Kan Ram Kalphung Hi

Ram veitu ten vawi tam an au chhuahpui a, hnam veitu te thinlung a rum a, kan ram a dam lova, kan hnam a na mek a ni. Khawi lai ber hi nge dik lova, engtik lai atang khan nge dikna lamlian ata kan lo pen bo tak le? A thenin politics kal sual kan puh a, a thenin khawvel changkanna leh hmasawnna ten a rawn pai tel thil tha lo lama ke kan pen chak lutuk kan puh a. Ruihhlo, hlemhletna, mahni hmasialna...engtizia nge kan ram leh hnam chungchang kan sawi apianga hlimna min thlentu aia lungngaihna leh thawpikna min thlentu sawi tur kan ngah zawk tak tlat mai le? A hausa te an hausa tual tual a, rethei ten lei rem an rap hleithei lo. A dai pelh laklawh ten an engkim, an nunna hial an chan zawih zawih laiin, a then lah kan no sen suah suah thung si. A eng emaw laiah tak hi chuan dik lo chu a awm a ni. A eng ber chu nge dik lo? Thil dik lo pakhat chuan dik lova siamtu (cause) a lo nei zel a. Kan sawi kan sawi a, chemtatrawta thawnthu ang maiin kan kual kan kual a, a tawpa kan thutlukna chu dik lo a awm a ni tih bawk hi a ni leh thin! A dik loh tanna leh a fuh loh tanna hmuh chhuah hleihtheih loh khawp hian em ni kan ram kalphung hi a lo buai tak a, kan hnam nun hi a lo sawprawp tak mai le?

Ram leh Hnam humhalh kan ti, ngaihhlut tur dik, zirna uar, hnam nun leh ziarang chawisan, ruihhlo do beihpui, kut hnathawk te khai chhuah, chhandamna beihpui...he ram leh a mipuite hian keimahni leh keimahni chungah hian beihpui kan va inthlak tawn khum nasa tawh tehlul em! Adolf Hitlera hova Nazi ho beihpui thlak te, mosolman firfiak ten an ram leilung ngeia mi 3000 chuang an thahsak avanga America ramin Saddam Hussein leh Osama Bin Laden leh Taliban hel chunga beihpui an thlak te, kum 1960 leh 1970 chho va khawvel ram tangrual ten zeng hri umbo beihpui an thlak te, thuhriltu ropui Rev.Dr. Billy Grahama chanchintha hril beihpui te, an lal leh roreltu te lal hrawt avanga rahbeha awm Middle East thalai ten anamhni rapbeta awpbettu te paihthlak tuma beihpui an thlak te...mi ram leh mi hnam beihpui te chuan a tha zawng a nih loh pawhin a chhe zawng talin nghawng a nei thin asin! Keini ramah ve thung erawh that ka tum veleh ka sual leh thin tih ang maiin, thil tha duh avang te, kan ram leh kan hnam humhim leh humhalh duh avang te a kan beihpui thlak tawh zozai te leh kan thlak mek te thlir chuan khawvel ram nuam leh a chhunga cheng te pawh rilru leh khawsak phunga khawvel ram dang te chung en tawh tur niawm tak kan nih laiin, a tawpah chuan kan kalphung a dik tawh lo a ni ti bawka indawm kun leh a ngai thin. Zirna uar beihpui kan thlak hma in central services ah Mizo fa kan tling kan tling a, tling kan awm theih tak mang loh hnua zirna uar beihpui meuh kan thlak hnuah pawh eng ruai kan ni chuang si lo. Ruihhlo do beihpui kan thlak apiangin ruihhlo sim aiin ruihhlo ti leh zuar/tawlh man an awm thu chu kan nitin chanchin thar hriat a ni awl lova. Kohhran, chhungkua leh khawtlang ang pawha thianghlimna beihpui kan thlak mek karah kan bawlhhlawh leh hnawmhnawk te chu dai pawn remchangah leh lui dunga paih kan la bang hleithei chuang si lo. Kan nun a changkang telh telh a, HIV-AIDS vei kan pung tulh tulh a. Kan incheina, ei leh in, in leh lo, hawiher thlenga ram changkang te kan el phak laiin, hnam upa, changkang leh hmasawn zawk te nunziaa bet tel tlat taimakna, thawhrimna, rinawmna, dan pawisakna, ram leh hnam hmangaihna leh hma ngaina te erawh kan bosal nasa hle thung si. Mihring tam dan atanga teha mi lar (celebrity) ngah ber hnam kan ni mai awm asin! Kan larna leh inchhuan ve na te chuan kan state ramri bak a pel hleithei chuang bawk si lo. Millionaire/crorepati ten rethei an intihna ram, Kohhran leh tlawmngai pawl te zahawmna phena nihna chelh hmanga lo inla tuavawn, mi pawimawh (pawimawha inhria?) tamna ram kan ni. Sawi dawn chuan a inkahpup chaw chho zut mai dawn!

A tawpa kan thutlukna leh kan inlungrual tlanna tlang ni leh thin ‘kan kalphung hi a dik lo laklawh tawh a ni’ kan tih fo thin pawh hi han chhut chiang ila, a lo dik lo leh tho mai lo maw? Kalphung (system) hi a chunga kan sawi, dik lo a awm chuan dik lova siamtu/dikloh tirtu (cause) a awm thin kan tih angin a siamtu/duangtu leh a zawmtu an awm a ngai. Chuvangin, kalphung tha a awm chuan a duangtu, a kengkawhtu leh a zawmtu te an tha tihna a ni mai. Heng lungthu pathum te hi lo tha rual vek lovin, lo hnufual leh zelthel deuh pawh awm se, a tha chhun chuan a khai chhuak leh nge nge thin. Kan ramah hian kan kalphung dik lo hi a eng ber dik loh nge ni ta ang? A duangtu nge, a kengkawhtu nge a zawmtute zawk? Heng pathum zingah hian a eng emaw ber tal hian dik takin an mawhphurhna hlen chhuak theiin, hlen chhuak ngam sela kan kalphung chu a dik mai lovang maw?