rem tawh lova, an tan chuan inkhel a tawp a ni nghal der mai a ni. He khelmual chhunga hamrik hamtu leh a hamrik pawimawhzia hi nizan chuan ka mumangah ka hmu a ni ber ang chu!

Hringnunah hian, nang leh kei hi kan duh leh chak vanga lo awm leh lo chhuak ve kan ni satliah ringawt lova, tin, kan duh hun taka rawn awm ve emaw, kan duh loh lai leh inpeih loh lai taka rawn chhuak ve ringawt kan ni lo bawk. He hringnun kawng zawh tura min dahtu hi a awm a, chu chu kan hringnunah hian a thu em em mai a, hringnun khelmuala lut tur leh hringnun inkhelhnaa tel tura min duh hunah tak a hamrik chu hamin, he khawvela hringnun khelmualah hian kan rawn lut ve ta a ni a, kan duhthlanna a tel lova, hamrik hamtu-in inkhel tura a hamrik ham a, min tirh luh hun hunah, tu te mai pawh hian, he hringnun khelmual chhung hi kan rawn rap ta a ni. Chu khelmual chhungah chuan, football khelmuala inkhel thin te ang bawk khan, kan duhna lam hawi zawng zawnga kan hringnun chu khalh kual vel min phalsak a, football player te zingah pawh ball thiam bik te, pet goal thei bik te, a goal tur lo dang tur te, mual laia ball sem tur…a tawi zawngin, kawng hrang hranga khelmual chhunga inkhel thiam ten, awmna hmun leh khelhna hmun bik hrang hrang neia an inkhel thin angin, chu hringnun khelmualah pawh chuan, kan thiam dan danin kan hringnun chu kan han khalh kual vel ta a. Mi thenkhat, hringnun ball khalh thiam bik te, thenkhat thiam lutuk lo te, thenkhat vanneih avanga goal thun mial te, thenkhat erawh an thawhrim leh thiam vang liau liauva goal hlawhchhuak leh thun te…kawng hrang hrangin, kan thiam leh theih dan dana kan hringnun ball chu hringnun khelmual chhunga khalh kual a, pet a, vawrh a, inchuh a, kan goal theuha pet lut turin hamrik hamtu chuan min dah ta a. Mahse, football khel te pawh an thiam thil, chakna leh theihna te lantir phalsak an nih ruala, dan leh dun, inkaihhruaina felfai tak hnuaia chung an theihna leh thiamna te chu lantir phalsak chauh an ni ang chiah leh, dan pela an kal chuan vaukhanna leh hnawhchhuah thlenga hrem an ni thin ang khan, kan hringnun khelmuala mahni tanghma hai a, mahni goal theuh va pet luh tuma hringnun ball kan inchuh luih luihnaah chuan, hamrik hamtu chuan uluk takin kan inkhel chu a lo thlir reng a, kan tihsual chang te, at kan so chang te, dan kan bawhpelh dawn te leh kan bawhpelh chang te, hre reng chunga kan tih luih leh hriat loh emaw, theihnghilh palh avanga kan tihsual chang apiangin a hamrik chu a rawn ham a, hringnun khelmuala kan inkhel chu kan tawp lailawk a tul chang a awm thin. Chu chu, kan eizawnna kawnga a ni emaw, midangte nen kan nunhona kawngah a ni emaw, kan nitin nunah hian a rawn thleng fo thin a. A chang chuan kan duh ngawih ngawih, kan neih a rem loh changte a awm a, kan chak ngawih ngawih aia kan thlan loh zawk thlan a tul zawk tlat changte pawh a awm fo bawk a. Chu chuan kan thin a ti rim a, kan hnual a, kan rilru te a ti na thin. Mahse, hamrik hamtu-in a hamrik a rawn ham miau chuan, tih theih kan nei lova, kan tih theih awm chhun chu, lungawi lo chung chung te, phur lo chung chung leh chak lo chung chung pawha hringnun khelmuala kan inkhelhna chhunzawm leh mai chu a ni. Chu ti anga hamrik hamtu thu ngai pawimawh lo leh pawisa duh lo te chu na taka vaukhanna te kan tawk ta thin a, a chang phei chuan hringnun khelmual atanga hnawhchhuah kan tawk a, tu khaw kha hriat loh vin hringnun khawvelah hian kan tam ral zui thin. Chu chu hamrik hamtu min thunun dan chu a ni miau mai si a, kan duh dan leh ngaihdan hian kawngro a su thui tehchiam lova, hamrik hamtu thu pawisa duh lo tan chuan khelmual chhungah hmun a awm lova, hun tawp hamrik a rik hmaa hnawhchhuah kan tul/ngai ta thin a. Hringnun khawvela kan dam chen tur dam zo ta lo, a va la hun lo em aw ti vawng vawng chunga kan inthlah liam a tul ta fo thin a ni.

Footballah chuan, goal khung hmasatu nih a pawimawh rual rualin, goal khung tam zawk, huntawp hamrik a rika thun tam zawk nih a pawimawh a, inkhelh tantirha goal thun, chakpui zawh chuan si loh ai chuan, inkhel tawp dawn, hun pek belh, chutah pawh huntawp hamrik a rik hma hreta khung pawh nise, chakna goal a nih chuan a hlu zawk ang chiah hian, kan hringnun khelmuala kan inkhelhnaah pawh hian, kan hringnun ball hi kan chang reng dawn lova, a chang chuan kan elpui ten min chhuhsak ang a, neih let leh ngei tuma thapui thawha kan chuh leh um dawr dawr a ngaih chang te pawh a awm thin a. A changin min pet ang a, a changin min nekthlu ang a, a changin kan inhliamin, hliamin kan awm thin ang a…chung zawng zawngte chu khelmual chhunga thleng palh thei leh kan tawn theih thil vek a ni. Chu ta pawimawh ta ber chu, hun tawp ham rik a rik hma chuan, tha thlah lova beih hram hram a, kan duh ang leh beisei anga thil a kal lo a nih pawha beidawng lova tan tlat a, kan tluk pawh a thawh leh a, na chung chung pawha hun tawp ham rik a rik ruala hnehna changtute zinga tel ngei tura a seha kan seh tlat hi a ni a. He hringnun khelmual hi, khelmuala min dahtu-in hun tawp hamrik a ham hma chuan bansan ngawt theih leh chhuahsan ngawt theih a ni si lova, kan chhuahsan duh a nih chuan, let leh lo tura chhuahsan a, mahni inhnawhchhuah (mahni nunna lak) ngawt mai loh chu kawng dang a vang nasa mai si a, chu vang chuan, hringnun khelmualah hian theihtawp chhuahin tang tlat ila, bei fat fat ila, hun tawp hamrik rualin hnehna kan chang mial mahna le!

Kan inkhel zawng zawng, kan che vel zawng zawng, kan tawngkam te thlengin leh kan elpui zawng zawngte thlengin, hamrik hamtu chuan a hamrik nen uluk takin min vil reng a, dan lova kan elpui ten min beih vaih chuan min chhan tura a hamrik ham ri tuarh turin a inpeih reng a ni tih hre reng ila, chu mi tur erawh chuan, keimahni hian hamrik hamtu dan kenkawh kan pawisak reng erawh a tul tih kan hriat thung a pawimawh awm e.