Muthlu Suh!

Khawvela tlang sang te zingah hian 8000 metres aia sang hi tlang 14 chiah a awm a, heng zinga a tam zawk te hi India, Pakistan, China leh Nepal te inrina bawr vel, Himalayan mountain range-a awm an ni. Heng tlang, khawvela tlang sang ber ber te hian kum tam tak kal ta atang khan a chhip lawn thlen tum, tlang lawn mi te nunna eng emaw zat a lo laksak tawh a, vawiinah pawh hian heng tlang sang pangah te hian tlang lawn mi te ruang, lak thlak ngaihna awm lo, an hnutchhiah tak te hi an la let pheng phung a ni. Heng tlan lawn mi te hian an nunna hlu tak an channa thin tam ber chu an ‘mutthluk’ thin vang a ni mauh mai! A chhan chu hei hi a ni. Khawvela tlang sang, 8000 metres (26000ft) aia sangah te hian mihring te tana hmun hlauhawm em em mai ‘death zone’ an tih chu a awm a. He death zone hi tlang sang, 26000ft chung lam, oxygen tlem em em tawhna, mihringin a taksa mamawh khawp boruak (oxygen) hip tur a neih tawh lohna hmun a ni a. Taksa in boruak a mamawh ang hip tur a hmuh loh chiah hian kan taksa bung pawimawh-lung leh thin te chuan kan taksa in a mamawh khawp boruak a hip luh theihna atan a hma zawng aiin an thawkrim a, kan taksa peng a pawimawh ber te zinga mi, kan thluakah pawh thisen tam zawk an thawn lut a. Vawi leh khata he ti ang a kan taksa khawlpui ten kan taksa mamawh phuhruk tura tan an han la thut mai hi kan taksa chuan zo lovin, kan thluak hnathawh a buai a, thluaka thisen zamah te thi a tlingin, a hnawh (block) ta thin a. Chu chuan kan taksa chet phung chu ti buaiin, khaw hmuh a fiah lova, ngaihtuahna a chiang lo ruai a, chu chuan thutlukna dik siam hleithei lovin mihring a siam ta thin a. Tin, heng, khawvela tlang sang ber ber chhip lawn chhuak a, him taka let leh tur hian tlang lawn mi te chuan darkar 12-14 chuang hun an hmang thin a. Taksa in a mamawh khawp boruak hip tur a neih loh avanga taksa chau nen, hah tawngkhawng tawh nen, khaw vawt satliah mai pawh ni lo, minus degree Celsius tam taka vawt leh kham chung kawng zim, tlak palh vaih chuan feet singhnih chuanga tlak thlak vang vangna tur ni bawk nen, mihring taksa in a tlin vawrtawp tak meuh meuh leh tlem thlenga an chakna zawng zawng sawm khawm a ngai thin. Chu ti ang taka chhel ngai a nih avang chuan mi tam tak chuan kawng laklawhah tlin lovin, tlang chhip lawn thleng lova fam ta te, letsan leh ta tam tak an awm a. Tin, tlang chhip han lawn chhuak, an let leh lama chauh luattuk avanga thi leh ta te pawh an awm. Kan hriat atana pawimawh tak mai chu, heng tlang lawn mi, tlang panga an nun chan ta tam zawk te hi an tum ber tlang chhip an lawn thlen/chhuah hnu a, an let thlak lehna lama an chauh tawngkhawng lutuk avanga muhil, harh zo ta lo te hi a tam zawk an ni a. Hei vang hian, tlang lawn m ite zingah chuan tlang chhip lawn chhuak tur leh lawn chhuah hnu a him taka let thla leh tur chuan ‘chawl lova kal’ hi thih leh dam hriltu a ni a, mut chhuak in, chau eng ang mahse, ‘mutthluk loh’ chu dam khaw chhuahna bulpui a ni tiin an sawi thin. An mutthluk zeuh chuan minute rei lo te chhungin khaw vawtin a hmet hlum nghal a ni mai!Heng tlang sanga death zone an tih chhungah hi chuan rei tak awm chi a nih loh avangin, chawlh loh leh mutthluk loh hi tlang lawn mi te tan dam khaw chhuak tura pawimawh vawrtawp a ni tawp mai a ni. Hetah hian hringnun zirlai pawimawh tak a inphumin ka hria.

He ti zawng hian I han ngaihtuah teh ang. Mihring hi kan lo piang chhuak a, kan lo sei lian a, mahni chhia leh tha hriatna hmanga dam khaw chhuak tura bei thei khawpa kan taksa leh rilru a lo than len hnuah ‘puitling’ kan lo ni ta thin. Puitling kan nih tawh hnuah chuan mihring hian kan dam khaw chhuahna atan ei kan zawn a ngai a, tih tur kan nei in, kan intuk thin a. Chung kan thil tum leh dam khaw chhuak tura in nghahna tlinga kan in chher chhuah chiah hian ‘hlawhtling/mi hlawhtling’ tiin kan sawi/insawi thin. A nihna takah chuan, hlawhtlinna te pawh hi mihringin a tum a thlen a, a hlen hi a ni mai a. Thenkhat chu an tum a sang deuh a, thenkhat erawh an lungawina a hniam deuh a. A eng a pawh chu ni se, miin a lungawina khawp chin a tih leh a thlen hian, chu mi chu a tumah a hlawhtling a, mi hlawhtling a ni tihna chu a ni mai a. Lungawina tawk a san leh hlawhtlinna a sang kan ti a, lungawina hniam deuh chu an hlawhtlinna pawh a langsar lo deuh va. Mahse, a mihring bera a lawm a, a lungawi a, a dam khaw chhuahna tur atana a thlen chin tura a bituk chin a thlen phawt chuan mi hlawhtling chu a ni tho tho mai. Chu tih rualin, mi hlawhtling te zingah pawh hian harsatna tam tak paltlanga hlawhtlinna tlang chhip han chuang chhuak, chu tlang atanga an let leh lama inthlahdah a, muthlu ta, tho chhuak tur awm leh ta lo hi, tlang lawn mi te chungchang kan sawi ang chiah khan thil awm thei leh awm mek a ni tih hi I lo ngaihtuah ve tawh ngai em?

Khai mah aw…tunlai khawvel, kil tina engkim a harsat em em tawhna khawvelah hian, eng kawngah pawh ei zawnna ngelnghet nei tur chuan thi leh thau pawlh tak meuh meuh a beih a ngai tawh tih hi mi puitling (taksa puitling ringawt ni lo, rilru puitling) chin hi chuan chal kawlh a pen ang fawk a chiangin kan hre vek tawhin a rinawm. Chu vang tak chuan thi leh thau pawlhin, a thim a var thlu lovin, theihtawp tak meuh chhuahin he khawvel, inelna leh rualelna khawvela zi chhuak ve thei tur hian kan bei thin a. A tuma tum na na na leh chhel taka bei tlauh tlauh na na na chu hlawhchham (hlawhchhamna pawh hi eng nge tih hi sawi tham fe chu a awm) reng theih ni hek lo, hlawhtlinna tlang chhip sang, mi tam tak a kawnga an tluk hlumna leh thlen zawh lohna tlang chhip chu an lawn chhuak nge nge thin. Hetah tak hian fimkhur erawh a ngai ta. A hma lama tlang lawn mi te chungchang kan sawiah khan let leh ta lawk ila. Khawvela tlang sang ber ber lawn chhuak a, dam taka lo let leh tawh tlang lawn mi te zawng zawng hian thil pakhat, hriat chian em em mai an nei a. Chu chu, tlang chhip an lawn thlen hian kawng chanve chauh an la thleng a, an let lehna kawngah an chhoh lama hlauhawm an paltlang zawng zawng te kha an paltlang thlak leh vek a ngai dawn a, chu vangin, tlang chhip an thlen vang ngawtin tha an thlah thiang lo tih hi a ni.

Mi tam tak chu rim taka an beih hnuah an han hlawhtling ta cheng a, an hlawhtlinna avanga thahnem ngaih sauh ahnek a inthlahdah zui ta, an thiam leh finna te engmah chher hriam peih lo leh thatchhe nghal rawih rawih hi kan ramah hian kan tam ta lutuk em aw tih hi ka ngaihtuah fo thin. Chung mi, hlawhtlinna tlang sanga chuang chhuak a, rawn let leh tawh, an kal kawnga muthlu zui ta te avang hian ram than a thu thin a, an hna in a ken tel mawhphurhna la zui peih miah lo, muthlu zui ta te avang hian mi tam takin an chan ai ngawih ngawih an hmuh theih loh phah a. An hlawhtlinna avanga khawvela an zik chhuahna tur khawp lak luh/thawh chhuah nei tawh, mahse, chu tah chuan duhtawk hmu ta mai, tih tur hlen zova in hria a, hahdam tum ta tlat te hi tlang lawn mi, tlang sang chhip han lawn thleng a, let leh lama boral ta te nen hian an danglamna ka hre lo….hlawhtlinna muthilh hlenpui te hi tangkaina an nei tlem khawp mai. Hetih rual hian, tlang lawn mi, tlang sanga boral ta te hi chu an thatchhiat leh inthlahdah vang lam aiin, an taksa in a tlin tawh ngang loh avanga muthlu/muhil an ni tlangpui a. Mahse, hringnun tlang sang lawn thin te erawh hi chu dawngdahna leh thatchhiatna avanga meng peih lo, muthlu zui ta, mahni hna leh mihringpui te tan pawh a chhawrnahawm loh zeta chhuak ta hi a tam zawk kan niin a lang. He ti ang mi, mahni hlawhtlinna chapopui a, duhtawk a, midang te tana a hlawhtlinna sem leh hmang tangkai ve phal miah lo/duh miah lo te hi hringnun tlang panga muthlu ka tih te chu an ni a (an tanghma hai kawngah erawh an meng fiah leh duh fu ang lawi a!), he khawvelah hian tangkaina an nei lo. An dam khaw chhuahna khawp chu an thawk chhuak a ni mai thei, mahse, chu tah chuan an duhtawk an hmu mai a nih chuan ramsa te nen danglamna an nei lo. Ramsa khawvelah pawh a te ber atanga a lian ber thleng hian, an dam khaw chhuahna khawp chu eng rannung leh ramsa pawhin an thawk chhuak vek. Mihring leh ramsa danglamna erawh chu ramsa te chuan anmahni tan chiah an thawk a, an ramsa pui te ngaihtuahna leh venthawnna engmah an nei lo mai ni lovin, an dam khaw chhuahna atan an ramsapui te ngei pawh an ei ral a tul thin a, chu chu an dam khaw chhuahna atana Khuanu’n a duan dan a ni. Mihring te erawh chu chu ti ang tura siam leh din kan ni tlat lo.

Chu vangin, hlawhtlinna I chang tawh a ni mai thei, hringnun intlansiakna kawngah hian a chak ber niin, I tum I hlen tawh pawh I in ti mai thei a, I ke in, tu puihna mah mamawh lovin I ding thei tawh pawh a ni thei e. Mahse, hei hi hre reng rawh, kawng chanve chiah I la thleng a ni tih hi. Kawng zahve dang, I rawn let lehna tur kawng chuan a la hmuak che a, chu kawngah chuan I tanpuina mamawhtu, I hlawhtlinna zar lo zo ve tur I mihringpui ten nghakhlel takin an lo thlir reng che a, an lo nghak reng che a ni tih hi theihnghilh suh. Chung I mihringpui te chu I mutthluksan a, I menpui peih lo a nih ngat chuan mihring I tling lo tihna a ni a, ramsa te nen angkhat/thuhmun reng in ni. Chu vangin, he kan hringnun zin kawngah hian nang chu lo muthlu ve ngai suh ang che!