Mi Thiam Vs Mi Thiam Bik

Mizo te hi a hnam ang pawh a thiam thil ngah leh zei tak kan ni tiin kan sawi fo thin a, a dik hle pawhin a lang. Infiamna kawng hrang hrangah te hian a mawi tawk hian kan ti thei ve zul zel emaw tih tur a ni. FIFA World Cup a zawh ve leh mipa naupang ten football pheikhawk an lei sup sup a, nuam ti takin an inkhel leh thei mai a. Chu ti ang bawkin, boxing lar lai a nih pawhin inelna-a tel thei khawpa thiam ve nial nual an rawn chhuak leh teuh mai a, zai intihsiakna-a zaithiam inthup lo tam zia te hi! Hnam dang te nen han khaikhin pawhin thiam thil ngah tak kan ni pawh in ti ila dawt muhlum zawng a ni hauh lo. Chu tih rualin, ‘thiam thil’ ngah hnam kan nih lai hian ‘thiam bik’ ngah hnam kan ni em tih erawh ngaihtuah fe tham a awmin ka hria. He mi kawnga mawhphurtu lian tak pakhat chu ‘Kohhran’ leh‘Khawtlang/Vantlang’ hi niin ka hre bawk.

Khaw tin leh veng tinah hian ‘mi bik’ ti a kan chhal, kawng hrang hranga vantlangin kan chung en deuh hlek mihring hi kan kawl nual hlawmin a lang a. Chu tih rualin, chung mi bika kan ngaih te chu an ‘bikna (specialty/expertise)’ kan chhawr dan erawh hi chu ennawn deuh a ngaiin a lang. Mi pakhat chu ‘pianpui BA’ kan tih ang nei, zirna lamah pawh zir sang thawkhat, thluak hman kawngah pawh chhawrnahawm tak, tawngkam lah thiam zek, hmalak kawngah lah midang ten an um phak hleih theih loh khawpa mi chak a awm a. An veng/khaw mite pawhin ‘ani hi chu’ an tih hat khawpa mi lak tlak leh thiam thil ngah a ni. Chu tih rualin, mitin hian thiamna lam bik te, tuina lam zawng te leh kan chem. kalna bik hi kan nei theuh va. He kan mi sawi pawh hi kawng hrang hranga mi chhawr tlak tak ni mahse, a tui zawng leh chak zawng, a rilru pekna leh a theihna sang ber a pek/hman chhuah theihna tur kawng nei hrang ve tho a ni. Mahse, kawng hrang hranga thil a lo thiam ve zulna leh mi taima a nihna te, a thluak thatna te, a tawi zawngin, ‘thiam thil ngah’ a nihna chu hman tangkai tumin kohhran leh khawtlangin an han pawt phar ta tak tak a! A lawina Kohhranin a tel theihna tur chi ni a an ngaih dek dek tawhna lamah chuan an telh vek a, tlawmngai pawl lam lahin pawl dangin a theihna an lo hman tangkai bik phal lo leh thik ni awm takin a theih dan dana lo hman tangkai dan an lo zawng ve reng bawk a. A telna leh hawina lam apiang, pawl tesep chen in nihna chanvo an lo pe zel a, a phur a rih avanga a zawh loh vin amah chu a ruat tu te bawk chuan an kawh rawn leh thin lawi si a, pawl ti chak lotu ah an puh leh ang lawi a! Thil/kawng pakhat, a tuina leh thiam zawng takah ‘mi bik/thiam bik’ ni turin han in sawrbing dawn se, kohhran leh khawtlanga a mawhphurhna in a uai rit bawk si; kohhran leh khawtlang lama a chanvo te hlamchhiahin a thiamna leh theihna sang ber sawr chhuah tumin han kal bing dawn se, kohhran leh khawtlang chuan chhawr tlak loh, ti tha duh lo leh inpe lo tiin an chirh theh zui zel bawk si! Hei vang hi a ni lo maw, Mizo te zingah hian kawng hrang hranga mi thiam kan ngah em em laia kawng hrang hranga mi thiam bik kan ngah lohna chhan. Khawvel huap chu sawi loh, India ram pum huap angah pawh infiamna a ni emaw, zirna a ni emaw, thiam thil kawng hrang hrangah Mizo te hming lang kan la tlem zia hian a ti chiang viau a ni lawm ni?

Switzerland ram te khu chuan keini chu thil zir bing ram leh hnam kan ni (we are a research nation) inti ngam ngat ram an ni a. An sawi ang takin, khu ram, Europe khawmualpui ram laili-a awm ram te tak te khuan Nobel Prize dawng pha mithiam bik hi a  chher chhuak chur chur a, an zirna in te lah khawvel huap pawh-a a tha ber ber te an nih bakah, an politician te thleng khuan an kalna lam kawng theuhah chuan mi thiam bik ti a chhal theih an ni deuh vek mai. Kan thenawm hnam, ‘vai’ ti a hnuai chhiah ang reng deuh taka kan en te ngei pawh khu han ngaihtuah ila, an thiam loh zawngah vek vek chuan nuaihzatthlak satliah mai pawh ni lo, ngeiawm khawpin an thiam lovin an zei lova, an thiam zawng leh an kal bingna kawngah ve thung erawh chuan, thingpui thlit leh mix zawrh, fu thel thlengin zei leh thiam theihpatawpin an thiam leh an zei vek thung chu a nih hi! Hei hi engnge a chhan ni ta ang? A chhan ni bera ka hriat chu anni chu an kalna lama a ‘ber’ thleng turin an rilru, theihna leh thiamna zawng zawng an sawr bing a, mi thiam bik ni turin an kalna kawng khatah an in sawrbing tawp zel mai thin hi niin ka hria a. Chu tak chu Mizo ten kan harsat em em mai thil a ni a, chu harsatna siamtu lian ber chu kan khawtlang leh kohhran hi niin ka hre tlat nia (helh fe fe chu kan awm ngei ang!).

Mizo khawtlang nuna mi tha, mi fel leh hmatlak tehna atana Kohhran leh Khawtlanga inhman leh inhman loh kan hmang hi a dik lo ka ti hauh lova, teh khawng tha tak pawh a niin a lang. A chhan chu, pawl (association) a hruaitu ni pha chin chu, eng pawl pawh nise, mi hmantlak leh thiamna leh theihna eng emaw tak nei a ni tih chu a chiang nghal mai a. Chu tih rualin, mihring thatna, theihna, thiamna, hmantlakna etc tehna atana tehkhawng bera kan hmang thin erawh a fuh lo hulhualin ka hria. Mi thiam leh theihna nei sang te hi vantlang tan an tangkaiin an chhawrnahawm em em a, chu ti ang chiah chuan, mi thiam bik leh theihna nei sang bik te tangkaina chu a leh eng emaw zatin a hlu in a la chhawrnahawm zawk a ni. Chu vang tak chuan, kan khawtlanga theihna leh thiamna nei te hi an theihna leh thiamna sawk then zawng ni lo hian, a peipung zawnga chher dan hi ngaihtuah ila. Tha (energy) eng pawh hi a tha chakna hman tangkai tuma kawng hrang hranga pawh pen nuai a nih chuan a tha chakna chu a insem darhin a peng darh sung a, a chakna leh theihna vawrtawp (fullest energy/potential) chu hman theih loh vin, a tha chakna chanve te, a aia tlem chauh te hman theih a ni thin. Chu ti ang chiah chuan, kan mi thiam leh theihna nei sang, thluak tha leh mi tha te hi an thatna, thiamna leh theihna te pawl tinin hman tangkai tuma kan pawh pen nasat lutuk chuan an theihna leh thiamna vawrtawp an sawr chhuak thei lova, anmahni kan tih chak loh mai bakah, an tha chakna chhawr tum tu tan pawh awmzia an neih loh phah thin.

Chu vangin, an thiam leh theihna te hi kawng khata sawrbing thei turin zalenna pe thiam ila, mi hui khawm thiam mi leh kohhran leh tlawmngai pawl tana mi in pe te chu chung pawlah te chuan an thiam leh theihna zawng zawng nen in hmang se, ziak mi te pawh thu ziah lamah insawr bing se, zai mi zai lamah, infiammi infiamna lamah, mahni kut kawiha ei zawng pawh a eizawnnaah, sawrkar hnathawk pawh a hnathawhnaah....chu ti ang zelin, mahni thiamna, tuina leh theihna zawn theuhah kan chakna, finna, theihna leh thiamna te hi bing takin han sawr tlang ila, chu mi atang chuan mi, thiam thil ngah mai ni lo, mahni kalna kawnga mi thiam bik tam zawk kan in chher chhuak ang a, chung mi thiam bik ten an insawr bingna atanga an sawr chhuah thiamna, finna leh theihna te chu a tawpah vantlang/khawtlangah bawk a rawn luang khawm leh ang a, chu mi hunah chuan a thu mai ni lo, a tak takin ‘Switzerland of the East’ ah te pawh kan in chhal ve thei tawh ang chu!