Tawng Tlem La, Thawk Tam Rawh

“Mi fing chuan a sawi zawng zawng a hria a, mi â chuan a hriat zawng zawng a sawi,” tih a ni. He thufing tawi te hian kan nihna dik tak chu a phawk chiang viau awm asin! Ryan Halliday-a lehkhabu ziah, Ego is the Enemy tih bu-ah chuan mi pakhat, Upton Sinclair-a chanchin heti hian a ziak a.  Kum 1934 a California state governor tur an thlan dawn tumin, Sinclair-a pawh hian chuh ve ngei tumin a campaign ve sauh sauh va. State governor inthlannaa a chuh ve tum khatna tur a ni. Inthlan ni tur a hnai tawh viau mai a, chutih lai chuan Sinclair-a chuan chu inthlana a dinhmun sawhnghehna tur nia beiseiin, midangte la tih ngai hauh loh lehkhabu a chhuah ta mauh mai a. Lehkhabu a chhuah hrim hrim chu a makna lai tak a ni lova, a mak lai tak zawk chu a lehkhabu hming leh chu lehkhabu chhunga a thuziah te chu a ni. A lehkhabu hmingah chuan I,Governor of California and How I Ended Poverty (Kei, California Governor leh retheihna ka umbo dan) tih hmangin, Governor a nih chhunga a policy duan chhuah tha tak hmanga retheihna a umbo dan chungchang a ziak chiam mai a. Amah lah chu vawi khat mah governor-a thlan tlin la ni ngai lo leh, governor thlanna pawh a tum khat chuhna ve chauh a ni lawi si!

Sinclair-a thil tum ber chu hei hi a ni. Amah hi ziakmi leh thusawi pawh thiam tak a ni a. Chu a talent chu hman tangkai tumin leh, a elpui candidate dang ten tawngkam thiam lamah na na na chuan an khan dawn lo tih hre ranin, lehkhabu-a a thu thiamna hmanga mipui thinlung hneh chu a tum a ni. Mahse, a ngaih ang a ni ta hauh lo mai. Chu a thiltih chuan mipuite vote thlak danah engmah nghawng a neih loh laiin, amah Sinclair-a chu a vaw let ta hlauh zawk a.  A lehkhabu ziah chu lehkhabu hralh kal tak a ni zui a, chutih lai erawh chuan Sinclair-a chuan inthlannaa a khingpui chu vote nuai nga dawnin a hneh lo thung! Enge Upton Sinclair-a tih dik loh chu ni ta ber? A tawng tam lutuk alawm mawle!

Governor a nih hma hauhin governor ang ziazangin tawngkam a cheh a, governor a nih huna a nih tur ang zawng zawng chu a tawngkam hmangin a lo ni zo hman vek tawh a, inthlanna hmanga governor nih tir leh kha mipui ten a tulna an hre tlat lo, a tawngkamah a zo tlat. Amah ngei pawh chuan lehkhabu-ah a campaignnaa a sawi tur leh tih tur zawng zawng chu a lo sawi zo vek tawh a. A nihna takah chuan a tak taka a campaign hma in, a tawngkamin a lehkhabu-ah a lo campaign zo vek tawh tih a inhrechhuak leh si a, campaign zui vak ngaihna pawh a hriat loh phah ta zawk hial a!

Hetiang deuh hi a ni. Thenkhat hi chuan kan tawngkam kan umpha lova, mi zah kan kai loh phah a. Thenkhat erawh chuan kan umpha mai pawh ni lovin, kan tlanpel nasa leh lutuk a, midang ten ngaihdan an sawi ve na tur leh an tawng ve na tur takngial pawh awm lo khawpin kan tawng nasa thung a. Chutiang mi chuan ngaihtuahna tha tak neiin, thil tha tak pawh han ti thin mahse, a tawp a tawpah chuan mi nin a hlawh leh nge nge thin.

Thil mak ve deuh mai chu mi tawng tam lutuk te hian anmahni hamthatna tur chiah an ngaihtuah a, an lansarhna tur leh mi rilru an hip theihna tur chiah an ngaihtuah tih hi i lo hre ve tawh em? Chik takin mi tawng tam ho hi han belchiang mah teh. Tawng duah mahse, an tawpna chu anmahni tho a ni zel! Midang fak an nghak hman lova, anmahni an infak zel a, midang thurawn an la hman lo, thurawn pek tur an ngah lutuk! Mahni chanchin chauh sawi lo pawh nise, midang chanchin sawi hrat te hlei hlei hi! Mi thenkhat chu an tana hlawkna awm miah lo, anmahni nen pawha inkungkaihna leh inlaichinna pawh nei map lo, midang chanchin sawi nuam ti tlat te hi an awm nia! Mi chanchinah pawh an chanchin tha lo lai thur chat chat te, an tana hriat nuam lo lai tak sawi chhuah tur hre em em leh sawi chhuak reng mihring te hi an awm. Mahse, sawi tawh angin, chung mite chuan midang rel leh an chanchin tha emaw, tha lo emaw, midang chanchin sawi hrim hrim kha nuam an ti pawh a ni lo, midang aia thil hria leh hre thei, hre hmasa leh mite hriat ve loh thil hria nih a, miten thil hre thei an tih an thlakhlelh vang mai mai zawk a ni!

A thuhrimin tawng tam lutuk hian hun leh tha a heh em em bawk! Mi tawng tam chuan hna tangkai tak tak a thawk hman lo, titi tur leh sawi tur ngaihtuah reng rengin a hmanhlel a, chuta a hriat ang ang chu tlem phuah belhin a sawi chhawng leh zar zar a. A hun mai pawh ni lo, midang te hun thlengin a ei heksak vak zel! Mihringa chakna awm hi tawng (talking) leh thiltih (doing) hian chang tam zawk nih tumin an inchuh thin a. Chumi awmzia chu tawng leh thiltih te hian an hlawhtlinna turin thil pahnih mamawh em em an nei. Chung te chu hun leh tha a ni. Tawng tam leh titi reng mai chuan hna a thawk hman lova, thil tangkai a ti hman lo. A ti dawn chauh va, a tawng/titi a, a chawl leh zel thin! Chu vang chuan alawm tawng tam loh hi taimakna kalka pawimawh tak a nihna chhan chu.

Thenkhat chuan duhthu kan sam a, chu kan duhthusam chu tawngka-in kan ti hlawhtling a, thiltih erawh chuan kan ti hlawhtling leh peih si lo. Hei vang hian alawm, a sawia sawi chuan a awl kan tih fo. Sap hoten thiltih hi thu aiin a tawng ring zawk (action speaks louder than words) an lo tih dikna chiah chu a ni ta a ni. Kan duhthusam te, kan hlawhtlinna te, kan thiltih that te hi mite sawi-ah i khek ang u. Thil zuartu hian a thil zawrh tur siam harsa tak chu kum tam fe a beih hnuah siam hlawhtling se, chumi hnuah miten lei an duh theihna turin a theihtawpa a fak leh chawi lar ngai ziah ta zel sela, sumdawng hausa hi an tlem pharh ka ring! Tu pa chakna in nge chutiang te chu tlin reng tehlul ang ni! Ni lo. Chutiang chu a ni lo. A siamchhuaktu ten uluk tak leh rim taka an beih fat fat hnua an siam chhuah chu a zuartu ten thiam takin an lo fak mawi a, thil hlu takah a lo chang thin. A hlawkna teltu chu a siamchhuaktu leh a zuartute tho an ni. Chutiang chiah chu a ni tawng tam leh tawng tlem inhlawkhleihna chu (tawng tlem satliah, engmah ti chuang lo chu kan huam tel lo tih erawh hria ila). A awmzia chu, siamchhuaktu leh zuartu nih kawp reng tlin theih a ni lo ang chiahin, tawng tam bawk, thawk tam bawk nih kawp chu thil har tak a ni. A chhan chu hun leh tha mamawh leh heh tak v eve an nih tlat vang a ni. Khawvel huapa kan hriat lar mi ropui leh hlawhtling te reng reng hi chhut mah rawh. An ropuina hi anmahni’n an sawi zuah zuah ngai lo. Midang ten an sawi nasat avanga mi ropui leh hlawhtling lo ni ta an ni zawk. Chuvangin, a nihna takah chuan, tawng tam lutuk hian midangte ropuina kawng kan sialsak zawk a lo ni a, chutih rual chuan mahni kan intei tê tial tial thung.

Tin, ngawih (silence) hi mi dawihzep te leh awmnem te ta bil ni lovin, mi huaisen leh tumruhte ralthuam tha ber te zinga mi a ni zawk. Kawng engkima kan hnuaichhiah theih te laka ngawih chuh te hi huaisen ngai deuh asin. Huaisenna pawh hi tlawm lohna nen kan hmehbel reng lai hian tlawm tura huaisen a ngaihzia pawh hi kan hriat tel a tha awm e. Thu kan neih ve phak lohna ngawih ngawih, mi nun leh chanchina tawngkaa tel ve phet tum loh mai (ka chip) mai te hi thil awlsam te nia lang, mahse, a beiha beih fat fat ngai, tumruhna nen chauha tihhlawhthlin theih thil a ni ve tlat. Sap ho bawkin ngawih theih hi rangkachak anga hlu a ni (silence is golden) an lo tih leh thlap dikzia tarlanna bawk!

Chuvangin, nang leh kei chu i ngawi ang. Kan chanchin tha lo lai leh tha lai te, mi chanchin hriat nuam leh nuam lo te, fak kan phunaa fak leh sel kan ngaihnaa sel chu midang, mi tawng tam te kutah i dah ang. Tui taka an tawng suah suah laiin, keini chu ngawi ila, kan tih tur leh thawh tur tiin, thawk miah miah ila, ni a liam hun (at the end of the day)ah tunge hlawk zawk kan hria ang chu!