The Miller of Dee

Kum khata ni hnuhnung ber, a ni 365na chiah, 31st December a lo thlen hi chuan ka rilruah Scottish thuhlahril phuah thiam, Charles Mackay a thuhlahril (poem) lar tak, The Miller of Dee kha ka hre chhuak leh thin

Kum bi chhiara a ni hmasa ber, January 1 atangin mahni zawn theuhah, mahni phâk tawk theuhin, mahni theihna leh chakna ang zelin hma thar kan han la sang sang a. Chutiang chuan ni 365na, vawiin hi kan lo thleng ta hlawm a. Kum khat chhunga kan thil tih that leh kan thil tha tih emaw, kan thil tih sual leh kan thil sual tih zawng zawng pawh Pi Lalsangzuali Sailo hla chuai thei lo ang takin, Lal hmaa dinpui turin kum hlui ral mai tur chuan a her liampui leh ta ruai ruai mai. Kum thar hlima pawl hruaitu nihna chanvo chelh nawn leh chelh thar, rilru thar nena hma, nasa taka lak tum te khan vawiin, kum tawpni-ah hian an phurna leh thathona ang tak khan hma an la ta em ka hre lo! Kum thar thutiam nei zawng zawng te khan an thutiam an hlen chhuak vek ta hlawm nge pawh ka hre lo. Kumpui lingleta sum leh paia hlâwk tum leh hausak tuma bei ngar ngar, hlawhtling ta te khan an tum an hlen tâk avang khan sawifiah hleihtheih loh hlimna leh lawmna, an thlarau thlenga hahchawlhtirtu an thawk chhuak ta em ka hre lo. Zelthel taka khawtlang leh mipui rawng bawltu te, inpekna tel lem lova sakhaw rawngbawltu te, mahni chan tâwka lungawi thei ngai reng reng lo, midang te kuta sa hrang hmu lian tlat thin te khan an lungawina khawp an hmu ta em ka hre lo. Thawhrimna leh rinawmna nena an hna thawk thin te khan an thawhrimna rah leh an hah leh rinawm man te an hmu chhuak ta hlawm em pawh ka hre chuang lo. Kum khat chhunga kawng khat tala mahni zâwna hmasawn tum te khan hma an sawn ta nge, an tlahniam ta zawk? Nge, ngai an awh? A pawimawh berah chuan kum khat chhung khan engnge kan tih a, kan thiltih te kan thlir letin kan lungawi em? Kan hlim em? Chu chuan a ni he thuhlahril, The Miller of Dee hi kum hlui thlah ni-a min hriat chhuah tir leh thin chu ni. A thu ken tlangpui chu heti hian ka'n khaikhawm ang e:

Hman lai hian Dee luipui kamah loneitu pakhat, buh her khawl (mill) nei a awm a. Kâwla ni chhuak chhiarin, ni chhuah atanga ni tlák thlengin a buh her khawlah chuan buh herin hna a thawk a. Mahse, chu ti khawpa a thawkrim leh a hah chung chuan hlim takin a zâi rât rât nileng thak reng mai a. A hlim theihna chu a thenawm te leh an bul vel khua te zawng zawng pawhin an hmu in an hria a, a hmingah Dee luipui kama buh hertu (The Miller of Dee) tih an phuahsak nghe nghe a. Chu loneitu hlim thei tak chanchin chuan an Lal beng hial a lo thleng ta a, Lal chuan loneitu chu a hlim reng theihna thuruk chu zawh chhuah tumin a va pan ta a. Lal chuan, 'Aw loneitu duhawm, ni tla van vuaiin kum tluanin hna i thawk a, i hlim em em reng tho si a. Keiin ka Lal inah ka mamawh leh duh zawng zawng thawh hah ngai miah lovin ka nei a, i hlimna ang erawh ka nei ve si lo. I hlimna thuruk hi min lo hrilh ve teh. Nangmah anga hlim reng hi ka duh ve e,' a ti a.

Loneitu chuan, 'Aw Lal ropui leh zahawm, ka hmangaih leh min hmangaihtu nupui fanau, chhungkua duhawm tak ka nei a, min duhsaktu leh ka tana awm reng thin leh an tan pawha ui ka neih ngai loh thian tha tak tak ten min hual bawk a. He ka buh her khawl hmang hian ka nupui fanau te ei leh in tur sum seng miah lovin ka thawk chhuak thei bawk a. Ka mamawh zawng zawng ka nei a, tlachham lovin kan awm a, kan kham khawp ka thar chhuak bawk a. Min hmangaihtu leh duhsaktu te min hual velna kara ka kut kawih ngeia nitin ka thawh chhuah hmanga kan ei a, kan in thei tluka hlimna nasa min petu dang hi a awm thei dawn em ni?,' a ti a. Lal chuan, ' A ni tak e. I hnathawhna lukhum, vut leh bâlin a khuh lûk te kha lung man tama chei, ka Lallukhum ai pawh hian a mawiin a ropui zawk a ni,' a ti ta a.

Aw, Dee luipui kama loneitu, i hlimna thuruk hi mihring te hian zu man thiam in, zu hlimpui pha ve ila chuan, kumin chhung pawh hian mi tam tak nunna kan chhan thei ni mai tur!

Kum Thar Chibai (advance) vek u le!