Eng tin nge ka tanpui theih ang che?

            Netflix online streaming site-ah hian serial film pakhat, New Amsterdam tih hi ka en a. A tirah tak chuan, a storyline summary vel ka’n chhiar chuan ka hmuhnawm tih tur chi ni-a ka hriat loh avangin ka peh hel kual a, thil dang ka en kual ka en kual thin a. Tun krismas boruak chhovah khan a dang ka en mek ho ka en zawh tawh hlawm avang leh company lamin min rawn recoomend sek avangin ka’n en ve ta poh a, a inchhirawm loh viau mai. A thawnthu kal hmang chu he ti ang deuh hi a ni. New York khawpuia sawrkar enkawl hospital pakhat-a Hospital Board chuan Medical Director thar atan thalai mawng zang leh viak tha tak mai (a hmel en chuan kum 40-45 vel niin a lang) Dr. Max Goodwin chu an ruat thar a. Medical Director thar chuan a hna a zawm tirh a hospital staff te inhmuhkhawmna a neihpui hmasak berah hospital-a lung lam zai leh enkawltu ber, cardiology departmenta doctor thawk zawng zawng te chu a bo a bang awm lovin a ban fai nghal phiar mai! Chu mai chu a la ni lo. An hospital mai pawh ni lo, khawvel pum huap pawh a cancer enkawltu doctor thiam bik, chu tih ruala hospitala dam lo te enkawl aia hmun hrang hranga thusawi a zin kual thin leh an hospital vawrh lartu ber, an oncologist chhuanvawr, tumahin an thunun ngam ngai loh, Dr. Helen Sharpe meuh pawh a zin chhuak tur lo changin, darkar 48 chhunga a rawn let leh a nih loh chuan rawn let tawh lo law law turin a hrilh hmiah mai bawk!  A chhan chu hei hi a ni. Dr. Maxa’n Medical Director ni tura hospital a zawm hma hian he hospital, New York khawpuia sawrkar enkawl hospital lian berah hian eirukna a nasa em em mai a, thawktu te an zelthelin, doctor te pawhin an dam lo enkawl te chu sum siamna atan an hmang a ni ber a, hospitala thawktu te inthlahdah avanga dam lo boral an tam em em mai bawk a. Hospital board lahin hospital chu dam lo te damna lam ai chuan mi hausa te sum lakluh a, eisakna remchang atan ringawt an lo hmang bawk nen, engkim mai chu a nih loh dan tur ang hlirin a ni vek ringawt emaw tih mai tur a ni. Chu an kalphung dik lo thui lutuk tawh, siam that ngaihna pawh awm tawh a an hriat loh khawpa an lo thanhnan tawh chu he Medical Director thar, la naupang tak hian thlak danglam tumin a rawn bei chho va, a ngaih pawimawh ber te chu an hospitala dam lo te chu an ni a, a bak, sum, mi pawimawh, sawrkar hotu, hospital board hotu tih angreng te chu eng atan mah a ngai lo. Doctor a ni a, a hna chu dam lo te an dam theihna tura enkawl a ni. A hna chu a hre chiang a, a thawh chhanah a chiang bawk a, a dam lo te bak ngaih pawimawh dang pakhat mah a nei lova, an damna tur a nih dawn phawt chuan khawlaia kutdawh pawh ni se, a thlawn vekin, in enkawlna senso zawng zawng pawh hospitalin a tumsak vek tur pawh a lakluh pawi ti lo khawpa a hna leh a hnathawh chhana chiang a ni. Heti chinah hian a lemchan thawnthu lam chu duhtawk ang, a duh chuan lo en ve mai teh u! He film ka en laia ka rilru-a tla na em em mai leh thil tam tak min ngaihtuah tir tu chu Dr. Max Goodwina tawngkam, dam lo a enkawlna kawngah leh a thawhpui te, a ho te a enkawlna kawnga a hman lar em em, “How can I Help? (Eng tin nge ka tanpui/puih theih ang che?),” tih hi a ni. A hnathawhna pumpuiah he zawhna tawi te hi a in nghahna a ni a, dam lo te eng tin nge ka tanpui theih ang, tanpui ngai te eng tin nge ka tanpui theih ang, ka naute ho hi an mamawhna zawnah eng tin nge ka tanpui theih ang? Midang te tanpui a, an tana malsawmna nih a, a theihna apianga tanpui/puih chu a thupui ber a ni tawp mai a, mi hausa leh rethei a thliar lova, hlauh lah a nei bawk hek lo. A hna chan phah thak dawn pawh ni se, midang te a tanpui avanga hna chan chu pawi tihna reng reng a nei lo.

            A ngai te in kum a lo thar leh ta. Mi tam tak chuan kum hlui aia kan nun kawng leh hnathawhna kawng hrang hranga hmasawn lehzual tur te, sim ngai te sim a, hma lam pana ke pen turin rilu kan siam leh sauh sauh tawh hlawm in ka ring. Chu ti ang a mahni theihna zawn theuh a hmasawn tuma rilru leh thinlung kan in buatsaih lai hian, Dr. Max Goodwina tawngkam, “Eng tin nge ka tanpui/puih theih ang che?” tih hi kan in nghahna bulpui han ni hlauh thei se a va lawmawm dawn em! Zirtirtu hna thawk ka ni a, zirtirtu ka nih angin, zirlai te zirtir chu ka hna a ni a, ka thawh chhan chu zirlai naupang te an ni. Zirlai te, an zirna kawnga tanpui tumna rilru pu miah lo, dan pangngai a class lak a hun a, kum tam tak liam ta a note siam sa pe a, en pawh en mang lova, hriat bel sa han sawi mawp mawp a, zirlai ten an hrethiam em, an hlawkpuiin, an sawtpui em tih pawh ngaihtuah miah lo, an tih chhiat pawh a chaw ei tui loh phah ngai chuang bawk lo, sawrkarin zir hun tur a bituk hun chhungah chuan Sunday school kai kim lawmman lak tum ngawr ngawr avanga Sunday school kai kim ang chiah a zirtir tluan ve thak, zirlai te result chhuah hun aia hlawh lak hun nghakhlel, zirlai ten an zirlai an thiam loh leh an tih chhiat aia hlawh lak hun bi pangngaia hlawh lak loh leh kaisan huna kaisan loh hlau zawk, zirlai bu chiah zirtir a, zirlai te zirtir miah lo leh zirtir tumna pawh nei miah lo, a hna chu ei hmuhna atan chauh va hmang zirtirtu ka nih chuan zirtirtu hna thawk tlak ka ni lova, zirtirtu hna, khawvela hna ropui leh zahawm bera an sawi thin pawh hi thawk turin ka tling lo chhia va tihna a ni. Chu vang chuan alawm, a chunga ka sawi, serial film-a Dr. Max Goodwina tawngkam, “Eng tin nge ka puih theih ang che?” tih khian min deng na hle ka tihna chhan chu!

            Zirtirtu hna thawk ka nih avangin zirtirtu ka nih anga ka thlirna atangin ka han sawi mai a ni a, mahni hna thawh theuhah he zawhna hi nitin, darkar tin, minute tin leh second tin hi han inzawt theuh ziah thin ila chuan, kan ram pawh hian hma a sawn zawt zawtin ka ring hial zu nia! Kut hnathawka ei zawng te pawhin mahni pum puarna atan chauh em ni kan thawh thin? Kan kut kawih a kan thar chhuah, a rah kan hmuh te chu midang te tanpuina atan, midang te tana malsawmna nihna atan kan hmang thin nge, kan kham tawk bak pawh sum a chan tir a, nawmsak ve dan ngawt kan zawng thin le? Nuamsa takin I awm lovang u ka ti lova, mahni chauh in ngaihtuah a, mahni hmasial taka nawmsak tum hian eng hlimna leh lawmna nge min pek tih ka sawi tumna mai zawk a ni. Doctor, an dam lo enkawl te aia damdawi supplytu te ngai pawimawh zawk, dam lo neih tlem aia dam lo an tam poh leh a hlawk tih hria a dam lo ngah dan phet zawng te hi kan awm em? Engineer leh contractor, an in panna kawng phu lova in leh lo nei tha, kawng chhia chu eng atan mah ngai lo, mahni in sak chungchangah erawh duhtui leh kherkhiap viau thung si te kan awm em? Sumdawng, a ei hmuhna chu a mihringpui, amah rawn dawr thintu te an ni tih hre chang lo lek a duham, hlawkna tur ringawt ngaihtuah a a mihringpui te hmel pawh zah zo lo khawpa pamham kan awm em? Sawi dawn chuan a tam lutuk ringawt! A khaikhawmna atan chuan, sawrkar hnathawk, mipui te avanga hna tha tak nei, an hnathawh leh an thawh chhan hre miah lo, midang te tanpui mai aia a harsat theih dan tur ang bera tihsak tum tlat te, sawrkar hna thawk lovah pawh mahni eizawnna leh hnathawhna kawng theuhah, midang te tan eng tin nge ka tangkai theih tih lam ngaihtuah duh miah lo, mahni tanghma chauh hai te, khawtlanga kan nunhona kawngah pawh hlawkna kan tel tur a awm loh va midang te tana a awlsam theih dan tur zawnpui a, tihpui hram hram aia an kawng dal dan tur phet zawng tlat thin te kan awm em? Chu ti ang kan lo awm a nih chuan, kum tin dan in kum a lo thar leh ta bawk a, he kum thar, 2025 ah hi chuan, kan thil tihna leh hnathawhna kawng theuhah ‘”Eng tin nge ka tanpui/puih theih ang che?” tih hi midang te kan dawrna kawnga kan tawngkam hman rim ber lo ni se, kan hnathawh dan phungah pawh chu mi rilru pu reng chung chuan hna thawk theuh ila, kan ram tluka ram nuam tur hi a awm chuang bikin kei ka ring lo.