Hun

            Hman zan ka muhil thei lovin thil hrang hrang ka ngaihtuah mai mai a, chu tah chuan ka rilru ah ‘hun’ chungchang hi a rawn lut teh tlat a. ‘Hun’ hian ‘bi’ a nei em, ‘hun’ kan tih tak hi engnge tih te, mihring zawng zawng te hian hun in ang khat vek kan hmangin, kan nei tlang nge, mimal tin hian hun hrang theuh kan hmangin, kan nei, hun hi tu siam nge ni a, tu bithliah nge, mihring hi awm lo ta ila, hun hian awm zia a nei ang em, chu ti ang bawkin, hun hi awm lo ta se, eng tin nge mihring te hi kan awm ang tih mai mai te ka ngaihtuah a, ka meng rei ta phian a!

            A nihna takah chuan hun bi tuk tu hi mihring te chauh hi kan ni mai em aw ka ti a; ni chhuak leh ni tla kan han tih te pawh hi a ni-a kha a tla (thim) a, a rawn chhuak (eng) leh thin ni lovin, kan awmna khawvel phel lam ni engin a chhun phak lai leh chhun phak loh lai a awm vang mai mai hi a ni a, a ni-a tak kha chu a en ngaiin a eng reng a, ‘zan’ kan tih tak, thim/khaw thim pawh hi eng tik lai pawhin a thim reng zawk a. Kristian te rinna-a hmun pawimawh chang pha, ‘chatuan’ te pawh mihringin a bi kan han tuk phak a nih loh avanga tawp chin nei lo, hun bi awm lo te hi a ni mai mai em tih te thlengin ka ngaihtuah teh tlat a (a Kristian viau lo mai thei!). A eng a pawh chu ni ta se, ‘hun’ kan han tih te pawh hi mihringin a bi kan lo thliah a, kan lo tuk dan azira lo awm mai mai ni ta te hian ka hria a. Hun bi thliahna atana kan hman, sana te pawh hi a nihna takah chuan a vir ngaiin a vir reng a, kum hlui leh kum thar kan tih te pawh hi nambar hmang hian a bi lo thliah lo ta ila chuan a inang put reng mai awm asin!

            He ti zawnga ngaihtuahna han sen takah chuan, ‘hun’ kan han tih tak pawh hi thil hrang, amaha awm hrang daih ni lo hian mihring te tho hi kan lo ni mai lo maw tih hi ka ngaihtuah a. Sawi dan tam takah chuan, mitin hian hun inang tlang theuh (entirna atan, ni khatah darkar 24 theuh) kan nei a, chu kan hun inang tlang neih chu kan hman that leh that loh azirin hun chuan kan tan awmzia a neiin, a nei lo emaw, a tangkaiin, a tangkai lo ang te in kan sawi thin a, a dik lo phei chu ka ti hauh lo. Chu tih rualin, ‘hun’ chu ‘mihring’ a ni ti zawnga kan sawi dawn a nih erawh chuan hun khat,inang tlang vek nei anga kan zavaia han hrut rual pawp hi a dikhlel deuhin ka hre ta tlat thung! Eng vang chuan maw?

            Mihring te hi kan lo pian chhuah atang hian kan hun a in tanah lo ngai ta ila, kan thih rual hian chu hun, kan hun chu a tawp ve tihna a ni mai dawn lawm ni? Sawi tawh ang khan, kan dam emaw, kan thi emaw, khawvel chhung leh a pawna thil awm dan te hi chu an nih phung ngaiin an la ni ngar ngar zel tho dawn a, an kal ngaiin an la kal muah muah zel dawn bawk a. Chu ti a nih chuan, mihring hi hun chu kan ni a, mihring a tawp rual hian hun pawh chu a tawp zel tihna a ni mai em? Hun bi kan thliah mil hian mihring te hi kan nung, kan che ni lovin, kan chet leh nun rual hian hun hi rahbi ang hian kan tuk chho zel a, mihring azirin kan hun hman leh neih te chu a dang theuh va, kan tawp rual chiahin chu hun pawh chu a tawp ve nghal a, kan mihringpui dang ten anmahni pual theuh a an hun, an hun bi erawh an tawp ni a thlen hma chuan a kal zel ni ber mai hian a langin ka hria. Chu tih rualin, he ti zawnga kan han sawi hian hun pawimawhna emaw, a tangkaina emaw sawi bo kan tum lam a ni lova, sawi bo ngawt theih lah va ni hek suh. Mihring te hi awm ta miah lo ila, hun hian awmzia a nei ang em? Eng kim hi a hunah tak a thleng thin kan han tih te pawh hi mihringin kan hun tawn (engnge kan tawn dawn a, eng tikah nge kan tawn dawn kan hre lo) azira a hun leh hun lova kan hriat leh bithliah dan azir zela ‘a hun taka lo thleng’ leh ‘a hun lova lo thleng’ te hi a lo ni zawk em tih te hi ngaihtuah tham tak, chu tih ruala va ngaihtuah chhuah a, ‘hei hi a ni e’ va tih chat hleih theih ni si lo hi a ni berin ka hria.

            Tin, mihringin ‘hun bi’ ti a kan chhiar leh kan thliah te pawh hi awm lo ta se, kan nunphung, chet phung, a tawi zawngin, mihring hian kan mihrinna hi kan hlohin, a buai vek ang nge, engmah a buai chuang lovang? Zan mut hun, zing thawh hun kan tih te pawh hi kan taksa in hahchawlh a mamawh avanga muhil a, kan taksa a lo hahdam tak avanga kan muhil lai lo harh hlawl a, tho ta mai thin nge kan nih a, mihringin ‘mut hun’ leh ‘thawh hun’ ti a darkar, minute leh second kan bithliah avanga mu leh tho thin kan nih tih te, heng mihring hun bi chhiar dan leh thliah dan te hi awm lo ta se, kan mu in, kan tho tho ang a, kan awm phung hi a buai viau chuang ang em tih te hi ngaihtuah loh pawh a eng mah pawi hawl ni miah lo mah se, han ngaihtuah chet chet chuan suangtuahna a kal thui duh phian asin! ‘Nimin’ kan tih te pawh hi niminah kha chuan vawiin a ni a, ‘vawiin’ kan tih pawh niminah chuan ‘naktuk’ a ni a, ‘naktuk’ ngei ngei pawh hi naktuk a lo thlen chuan ‘vawiin’ a lo ni ang a, nimina vawiin kha naktukah chuan ‘nimin’ a lo ni leh daih tawh dawn a! A nihna takah chuan nimin a ni emaw, vawiin a ni emaw, naktuk a ni emaw, engkim hi a ngai reng a, mihring te hian kan lo bithliahin kan lo chhiar danglam mai mai hi a lo ni ber hian ka hre ta tlat a ni.

            Chu vangin, hringnunah hian eng pawh tawk ila, ‘hun’ chu ‘mihring’ hi kan lo ni mai a, kan hun bi kan thliah dan leh a bi kan tuk dan azir hian kan hma in, kan tlai emaw, a hunah tak zel thil kan ti emaw hi a lo ni reng maiin ka hre ta a. Chu vang chuan, mihringin hun bi kan chhiar leh thliah dan avang ringawt hian buaina leh harsatna kan hma-a a lo chhuah chang te hian indawm kun mai tur kan niin ka hre ta lo. I hun, ka hun hi a ral lova, a lo la thleng lo pawh a ni lova, kan tawng mek pawh a ni hran chuang lo….nang leh kei hian keimahni mil tur ang zela a bi kan lo thliah leh kan lo chhiar azir zel hian hun kan neiin, kan nei lova, a hunah tak thil kan tiin, kan ti hman lo ni ta mai hian ka hre ta deuh a ni.

            Eng pawh chu nise, Vanlalsailova hla sak a, ‘Tun hi hmang tha in, naktuk veng rawh,’ a tih hi I vawng tlang reng phawt mai teh ang u.