Career Planning

Khawvel hmasawn leh thang zelah inelna leh rualelna a sang zel a, mi fate hi an lo thiamin, hmangchang an lo hre telh telh tawh. He kan khawvela mihring te tana kan dam chhunga pawimawh ber zinga pakhat chu mahni ke-a din a, intodelh leh nupui/pasal fanau chawm thei ni tura kawng hrang hrang hmanga tan lak hi a ni ngei ang. Chutiang dinhmun thleng tur chuan inzir kan ngai a, inchher hriam kan mamawh a. Chutiang tak tur chuan zirna peng leh kawng hrang hrang kan zawhin, kan intlansiak mup mup reng mai a nih hi. Chutianga kan zir chhuah leh thiam chhuah hmanga mahni ke-a kan din theihna apiang chu kan nun khawchhuahna innghahna, kan ‘career’ chu a lo ni ta mai thin a ni.

Career hlawhtling tak nei tur hian thil pawimawh tam tak a awm a, tum khata sawi vek sen a ni lova, a pawimawh dan indawta rem ngawt theih lah a ni hek lo. Mi thenkhat tan chuan career hlawhtling tak an neih theihna atan hlawhchhamna an paltlang hmasak te a ngai a. Thenkhatin an hlawhchhampui der tawh career pawh thenkhat tan chuan an hlawhtlinpui career te a lo ni ve leh hlauh thei thung bawk. Chuvang chuan, career hlawhtling tak kan neihna tur kawnga tluang taka kan kal theihna tur chuan ruahmanna fel tak neih hmasak a pawimawh hle a, chu chu ‘career planning’ kan tih chu a ni. Career plan tur pawh chuan ar khaw thim dai ngawt ai chuan a tih dan phung leh a kalphung kan hriat hmasak a lo pawimawh leh ta a. Chu chu tuna kan sawi tum ber chu a ni ta a ni.

Career Plan tura hriat tur pawimawh te:

1.      Mahni personality (Nunphung, mizia, nungchang etc) hriatchian:

Mihring hian mize hrang hrang kan nei theuh a. Chu kan mizia chu kan chenna hmun leh kan chhehvela kan hmuh leh hriat te atanga lo nei chho kan ni (Pianpui mizia hi a awm tak tak lo! Kan seilenna boruaka zir a ni zawk!). Kan mize mil lo thil chu kan tuipui lo tlangpui a, a thiam pawh kan thiam lo tlangpui. Chuvangin, career thlan dawna hriatchian ngai em em mai chu ka mizia nen a inmil em tih hi a ni. Kan chak nazawng hi kan mizia leh nihphung, talent dawnna lam a lo ni lo thei. Mathematics thiam thei miah lo hian engineer nih chak eng ang mahse, a thiamna leh rilru in a phak miau loh chuan a thleng thui mawh khawp ang. Chuvangin, kan mize mil career kan thlan fuh chuan kan tui a, a thiam pawh kan thiam nge nge thin. Thawh tui chawp ai chuan tui sa thawh chu a nuam zawk ngei ang. Chutih rual chuan tumna tak tak nen chuan theih loh erawh a awm lo. Midang te aia kan hah a, kan thawhrim erawh a ngai dawn tih mai zawk a ni!

2.      Tui zawng (interest) hriat:

Mi tam tak chu kan tui zawng ni lo, kan tui zawng emaw kan tih lamah hun leh tha tam tak kan seng a, a tawpah kan beidawng leh nge nge thin. A hna a zahawm avang te, a hlawk avang leh miten an umzui avang ngawta a hniak tam lam lama kan kal ve ngawt hian, kan tuina tak a lo nih leh si loh chuan kan hlawhchham a nih loh vek pawhin, chhuah leh rem tawh si lova damchhunga inhrem palh mai awl tak a ni. Ka hmelhriat pakhat chu a nu leh pa ten medical doctor ni tura an duh em avangin MBBS a zir a. A thiam theih loh vang ni hauh si lovin, exam dawnah kum hnih ngawt a rawn haw hlawl zel mai a. A tawpah arts streamah inletin, English subject a zir tha leh a. Amah pawhin nuam a tiin, tha takin a graduate ta nghe nghe a ni. Chuvangin, ka career ka thlan dawnah ka tuina zawng tak ka thlan thiam phawt chuan phur leh tha tho takin chu lam kawng chu ka zawh thei ang. Chutih rual chuan, kan chak zawng hi kan tui zawng a ni vek kher lo tih hriat tel erawh a pawimawh hle. Dr. A.P.J Abdul Kalama khan, “ Kan chak ngawih ngawih leh min kap tlattu, kan suangtuahna luah reng tu (dream) chu zan kan muthilh laia kan hmuh thin te hi a ni lova, zana mu thei lova min siam thintu zawk hi a ni,” tiin a sawi. Miten an tih leh an thiam kan hmuh avanga kan chak chawp te, phur thut inngaihtuah a, kan chak thut te hi kan tui zawng a ni ngawt lo. Tuina tak tak chu naupan lai atanga puitlin hnu thleng pawhin a reh mai mai ngai lova, thil dang kan tih lai ngei ngei pawhin chhungril lamah a rawn thar leh fo thin. Ngun takin han ngaihtuah vang vang la, i nin theih miah loh leh, i tih loh vang vang hnu pawha i tih dawn apianga phurna pe ziah thin che i nei tawh em? Chu ngei chu i tuina tak chu a ni.

3.      Rilru Puthmang Dik (Positive Mental Set Up):

            Hna reng reng hian nihphung leh thawh dan tur kalphung a nei vek a. Chumi mil chuan i thawk thei ang em (mahni mila hna her/siam rem ni lovin) tih zawhna hi career kan thlan dawnah kan inzawh nawn fo a pawimawh hle. Zirtirtu chu zirtirtu tha leh a zirlai ten an ngaihsan ni tur chuan zaidam te, thu sawifiah thiam leh a zirtir chungchang (topic) thiam bel tak nih a ngai a, dawr nghaktu tha ni tur chuan thin nel te, mi biangbiak thiam adt a ngai a, medical doctor thiam leh mi fak hlawh ni tur chuan taimak, inpek leh midang te harsatna sutkian nuam ti mi tak nih te a pawimawh hle. Chutiang zelin kut hna thawk tur pawhin tawrhchhel leh taimak a ngai. Ka hna thawh turin a phut tel leh ken tel tlat te hlen chhuak thei tur chuan kan rilru a insiam hmasak a, hautak leh hahthlakah pawh hnual mai lo tura rilru lo siam fel hmasak diam a pawimawh hle. Chutiang rilru pu thei tur chuan a hmalama kan sawi mahni nihna inhriatchian leh tui zawng hriatchian a pawimawh ta hle mai. Thil reng rengah tui lo leh peih lo chung chuan rilru puthmang a dik mawh em hi!

4.      Midang biakrawn tam:

Kan career atan eng pawh thlang dawn ila, a hmasa ber kan ni lo tih hriat a, kan hmaa lo hlawhtling tawh leh kan career thlan ang thlang a, lo kal hmasa tawh te biakrawn tam hi a pawimawh hle. Chu chuan hun leh tha tam tak kan sen tur min chhawkin, min humsak thei a ni. Tin, hringnun hi sawichhuah a fiah chi a awm a, tawnhriata fiah chi a awm bawk. Lehkhabu-a ziah vek sen a nih loh avangin a tak ngeia lo tawng tawh leh lo paltlang tawh te tawnhriat atang hian thui tak kan lo zir lawk thei. Engkim chhiar a, hriat vek sen a ni lo. Thufingin, “Mi fing chu midang te tihsual atangin a inzir thin,” a lo tih angin, kan hmaa lo kal tawh te tih sual leh tih dik tawh te hre chunga hmalam pan hian kal a ti sawt bik em em a ni.

5.      Hmanhmawh suh:

I career thlang turin hmanhmawh suh. Hmanhmawh suh kan tih hian muangchan a tha e kan tihna zawng a ni lo, hun leh tuilianin tumah a nghah ngai loh hi! Kan sawi tum ber zawk chu career thlan hma in ngun takin ngaihtuahna sen hmasak a pawimawhzia zawk hi a ni. Kan neihin a tlin em? Tlin lo ta se engtin nge ka tih ang? Ka tih awm chi a ni em? Hlawhtlinpui tham a ni em? A chhe ber atanga a tha ber thlenga mahni phak tawka rilru lo sen hmasak hian thil reng rengah kawngro a su thui thei hle. Harsatna kan paltlang ngai, remchanna (opportunity) awm dan, ka chaklohna lai leh midang te ka khumna lai, ka kawng min tibahlah thei thil te adt... heng zawng zawng hi hriat lawk vek theih ni lo mah sela, rilru lo sen lawk atang hian tam tak chu kan lo inring lawk thei a ni.

6.      Plan B nei rawh:

I tum ber i thleng lo palh thei. Chu chu i thiam loh leh midang te thiam loh vang pawh ni lo, Pathian remruat, dal theih rual loh avanga thleng thei ta lo pawh i ni thei. Chutiang dinhmun leh hun i lo tawng palh a nih pawha career hlawhtling tak i neih theihna turin a tha ber dawttu hi rilrua dah reng a pawimawh hle. Tin, khawvelah hian career duhthlan tur chi khat chauh a awm lo tih hria la, thiam thil te pawh hi tih than atanga mihringin kan neih theih a ni tih hre reng rawh. I tum ram i lo thleng lo palh a nih pawha i lungawina tur thla veng i lo neih lawk chuan hlawhchham avanga mahni nunna hial chhat te angin i awm ve dawn lo zu nia! Chutih rual chuan, MacDonalds Restaurant khawvel huapa rawn vawrhlartu Ray Croc-a khan kum 52 a nihin a thawhrim rah a seng ve chauh! Kum 30 chuang chu career hrang hrang a umzuiin, hlawhchham fe fe tum pawh a ngah hle. Chuvangin, vawi hnih khat hlawhchham avanga plan B a insawn mai tur tihna a ni lova, i dal theih loh leh i tih danglam theih loh thil i tawn avanga i tum ram i thlen theih loh palh thulh a, i kal zel theihna turin Plan B nei rawh kan ti zawk a ni.

7.      I hmanraw mamawh hre rawh:

I career atan eng nge i mamawh i hriatchian a pawimawh hle. Huan thlai siama eizawn tum tan MBBS nih ngawt a tangkai lo ang bawkin, medical doctor tan journalism degree neih hian tangkaina a nei tlem hle. Chuvangin, i career atana i thlan i hlawhtlinpui theihna turin eng thiamna nge i neih ngai a, eng thil te nge chu thiamna nei tur chuan i mamawh a, i hriat a, i zir ngai tih te i hriat a pawimawh hle. Kut hnathawk tan hming tawpa degree tlar dul ai chuan tharum leh taimakna a pawimawh zawk!

8.      I duh chhan chiang rawh:

Hna sang leh zahawm tak chelh emaw, a eizawnna avanga ding chhuak, mahse, a nunphung, tawngkam leh mizia, a nihna nena inchawih lo leh inmil lo fe fe i hmu tawh ngai em? Tuina leh phurna nei miah lo leh zelthel tak chunga hna thawk thin mi i hmu tawh em? Eng vangin nge i career thlan kha, kha kher kha i thlan? I thlan chhan azirin i career i hlawhtlinpui dan leh miten an hmuh dan tur che a danglam thui viau thei. Sum a tam avang emaw, eiruk tur a tam avang emaw a thawk chuan a thawh chhan ang takin a eiru nge nge thin. A tui zawng tak a nih avanga thawk chuan phunnawi lo leh tui takin a thawk mai a, hna dang a hmuh loh vang emaw, eng emaw avanga thawk ve satliah ringawt chuan thawh chhan mumal a neih miau loh avangin hna thawktu tha tak a ni mawh khawp mai.

9.      Engtin nge nang aia tawnhriat nei zawk te i khum theih ang?

A hmasa berah chuan mahni inrintawkna i neih a ngai. Mahni pawh inring zo lo chu midang te rin kai a har khawp mai. Tin, kan tluk loh te an awm a nih pawhin kan tluk loh chhan- eng vanga tluk lo nge ka nih? Eng nge midang te leh kei aia a thiam bik thil chu? Ani aia chungnun theihna ka nei em? Eng kawngah nge amah khum tura ka zir belh ngai leh tan ka lak nasat ngaihna lai? Min tluk loh zawkna lai, kei aia a chakloh zawkna lai a awm em? adt...heng te hi zir chian (research) peih a pawimawh hle. ‘Ani chu a thiam thei a’ tih ngawt hian engtikah mah tumah a khum theih loh! A thiam theih bikna chhan kha han chhuiin, han zir chiang chiah teh. Nang aia a lo taimak zawk vang te,a lo tawrhchhel zawk vang te, a lo chhiar tam zawk vang mai mai alawm lo ni! Chumi khum tura beih chu ani aia i thiam theihna tur kawng chu a lo ni reng zawk a lo ni!

10.  Danglam ngam rawh:

Zirna kawngah hian a nawlpuite zir ang leh kalna kawng ngawr ngawra kal a, zir ve ngawt chuan a nawlpuite tawpnaah bawk kan tawp ve nge nge thin. Career thlan dawna hian mi tih ngai loh leh huphurh lam a nih vang taka huaisen taka bitum chat thin te bawk hi a nawlpui te nena inelnaah pawha dingchang  leh te hi an lo ni leh thin. Chuvangin, eng career pawh thlang dawn ila, mahni tuma chian leh huaisen a, mite aia danglam ngam khawpa tumruh leh mi hrat khawkheng nih hi a pawimawh hle.

11.  Beidawng ngai suh:

A tawp bera chuan hlawhtlinna thuruk, leilung piantirh ata la danglam lo hi hre reng la, i thil tih tum leh nih tumna kawng zawha i beihnaah beidawng ngai suh ang che. Beidawnnaa hrual fip leh harsatnaa sawisak te bawk hian a tawpah chuan hnehna an chang let leh nge nge thin. Mi tih theih ang ti ve thei lova inngai a, ti ve ngam lo te hi hlawhchham pawh an hlawhchham pha lo (hlawhchham te aiin an dinhmun a la hniam zawk tihna a nih chu!). Tin, kan tlawm hma chuan kan la hlawhchham lo tih hriat reng a tha. Boxer ropui Muhammed Ali-a’n, “ Tluk hi a pawi lova, thawh leh loh hi a pawi zawk chu a ni,” a tih te, Sir Winston Churchilla’n, “Hlawhtlinna chu hlawhchhamna pakhat atanga hlawhchhamna danga phurna leh thathona hloh miah lova kal zel theihna hi a ni,” tia a lo sawi te hi an tawngkam thiamna atang ni lo, an tawnhriat ngei atanga an sawi a ni. Chuvangin, beidawng thin te hi tlawm thin te chu an ni tih hria la, i tlu a ni pawhin tho leh zel rawh. Tho leh zel an tlu hlen ngai love!