Teaching, A Noble Profession

Zirtirtu hna hi hna sang, hna zahawm leh ropui a nihna hria in hnam fing zawk te chuan an lo dah sang hle thin a, tunah pawh an la dah sang hle reng tho mai. A ni tak a, khawvel mi ropui zawng zawng hi zirtirtute chhul chhuak an ni a, ram hruaitu fing leh remhria zawng zawng te pawh zirtirtu zirtirna hnuaia lo kun vek tawh an nih vang te pawh a ni mahna, zirtirtute chu ram kal siamtu an ni (Teachers are the builders of the nation) an lo ti fo reng a, a dik lo ti a hnial thlak chu a har ve khawp ang le!

Chutih rualin zirtirtu hna hi lawm thu dawng lo hna (thankless job) tia an sawi thin hna zingah hian a tel ve mai awm mang e ka ti thin. Hna sang leh ropui tak a ni kan tih rual hian a ropui ang phu hian lawmtu leh lawm thu hi zirtirtu hian a dawng thin ang em? tih hi rilruin ka inzawt fo thin. College-ah zirtirtu hna kum sarih pumhlum ka lo thawk ve ta a, he zawhna hi ka rilruah ka inzawt fo thin a, a chhanna dik tak hi ka la hmu chhuak mai thei lo! Ram inrelbawlna khawihtu leh chumi buaipuina lama thawk te chu an thutlukna te, an hna thawh that leh that loh ten mi fairel bel a nghawng a, mi fate nunkhua a sial nghal ruak ruak thei a. An hna thawh that chu chawp leh chilhin a lang nghal titih deuh mai a. Chung mite chuan an thawh that ang leh an phu tawk angin chawimawina parthi an awrh a, lawmtu leh lawmthu lah an dawng tam nangiang e! An hna in a ken tel a ni miau va, a mawh love. Daktawr te, sipai te leh hna dang tam tak chu an thawh that va sawi chhuahsak emaw, va tih lar chawp pawh ngai lovin an mihringpui ten an hmu in, an hria a, an dawng bawk thin. Lawm loh rual a ni lo reng a ni. Thik pawh ka thik hauh lo. Chutih lai mek chuan, chung mi zawng zawngte chherchhuaktu leh kaihruaitu, an zirtirtute erawh chuan hriat an hlawh mang lova, fakna ri timawitute zingah lam tel an ni ve ngai meuh lo. Chutia kan tih rual chuan zirtirtute hian hna dang thawk te angin fak leh chawimawi hlawh ve hluai rawh se kan ti erawh a ni hran chuang hauh lo! Ka zirtirtupui te u, in hah leh thahnemngaihna zozai te hi fak leh hriat hlawh lovin khawvel hian a liampui a, a thamral pui thin nia hriat chang in nei ve ngai em? Kei chu ka nei fo mai! Hna dang thawkte chu an thil tih sak ten thilpek leh lawmthu sawisen loh nen an vur a, an fak chamchi a. Zirtirtu erawh chuan a naupang ten zah taka an ‘sir/miss’ bak chu khawi atang maha pi leh putu a hmu ve meuh lo. Mite chuan an chunga thil tha tihsaktu hnathawktute chu a sumfai te, thilpek leh kawng dang dangin an chawimawi a, lawmthu an hrilh thin a, damchhungin theihnghilh an ni tawh ngai lo. Zirtirtu erawh chu an zirlaite hlawhtlinna lawmni-ah meuh pawh tawngkaa lawmthu sawi leh a vengva chin leh nachang hre deuh ten an chibai liam liam a, lawmthu an hrilh bak chu, a tukleh zing ni a chhuah leh atang chuan chawimawina an dawng lo mai ni lovin, hriat zui an hlawh ngai meuh tawh lo. A zirlaiin hna sang tak leh dinhmun sang tak a chelh ni-ah chuan primary schoola nun dan leh hawrawp ziah leh chhiar lo zirtirtu, middle school a kal laia chhiarkawp lo thiamtirtu zirtirtu chuan hmanni lawka a thian chhar thar te leh a thawhpuite aiin thutna a chang hnung leh zawk tlat thin! Mahse maw, mi tam zawk ten an hriat leh hmuh loh hian zirtirtu hian ropuina leh chawimawina lallukhum a khum mawlh mawlh reng asin. Zirtirtu zirtirna kaihhruaina leh fuihna chuan zirlai chu a rilru put hmang a hriatthiamtir a, a thiam thil a haichhuahsak a, kawng a kawhhmuh a, a tum ram thleng turin a chhawm thin. Chu chuan hruaitu ropui te, hmuchhuaktu (inventor) hmingthang te, thiamna leh finna hmanga khawvel tihmasawntu leh tinuamtu te a lo hringchhuak ta thin. Chung an zirtir chhuah te hmang chuan khawvelin thil thar a nei a, hma a sawn a, nun nuam zawk leh changkang zawk a herchhuah tir a. Chung zawng zawng zar lo zotu zingah chuan zirtirtu chu a tel leh thin lo em ni? Khawvel leh a chhunga cheng mihringte chuan zirtirtu-in a chher chhuah, a zirlai thiam, finna leh theihna hmang ngei chuan zirtirtu chu nitin hian kawng hrang hrangin lawmthu a hrilh let mawlh mawlh reng zawk a lo ni! Tin, hna dang thawktu ten an hna an thawh theihna tura an mamawh thiamna, chumi an neih theihna tura thiam leh finna lo ngaihtuah chhuaktu leh lo chhawpsaktute chu zirtirtu, mi hriat loh lo hria a, mi chhiar loh lo chhiar a, mi ngaihtuah phak lo lo ngaihtuah chhuaktute kha an ni asin. Chu dinhmun ringawt pawh chu eng lawmman, thilpek leh fakna hian nge hen pha tehlul ang ni?!

Chutiang taka dinhmun pawimawh a nih avang chuan zirtirtu hna hi hna ropui, zahawm leh sang a ni an lo ti thin reng a. Chuvangin, a hna hi hna ropui, zahawm leh sang sa a ni a, zirtirna hnaa lut zirtirtu hian zirtirtu hna chu a tih ropui emaw, amah avanga zahawm emaw a ti tur a ni lo. A tel lo pawhin zirtirtu hna chu a zahawmin a ropui sa a, chu a zahawmna leh ropuina chu zirtirtu chuan a tawmpui pha em tih zawk hi a pawimawh lai chu a ni. Zirtirtu zingah zirtirtu hna, hna zahawm leh ropui ti hminghliautu hi kan ramah hian engzat tak awm ang maw?

Italian zirtirtu ropui Pestalozzi chuan, “Naupang chu kum sarih chhung min kawltir la, chumi hnulamah chuan Pathian leh ramhuai hnenah pawh nise, i duh phawt chuan pe rawh. Chu naupang chu an thlak danglam tawh chuang lovang,” a ti hmiah mai! Pestalozzi zirlaite hian engtin nge an zirtirtu hi an hriat reng zui ang le? Chhan ngai lo zawhna a ni! Anih leh keini ve hi? Zirtirtu hna thangkhat lian teh meuh lo thawk tawh te leh vanglai hun zawng zawng chuai thak khawpa zirlai te zirtir thin zirtirtu hi engtin nge kan zirlai te hian an damchhungin min hriat zui ve ang ? Chu zawhna chu zirtirtu in zirtirna hna a thawh rual ruala, a duh emaw, duh lo emaw, a zirlai te hnena a zawhna pek, a zirlai ten an damchhunga midang te hnena chhanna an pek tur a nih tlat si avang hian alawm zirtirtu hna hi hna ropui, zahsawm leh sang, ‘ noble profession’ an lo tih reng ni! Nang zirtirtu, chu hna ropui leh zahawm (noble profession) thawk tur chuan i zahawmna, inpekna leh taimakna in a tlin ve em le?!