Hmasawnna leh Changkánna

'Changkánna hi hmasawnna in a rawn nawr chhuah a ni a, mahse, hmasawnna zawng zawng erawh changkánna a ni kher lo' tiin an sawi thin. He thu ka ngaihtuah chhuah apianga ka rilru a zawhna lo awm thin chu, 'Hmasawnna hi kan changkán pui em tih leh, changkánna hian hma min sáwn pui em?' tih hi a ni.

'Changkánna,' a sap tawnga modernization kan tih hian ken tel leh nghawng tam tak a nei a, chu lam erawh chu sawi leh ziah a tam tawh bawk a, sawi zau lutuk lo ta ila. Chu tih ruala ka han sawi zau leh thlûr bing duh pakhat, changkánna in a rawn ken tel/ nghawng chhuah pawimawh tak pakhat ni bawk chu 'beiseina' hi a ni.

Hmàna kan neih phak loh leh hmuh phak loh, a rim a râ pawh kan hriat ngai loh thil tam tak, kan nun khua ti nuamtu leh ti awlsamtu, vawiinah phei chuan a tel lova kan awm hleihtheih tawh loh thil tam tak kan hmuh leh ban phâkah kan hmu in kan nei ta. Chu chuan mihringah beiseina, hun lo kal tura kan hmachhawp hrang hrang te atan beiseina sâng tak min neih tir thin. Mahse, kan ram hausakna leh sum leh pâi dinhmunin a zir loh avang te, hlemhlêtna leh eirûkna avang te, chhungkaw dinhmunin a tlin loh avang te...a tâwi zawngin ram hmasawn leh changkang te kan la phâk loh êm avang te hian chung beiseina leh suangtuahna tam tak te chu a thâmral leh thin. Chutiang dinhmuna kan ram leh hnam a la din laia 'kan changkáng ve ta hle mai' han tih te hi kei ka lo îp lek lek thin!

 Tunlaia kan ramin kan buaipui leh vei ber te zinga mi chu All India Services leh Central Services a Mizo kan tling hleithei lo hi a ni âwm e. Rual û záwk te thahnemngaihna au râwl pawh kan hre tam ta. Tunlai thalai te vanneih zia, engkim kan kawt kai atanga neih leh hmuh theih vek a nih tawh zia, hmân lai miten hlawhtling tura an beih leh tawrh nasatzia, vawiin anga thil tha an ban phâka a awm ve loh thu, chu ti chunga an hlawhtlin tho thu leh thangthar te erawh kawng engkima hrânghlui te aia hlawhtling tura hun an neih that tawh thu leh an taimâk tâwk si loh thu an sawi te....a dik vek mai. Hetiang lama thahnemngaihna thu ka chhiar a ka rilrua ka lo chhân ve fo thinna chu 'kan la changkáng tâwk lo a ni' tih hi a ni leh thin. A chhan chu, thiamna leh theihna lama hmasawnna in a rawn thlen tam tak, tun hmaa beih fê pawha mi tam takin an hmuh leh ban phâk loh, vawiina thangthar te ban phâka chhawp hnaiha rawn awm, a tâwi zawngin, hmasawnna hrang hrang te hi kan lo changkánpui ve tlat lova, chu chuan kawng hrang hrangah Mizo thalai te hi kan nih tur leh thlen tur ang min nih phâk tir lovin, min thlen phâk tir thin lo niin ka hria.

Hmasawnna leh changkánna in Mizo te zinga nghawng chhuah lian tak zinga pakhat chu lehkha chhiar peih kan tlêm ta lutuk hi a ni. Internet kan hmelhriat hma, smart phone hi engnge a nih pawh kan hriat hma kha chuan veng tina vantlâng library te kha a lún thei em em a, cowboy bu ringawt library te pawh a awm thin kha a ni a! Mahse tunah chuan, engkim hi kan kutzungpui hmáwr hmangin, second reilo te chhungin, kan duh lai lai kan thur chhuak zung zung thei tawh a. Hei pawh hi hmasawnna in a rawn hrin chhuah, mi tam takin an changkánpui mek a ni. Mahse, keini chuan chu hmasawnna pawh chu changkánpuina atana hmang lovin in awm tleina atan, ennawm tan, fiamthu thawhna atan leh hun àwl hnawhkhahna atan chauh te kan lo hmang thung a! Finna leh hriatna pûr kan cháwkna ber, hmasang atanga vawiin thleng pawha khawvelin a aia tha thlâkna tur a la hmuh chhuah zawh loh, 'lehkhabu leh lehkhabu chhiar' pawh a hlutna kan hre ta mang tlat lo. Hmasawnna in thil thar tha zawk a rawn ur chhuah apiang a hûm hmasa ber, a ha hmasa ber leh nei hmasa ber pawl kan nih zel lai hian, chu hmasawnna in a rawn ken tel, changkánna chu kan lo changkánpui ve em? Chu changkánna chuan hma min sàwnpui ve em?

A chunga kan sawi, changkánna kan lo changkánpui ve lo thinin a nghawng chhuah pawi tak chu 'mi tak tak' kan tlem ta hi a ni. Zirlai tam tak te pawhin an zirlai te a bul thúm atanga hriat tumna leh thiam tumna tak tak an nei ta lo. Chîk taka thil ngaihtuah a, chhui zui keuh keuh peih pawh kan tlem ta. A chhan chu, hmasawnna avangin mi changkáng te ngaihtuah sa leh chhui chhuah sa, an thawhrim rah te chu awlsam taka kan hmuh zung zung theih tawh vàng a ni. Chu chuan hre ve nil nial, hre zik tluak tak tak si lo, sawi ve thei dûm, a bul thut atanga hrethiam tak tak si lovah min chhuah ta teuh va, chu vang chuan khawvela thil tihpun theih hlu ber te zinga mi, mihring theihna tihpun (human resource development) lamah hnam dang te kan phâk lo ta telh telh a nih ber hi!

Chu vangin, he zawhna hi i inzawt nawnin, i inteh nawn fo teh ang u:

"Hmasawnna hi kan changkánpuiin, changkánna hian hma min sáwnpui em le?"