Nung tura Thawk leh Thawk tura Nung
US President hlui, hleitling, hmeltha leh chanchin, a tha lam leh tha lo lam pawh ngah ve tak mai, Bill Clinton khan a chanchin amahin a ziahna bu 'My Life' tih ah khan, a nu leh pa, pi leh pu te chanchin kháikhâwmna atan heti hian a ziak a, "Sum chuang báng hman tur engmah nei ngai lo mahse, in leh lo chenna tur an neih a, thawmhnaw thianghlim leh an kawngkapuia lo lut apiang te ei tur hlúi tur an neih phawt chuan rethei an inti ngai lo," tiin, a kháikhawmna atan, "They worked to live and not the other way round," tiin a ziak a. A mawi ka va ti tehlul em!
President Clintona'n an chhungkaw chanchin a hrilhfiahna táwi tê hian kan pi leh pu te hun laia kan ram dinhmun leh kan rilru puthmang bakah, vawiina kan dinhmun leh rilru puthmang hi thui tak a hrilhfiahin ka hria.
Hman lai kan pi leh pu te hunah pawh khan, an nunna turin nitin an thawk a, thawhrimna leh an kut kawih ngeia an thawh chhuah bâk kha chu mi chan ai eisak an tum lo mai ni lovin, rethei leh chhuan chhama awm te kha an chhawmdáwl zawk thin kha a ni a. Khaw khat chhungkaw hausa, thang chhuah thei khawpa buh leh bâl ngah te pawhin an hausakna te chu kawmpui mai lovin, khawtlang leh vantlang tan an luang chhuak thin a nih kha. Khâng hun lai kha he tia ka han ngaihtuah lêt hian, kan pi leh pu te nun kha a lo 'fair' mang e aw ka ti thin! Tu a mah khan an neih bâk kha kut tling lova neih belh tum em em in an lang lova, a neinung te lahin rethei te hnuai chhiah leh chaldelhna atan leh an chan ai eisakna atan an dinhmun kha an hmang uar em em in a lang lo bawk a. Nitina rim taka an thawh chhuah kha lungawi takin an eiin an in a, an phâk loh leh theih loh pui kha neih hrâm tum a, a dik a dawk pawh thlu lova rualelna kawnga an intlânsiak chiam chiam thu kan hre tam lem lo. Lungawi takin hna an thawk a, an hnathawhna atanga an ei hmuhah khan an lungawi bawk a, lungawi tak bawkin mual an liam ta ni maiin a lang!
Helai tak hi vawiina kan ram leh hnamin kan bosal tâk leh kan kal sual tanna bul chu a ni mai lo maw, nunna atana thawk lova hnathawhna atana nun hrâm hrám kan tumna hi?
Vawiinah chuan thawh loh hlawh lâk kan pawisa tawh lova, kan taimak leh thawhrim rah pawh ni lo, phakar leh dik lohna rah téla in ham puar pawh zah ah kan la tawh hek lo. Thawhrim leh taimak te hian awmzia a nei ta lo zawk em ni? Kan thianpa, engineer pakhat chuan heti hian a sawi a, "Kawng siamna tur project report kan siam reng reng hian a thawktu contractor te hlawh tur hi 20% vel kan chhût telsak thin a. Mahse, thenkhat hi chuan 60-70% an tél loh chuan hlâwkah an in ngai tlat thin lo," a ti! Mamawh tâwk chu sawi loh, nuam kan chen fê hnu pawha chen leh fê na khawp sum leh pâi hi thenkhat te hi chuan kan nei țin țên a, kan thawhrim avanga kan neih a la ni lo zui lehnghal a! Thenkhat hi chu nung tura thawh, kan theihna leh taimakna hmanga kan nunna tur thawk chhuak zâwng ni lo, thawk tura nung, natna khirh tak vei a, rei dam tawh lo tur tih inhre reng chunga la duhâm em em mai te, kan ei khawp thawk chhuak tura Pathian in vanglai hun min pek thui tak kal pelh tawh hun, nun chawhnu ruih tawh pawh a mahni leh chhung leh khat te pum puarna atana thalai te hnathawhna khawvela tlin tawh lo chung chunga la inham tâng țang țang te....hêng mite hi chuan mihring dam hun chhung hi tun ai hian rei deuh se an ti áwm thin hi ka ti! Hetiang mi, thâwk țêk țék chhung zawnga an nunna atana thawk pawh ni tawh lo, an theih chhung sum lakluhna zawng hrâm hrám a, kut tling lo leh mi chan ai pawh eisak zel tura dam/nun tum ve tlat te hi alawm nunna atana thawk ni lo, thawk tura nung dik tak, kan ram leh hnam ei chhe tu te chu!
Kei zawng...President Clintona te chhungkua anga nung tura thawh mai hi ka duhtawk e....ka hmuh leh hriat ve phâkah pawh thawk tura nung te hringnun zawng, a hahthlak hlawm em mai!
Comments
Post a Comment