Leadership and Communication Skills

            Mihring te hi kan nih phung hrim hrimah hian mal tlat tur ni lo, midang te nena khawsa tlang tur leh cheng za tura din leh siam kan ni tih chu Eden huan atang daih tawh khan a lang chiang viau mai. Tin, chu ti ang a kan mihringpui te nena cheng za tura siam a kan lo awm takah chuan, khawvel dan (nature’s law) in a ken tel thil pakhat, mihring chauh ni lo, ran leh ramsa te khawvel thleng pawh a kan mamawh leh kan zawm ngai pakhat a awm a, chu chu ‘Hruaitu neih’ hi a ni. Ramsa khawvela chak ber, ramhnuai/ram ngaw Lalpa (King of the Jungle) ti hiala an sawi, sakei rual zingah pawh an hruaitu leh hotu sakeibaknei, alpha male an awm a, chu ti ang bawkin rannung zinga a te ber pawl, fanghmir te pawhin awp khawmtu leh ho khawmtu Lalnu an nei tho! Hei hian a tarlan chian em em chu, huho nun/nunhona-ah reng reng chuan, mihring kan ni emaw, ramsa an ni emaw, fel taka thil a kal theihna tura hruaitu, kawhhmuhtu, vengtu, chhantu, fuihtu, a tawi zawngin ‘hruaitu tha’ kan mamawh a, chu hruaitu chu hruaitu tha a nih theihna tur chuan a hruai a te nen inzawmna tha leh nghet tak an neih a ngai bawk a. Chu chu tuna kan thupui khel tur pawh hi a ni.

Hruaitu chu engnge ni a, Hruaitu chu tunge?

             Thil ho te ni a lang, chu tih ruala a awmzia hriat fuh loh palh chuan a nihna bulpui ber (principle) thlenga thelh duai theih chu a chunga zawhna, hruaitu hi engnge a nih/a awmzia ni a, tunge hruaitu chu tih hi a ni a. He zawhna pawimawh tak hi eng tin nge kan chhan tih hian hruaitu tha kan nih leh nih lohna kawngah kawng ro a su thui viau dawn a ni. He zawhna ka chhan ve dan hi tawi te te in ka’n sawi ve ang e:

Hruaitu chu Hotu (Commander) ni lovin Hruaitu (Leader) a ni

            Hotu chuan a ho te thu a pe a, tih tur a hrilh a, hotu thupek angina a ho ten an ti thin. Hei hi hotu leh a ho te in aichinna a nih avangin a ho te chuan an hotu lakah mawh an phur a, thu petu a nih miau avangin, a thupek anga ti lo leh ti tha lo te chu hotu hmaah an insawifiah a ngai a, hremna pawh a petu chu hotu a ni a, hotu chuan a ho te chu lawmman a pe in, a hrem bawk thin. Hruaitu erawh chuan tih tur a hria a, amahin hma a hruai a, a ho ten an zui a, amah, hruaitu leh a hruai a te mawhphurhna pawh a in chen tlang a, chhiat thatah mawh an phur tlang thin. A tawi zawngin, ‘hruaitu’ chu hma hruaitu, kawhhmuhtu leh kawng sialtu a ni a, a thil tih hmangin a ho te a hruai thin. Hotu erawh chu thu petu, endiktu leh thununna kengkawhtu a ni a, a ho ten a thupek angina a hna an thawk thin.

Hruaitu chu mawhphurtu a ni

            Mihringah hian nihna/hruaitu nihna chauh duh leh thlahlel, chu tih ruala hruaitu hna leh hruaina hna in a ken tel mawhphurhna la peih miah lo hruaitu a awm theih. Chu ti ang mi chu hruaitu tha eng tik lai mahin an ni ngai lo. Hotu chuan a ho te hnenah mawhphurhna a sem darh (delegate) thin a, amah chu a khaikhawmtu chauh a ni. Hruaina hnaah erawh chuan hruaitu chuan hna a sem darh a nih pawhin, kawng engkimah mawh a phur a, hruaitu a nih miau avangin, a hruaina lam hawi hawiin a kaihhruai a te chu an kal mai dawn a. Chu vang chuan hruaitu chu mawhphurtu a ni tel a, hruaitu nihna leh hruaina hna in a ken tel mawhphurhna la peih lo chu hruaitu ni tlak a ni lo ni mai lovin, hruaina hna thawk turin a tling tawk lo a ni.

Kawhhmuhtu ni lovin Entirtu a ni

            A sap tawng taka ‘leading by example’ an tih angin, hruaitu chuan a hruai a te tan entawn tur tha, thil tih tha hmangin hma a hruai thin a, midang te tih tur kawhhmuh tur hre em em ringawt mihring chu hruaitu ni lovin hotu a ni. Hruaitu tha chu a thil tih a a tih tak takna, a inpekna leh taimakna te a kaihhruai ten an hmu a, entawn tur tha a hmuh tir leh hnutchhiah hmangin a hniakhnung an rawn zui mai thin.

Hmahruaitu leh Hnungdawltu a ni

            Hruaitu chu kawng engkimah bultantu, midang te tihhmuhtu (kawhhmuhtu ni lovin), sulsutu leh hma hruaitu a ni a, a hote tih sa-a kal tur ni lovin, a kawng sial kuak sa-ah a hote chu a hruai tur zawk a ni. Chu tih rualin, midang tel lovin hruaitu a awm thei lo angin, a hruai te chu mihring, mize inang lo tak tak, a then chu chak taka kal vut vut chi te, a then erawh chu nawr kal chawp ngai leh a chhawm a chhawm ngai te an ni thei. Hruaitu chu a hruai a te hma a kal tur leh hruai tur mai ni mai lovin, a hruai te zinga chak lo ber leh hnufum ber te pawh chhawmdawl a, an hnung dawlsaktu a ni tur a ni.

Hruaitu hna leh nihna (Leadership) pawimawhna

            He mi chungchangah pawh hian mitin hian tawnhriat atang te, midang te kan hmuh leh kan chhiar atang te in sawi tur thahnem tak kan nei ngei ang. Kei pawhin a pawimawhna ni a ka hriat te ka’n sawi ve ang e:

Hruaitu tha hnuaiah chuan thawhhona tha a awm thin

            Hei hi hruaitu tha leh hruaitu satliah hriat hranna leh thliar hranna pawimawh tak niin ka hria. Hruaitu tha hruaina hnuaiah chuan mi chi hrang hrang, rilru leh ze inang lo tak tak te pawh rem takin an thawk ho thei thin. Hruaitu tha hruaina hnuaiah chuan a hruai a te an thu a inhmu vek kher lova, an hlim tlang reng kher lo. Chu tih rualin, ngaihdan insual karah te, duh dan inkalh karah leh thahnemngaihna inchen lo tak tak karah pawh thawhhona tha a awm tho thin. Chu ti ang thawhhona tha thlentu leh siamtu hruaitu chu hruaitu tha a ni a, hei tak hi hruaitu tha pawimawh em emna chhan pawh a ni.

Hruaitu tha chuan midang te tan entawn tur tha leh chhinchhiahtlak an hnutchhiah thin

            He ta entawn tur tha kan tih hi a sap tawng taka ‘imprint’ an tih, Mizo tawng nem kai, rilru leh thinlunga tuh kan tih hi a ni a. Pawn lam lang thei a kan thil hnutchhiah, entirna atan, sum tam tak kan thawh chhuah te, thil tha tak kan sak sak/dinsak ang chi te hi a tha lo a ni hauh lo, amaherawhchu, heng lang thei thil kan tih that te hi chu ral leh thei, chhe leh thei, chul thei an ni. Hruaitu tha hnuhma leh chanchin (legacy) erawh chu pawn lam lang thei thil piah lama chhung lama nawhreh theih tawh loh, hun leh niten an liampui ve mai mai theih loh entawn tur tha leh chhinchhiahtlak an hnutchhiah thin hi a ni. Hei vang tak hian hruaitu tha chu a chhuahsan apiangah a hmun ruak a zau va, a kalna apiangah entawn tur tha leh chhinchhiahtlak a hnutchhiah thung thin. He mi kan sawi ruala ka han tarlan tel duh chu, hruaitu nihna hi dinhmun chelhah ni lovin, chhungril lama ze tha (inner quality) a in nghat a ni zawk a. Eng anga dinhmun sang leh tha chelh pawh nise, chhung ril lama hruaitu tha zia (leadership quality) nei lovin chu dinhmun chu a chelh chuan, eng thil ropui mah a chhuak ngai lova, chu chhungrila hruaitu tha zia putu leh neitu erawh chu a kalna apiangah, eng pawlah pawh hruaitu nise, hruaitu tha a ni zel a, a hruai a ten amah atangin hlawkna tam tak an chhar chhuak thung thin.

Hruaitu tha chuan Hmathlir (vision) tha a nei a, chu a hmathlir tih hlawhtlin dan tur pawh chu chiang takin a hmu a, a hre thin

            Ngaihtuahna tha leh ropui tak tak neih te, hmathlir thui leh tha tak tak neih te hi thil tha tak a ni. Khawvela thil ropui lo piang chhuak tawh zawng zawng te hi ngaihtuahna (idea) atanga lo intan vek a ni a, chu vangin, ngaihtuahna fing, ropui leh hmathlir thui leh tha tak neih hmasak hi hlawhtlinna bul tanna lungphum pawimawh tak a ni. Chu tih rualin, ngaihtuahna leh hmathlir ropui, fing leh thui tak tak ngaihtuah chhuah ringawt hi thiltihin a zui chuan si loh chuan duhthusam leh suangtuahna (dream) nen danglamna a awm lo thung! Hei tak hi hruaitu tha leh hruaitu tha lo inthlauhna em em chu a ni. Hruaitu tha chuan ngaihtuahna a seng a, chu a ngaihtuahna atang chuan thil thar tha, hmasawnna tur kawng tam tak a ngaihtuah chhuak a, chu ta tang chuan hmathlir thui tak a nei a, chu a ngaihtuah chhuah leh a hmathlir te tih hlawhtlin dan tur kawng pawh a hmu a, harsatna paltlang ngai thlengin (hriat lawk loh harsatna erawh a awm thei) a hmu lawk thin. Tih hlawhtlin zawh loh tur leh thil sawngsawhlawt lo turah hruaitu tha chuan a hun leh tha a khawhral ngai lova, chu tih rualin, harsatna a hmachhawn avang ringawtin a tum tih hlawhtlin a tumna kawngah a beidawngin, kawng laklawhah a tawpsan ve mai mai ngai lo thung. A khaikhawmnaah chuan, hruaitu tha chuan ngaihtuahna leh hmathlir tha a neih rualin, chu a ngaihtuahna leh hmathlir tih puitlin dan kawng thlengin a ngaihtuah a, a tum tih hlawhtlin ngei tumin nghet takin hma lam panin a kal zawk thin.

Hruaitu tha chu mi rilru zau a ni

            German mi fing, Karl Marx chuan ngaihdan a awm a, chu ngaihdan chu hnial kalhtu an awm leh a, ngaihdan awm sa leh hnial kalhtu te inhnialna atang chuan ngaihdan thar tha zawk a rawn chhuak thin a ti a. Chu ti ang deuh chuan, hruaitu tha chuan ngaihdan chi hnih emaw, a aia tam awmah pawh, a mimal ngaihdan kalh pawh nise, ngaihdan leh thlir dan hrang hrang rawn tling khawm atangin thil tha zawk a rawn chhuak thin tih hre rengin, zau takin ngaihdan hrang hrang te a ngaithla in, a buk thiam tur a ni a, mimal ngaihdan nghet lo nei sa emaw, ngaihdan lo nei sa (pre-conceived notion/concept) run chungin thutlukna a siam tur a ni lova, rilru zau tak pu chungin, a tha tur ber ni a a hriat angina a ngaihdan leh thutlukna a siam thin tur zawk a ni.

Hruaitu tha chuan hruaitu tha bawk a chher chhuak thin

            Hei tak hi hruaitu tam tak ten an hmaih thelh fo thin chu a ni. Hruaitu tha kaihhruaina hnuaiah chuan amah, a hruaitu ber chu a that em avang emaw, a kaihhruai a te a kep hneh em avang emaw te in amahah chuan rinna nghah lutuk leh rin lutuk awm palh thei a ni. Tin, khawvelah hian thil tha reng reng hi a aia tha zawkin a rawn hliah khuh hun, a rawn thlak hun a awm thin a, hruaina hna ah pawh chu chu a danglam chuang lo. Eng anga hruaitu tha pawh hi an tawn san theih ber an thlen hun a thleng thin a, tin, mihring an nih angin hruaina hna an thawh theih loh hun te pawh a lo thleng ve thin. Hruaitu tha chuan chu chu a hmathlir (vision) zingah a telh ang a, a chhuahsan hun emaw, a theih loh hun a lo thlen pawh a a hmun ruak a zau lutuk lohna turin hruaitu tha a chher chhuak thin tur a ni. Sial rangin sial rang a hring, sa kawlin sa kawl a hring tih kha hruaitu tha nihna (quality) pawimawh tak te zinga mi a lo ni reng mai!

 

Hruaitu tha zia (traits of a good leader)

•      Hmathlir nei

Hei hi chu a hma lamah kan sawi tawh a, kan sawi thui tawh loving. Hmathlir tha neih hi hruaitu tha zia-a ze ropui ber te zinga mi a ni a. A kaihhruai a ten an hmuh thiam loh pawh a a tuma chiang leh hmu fiah, a theihna chin hre chiang leh tum ram thlen dan tur hriat chian hi hruaitu tha ze pawimawh ber te zinga mi a ni.

•      Midang te fuih phur/ti phur thiam

Hruaitu tha chuan a thil tum leh hmathlir te chu a kaihhruai ten chiang taka an hriat leh hmuh thiam theihna turin a entir/tarlang thiam tur a ni. A thil tum leh hmathlir tih hlawhtlinna kawngah chuan thawhhona (team work) tha a awm theihna turin a kaihhruai te chu a eng lam thlir thei tur leh phurna/thathona an neih theihna atan a fuihin a ti phur ang a, an thawh chhan leh an tum ber chiang takin a hriattirin, a entir thiam tur a ni.

•      Remhria, ril leh fim taka ngaihtuahna seng thiam

Thluak/rilru nu but lo mi nih hi hruaitu tha ze pawimawh tak leh tangkai tak te zinga mi a ni. Hruaitu tha chuan ngun leh chik takin a kaihhruai te leh a pawl kaihhruai tana tha tur a ngaihtuah thin a, an chakna lai leh chak lohna lai te, hmasawn an ngaihna leh tan lak an ngaihna te, remchanna tha bakah amah leh a kaihhruai/pawl tana thil tha lo (inpumkhatna ti chhe thei, hmalakna ti thuanawp thei etc) thlengin fim takin a ngaihtuah thin (S-Strength, W-Weakness, O-Opportunity C-Challenges SWOC Analysis). Ngun leh fim taka a ngaihtuah hnuah hruaitu tha chuan a tha zawk a nih chuan kalphung leh hawi zawng thlak (course-correct) hun a hria in, a tul hunah chuan inthlak danglam a hreh lova, chu ti anga kalphung leh hawi zawng thlak chu an tan a that zawkna leh an tum hlenna atana a pawimawhna leh tangkaina thlengin a hmu thiam thin.

•      Midang te nena in dawr tawn thiam

Midang te nena in dawr tawn thiam leh theihna (good and effective communication skills) hi hruaitu naran leh hruaitu tha thliar hrangtu pawimawh tak a ni bawk. Hruaitu tha chu midang te dawr thiam leh dawr kawnga tha a ni satliah ringawt lova, amah chu midang te pawhin an dawr thiam leh an dawr theih mi a nih tel a pawimawh hle. Chu mi atan chuan, hruaitu tha chuan midang te nen an indawr in, a va dawra te emaw, amah rawn dawrtu te chuan a der ni lo, a tak tak (genuine) a ngaih pawimawh an ni tih an in hre thin. Chu tih rualin, hetia kan han sawi hian, hruaitu tha chu tawngkam thiam tak, mi hneh leh hmin thei em em nih ngei ngei tur a ni kan tihna erawh chu a ni hauh lo thung! Khawvel huapa an kalna zawn theuha hruaitu ropui, hlawhtling leh an hnuaia mi ten an ngaihsan Bill Gates, Warren Buffett, Barack Obama, Mark Zuckerberg, Elon Musk, Abraham Lincoln leh Albert Einstein te thleng khan mi ti zawk zawk lo, ngawi chawi leh rual pawl lo, mipui hmuh leh hriata lansarh ai chuan tlar hnung lam, a langsar lo lama lo awm duh leh thlahlel, a sap tawng taka ‘introverts,’ an tih, lar khel lo an ni vek a, mahse, khawvel huapa hruaitu langsar leh ropui, mite ngaihsan leh hriat hlawh an ni vek thung! Chu vang chuan, hruaitu tha chu in dawr tawn thiam mi a ni tur a ni kan tih hian, midang te hriatthiamna leh mi ten an hrethiam a ni tih pawh an hriatthiam theih hruaitu (empathic leader), midang te thu leh hla ngaithla peih (active listener) leh an thawhpui leh kaihhruai te nena inzawmna tha tak siam thiam leh siam thei mi a ni tur a ni kan tihna zawk a ni.

•      Mahni in hriat chian leh mahni nihna pawm ngam

Hruaitu tha hriatna leh nihna pawimawh tak pakhat chu mahni in hriat chian-mahni chakna leh chak lohna hriat a, mahni that dan ber leh nihna dik tak in hre chiang leh thup engmah nei lova hna a tha thei ang bera thawk thin mi nih hi a ni. Hruaitu tha nih tum hi thil tum tha leh hruaitu in a tum ber tur pawh a ni reng a. Chu tih rualin, tu ten emaw an lo tih tawh dan leh nih dan entawn a hruaitu tha nih tum ai chuan, mahni nihna dik tak lungphuma hmang a, mahni in hriatchianna nena hruaina hna thawh hi hruaitu tha zia a ni a, a tlo nge nge thin bawk. I chakna lai, thatna lai leh theihna lai lan chhuah tir tum chungin, I chak lohna lai pawm thiam la, midang entawn (copy) chunga lem chang lovin, mahni nihna dik tak lan chhuahpui leh nih chhuahpui ngam hruaitu (authentic leader) te hian mi ngaihsan leh dahsan an hlawh nge nge thin ti hre reng rawh.

•      Rilru zau leh thil thar ngaihtuah chhuak thiam

Hruaitu tha chu mi rilru zau a ni tur a ni kan tih tawh ang khan, ngaihtuahna thar (new idea), remchanna lo awm hmang tangkai thiam, thlirna tlang hrang hrang atanga thil thlir thiam leh kalphung thar zuan hreh lo mi a ni tur a ni. Chu tih rualin, hetia kan han sawi hian, thil thar leh kalphung thar zuan zung zung tur kan tihna erawh a ni lova, chu ti ang tih ‘hun (timing)’ dik tak hmuh leh hriatthiam hi hruaitu tha zia chu a ni zawk. Helaiah hian, hruaitu tha nihna (good and effective leadership) ah chuan hlawhtlinna hi kalphung/nihphung thlak danglam a hun/tul huna thlak danglam ngam te, ngaihtuahna thar leh thlirna thar tha zawk hmuh fiah a, hman tangkai thiam bakah mi nawlpuiin an ngaihtuah leh thlir dan ang ni lo, thlir dan danglam leh tha zawk a thil ngaihtuah leh thlir thiam (thinking outside the box) te hi thil pawimawh tak a ni. A khaikhawmnaah chuan, hruaitu tha chuan ngaithlak a peih tur a ni a, uluk leh chik taka thil thlir leh zir mi, a tul huna thil thlak danglam ngam, pawm dan leh tih dan, kalphung awm sa sahuai thing vawn tlut lo mi a ni tur a ni.

•      Mi fân thei/in pawt fan thei

Hruaitu tha chu dawhthei, fan thei, zuan zang leh nel a ni tur a ni. Hringnunah hian ruahman lawk ang thlap thlapin eng tik lai pawhin thil a kal reng thei lova, a hma a harsatna leh kawng daltu a lo awm chang pawh a beidawng a tawp mai lova, thil awm dan chik taka zir chunga an tih sualna lai hmuh chhuah tuma in en let a, bul tan that emaw, kawng danga kal a tul pawh a kal kawng thlak nachang hria hruaitu a ni tur a ni. Hruaitu tha chuan thil inthlak danglam zia ang zel leh a hma a chona/harsatna rawn inchhawp ang zia zelin a inpawt fan in, a in siam danglam thin a, eng chona leh harsatna pawh hmachhawn se a nel/fei tlat a, pehhelna zawng lovin chung thil te chu a hmachhawn thin a, harsatna leh buaina an tawh avanga a kaihhruai a te an zam a, an hnual lai pawhin kawng tharah hruaiin, a hma ang bawk a phur taka a hnung an zui a, an tih tur theuh an tih theihna turin a fuih thin.

•      Dawhthei leh tlo/fei, chu tih ruala tawp/bansan hun hria

A chung chiahah hruaitu tha chu mi tlo, fei leh hnual mai mai ngai lo a ni tur a ni kan tih rual khian,tlo leh fei ngat ngat ringawt hi hruaitu tha nihna a ni chuang miah lo! Harsatna leh chona avanga pehhelna kawng zawng zung zung mite hi hruaitu tha an nih ngai loh rualin, awmze awm tawh lo, sawngsawhlawt lo tur tih hre reng tawh chunga ngaihdan leh kalphung thlak duh tlat lo khawpa fei leh tlo hruaitu chu hruaitu tha a chhiar an ni ngai chuang lo. Chu vangin, hruaitu tha chuan eng chen nge tlo, fei leh dawhtheih a tul a hre tur a ni a, chu tih rual chuan huaisen taka tawpsan hun a hre tel tur a ni bawk. A hma lama kan sawi tawh ang khan ‘hun dik hriat’ hi hruaitu tha ze pawimawh ber te zinga mi a ni.

•      Mi inzir mi leh hmasawn tum mi

Hruaitu tha chuan hruaina hna ah hian sawisel bo, famkim (perfect/perfection) a awm thei lo tih a hre chiang tur a ni a, chu vang tak chuan sawiselna (criticism) a dawl zo tur a ni a, a dawl zo satliah mai ni lovin, sawiselna te chu insiamthatna atan a hmang tangkai thiam tur a ni. Tin, hruaitu tha chu thlen china lungawi ringawt zel lova hmasawn zel tum mi, midang ten an thlen chin thleng tura eng tik lai pawh a puih inhuam leh midang te theihna ti pung a, an chak lohna lai leh chakna lai hriatsak a, chung a hriatna te hmanga midang te tih hmasawn tum mi leh mahni pawh hmasawn tuma mi inzir peih mi a ni tur a ni.

 

Hruaitu Chi Hrang Hrang te

•      Midang te thlak danglam thei hruaitu (Transformational Leader)

Naupan laia thian ho inkawm khawmna kha han ngaihtuah let ila, kan thian ho/in kawm ho reng rengah khan ‘boss’ kan nei deuh zel tih kha han mitthla let ta ila. Kan boss te kha tumahin boss atana kan thlan leh ruat pawh ni lo, boss ena kan en nghal mai te an ni tih pawh kan mitthla-ah a lang nghalin ka ring! Khang kan boss/ring leader te kha an in tih thu vang leh an lal vang hrim hrim ni lovin, thian te ho khawm leh hui khawm thiam, fuih phur thiam leh kawng hrang hranga hmahruaitu an nih avanga boss dinhmuna lo ding ta kha an ni tlangpui thin a, chu chu hruaitu chi khat, transformational leader kan tih te chu an ni. Transformational leader te chuan an kaihhruai te chu an theihna sang ber leh an ti thei tih pawh an in hriat loh te thlenga ti thei turin an kaihruaiin an fuih thin a, anmahni, a hruaitu ngei pawhin a tih theih loh chu a kaihhruai te zinga ti thei an awm chuan hmang tangkaiin, pawl hmasawnna nasa tak an thlen thin a, midang te a tha zawnga thlak danglam thei hruaitu an ni. Transformational leader te chuan hma lam hun thui tak an thlir lawk thin a, an tum (goal) thlenna tur atan an lo inhmakhua lawk thin. Tin, an thil tum tih hlawhtlinna a nih dawn phawt chuan in thlak danglam leh thil thlak danglam an hreh lova, an kaihhruai mimal tin te chu hman tangkai dan tur an hria a, an chakna lai theuh chhawr tangkai dan an zawng thin a, midang an chher rualin, midang thawhpui pawh an thiam hle thin. Transformational leadership hi midang te chher hriamna leh an theihna zawn theuha hman tangkaina tha tak a nih rualin, mihring mizia leh theihna a inang vek lova, hruaitu tan a hun leh hmun bakah mihring hriat chian hmasak a pawimawh hle thung a ni.

Midang te ring thiam hruaitu (Delegative Leader)

Delegative leader chuan a kaihhruai te hnenah hna a sem zai thiam a, hruaina (leadership) ah chuan hruaitu inrawlh tam lohna ber hruaina anga ngaih te zinga mi a ni. Delegative leader te chuan an kaihhruai te hnena mawhphurhna leh chanvo an pek/hlan chhawn tawh chuan an hnathawh dan leh hnathawh phungah an va inrawlh vak tawh lova, an chungah rinna nghat ngamin, an hna theuh tlin taka thawk tura beiseina nen an kaihhruai te kutah an nghat hmiah mai thin. Mihring chherna kawng atan thil tha tak a ni a, chu tih rualin, hna an pek te chu an beisei leh duh anga an lo rintlak loh palh hlauh erawh chuan a pawi thui palh viau thei ve thung.

•      Mawhphurhna zawng zawng la thin hruaitu (Authoritative Leader)

            Authoritative leader te chuan an kaihhruai te chu keh thei dawm taka dawmin, an ai an awh zo hle thin. Chu tih rualin, authoritative leader te hi authoritarian leader/dictator, an duh dan dana rorel a, an kaihhruai te tih luihna nena an duh dan zawm tir leh inzui tir te nen erawh chuan hriat pawlh lo thung ila. Authoritative leader te chuan an kaihhruai ten an hnung an zui theihna turin kawng an sial thin a, kawng an sial kuak sa-ah midang te chu hahdam takin an rawn kal mai thin. Authoritatiive leader kaihhruaina hnuaiah chuan hruaitu chu kawng engkima midang te en leh innghahna a ni a, hruaitu chuan a kaihhruai mimal tin te chu a hre chiang a, a kaihhruai te pawhin an hruaitu chu kawng engkima an en ber leh an innghahna lungpui a ni. Authoritative leader te hi mi chak, taima leh thil ti zung zung mi an ni tlangpui a, an kaihhruai te tan chuan an hnung zui a hahdamthlak hle thin. Chu tih rualin, hruaitu pakhat duh dan leh ruahmanna ringawta kal hi a fuh lohna chin a awm thei a, tin, chu hruaitu awm loh hunah chuan a hmun ruak a zau viau thei bawk. Chu mai piah lamah, mahni thu duh lutukna thlenga awm palh thei a ni a, pawl chhungah neuh neuh a pian chhuah phah duh viau thung thin bawk a ni.

•      Kilkawitu hruaitu (Transactional Leader)

Transactional leader te hi chuan lawmman leh hremna an hmang tangkai thiam hle! He ti ang hruaitu te hi chuan an kaihhruai te chu an tih tur chin felfai takin an bithliah a, an chanpual theuh chu tha taka ti hlawhtling vek tura an beisei bakah, uluk takin an vil zui reng thin. Transactional leader te chu mi taima, mi ti chet chawt leh zawmthawt ngaithei lo tak an ni tlangpui a, chu ti ang tak chuan an kaihhruai te pawh chu an hna theuh tlin tak leh inpekna vawrtawp nena thawk a, hlen chhuak ngei turin an beisei thin. An beisei ang leh duh ang taka hna thawk leh thil ti thin te tan chuan he ti ang hruaitu te hi hruaitu hrawn nuam tak an ni a, tin, mihring theihna chher hriamtu hruaitu tha tak an ni thei bawk. Chu tih rualin, an mit tlung zo lova hna thawk thin leh an duh dan ang ni chiah lova ngaihdan hran lo nei te tan erawh hruaitu hrawn nuam tak an ni lova, thawhpui an har tlangpui thin. Transactional leader te hi mi chak, inpe leh ti kher kher an ni tlangpui thin a, mahni theihna ti pung duh leh thawkrim te tan chuan hruaitu tha an ni. Chu tih rualin, an kaihhruai te an beiseina leh duh dan a san thin em avangin, mi zawng zawng thian tha an ni lem lova, chu chuan thawhhonaah inlungrual lohna a thlen thei a. Tin, an lawmna thlentu te chauh duhsak a, an beisei pha lo te chu zilh/hrin mai thin hruaitu an nih avangin, thawk ho leh thawk ho inkarah hruaitu duhsakna (lawmman/award) beisei vang chauh, hna tha taka thawh duh vang hrim hrim ni lova hna thawk an awm duh phah hle thin a, mi tam tak hmasawnna ti thuanawptu an ni thei bawk.

 

•      Huapzo hruaitu (Participative Leader)

Participative leader te chu mi dawhthei, mi dang te ngaihdan ngaithla peih, kawng engkima huapzo (comprehensive/inclusive) ngai pawimawh, midang te nena indawr tawn thiam leh thuneihna leh mawhphurhna semtu ni ringawt lova, midang te nena thuneihna leh mawhphurhna lak ho thiam hruaitu te an ni. Participative leader te chuan hruaina hna an thawhna kawnga an ngaih pawimawh ber chu mitin telna leh tha thawhna (inclusive participation) a ni a, harsatna chinfelna kawngah a ni emaw, thu lawmawm bawhzuina leh tih hlawhtlinna pawh nise, a tel te zawng zawngin ‘ka tel ve, tha ka thawh ve,’ an tih vek theihna tur hi an ngaih pawimawh ber a ni. Hei vang hian participative leader kaihhruaina hnuaiah chuan tu te pawhin an ngaihdan te ngaihsak leh ngaihhlut a ni tih an in hria a, thawhhona tha leh inpekna thuk tak a awm thei thin. Chu tih rualin, midang te thu leh hla an ngaihchan lutukna leh huapzo an ngaih pawimawh lutukna lamah hruaitu an nihna anga an mawhphurhna leh zahawmna hum him zawh loh palh leh, an kaihhruai te ngei ngei pawhin an duh khawp loh hun a thlen palh a hlauhawm thei thung.

 

•      Chhiahhlawh hruaitu (Servant Leader)

Servant leader te chu mi pawisawi hlau em em, thu hnu dawn tak, an duh dan leh ngaihdan aia midang te duh dan leh ngaihdan dah pawimawh leh ngai pawimawh thin hruaitu te hi an ni. He ti ang hruaitu te hi chuan an kaihhruai te chu an chhungril nun leh rilru put hmang thlengin an hmu chiangin an hre chiang thin a, thawhhona tha siam turin mi dang te pawisawi lo thei ang bera hruaina hna thawh chu an tum ber a ni. Chu tih rualin, an kaihhruai te thu thu in an kawi kan tihna erawh a ni hauh lo thung. Servant leader te chuan thutlukna siam dawn reng rengin a tam zawk ngaihdan leh a tam zawk ten an chhawr theih tur lam hi an ngaih pawimawh ber a ni a, mi zawng zawngin thutlukna-a an ngaihdan leh duh dan an thawh vek thin avangin, thawhhona tha tak a awm thin a, hruaitu chuan a kaihhruai mimal tin te ngaihdan leh duh dan ngaihthlaksak a, a thutlukna siamna kawnga a telh vek thin avangin servant leadership hi pawl kaihhruaina him tak te zinga mi a ni. Chu tih rualin, midang te venthawn lutukna lamah thu mum neih hleihtheih loh palh leh hruaitu in thu a vuak thlak a hun tawh lai a midang ngaihchan avanga thu mum neih theih loh, hruaitu rin tawk loh phahna te thlengin a thleng thei ve thung a ni.

            A chunga kan han tarlan hruaitu chi hrang hrang te khi kan tarlan ang khian thatna leh that lohna an nei vek a. Chu vangin, hruaitu chi hrang hrangah khian chu mi, kha mi chu a tha ber emaw, chu mi ang hruaitu chu nih tum tur tih lam zawnga sawi leh thurawn inpek hi ka tum a ni lova, thil tha ber pawh niin a lang lo. Chu ai chuan, hruaina hna (leadership) a ka ngaih pawimawh em em, ‘a hun leh hmun hriat’ hi a pawimawh ber zel tho vin ka hria a. A hun leh hmun a zir leh kan kaihhruai te azira hruaitu ze hrang hrang kan lan chhuah tir thiam hi a pawimawh lai ber chu niin ka hria.

 

Communication Skills:

            Communication Skills awmzia hi thui fahrana han sawifiah leh pawh a tulin ka hre hranpa tawh lova. Chu tih rualin, hei chauh hi chu ka’n tarlang hram teh ang. Communication skills han tih hian midang te nena inbiak tawn/in dawr tawn thiamna tiin a sawifiah mai theihah ngai ila. Chu tah chuan, communication skills hi kawng khat chauha kal (one way street) ni lovin, kal lam leh haw lam kawng awm (two way street) a ni tih hi kan hriat a pawimawh hle. Chu vang chuan, midang te nena indawr tawn thiam (good communicator) ni tur chuan midang te va dawr thiam nih ringawt a tawk lova, mi dang te dawr thiam (‘ka thiam loh a ni’tih a ‘thiam’ anga lam rik tur) kan nih tel a ngai bawk a ni. Hei vang hian, hruaina hna (leadership) leh mi dang nena indawr tawn thiamna (communication skill) hi thil inzawm tlat a ni tih kan hriat a pawimawh awm e.

Communication Skills Pawimawhna

            Midang te nena indawr tawn thiam pawimawhna hrang hrang te hi tawi te te in han sawi zau ta ila:

•      Midang te nen inlaichinna tha min neih tir

Mihringah hian kan duh zawng leh ngaihdan kan sawi that theih lohna, sawina hun kan chan ve mang lohna te ai chuan kan duh duh kan sawi theihna, dawhthei taka kan sawi apiang min ngaihthlaksak a, kan mamawh huna thurawn leh ngaihdan min sawipui theitu te bul zel hi awm nuam kan tihna a ni thin. Hei hian communication skill (kawng khat kal ni lova kawng hnih kal) pawimawh zia leh mihring inlaichinna atana a pawimawh zia chu a ti lang chiang mai awm e. Tin, hei hian a tih lan chian em em pakhat chu, communication skills tha nei tur chuan midang te thurawn petu leh hrilhtu/va dawrtu chauh ni lova, midang te ngaithla peih/midang te tana dawr nuam nih a tul tih hi a ni bawk awm e.

 

 

•      A hun leh hmun azira tawng dan leh awm dan kan thiam

Communication skills nei tha te chuan tawng hun leh ngawih hun an hria a, an mi dawr te leh anmahni dawrtu te mizia leh duh zawng leh duh loh zawng thlenga an hriat chian avangin tawngkam cheh tur leh cheh dan tawk te, a mihring azira insiam rem dan tawk te an thiam thin avangin an bula awm a nuam a, midang te tan thian tha an tling thuai thin. Chu mi piahah chuan, a hun leh hmun azira sawi tur leh sawi loh tur thliar thiamna a keng tel hi communication skills neih that a pawimawh em em na chhan pakhat chu a ni.

•      Midang te zirtirtu tha leh kaihhruaitu tha-ah min siam

Communication skills nei tha te chuan midang te an ngaihthlak peih leh chik peih thin avangin an va dawr te leh anmahni rawn dawrtu ten an mamawh an lo hre thei thin a. An mamawhna takah leh tanpui an ngaihna lai takah te lo tanpuiin, zirtirna leh kaihhruaina tha an pe thiam thin a, chu chu midang te tana an hlut em em na chhan pawh a ni.

•      Midang te dinhmun (ngaihdan,pawm dan etc) atanga thil thlir dan kan thiam

       Mi hrang hrang an dawr tam avang leh mi hrang hrang ten an rawn dawr tam avangin communication skills nei tha te chuan an ngaihdan leh pawm dan neih sa piah lamah, midang te dinhmuna in din tir/in chan leh midang te thlirna tlang atanga thlir dan thiamna an nei thin a. Chu chuan, mihringin a mamawh ber te zinga mi, in ngaihsakna, in ngaih pawimawhna, in hriatthiamna, in duhsakna leh inpuih tawnna kawngah chet lak dan tur a hriat tir thin a, midang te aiin communication skills nei tha te chuan an mihringpui te hriatthiamna an nei bik satliah ni ringawt lovin, hriatthiam dan an thiam bik thin a ni.

•      Midang te hmin/hneh theihna min pe

            Communication skills nei tha tur chuan midang te chik peih, ngaihthlak peih leh anmahni hriat chian a tul kan tih ang khan, chu ti ang taka ti thei mihring te chuan an mihringpui te rilru leh thinlung an hmin in, an hneh thei bik a, an kiangah chuan an mihringpui te pawh an thla a muangin, thinlung inhmu tawna an indawr thin avangin an thurawn pawh an ngai pawimawh bik thin a ni.

 

Types of Communication Skills

•      Tawng (language)

Communication skills tha nei tura pawimawh hmasa ber chu tawng (language) thiam hi a ni. Chu tih rualin, tawng thiam kan han tih hian tawng thiam tam (quantity) lam hi kan sawi tum ber a ni hran lova, a hun leh hmun azir leh kan indawr tawn pui tur te nena kan in hriatthiam tawn theihna tura tawng thiam hi kan sawi tum ber zawk chu a ni. Helaia ka sawi uar duh lai chu, tawng hi mihring kan inbiak tawnna hmanraw pakhat (medium of communication) a ni tih hi kan hriat reng a pawimawh a. Min betu leh kan va biak te nen kan in hriatthiam tawn theihna khawp a nih chuan a tawk em em a ni. Entirna atan, mi tam zawk hian English hi kan tih khai deuh ni te hian a lang a, sawi sual palh, tih dik loh palh kan hlauh luatah hian a tulnaah pawh kan hmang tha ngam lo thin niin a lang. Tawng reng reng hi a in rem khawm dan dik taka hmanna hun, hmanna hmun leh hmanna tur chu a awm teh meuh mai. Chu tih rualin, mi tam zawkin kan pianpui tawng ni lo tawng dang (English kher ni lo) hman kan mamawhna hun leh hmun hi chu in biaktawnna/in dawr tawnna (communication) atan hian a ni ber a. Tawngkam bungraw ulh, ril leh un pui pui hlir hmanga thu sawi thei pawh ni ila, kan thusawi ngaithla tu khan a hriatthiam chuan si loh chuan engmah awmzia a awm lo. Chu vangin, communication skill tha nei tur hian tawng dang nal taka thiam tluk chu a awm lo na in, a dawrtu leh a dawra ten kan in hriatthiam tawnna khawp tawng kan thiam mai kha a tawk em em a ni tih hi vawng reng ila a tha awm e.

•      Ngaihthlak peih mi (good listener)

Midang te nena indawr tawnna-a pawimawh em em mai chu a hma lama kan sawi tawh ang khan, tawng (speaking) piah lama ngaithlak peih mi nih hi a ni. Communication skill tha nei tur chuan kan tawngkam thiam dan te, kan duh kan sawifiah thiam dan leh midang te kan hmin theih dan te hi tehkhawng pawimawh tak an nih rualin, mi dang te thu hla uluk taka ngaihthlak leh dawnsawnsak peih mi nih hi thil pawimawh ber te zinga mi a ni. Dawhthei taka midang te thu hla kan ngaihthlaksak hian kan ngaihsak a, kan ngai pawimawh a ni tih a lantir a, uluk taka kan ngaihthlak hian an mizia leh engnge an duh leh mamawh tih te kan hre thei thin. Chu vangin, communication skill nei tha chuan tawng hmang a thiam a ni satliah mai lova, midang te thu hla chik leh uluk takin, dawhthei takin a dawngsawng thei thin a, chu chu midang te nena in dawr tawn a thiam em emna chhan pakhat pawh a ni thin reng a ni.

 

•      Uluk taka thlir/thlithlai (Observation)

Midang te nen kan indawr tawnna hi tawngkam leh tawngkam chauh a nih loh chang te a awm a, tin, thu khuh tak chunga indawr tawn a ngaih chang te pawh a awm thin. Hei vang hian, communication skill tha nei tur chuan mihring chet zia leh hmelhmang ngun leh chik taka zir leh thlithlai mi nih a ngai a ni. Entirna atan, thil tam takah chuan kan pawmpuina leh pawmpui lohna te, kan lawmna leh thinrimna te hi mihring hian tawngkama sawi chhuak kher lovin, kan hmel hmai hmang te, kan aw ki (tone) hmang te leh kan chet zia hmang te in kan lan tir thin a, chu chu communication skill pawimawh tak pawh a ni reng a ni. Heng thil hmanga midang te kan va dawr emaw, midang ten min dawr emaw a nih chuan, an che zia leh hmel hmang te uluk taka kan lo chik a, keimahni ngei pawhin chu ti ang bawk a chhan let chi a nih leh nih loh thlenga ngaihdan kan lo siam zung zung a tul chang a awm thin a. Chu tak chu communication skill nei tha te chuan a hun leh hmun an thliar thiam thin. Midang te nena indawr tawnna hi tawngkam chauh a ni lo tih hi kan hriat chian a pawimawh hle a ni.

•      Midang kawm tam atanga thiam thil chhar chhuah (Interpersonal Skills)

Midang kan kawm tam/rual kan pawlna atanga midang te nena in dawr tawn thiamna  kan chhar chhuah (interpersonal skills) pawimawhna hi tunlai khawvel, mahni-a kan mobile phone nena kan tlei em em tawhna khawvelah hian in hrilh thar leh kan mamawh hle in a lang. Mi hrang hrang, mize hrang hrang hrang leh tawng hmang hrang hrang nei te kan kawm tam atang hian communication skill tam zawk hi mihringin kan lo zirin, kan chhar chhuak thin a. Entirna atan, mi dawra inhlawh thin chuan a mihring dawr tam ber te leh rual a pawlna tam ber chu dawrtu (customer) leh sumdawng te an nih miau avangin, nikhua a lo rei chuan sumdawng leh dawrtu inlaichinna te, chin dan tha leh tha lo te, dawrtu te hip dan leh tih lawm dan te a lo thiam mai thin a. Heng thiamna (skill) a chhar chhuah thar te hi a hranpa in khawiah mah a zir lova, a chen tamna hmuna a mihringpui te nen an in dawr tawn tamna atanga a zir chhuah vek a ni. Chu ti ang zelin, nun kawng hrang hrangah hian, midang te nena nunhona leh mihring leh mihirng rem taka kan chen ho za theihna atana kan nuna zir thiam ngai (life skills) tam zawk te hi kan mihringpui te atanga kan zir chhuah tur leh zir chhuah ngai a ni tih hi kan theihnghilh loh a pawimawh hle a ni.

•      Mahni inrintawkna (Self-Confidence)

Midang te nena kan indawr tawnna, a bikin kan hmelhriat vak loh te nena kan indawr tawnna ah hian a pawimawh ber ti a sawi theih chu mahni inrintawkna hi a ni. Mi tam tak chuan mahni inrintawkna leh chapona hi kan ngaihfin palh fo mai a, thil inang lo, mahse, inzawm deuh roh si a nih avang hian kan hriat pawlh thin niin a lang. A awmzia leh a danglamna lam chu sawi chiam ka tum lo na a, mahni inrintawkna hi chapona nen a inan loh rualin, a lutuk chinah chuan chapona-ah a chang daih thei tih erawh kan hriat a tha awm e. Mahni kan inrintawk miau chuan midang te nen kan in dawr tawnna kawngah mi rilru kan hnehin, kan sawi duh leh tum tak pawh chiang takin kan sawiin, kan hriattir thei thin dawn a. Mahni inring tawk tak te thusawi hi chu a lo ngaithlatu leh dawngsawngtu te tan pawh a rinawmin a rintlak nge nge thin. Hei vang hian, communication skill tha nei tur chuan mahni inrintawkna neih that te, zak thei lo ni lova, a huna zah loh theih te hi thiam thil kan zir tur pawimawh tak a ni.

•      Midang te rilru thlir/hriat thiamna (Emotional Intelligence)

A hma lama kan sawi tawh ang khan, communication skill tha nei tur hian tawngkam thiam satliah ringawt a tawk lova, dawhthei taka midang te ngaihthlak bakah an rilru chhungril, an thinlung leh rilru put hmang hmuh thiam leh hriat thiam theihna (emotional intelligence) neih that hi a pawimawh hle. Emotional intelligence neih that loh avang hian tum reng vang ni lovin, mi rilru tih nat leh hliam palh hi thil awl tak a ni. Midang te nena kan indawr tawn reng rengin, engnge an rilru put hmang, an huat thu engnge, rilru natna leh hahna te an lo nei sa em etc tih lam ngaihtuah hmasa eih lova mahni puah puah a puah chhuah phawng phawng te hi midang te pawi leh huatthu min sawi tir tu langsar tak a ni. Entirna atan, tu emaw chu cher duh ngawih ngawih chungin a cher hleithei lova, a rilru a hrehawm ruk em em laia fiamthu ti taka ‘I va thau ve, in diet rawh,’ lo tih ngawt ang te hi mi thenkhat tan chuan nuih liampui mai mai theih a nih laiin, thenkhat tan chuan mahni insitna nasa tak thlentu te a lo ni thei. A tawi zawngin, emotional intelligence nei tha chuan a tawng hma in thu hnu dawn nachang a hre thin a, chu tak chu communication skill tha a neih bikna chhan pawh a ni reng a ni.

•      Taksa chet zia leh hmel hmai hmanga lan tir (Non-Verbal Communication)

Kan hmel hmai siksawi kual dan leh kan che zia te hian tawngkama sawi duah aiin a chang chuan midang te tan lawmna a thlen tam a, chu ti ang chiah chuan mi dang te pawi pawh a sawi thui thei viau bawk. Entirna atan, thusawi ngaihthlak lai a maimitchhin daih te, hnuai lam bih tlat te, lo thawk (breathe) rik deuh hulh te, ning tih hriat taka chet zia-a lan tir etc te hi tawngkam tluk zeta na-a midang te rilru hliam thei a ni tih kan hriat a pawimawh hle. Communication skill nei tha chuan heng kan sawi te hi a lo nei a nih pawhin thup hun leh thup nachang a hre thin a, chu ‘thup thiamna/lan chhuah tir loh thiamna’ tak chu communication skill pawimawh em em pakhat a lo ni reng mai. Heng te te te hi mi fing leh fing lova min chhuahtu, dawhthei leh midang te ngaithei lova min siamtu chu a ni a, ho te-a kan chet zia leh hmel hmai hmanga kan lan chhuah tir (simple gesture) te hian kan mihringpui te ah a tha zawng leh a tha lo zawngin thui tak nghawng a nei thin/thei tih kan hriat reng hi a pawimawh hle a ni.

•      Mobile Phone hman dan mawi (Mobile Phone etiquette)

Tunlai khawvela midang te nen kan in dawr tawn thiamna nasa taka min tih chhiatsaktu chu mobile phone hman chungchanga hmangchang hriatna (etiquette) kan tlachham hlawm ta lutuk hi a ni. In leng neih lai a kan in leng te pawh en mang lova mobile phone bih ngur ngur te, titi phung leng an vawr pawh a hawi chhuak eih lova, mobile phone-a social media chat chhiar pah emaw, games khel pah emaw a chhan mai mai te hi mi pangngai chuan a tih loh tawp tur thil a ni. Tin, phone-ah mi kan bia emaw, miin phone-ah min rawn bia emaw, midang biak laklawh laia bula mite va biak daih te, chu ti ang bawkin, bula mi te nen hmaichhana titi mawlh mawlh laia phone-a midang biaksan/call chhan san daih te hi a mawi lova, loh theih loh thil a nih loh chuan pumpelh hram tum ila, loh theih loh a nih pawhin mawi taka an mi hriatthiamna dil hmasak te hi a mawi ni mai lovin, midang te kan zahna entirna leh lantirna pawimawh tak a ni tih kan hriat a tul hle. Tin, social media-a kan tawngkam hman leh kan thusawi duh dan te hian communication skill kan nei tha nge tha lo a ti lang chiang viau thin bawk. He mi chungchang hi chu sei tak sawi leh ziah tur a awm avangin duhtawk ta ila, kan han tarlan tlem te atang pawh hian communication skill tha nei tura mobile phone hman dan mawi/hmang chang hriat (mobile phone etiquette) pawimawh zia chu kan hre thei awm e.

•      A taka sawi ho leh phone hmai phena sawi ho (virtual discussion) hman hun thliar thiam

Tunlaiah chuan internet khawvelah kan cheng tawh a, hmun leh hmun leh hmai chhan leh hmai chhana a tak a sawi ho leh titi ho aiin, phone hmai phena sawi ho (virtual discussion/online meeting) kan chingin, kan uar chho ta viau mai a. A samkhaiin, hun leh tha sen a ngai vak lo bawk nen, changkanna in kan nuna awlsamna a rawn thlen tha tak a ni tih hi chu phat rual a awm lo. Chu tih rualin, a tul leh pawimawh dan azira a taka sawi ho leh phone hmai phena sawi ho chi leh sawi ho tur leh a hun thlan thiam hi communication skill tha neihna pawimawh tak pakhat a ni ve tlatin ka hria. Entirna atan, hmai chhana thil ngaihtuah ho leh sawiho na-ah chuan a sawitu in a sawi tum chu a tawngkam mai bakah a hmel hmai awm dan (a thutak dan, thinrim dan etc) atangin engkim kan hmu thei a, chu chuan thutlukna kan siamna kawngah pawh kawng ro thui tak a su thin. Mahse, hi hi phone hmai phen a thil ngaihtuahhona ah chuan a awm ve ta tlat lova, a thinrim tih entirna atan thinrim lem (smiley) emaw, ngaihtuah ngun deuh tul a tih zia tih lanna atan zawhna entirna (question mark) lem rawn tlar tuarh pawh nise, hmai chhana hmuh nen chuan a inang tak tak thei lova, an ngaihdan leh rilru dik tak a phawk chhuak zo tak tak lo. Hei vang tak hian phone hmai phena thil tih atang hi chuan a hma lama kan sawi, emotional intelligence ang te kha zir leh hriat ngaihna a awm lova, a hun leh hmun a zira hman dan tawk leh hmanna hun kan thlan thiam a pawimawh takzet a ni.

 

 

•      Sawi chhuah/chet zia-a lan chhuah tir dan thiam (presentation Skills)

Midang te nena in dawr tawnna kawnga pawimawh em em chu sawi tum inang rengah pawh kan va sawi chhuah/lan chhuah tir dan (presentation skill) hi a ni. Hei hi lo ngaihtuah ve mai mai chhin teh. Mi tu emaw thilpek I va pe a, I thilpek lo dawngtu chuan, “Ka va han lawm tak em! He ti ang thilpek hlu leh tha reng reng dawn ka lo in beisei lo. I va han ti lawmawm tak! Eng tin nge ka rulh let ve theih ang che aw,’ tih aiin, ‘Ka lawm e,’ to ti bul deuh hmuk se, a khawi zawk nge nangmahah tla na zawk ang? Thinlung chhung leh rilru chhungrilah chuan, thinlung tak leh rilru chhungril tak atangin I thilpek dawngtu chu lo lawm pawh nise, a lawmna a lan chhuah tir dan khan a lawmna tak tak kha a phawk chhuah zawh leh si loh chuan, lawm lo/lawm vak lo nen khan a lan chhuah dan a inan reng avangin danglamna teh chiam a awm lo! Hei hian sawi duah lo pawhin kan sawi chhuah/chet chhuah/lan chhuah tir dan (presentation skill) in communication skill tha kan neih leh neih lohna-a kawng ro a sut zia chu a ti chiang mai awm e. Tin, he mi kawngah hian kan sawi tum leh kan hrilh tura ten lo dawngsawng se kan tih dan ang taka an lo hriatfiah a, an lo dawnsawn thiam theihna tura tawngkam hman uluk te, sawi tur chin hriat leh sawi loh tur chin hriat te thleng hian communication skill tha nei tur chuan kan hriat hran a, kan hman thiam a pawimawh hle a ni.

 

            A khaikhawmnaah chuan, hruaitu tha chuan ‘hruaitu tha’ a nih theihna turin ze pawimawh (trait) hrang hrang a nun chhuahpui tur pawimawh tak tak leh midang te nena an in dawr tawnna kawnga a hriat leh hman tur thiam thil (communication skill) pawimawh tak tak a awm tih hi hriat hmasak a ngai a. Chung zawng zawng atan chuan a sap tawnga ‘empathy’ kan tih hi kawng hrang hranga a neih a pawimawh hle a ni. Empathy chu midang te hriatthiamna, dawhtheihna leh an dinhmuna va in chan a, an rilru put hmang leh thinlung thlenga va hriatthiampui leh va hmuhpui thiam hi a ni satliah ngawt lova, a pawimawh lai ber chu chung mi te chuan an dinhmun, rilru leh thinlung te chu kan hriatthiampui a, kan hmuhpui thiam a ni tih chu an hre ve em tih lai tak hi a ni a, a tawi zawngin, kan hriatthiam leh pawmpui thiamna mai kha a tawk lova, kan hrethiam in kan pawmpui thiam a ni tih chu an hrethiam ve in, min pawmpui thiam let ve em tih lai hi a pawimawh lai tak chu a ni.

            A tlangkawmnaah chuan, hruaitu tha nihna leh midang te nena in dawr tawn thiamna te hi a hun leh hmun azir te, a mihring azir te a danglam leh insiam rem ngai reng thil a nih avangin ‘a tha ber’ emaw, ‘a fuh ber’ emaw a awm thei lo tih hi hria ila. Kan thusawina pumpuia ka dah pawimawh em em, ‘a hun leh hmun azira hman/lan chhuah tirna hun leh hmun,’ hriat hi hruaitu tha nihna leh midang te nena in dawr tawn thiamna atana bul tanna pawimawh ber a ni tih hi vawng reng ila a tha awm e.