Kha Tlangval kha!

Kha tlangval mawlh mai kha! Tunlai na nâ ná chu Mizo tlangval te zinga mite ngaihven leh khawngaih hlawh ber a nih loh vék pawhin, ngaihven leh khawngaih hlawh ber te zinga mi chu a ni ngei ang.

Kha tlangval kha, a hma chuan ka hre ngai lova (tunah pawh chu ti takin ka hre chiang chuang lo), keimah ang tho hi mi tam zawk chu in nih ve tho ka ring. Kha tlangval kha, kha mi zanah ngei pawh khan tu khaw khá in an hre lova, an ngaihven hek lo. A bianga mittui luang a hru zauh zauh te pawh kha a tam zawk chuan kan hmu lova, kan hre hek lo. A hre ber tur leh hmu chiang ber tur chu a bul hnaia ding te kha an nih ngei ka ring a, mahse, kha tlangval chauh kha kha mi zana mittui tla a ni lova, tin, mittui tla awm chhun pawh lo ni ta tehreng se, a bula mite ngei pawh khan chu ti tehchiamin an khùkpui ka ring hran lém lo. Mahse, kha tlangval kha, tun dinhmunah chuan Mizo tlangval azawnga 'luck' ber a ni ta dér mai a, a pui a pang, a tar a zurin kan ngaihven a, kan khawngaih a, kan lainat a, a tan sum kan thehkhawm ta ruih ruih mai a nih hi! Ni e, Saituala KTP General Conference atanga Zoramin kan hriat lar tâk, kha tlangval ngei mai kha a ni ka sawi ni.

Kha tlangval chanchin kha ka hre thui lova, tin, sawi thui pawh ngai lovin kan hre vek tawh a,  chu bakah, ka sawi tum ber, kha tlangval chungchang atanga ka rilrua lo lut a ni hran lo bawk a, ka sawi thui lo mai ang e.

Kha tlangval atanga ka thu dawn (mi hlim te tawngkam hawhin!) chu hei hi a ni. An khawsak a harsa hle a, a incheina, thawmhnaw leh pheikhawk te thlenga a thiante ta hawh chawpin leh, a inhlawhna atanga a sum thawhchhuah ang ang pawh General Conference-a a kal ve theihna atana kháwlin, KTP khawmpui lianah a rawn kal ve ta a nih kha. Zoramin kha tlangval kan lainatna leh khawngaihna phénah khan, kan kristianna-in a ken tel leh kan kristiannaa bet tlat tawh, tha ka tih loh em em chu tharthawhin a rawn awm leh ta tlat mai a, chu chu INCHEINA chungchang bawk hi a ni.

Eng vangin nge kha tlangval kha a thawmhnaw neih ang anga KTP General Conference-a a kal ngam tlat loh va, a thiante thawmhnaw hial hawh chawp a ngaih tih hian ka ngaihtuahna a ti thui hle mai. Hemi chungchangah hi chuan, chanchin tha min rawn thlensaktu, kan zosap missionary hmasa te kha ka dem lo thei lo.

Chanchintha min rawn hrilhtu sap missionary te hnathawh kha a pâwng a takin ka sawisel lova, han sawisel chi rual lah a ni hek lo. Mahse, kan hnama chanchin tha in zung nghet tak a kaih theihna atana kan rilru puthmang leh sukthlek min thlaksak nasa lutuk hi chu a rilrunatthlak hle in ka hria. Kan ramah Kristianna an rawn  pu lut a, chu mi rual chiah chuan kan kárah khi an rawn siam tlat mai a. Chanchin tha êngin an thinlung a tih var hmasak te pawh kha  Isua ringtu emaw, Mizo kristian emaw ti a koh duhtawk mai lovin, a la ring ve lo te nena hriat hran nalh theih turin, 'ringtu' leh 'ring lo mi' ah min han then hrang phawt a. Hei hi chu eng pawh lo ni ta se, an incheina zawng zawng an thlaksak a, khawthlang ram leh hnama an incheina zulzuiin an han inchei tir a, kawng engkimah ring lo mite nena hriathran an nih theihna atan kan zosap missionary te khan ringtu hmasa te kha nihna (identity) thar an siamsak a ni ringawt mai a, vawiin thlengin chu chu nghet takin kan la chhawm nung ta zel mai si a, kan Pathian biakna hmun te, kan inkhawmpui lian te chu, mi harsa zawk te tana tel ve leh kal ve huphurhawm khawpin kan siam zo ta vek mai a, chu chu kha tlangval harsatna chiah leh tun hnua kan lainat rawn ták em emna chhan pawh hi a ni.

Hman deuh khan, University of Oxford archives-a an thlalak hlui te he universitya Ph.d zirlai, ka hnam dang thiannu pakhat ka zawn tir a, ka inthawn tir chiam mai a. Chu tah chuan, zosap missionary ten Mizo ring thar hmasa te thla an laksak te pawh an lo la vawng tha khiau mai a. Chung thlalakah te pawh chuan, an incheina leh inchei dan atang ringawt pawhin 'ringtu' leh 'ring lo mi' chu an hriat hran nghal hliah hliah thei zu nia!

Ka thil tawn pakhat han sawi lawk teh ang. University of Hyderabada Masters kan zir lai khan, Mizo inkhawmnaah kan batch kha hla rem turin min ruat a. Hostela awm theuh kan ni a, a tu a te room mah kha min dawl zo khawp room lian a awm loh avangin, kan campus chhunga hmun fianrial deuh laiah, zanah kawng sirah, street light éng hnuaiah hla kan zir thin a. Zan khat chu, kan hla zirna lamah chuan kan Universitya zir ve tho, international exchange students te zinga mi, American zirlai pathum leh German zirlai pakhat te chu an cycle nen an rawn tlan tlang a. Part kima hla kan zai thap thap mai chuan an beng a verh deuh ni tur a ni...kan hla zirnaah chuan tel ve min rawn dil a, kan tel tir ve a. A tûk leh zana kan zirnaah pawh an pali bawk chuan an rawn kal leh a, hmeichhe pathum leh mipa pakhat an ni. Pathianni-a kan hla rem huna min rawn tawiawm turin tawngkam tha in kan sawm a, an phùr hle a, an rawn kal tak tak erawh kan ring lém lo. Mahse, Pathianni-a kan hla remnaah chuan an pali chuan an rawn inkhawm ve ta tak tak tlat mai! Hyderabad khaw lum vanglai, 40*C chung lama inkhawm kan ni chungin, keini Mizo ho chu mipate kameez leh necktie nen, kan nulate pawh 'chawlhni kawr' leh puan bih chungin, thlan tla hluamin kan inchei hram hram a, anni, kan hnam dang thian te erawh chu a then kawr bah nen, a then kekawr bul nen an rawn inkhawm a, smart shoes leh pencil heels te chu khawilamah...a nuam ti ti ah an la tang zui a! An zinga mipa awm chhun hi American missionary nupa fapa a lo ni a, class khata kan thut ho bawk avangin, USA lama an inkhawm dan phung te zawtin, a hnuah pawh kan titi dun ta fo va. Anni ramah chuan (youtube ah pawh hmuh tur a tam tawh) a hranpa in Pathian bia-a inkhawm tura incheina hranpa an nei ve lem lova, an 'in awm kawr' nen pawha an inkhawm mai thin thu a sawi a. Tun hnua youtube-a ka'n en leh pawh hian, khu lama an pastor te chuan jeans kekawr leh t shirt nen te Biakinah sermon an lo sawi 'mai mai' a, pastor tattoo nei pawh an tam khawp mai!

Ka tawnhriat pakhat ka'n sawi leh lawk teh ang. Shillonga lehkha kan zir lai khan, kâr tin, ningani tlai dar 3.30ah Biakinah thalai inkhawm kan nei thin a, member tam zawk kha zirlai, nitina class kal ngai kan nih vang te pawh a ni ang...ningani tlai thalai inkhawmah chuan zirna ina kan kalna thawmhnaw leh ipte nen kan tlang nghal mai a, a awlsam chu thuhran nise, kan inkhawm a urhsun loh phah hran lova, Biakin kan tih zahawm lohna pawh a awm lo a ni chêk a ni ang chu, kohhran hruaitute pawhin min khak ngai lém lo. Kei ngei pawh, thalai pawla secretary ka nih angin, t shirt leh jeans kekawr nen lecturn atangin thu ka puang ve lauh lauh thin!

Ka sawi duh tak zawk chu, Pathian be tura kan inkhawm hian, duhdah takin i inchei ang u ka ti lova, chu tih rualin, a hranpa hlaka inchei ngaia Pathian biak kan ngai tlat mai hi chu her rem a tha lo maw ka ti a ni. Hnam hrang hrangte Pathian biak inkhawmnaah hian ka lo tel ve nual tawh a, Mizote tluka a mi nawlpui anga inchei nasa leh inchei uluk hi ka hmuh ve phâk chinah chuan ka la hmu lo. Pathian hi chibai kan bûk hautak ta lutuk deuh lo maw, mi harsa zawk leh dinhmun harsa zawk te hi kan incheina hmang hian kan lo dál ru reng thei ang em tih hi a ni kha tlangval chanchin leh a behbawm ka han hriat a ka thu dawn chu ni!

Kha tlangval kha Pathian zarah dam se, 2028 a Champhaia KTP General Conference neih leh hunah chuan, a thiante incheina hawh chawp ngai lo chu thuhran, Conferencea kal tura thawmhnaw thar lei lovin, a neih ang ang inbelin kal leh ngei se, TV ah lo hmu leh ngeu bawk ila ti a duh thu sám pahin, duhsakna ka'n hlán ve ngawt teh ang!