Kan Zirna Kalphung Hi

Siam that a ngai! Hetah hi chuan kan lungrual tlang vekin ka ring a, kan buaina tak zawk erawh chu 'eng tin nge kan siam that ang'tih lai hi niin ka hria.

 Ka vei em em leh midang te pawhin in vei em em thin ni a ka hriat chu a zirna ngawr ngawr lam aiin a 'kalphung' zawk hi niin ka hria. Tuna kan ram, India ram zirna kalphung hi chu a vawn a vawn (rote learning) a, vawn sa atanga a hria hria thlan chhuahna (merit-based learning) a ni ber hian ka hria a (ka hriat dan leh sawifiahna hi a dik em phei chu ka hre chuang law!), hei tak hi kan ram thanmawh bâwk, zirna kan ngaih pawimawh ang hu a mihringin hma kan sawn theih lohna chhan lian ber chu niin ka hria.

He ti zawng hian han sawi ta ila. Naupang kum thum atanga kum nga mi te hian tawng an thiam tan a, ni a an hriat ang angin, dik leh dik lovin tawngkam maksak pui pui, a then chu nuihzatthlak fe fe te an hmang thin a, nu leh pate chuan kan hlimpui hle thin a nih hi. Heng kan fate, kum 3-5 inkar te hian English alphabet te, Mizo alphabet thleng pawhin a hawrawp mal malin an sawi chhuak vek thei hial maithei a, tin, TV/youtube-a an en atangin nursery rhymes leh sap tawng te pawh nâl takin an sawiin, an sa ve thei hial pawh a ni thei. Mahse, chûng an thil sawi thiam leh sak thiam te chu a awmzia han zawt ila, a awmzia tak tak hi an lo hre lo tlangpui thin. A awmzia chu, a thu awmzia tak tak (concept) an la man lovin, a awmzia an la hre lova, an hriatthiamna chu a thu lam rîk ang zela sipel (phonetic understanding) a ni tihna a ni a, an thiamna chu a la hman tlak tak tak lo tihna a ni. Entirna atan, naupang kum thum mi chuan A AW B a ni emaw, A B C a ni emaw, a indawt danin, dik takin a sawi chhuak dap thei a ni maithei. Mahse, chûng alphabet, a mal mala a indawt dana a sawi chhuah dap theih te chu thu (word) awmze neiin han rem khawm tir dawn ila, a ngaihna a hre leh der si lovang. A awmzia chu, a nihna leh tangkaina, a hmanna tur hrethiam miah lovin a thu mala chu an hria tihna a ni a. Hei tak hi zir thiamna leh a awmze hriatna (understanding) ni lovin, hriat ve satliahna (knowing) a ni. Hei tak hi kan ram zirna kalphungin a ken tel tha lo tak mai chu a ni.

Kan ram zirna kalphungah hian, zirna kan tan phat atangin zirtirtu ten an siam sa note kan zir a, kan thiam leh thiam loh tehna ber, examah pawh kan thil zir a chu kan hrethiam em tih lam aiin, a tawngkâu chheh (grammar and composition) kan hmang dik em tih te, zirtirtu ten note min pek ang thlapin kan ziak chhuak thei em tih te chu lehkha thiam leh thiam lo tehfung berah kan hmang a. An thil zir chu an hrethiam em tih lam aiin, an thu ziah kal hmang (sentence construction) a dik em tih te chu mark pêkna atana tehkháwng pawimawhah kan hmang ta thin a. Hei hian zirlai mark hmu sang pui pui, an thil zir awmzia leh nihna tak (core concept) hre chiang mumal si lo a chher chhuak ta teuh thin a ni. Hei hi a chianna em em chu, undergraduate/college level hial rawn thleng pha tawh, ziak leh chhiara a kalhmang dika hmang thiam lo leh ziak thiam lo kan tam dan atang hian a chiang hle in ka hria. A lung phúm (elementary/middle level) a kan zirna kalphung dik tâwk lo nghawng chhuah vek a ni.

Tin, keini pawh school zirlai kan nih lai khan, kan zirtirtu te khan school compound chhûng leh classroomah te sâp tawng (English) lova tawng te kha an han phal lova, kan pianpui tawng ngei hmanga tih palh thil thu leh sâp tawng thiam in a daih loh avanga thu kam hnih khat lek sawi chhuah palh zeuh te khan hremna (stay back!) kan han tâwk thin kha a ni a! Tun hnu a ka ngaihtuah hian kan zirtirtu te kha ka dem thar leh thin! A chhan chu, mahni pianpui tawng tluka thiam bel hi tu mihring leh tu hnam mahin an nei lo. Hnam dang tawng, entirna atan, Englisha min biak pawhin kan thluakah chuan English tawng ni lovin, Mizo tawng bawkin a ni kan thluak hian a lo dawnsawn a, kan lo hriatthiam thin ni! Miin 'What is your name?' ti a min zawh pawh Mizo thluakah chuan 'What is your name?' tih ni lovin, 'Tunge i hming?' tiin kan lo hrethiam a, kan chhang mai thin a ni lawm ni?! Kan hriatthiamna leh an chhán lêt theihna chhan chu, kha hnam dang tawng kha kan pianpui tawnga kan lo hriatthiam vang mai mai kha a lo ni a, miin 'sap tawng' a thiam loh chhan chu, sap tawng kha a pianpui tawnga a hriatthiam loh vang mai mai a lo ni! Chu vang chuan, mahni pianpui tawng hi hnam dang tawng aia dah pawimawh a tul a, hnam dang tawng in thiam tir tumna zirna kalphung kha tun hnuah hian ka dem thar ta riau mai (tun lai sikul zirtirtu te hian an la ti ngai em phei chu ka hre lo)! A nihna takah chuan, Zofa te zinga sap tawng thiam ber pâwla kan neih, fam JF Laldailova te, fam Mafaa Hauhnar te pawh kha Mizo tawng an thiam êm avanga sap tawng thiam mai chauh kha an ni asin, han ngaihtuah chiang chiah mah la, a dik i ti ve tho ang! Chu vang chuan, thil reng renga a lungphum nghet tha a pawimawh ang chiah hian, kan zirna bul tanna, a lungphúmah hian kan pianpui tawng, kan hnam tawng ngei hi kan naupang te hi bel takin thiam tir phawt ila, chu lung phúm chungah chuan, mahni pianpui tawng ngeia hriatthiamna nen hnam dang tawng hi zir ta thin se kan thiam leh hriat pawh hi a belin a nál zâwk ngeiin ka ring tlat a ni. A thu hrimin, tawng hrim hrim hi inbiakna hmanrua (mode of communication) a ni mai a. A hmangtu te kan inhriat tawnna leh inbiak pawhna tura siam leh duan a ni a. Kan inbiak tawn a, kan inhriatthiam tawn leh inbiak pawh theihna tawng hi tu te tân pawh hian a hlu ber tih te hi i hre nawn thar teh ang u.

 Sawi tur a tam...ka sawi sêng lo! A kháikhâwmnaah chuan, mahni pianpui tawng ngei thiam bel hnua hnam dang tawng leh nih phung zir a, a chhiar a chhiar thiamna (rote learning) ni lova a awmze dik tak hriat leh man thiamna (conceptual-based learning), mark hmuh sán ringawta in nghat (merit-based learning) ni lova, a taka hman tangkai theih thiamna paw chhuak thei zirna (practical oriented learning) kalphunga kan ram zirna kalphung a in her remhun hi kei zawng ka nghakhlel a ni!