Fight Fair in a Fair Fight

 

Tunlaiah hian an la ching ngai em chu ka hre lova; kan naupan lai kha chuan he tawngkam, ‘fair fight’ tih te, ‘in fair ila’ tih te kha a lar thei khawp mai a. He thu mal/tawngkam hi Greek tawng emaw, Latin tawng atang emaw-a English tawnga an seng luh a ni nge ni lo kan hre lova, a buai lah kan buai phah ngai hek lo! Mi thiam ten an hrilhfiah leh sawi dan lam in min ti buai lova, mahse, chu ti chung chuan, a tu a mah kha a awmzia hrilhfiah hran kan ngai chuang miah lo bawk. Kha kan panlai khawvela ‘fair’ awmzia te, ‘fair fight’ awmzia te khan tun kan khawvela kan nunphung leh chet phungah hian pawimawhna thuk tak a nei tlatin ka’n hre lehpek a. A hunlaia a hrilhfiahna leh a awmze dik tak hriat tum ngai miah lo khan, tunah hrilhfiah ka’n tum leh hnuhnawh tlat mai te hi a kawnghmang viau pawhin ka hre bik chuang lo! Tun hnua ka’n ngaihtuah let hian, kha fair fight kan hriatthiam dan leh sawifiahna ber (sawi chhuak kher lo mah ila) ni a a ka hriat tak chu tum’a tanpuina/puihna tel lo, mahni theihna leh thiamna chauh hmang a hnehna chan leh hnehtu zawk nih tih hi a ni ta berin ka hria a. Tin ‘fair’ kan tih pawh a thu mal hi a hunlaia kan hman dan leh hriatthiam dan ka ngaihtuah let hian, a phu zawk zawk/a phu berin hnehna a channa tura inbeihna tih hian a hrilhfiah chiang berin ka hre ta bawk.

A chunga (ka) hrilhfiahna khi han en vang vang ta la, khi aia hrilhfiah dan mawi leh nalh, chiang zawk bawk si I hre mai thei. Ka sawi duh lai ber zawk chu, kha tih hun lai a ‘fair’ kan lo tih thin kha a lo ‘fair’ tak tak hle thin mai tih hi a ni a, chu tih rualin, chu mi rual chiah chuan, a tak takah khan kan ‘fair’ ngam tak tak lo deuh zel tih hi rilru-ah a rawn lang tel nghal bawk! A ni lah tak a, sikul kan han kal a, kan pawlah khan a lian deuh te, a kawlhrawng deuh te, chimawm deuh te, ngawichawi deuh te, thinchhia leh zaidam thleng khan kan in pawlh nak thin kha a ni a. Thlahtu thuhmun lo, ze hran, chawr chhuahna leh rilru put hmang pawh inang lo thiau awm khawm ta chu in hmuh mawh nikhua te kha a lo awm lo thei lova, chu ti ang hun a lo thlen a kan buaina leh thu in chuh te chin felna atana kan leklam ber thin chu ‘in fair’ kha a ni. ‘Banah kan in fair ang,’ ‘pumpelh kawngah min lo nghak rawh,’ classroom hnungah banah kan in hmu ang,’ ‘banah I hre khawp ang,’ tih tawngkam chhak chhuah a nih tawh kha chuan ‘in fair/fair fight’ ah an in cho tih kha class pum khan kan hre nghal zel thin a, a pumraw te zawk, a dawih zawk tan phei chuan, tlawm hreh ve tum hrang tawh bawk si nen, class-ah thin a phu dup dup a, sikul ban dar rik kha a huphurhawm nghal tung tawh mai thin. Mahse, mak ve deuh mai chu, he ti anga ‘in fair’ tur te reng reng hian tawiawmtu an nei deuh ziah thin kha a ni a, a in cho va te kha an pahnih chauh vin, midang tumahin an hmuh lova an va ‘in fair’ tak awm reng reng hi ka hre lo (in hre ve hlawm emaw?). A khawi lam ve ve pawh khan tawiawmtu an nei a, a in cho va te kha an han in hmachhawn ta a, tawngkamin an han inbei phawt a, chu mi hnuah kut an thawh ta a. A tirah chuan anmahni tawiawmtu te pawhin an thlir thap a, rei vak lo hnuah erawh an va thelh leh a. A hnu lamah chuan a tu ve ve, a huai zawk leh a dawih zawka te pawhin an tan chhan ni fo chu, ‘Min lo thelh lo se la chuan aw,’ tih hi a ni leh deuh ziah bawk!

Ka han sawi tak duahna chhan chu, kan naupan laia ‘in fair/in fair fight’ boruak leh a kaihhnawih khan hnam pum anga kan rilru puthmang leh rilru chhungril hi a tarlang chiang hle lo maw tih hi ka ngaihtuah ta a ni. Hnathawhnaah a ni emaw, politics-ah a ni emaw, pawl kaihhruaina kawngah a ni emaw, kohhran inrelbawlna, a tawi zawngin, kan nunphung leh nun hona kil tinah hian kha kan naupan laia fair fight rilru kha kan la pu fur em aw ka ti a ni. Tawngkama rinawm tak te hi thil tihah kan rinawm lo fo va, a phu ber te aiin a ‘fair’ vak lo te an dinchan chang te hi a awm fo thin in ka hria. Tin, a bul lamah ‘in fair/fair fight’ awmzia (kan kalpui dan thin) kan sawi tawh a, dikna chu duh, hnehna pawh chan duh, felna leh thianghlimna, rinawmna adt duh leh tha ti vek chung si hian, a saseh tak takah chuan, naupan lai a ‘in fair’ a in cho ten ‘in fair’ tak tak chu kan duh chiah lo/ngam leh chiah lo ang deuh khan, han ‘fair’ tak tak dawnah meuh chuan kan ngam lo/duh leh tak tak thin lo fo em tih hi ka ngaihtuah a ni. A lang thei lamah chuan fair duh thiau kan nih lai hian, a sasehah tak tak kan fair ngam lo leh fo thin a, hei hian puanhnuai thil tam tak a rawn hring chhuak a, in ei lohna, in rin tawn ngam lohna…rilru kawi leh tha lo pu ran chungin, mi dang te thil tha tih leh dikna pawh hmuhsak thei lo lekin kan rilru te hi a piangsual zo ta em ni ka ti a ni. A awmzia berah chuan, ‘fair’ kan tih hi a ‘fair’ tawk em, nge, hriatthiamna leh mahni in thiam chawpna buk lung belhin, ‘fair’ kan tehna leh bukna khai te pawh hi rem leh rem lo, tling leh tling lo chung hian mahni leh mahni kan in teh tling in, kan in buk tling lui hram hram em ni zawk tih te thleng hian ngaihtuah tham tak a ni. Ram leh hnam lungphum hi dikna, rinawmna, felna, thianghlimna adt hmanga phum a nih loh chuan, a lungphum ber a ngheh tawh loh chuan, a lera dik leh that tum viau hian a daih rei tak tak thei ngai lo. Tin, dikna te, felna, te, thatna te hi mahni remchan dan leh mamawh dan mila pawh kawihsawih chi pawh a ni lova,dik chu dik, tha chu tha a ni mai tur a ni a. Dik, tha leh fel kan tih te hi a dikna, thatna leh felna bakah a dikzia, thatzia leh felzia te sawifiah a, sawi chian hmasak fe a ngaih chuan a sap tawng taka ‘fair’ kan tih, kan naupan lai pawh a kan chelek em em, a tak erawh a kan hman chhuah ngam meuh si loh ang chauh a ‘fair’ ngam kha kan ni tihna lek a ni dawn a. ‘Dawt aiin thudik chanve hi a hlauhawm zawk’ an tih ang chiahin, ‘fair lo ai chuan a chanve-a fair hi an hlauhawm zawk’ ka ti ve fan a. A chhan chu, fair lo law law, tum lo law law te hi chu an thiltih, khawsak leh chetphungah an hriat nghal mai a, mahse, fair anga lan tum, fair tak tak si lo (fair chanve) ho chu an inthup thiam em em a, lang thei lamah chuan mi dik ber leh thianghlim ber anga an in lan tir thin miau avangin, midang te rin leh zah te an lo kai ve tingtang si a, chu tih laiin, lang lo lamah leh chhungril lamah chuan an lo depde ru viau zelin, fair lo te tih ang zawng zawng kha tih hreh an lo nei leh der thin si lova, hriat chhuah an nih meuh chuan pawi thui leh lian tak an lo khawih hman der tawh thin. Heng mi, ‘fair chanve’ ho te hi kan ram leh hnam thanmawhbawk an ni mai pawh ni lovin, ram leh hnam ti chhe tu dik tak te an ni.

Chuvangin, fight fair in a fair fight-Dik leh thianghlim taka inbeihna-ah dik leh thianghlim taka in beiin, I in hmachhawn thin ang u. Chu chu kan ram leh hnam damna leh din chhuahna, ngelnghehna tur chu a ni ngeiin ka ring.