Social Media leh Nun Hona

 

Hringnun a thil pawimawh ber pakhat chu chen ho/nun ho hi a ni awm e. Mihring te hi Pathian in min din tirh ata khawsa ho tur leh in mamawh tawn a, in peizawn tlang tura a siam te kan ni a. Mihring hmasa ber, Evi leh Adama te atanga hmasang mi te zawng zawng pawh kha nung hova, a thlum a al ei za a lo dam khaw chhuak chho leh vawiin a keini ho kan lo awm theihna atana lo khawsa ho thin an ni.

Khawvelin hma a lo sawn zel a, thiam leh finna te nasa takin a lo pung chho va, chu chuan kan nun phung pawh nasa takin a rawn ti danglam a. Kawng tam takah awlsamna leh remchanna, kan la hmuh leh hriat ngai loh mai pawh ni lo, suangtuah pawh kan lo suangtuah thiam loh leh suangtuah phak ngai loh thil tam tak a rawn hring chhuak a. Vawiinah chuan heng thiam leh finna lo sang zel ten a rawn hrin chhuah thil hrang hrang te hi mihring te nunah hian a bet tlat tawh mai ni lovin, mihring te hi chung thil te ah chuan kan bet tlat tawh zawk a, pawisa phek, a hnung leh hma lak hran theih loh ang chiah hian, kan nun leh chung thiamna leh finna hmanga thil thar lo chhuak te chu a insuih fin tlat tawh a, pawh then theih pawh a ni tawh lo. Pawh then theih a ni tawh lo mai pawh ni lovin, a la in suih fin nghet tial tial zel zawk dawn ni pawhin a lang. Thil reng reng, lei leh van inkara awm zawng zawng hian thatna a neih rual a that lohna a nei vek angin, chung thil thar lo chhuak, kan nun ti awlsamtu leh ti nuam tu ngei ngei te pawh chuan kan nunah harsatna leh buaina an rawn thlen ve tho mai a. ‘Boruak’ kan han tih ringawt pawh boruak thianghlim, mihring nunna atana pawimawh tawpkhawk a awm lai a, boruak tha lo, tur (poison) hlauhawm tak, a hipa hip luh chi ziazang ni lo a awm ve tho nen te pawh hian a tehkhin theih awm e.

Chung thiam leh finna rah chhuah zinga pakhat chu social media hi a ni. Social media hi engnge a nih, engnge a thatna, chu ti kha ti tih vel chu sawifiah hranpa a ngai tawh lova. Hnam dang tawng a ni chunga ‘social media’ tih thu mal hrilhfiah hran teh chiam kan ngai tawh lo ringawt atang pawh hian, he thilin kan nuna nghawng a neih len zia chu a chiang reng! Thil reng reng hian thatna leh that lohna an nei vek kan tih tawh ang khan, social media that lohna/nghawng tha lo zinga ka vei em em pakhat chiah han chip nawi dawn teh ang. Chu thil chu social media in mahni induhtawkna/tha in tihna, midang aia mahni indahsanna hmanga midang te hnuaichhiahna leh mahni thu duhna, a sap tawnga ‘egotism’ a min hruai luh nasatzia hi a ni. Thu dang alai chuan, kan tawng, Mizo tawng hi eng ti zia nge maw ni, thu mal pakhat lek sawifiah tur pawh a thumal tam fe hmanga sawifiah a ngai tlat bik zel (ka tawngkam thiam in a daih lo zawk nge?) hi ka ti thin…sap tawng hi chuan kekawr te ang deuh, tawi si, fun kim si hian a fiah mai zel bik thin si a!

Eng pawh chu nise, kan thu khel turah I lut leh ang. A tir lama sawi tawh ang khan, mihring nihphung hrim hrim hi in ai lum tawn tur, in tanpui tawn a, nung ho leh khawsa ho tura duan kan nih vang hi a ni ang, khawvel puma heti zat khaw awmah hian mi pakhat chauh chenna khua hi zu awm hauh lova! Vawiin thlenga hnam hnufual leh mawlmang, Amazon ngaw chhunga cheng, khawvel changkanna in a la thlen phak loh te pawh khu a mala khawsa reng reng an awm lo. Chu chu thil mak a ni hran lova, a chhan chu kan sawi hnu bawk, mihring nihphunga khawsa hova, nung ho tura siam kan nih vang mai a ni. Mahse, chu nihphung, mihring hmasa ber ten he leilung an rawn luah tantirh ni atanga Committee in a rel vang pawh ni hauh lova mihring piang tawh phawt ten kan sahuai thing vawn tlat, ‘nunho na’ leh chu nun hona nun nei tura zirlai pawimawh tak kan zir tur, kan hringnun zirlaibu peng pakhat chu social media hian min rawn ennawn sakin, a chhunga thu inziak te a rawn ti danglam ta tlat mai hi a ni ka vei em em chu.

Han ngaihtuah vang vang teh. Mihring te chauh hi he nun ho na, hringnun zirlai zirtu hi kan lo ni hauh lo. Ramsa te khawvelah pawh hian he thuthlung hi a te ber atanga a lian ber thlengin kan lo vuan vek mai hi a lo ni a. Mahse, ramsa te zingah chuan a chak leh thei apiang din chhuahnaa in nghat nun ho na khawvel a ni a, mihring te zingah erawh chuan a chak zawk ten a chak lo zawk te kan in dawm kanna, mi fel lo te a fela te zara kan dam khawchhuah ve theihna, mi thatchhia ten mi taima te zar zova nun nuam kan chen ve theihna khawvel a ni tlat mai a, chu chu ramsa leh mihring te a nun ho na thuthlung inan lohna tak pawh a ni. Mahse, chu tak chu social media hian a rawn pal darh mek chu a ni si.

Internet khawvela thil thliar thiam har tak mai chu a tak ram (reality) leh suangtuahna ram (virtual world) hi a ni. Internet khawvela kan luh hma kha chuan tu emaw hnena eng emaw va sawi tur pawhin hmaichhana va hmuh kher a ngai a, engkim mai kha a tak (real) em em vek a, hmun leh hmun, hmaichhan leh hmaichhana tih leh sawi ngai thil vek kha a ni thin a. Kha khawvelah kha chuan mitin kan fimkhur a, mi hmai kan zah a, chu nun ho na thuthlung zawm ve thei lo te kha chu veng pum, khaw pum leh ram pum titi an tling thuai mai thin. Kan mihringpui te nena inrem taka cheng za a, nung ho tur chuan kan duh dan kan sahthlak then a ngai a, kan sawi duh zawng zawng kan sawi chhuah a rem lova, hmaichhana han in tih bawl bawl kha chu mi pangngai chuan pumpelh hram kan tum thin a. Chu ti ang tur chuan mahni theuh kan inzir a, kan insum a, nun ho dan phung kan zirin, kan thiam thin. Mahse, internet khawvelin a rawn hrin chhuah, social media khawvela kan luh tak hnuah erawh chuan mahni mihringpui te zahna te, inzah tawnna te, hmai hma in ven tawnna leh insum karna te kan tlachham sawt ta hle mai a. Kan biakna khawl te hmai eng phena biru chungin, kei ber ka ni emaw inti in mi titi na karah pawh ring rawlh kim ve vek kan tum tawh a, kan ngaihdan min tawmpui lo tu te lah kan vawm let nghal tawlh tawlh zel tawh mai a, chu chuan a tak rama kan nun ho na nihphungah nasa takin nghawng a nei ta a ni.

Social media khawvelah chuan midang te nen han awm hovin han tla ho thin mah ila, kan duh dan zawnga thil a kal loh hlekin kan chhuahsan nghal zung zung (group leave) thei a, kan ngaihdan min tawmpui lotu te emaw, kan mi ngei leh huat deuh apiang te lah anmahni be tawh ngai miah lo tur leh anni pawhin min rawn biakpawh theih tawh ngai miah lohna turin kan in dang char tawn (block) hmiah hmiah zel tawh mai bawk si a. He ti ang a mahni lenna tawk, mahni ngaihdan milpui te nen chauh a nun ho kan tumna tih hlawhtlin theihna tur awlsam zet mai social media in min rawn chhawpchhuahsak takah hian kan rilru puthmang thlengin a lo danglam a, kan ngaihdan min tawmpui thei lotu te zing atanga inpu chhuakin, social media khawvel kil khatah rotekawla sepa ang maiin, min thlawptu te leh kan ngaihdan min tawmpuitu te nen kan in kulh hrang ta fir fer hlawm a. Hmaichhan leh hmun leh hmuna chu ti ang a tih tur chu ni ta se, mi tam tak hi chuan social media khawvela kan chet phung tam tak hi chu kan ti duhin ka ring lova, kan rilru puthmang tam tak te pawh hi kan lo pu a nih vek pawhin, kan tih lan/lan chhuah tir duh ka ring hauh lo. Mahse, social media khawvelah chuan ualau takin midang ngaihdan leh duh dan kan pawmpui lohna leh kan tawmpui lohna te, kan lungawi lohna te chu kan lan tir a, thu a tawp e lumam tiin kan chhuahsan in, kawng kan in khar hnan ta hmiah hmiah hlawm a. A tak rama hmaichhan a kan inhmuh leh pawhin, chu social media khawvela kan in mu leh ar na chu kan chhawm ta zel bawk si a, nun ho kan thiam lovin, sep sep, nep nep a lo tam ta em em ringawt mai hi a pawi takzet a. Internet kan hmelhriat hma a vantlang leh chhungkua in enkawlna leh inthununna tha tak tak te pawh kan ngaithei tawh lova, mahni duh dan leh ngaihdan dinchanpui tum ran in, min hnial kalhtu leh min tawmpui lo tu apiang te lak atangin kan inthiar fihlim hmak hmak a, mahni duh dan dana kan tal vel theihna leh midang te len ve lohna khawvel, mahni chauh va, mahni duh dan leh ngaihdan chauh behchhana kan khawsak theihna tur khawvel zim te ah he social media hian min dah hrangin, min khung hrang ta fir fer hlawm chu a nih ber hi maw! Hei hi kan nunphung tur, nun hona thuthlung kan in zirtir dan leh kan in kawhhmuh dan tur a nih chhoh dawn zawngin, chhuan thar lo chhuak zel tur te kuta kan ram leh hnam dam leh dam loh a in nghah hunah chuan he ram leh hnam hi a ngaihtuahawm khawp ang le!