Hna Thawh

 Hmásâng Chinese mi fing Confucius-a khan, ' Lungsi leh nuam ti taka i thawh ngei tur hna zawng la, ni khat mah hna i thawk ngai lovang,' tiin a lo sawi a, a rilin a dik hi ka va ti em!

Hna hrang hrang kan thawk a, kum pui lingletin kan bung a. Mahse, thenkhat hi chuan hrehawm kan in tawrh tir tlawk tlawk ni ber hian ka hre thin! Hna thawh han tih ngawt mai pawh hi han ngaihtuah chian chuan ril deuh asin. 'Hna' chuan mawhphurhna hlen tur leh hlen ngei ngai a keng tel nghal a. Eng hnaah pawh hna a nih tawh hrim chuan mawhphurhna keng tel lo hna a awm ngai lo. Tin, 'thawh' tih pawh hian thil tih/chêt chhuah a keng tel nghal bawk a. Chu vangin, a táwi zawnga hna thawh awmzia chu thil tih hmanga mawhphurhna hlen tiin kan sawifiah thei áwm e. Chu mi awmzia chu hna ka thawk, hnathawh ka nei, chu mi kha mi ah chuan ka thawk kan tih chuan, chu mi kha mi ah chuan ka mawhphurhna ka kova tla apiang chu thil tihin ka hlen chhuak thin kan tihna tluk a ni tihna a ni a. Mahse, a tak ramah chuan mi tam tak 'hna thawk' hi chu hna thawk kan tling pha lo nasa hle thung si!

Thenkhat hi chu mahni hna-a tui map lo, tui pawh tum lo, pawisa duh váng ngawr ngawra in ham tâng ve hram hram hi kan tam hle in ka hria. Hetiang mite hi chuan hlawh an nei lo (hlawh chu kan hna thawh man kan lâk a ni tlat si a) va, mipui leh sawrkâr sum an eiru char char zawk a ni! Nitinin hnathawhna hmunah chuan kal ve ziah mahse, hna an thawh miau loh avangin thawh hlawh lâk tur engmah an nei lova, an la a nih chuan eirûk chingah kei chuan ka ngai hmiah mai! Hetiang mite hi ram leh khawtlâng thanmawhbâwk an ni

Govt. Serchhip Collegea kan Principal chhuak ta  Pu Lalhmangaiha Chawngthu kha ka ngaihsân em emna chhan pakhat a awm a, chu chu a hnaa a tuina avanga a hnathawh dan kha a ni. Kum 36 zet collegea zirtirtu hna a thawh chhung khan, Principal ni-a a pension hma ni thleng khan zirlai te zirtirin class a la la zak zak nia! A pension tur kan thlahnaa a thusawiah Pu Hmaa hian, ' College-a ka thawh tirh ni atanga ka chhuah dâwn ni thleng hian ka hna hi vawi khat mah ka la ning ngai lo,' a ti. Chu chu a ni! A hna nuam a ti a, lungsi tak leh tui taka a thawh miau avangin hna thawh kha a tan phurrit a ni ngai lova, thawh loh kha a tan a hrehawm zawk a. Chu mai piah lamah, a hna nuam a tih êm avangin, a thawh hlawh zâtah a buai ngai lova, a pension hnuah pawh min mamawh a nih phawt chuan a thláwn pawhin ka rawn thawk leh ang a ti mai a ni! Chu chu alawm Chinese mi fing Confuciusa thusawi awmzia dik tak chu! Kan hna in a ken tel mawhphurhna hlen tur leh thawh tur te phurrit a la a, peih leh peih lova tih țawk țawk reng ai chuan, kan hna hi bánsan ila, kan tuina zâwng tak hna hi va thawk mai ila. Chu chu keimahni, kan hna thawhna leh ram pawhin a thatpui záwk dawn tih hi a chiang. A nihna takah chuan eng hna pawh thawk in, lo bánsan leh pawh ni ila, kan ai rawn awh tur, hnaa tui leh thahnemngai, thiam zawk bawk si hi tunlai khawvelah chuan an tam tawh em mai!

Tin, eng hna pawh thawk ila, kan hna hi kan zahin kan ngaihlu tur a ni. Mahni hna ngaihlu leh zah tak chunga thawk thin hnathawktu chhawr tlâk loh an awm ngai lo. Baptist Church of Mizoram hnuaia driver hna thawk a, BCM Bus pension țhak thlenga khalh Pu Ramtea kha hemi kawnga ka mi ngaihsân táwp theih loh a ni bawk. Pu Ramtea khan a hna kha a ngaihlu a, a hnathawhna hmun (a bus) kha zahawm takin a vawng bawk a. A zin chhuah dáwn réng réngin amahin tawngtaina hun a hmang a, a mi phurh te hnenah a tawngtai hma in, ' Bus hi ka hnathawhna hmun mai bákah ka Biak in leh Pulpit ve a ni a. Chu vangin, bus chhungah hi chuan ruihhlo chu sawi ngai lo nise, zûk leh hmuam ti lo hrám turin ka ngén a che u,' a ti thin a. Chu ti ang taka a hna a ngaihhlut a, zah taka a thawh thin avanga Pu Ramtea sawisél emaw, 'over' ti an awm ka hre ngai lo. Chu tih a hnêkin, chhán sên loh zinpui tura sáwmna a dawng záwk thin. 

Chu chu a ni. Miin hna a thawh tak tak a, tui leh nuam ti taka a thawh chuan amah maiin nuam a ti lova, a hna thawh zâr lo zotu te thlengin malsawmna a lo ni thin. Nang, thian duh tak, hna i thawk ve em le?!

Zirtirtu te Ni Chibai vek ule🤝🤝