Kan Zirna Kalphung Mawlh Mai Hi!

Ramri buai kan buaipui luih luih laiin titi dang ka han vâwr daih teh ang!

Tun lai chu Japan Khawpui Tokyo-a Olympic infiamna khawmpui lian an neih lai a ni bawk a, mit a tlai nilêng thin hle mai! Chu tih rualin, Olympic infiamna ka en apianga ka rilru-a lo lang ziah chu kan ram (India) a zirna kalphung leh inrêlbáwl dan (education system) bawk hi a ni leh thin.

Khawvel ram hrang hrang atangin infiamna pêng hrang hranga a tha ber ber te kumin Tokyo Olympics ah pawh an rawn fuankhawm leh a. India aiawha rit cháwi (weightlifting) a tel, Manipur nula, Miarbai Chanu chuan India tana tun tum olympics-a medal hmasa ber hlawh chhuakin, silver medal a la a nih kha. A hnuah whatsapp group pakhatah Mirabai chanu chu Manipur sawrkarin cheng vaibelchhe thum leh Addl. SP hna an pek tur thu an chhuah an post chu ka hmu a, ka rilru a na ta tlat mai!

Ram changkang ti a kan sawi, USA leh Europe ram hausa atanga an infiammi te chanchin, TV commentator ten an han sawi chuan, anni ho chu high school leh college level atanga infiamna lama an kalna tur hre chiang tawh leh chu mi kawnga lehkha zir paha insâwrbing te an lo ni daih tawh. Entirna pakhat atan, US mipa basketball team player tam zawk chu college an kal lai atanga ram pum huap college inelna, NCAA a an chêt that avanga NBA team ten an cluba khêl tura an thlan (draft picked) te an lo ni daih tawh. Chu ti ang bawkin, Great Britain leh Australia aiawha hmeichhe tui hleuh thiam te pawh high school an kal laia ram pum huap school inel na-a pakhatna lo ni tawh te, university-a lehkha zirlai te an ni fur mai. Ram dangah pawh sawi tur an awm teuh ang.

Ka sawi duh ber zawk chu, ram changkanga infiammi te chuan an zirna hlamchhiah chuang si lovin an tuina kawng an zawh thei bik tlat lai hi a ni. Zirna pawimawh zia an hai bik lova, an infiammi te pawhin lehkha zir thulh chuang si lovin Olympic-ah an ram tan gold medal an hlawh chhuak thei a, an duh chuan lehkha pawh an zir zawm thei a, eizawnna atana infiamna an duh zawk pawhin an kal thei mai zel. Keini ramah erawh chuan infiammi hlawhtling ni tur chuan lehkha zir chawlhsan a ngai tlat zel mai hi a pawi ka tih lai chu a ni. Zofa te zingah pawh olympic infiamnaa India tana tel tawh leh medal hlawh chhuak tawh te pawh kan nei ve. Archeryah Lalremsanga te, boxingah Zoramthanga leh Jenny Lalremliani te pawh kan nei. Mahse, han ngaihtuah vang vang ila, anni ho mai pawh ni lo, india infiam mi, Olympics meuha medal hlawh chhuaktu te hian India-a an rawn kir leh hnuah an medal hlawh chhuahna, an infiamna ngainat chu eizawnna atan an hmang zui em?....teuh lo mai! An vaia an táwpna chu sawrkar hna-ah tho a ni! Bronze medal la te aiin gold medal la te hna a sâng deuh zawk tih vel lek a ni! Hei vang hian alawm sawrkar hna in min daih dawn lo, mahni kut kawihin ei zawng rawh u tiin han in fuih sa teh thin mah ila, a sâwt tak tak thei tlat lo.

Eng pawh ti ila, ei hmuhna khawp a tlin si loh awmzia a awm si lo....kan zirna kalphung leh zirlai te kan zirtir dan leh an zir tur kan bituksak dan  lah hian mahni kut kawiha ei zawn emaw, sawrkar hna ni lo, eizawnna kawng dang zawh tura naupang leh thalai te kaihhruai lam a kâwk meuh bawk si lo. Kan ram zirna kalphung fuh loh avang hian sawrkar hna ni lo, mahni tuina kawnga kal tur chuan huaisen taka lehkha zir bansan a ngai tawp zel mai si a. Hetiang lo deuh hian, sawrkar hnaah chauh innghat lo turin zirlai te kan fuih ta sa sa, kan zirnaah hian lehkhabu chhung thu ziak ringawt ni lo, a taka zir leh hman theih nghal kut themthiamna lam te, infiamna pêng hrang hrang te leh eizawnna kawng pêng dang te hi telh belh ila, lehkha zir pahin,zirlaiin college/university a chhuah ruala a tuina tak kawnga ei a zawn theihna tur hian school level atangin inhrual ila, sawrkar pawhin sawrkar hna siam belh aiin, helam kawnga eizawn theihna tur hi buaipui nasa zawk ta se, eizawnna pêng tinah lehkha thiam an awm fur ang a, lehkha zir pawhin awmzia a neiin, kan ram leh hnam hian hma kan sâwn zâwk lovang maw?!