Mizoram leh Mizo Hnam tana State Day Pawimawhna

 

 Mizo te hi kan tobul (origin) hi vawiin thlengin a la chiang thei lova, kan tobul chhuitu, kan historian te ngei ngei pawh thu tawp siam danah an la inlungrual thei chuang lo. Mahse, chung chian lohna leh hriat chhuah hleihtheih loh thil (mystery) karah chuan thil chiang tak pakhat erawh a awm…chu chu Mizo ram leh hnam (Mizo nation)  a awm tih hi a ni. Vawiinah hian tumahin keini, Mizo te hi kan to bul dik tak kan la chhui chhuah fuh hleihtheih loh avang ringawt hian ‘hnam in tling lova, ram in nei lo’ min ti ngawt thei lo. A chhan chu Mizo hnam kan awm a, ram ‘Mizoram’ kan nei bawk a. He kan nihna (identity) leh ‘ka ram’ ti-a chhal tur ram kan neih te hi tu min pek mah a ni lova, tumahin min chhuhsak thei,hek lo. Kan thisen leh thlan tui hmanga kan sual chhuah, kan ta liau liau a ni a, chung kan neih theihna tura theihtawp lo chhuah tu, kan hnam pasaltha fam ta te kha vawiinah hian I hre reng ang u.

 Kan pi leh pu te hun lai khan vawiin ang hian ‘Mizo hnam’ hi a la awm lova, ‘Mizoram’ pawh hi a la awm hek lo. Kan pi leh pu te kha an nihna (identity) leh rinawmna (loyalty) kha anmahni awptu, an Lal te leh an hnam bil theuhah a awm a. Sailo lal khua leh tui tan chuan Sailo lal leh Sailo hnam kha a nihna hriltu a ni a, chutiang zelin Ralte, Fanai adt te pawh an ni. Mahse, British sawrkarin hmasanga kan Mizo lal te kha an ram chin ni-a an lo chhal ve zawng zawng te nen a thuhnuaiah a rawn dah ta vek mai a. Kum 1891 a vai len vawi hnihna atang phei kha chuan reorelna leh inawpna (administration) pakhat hnuaiah Mizo hnam peng hrang hrang te chu an lo awm ta a. British sawrkar thuhnuaia an awm hnu, hnam dang awpbehna hnuaia an awm atang chiah khan kan mi hmasa te khan ‘Mizo hnam’ awmzia tak tak chu an rawn hrethiam ta a, Ralte ka ni, Sailo hnam ka ni, Chawngthu ka ni ti-a an nihna (identity) chi bil te te-a an lo voh thin chu paih bovin, anmahni awpbettu te lakah chuan ‘Mizo’ vek an nih a tul tih an lo inhrethiam ta a. Chu tah chiah chuan ‘Mizo hnam leh ram’ chu a lo piang ta a, ram leh hnam hmangaihna (nationalism), zo hnahthlak pumpui huapzo pawh a lo piang ta a ni.

 Britishin India ram a chhuahsan hnuah Mizo te chu India sawrkar awpna leh thununna hnuaiah kan awm leh ta a. Mahse, kan thinlungah ram leh hnam hmangaihna leh veina chu a dai tak tak thei tawh lo. Kan mi hmasa ten kan hnam chanchin an hmuh phak ang ang an chhui a, Mizo hnam ngaihhlut (values) dik tak, sa leh ral hmaa zam ngai lo hnam, tlawmngaihna chawi nungtu hnam, hnam huaisen leh mahni-a ro inrel thin kan nihna te khan an thinlungah ram leh hnam hmangaihna a neih belh tir zel a, kum 1966 a lo in her chhuah meuh chuan, hnam dang thuhnuaia kun reng tur kan ni love tiin Pu Laldenga hovin Mizoram chuan zalenna a sual ta a nih kha.

 Indona hi a tawpah chuan dawhkan kila sawi fel leh tho a ni thin tih ang deuhin, kum 20 chuang zet zalenna suala Mizo ten thapui kan chhuah lai khan, Mizo hnam leh ram chuan a kal siam in, ke a lo chhep rem ve hret hret zel a. Kum 1952 ah Assam state hnuaiah Autonmous District Council-ah hlan kai a ni a, kum 1972 ah Union Territory-ah hlan kai niin, 20th February, 1987 ah chuan Mizoram chu India ram state puitling zingah chhiar tel a lo ni ta a, State 23na a ni. Chu ni hriatrengna atan chuan kum tin in State Day hi kan lo hmang ta thin a ni.

 Thian te u, he ni hi politics-a incherh thehna atana hman chi a ni lova, India ram atanga kan chhuah theih tak loh avanga kan ram leh hnam tlawmna ni anga ngaih tur pawh a ni hek lo. American dan hre mi, Judge Billings Learned Hand khan, ‘Zalenna chu mihring te thinlung chhungah a awm a. Chu zalenna chu a thih tawh chuan eng danpui leh dan te mahin a chhanchhuak zo tawh lova, eng court mahin a chhanhim thei lo (Liberty lies in the hearts of men and women; when it dies there, no constitution, no law, no court can save it)” tiin a lo sawi a. Zalenna hi thinlung chhungah zawk a awm a. India ram danpui hnuaiah hian he hnam hian a duh ang ti turin zalenna a nei a, kan ram leh hnam humhim turin zalenna kan nei bawk. Chu mi ti chiang tu chu keini aia a let nuai eng emaw zata tam, hausa leh thiltithei zawk hnam te nen mahni-a ro inrel theihna ‘statehood’ kan nei hian a ti chiang hle a ni. Kan chhungrila ‘zalenna thinlung’ kan put chhung leh keimahni-a a awm chhung chuan eng hnam chak zawk leh ram thiltithei zawk mah hian chu zalenna meichher chu min tihmihsak thei lo. He hnam ropui hi hnam chak leh thiltithei zawk te awpbehna kar atanga lo ding chhuak a  ni a, India ram bung te tak te pakhat kan ni satliah ringawt lova, India ram peng pawimawh tak zinga mi kan ni a. Hnam tlem te ni mah ila, India ram state dang te ang bawka mahni-a inrelbawl tura chanvo leh zalenna pek kan ni. Chu vangin, chutiang ti thei tura zalenna kan neih ni, Mizoram State Day hi ni satliah a ni lova, Mizo hnam leh ram tana ni pawimawh bik a ni tih vawiinah hian I hre nawn thar theuh zawk ang u.

 Mizoram leh Mizo hnam vul zel rawh se