Chhungkua

4^th November, 2017 zan dar 2 bawr vel a ni a. Dan pangngaiin kan naute mu tha duh lo menpuiin a nu nen kan la in awih chhawk zak zak a. Tun hnai zan tin deuhthaw a kan thawm ngaihthlak thin, kan in ep ral lehlama inhau thin te pawh an ri a ring leh ta hle mai. Eng emaw chen nau ka awih hnuah ka nupui chuan min rawn awih chhawk a. Chumi hun remchang la chuan kan mut pindan verandah-ah meizial zu pahin zan boruak vawt nuam tawk raih mai dawng pah chuan ka ding a. Van chu a pawl thiang kuk mai a. Chumi rawn cheimawi tawk chiah leh kan pindan ep tlang panga thing hring leh in tlep tuar te thlir ti nuam tawk chauh leh lunglen kaitho tawk vel chiahin thla lah chu a eng no nghulh mai bawk a. Hla phuah mi han nih ve a, thangthar chhuan hnih talin an kur pui hat tham hla lungkuai leh lungleng han phuah chhuah thiam ve ka va chak kher em! Mahse, chu zawng, Pathianin talent min pek tlem te zingah pawh la tel lo leh zel a nih avangin Kohhran rorelin ‘sawihona hi tawk mai se kan ti’ an tih thin ang deuhin ‘ka suangtuahna hi tawk mai se’ tiin ka rorel thu chu ka rem ve ta a.

Ral lehlam thawm pawh zan a reh thep thawp ta bawk nen, a ring leh ta hle mai. Nizan lama an sawiho tura an thupui thlan kha a tla tha vak lo nge ni, zanin thupui chu nu leh fanu leh scooty chungchang a ni deuh ber! Zan dangah pawh an thawm ka hriat fo tawh a nih avangin ka uksak lem lova. Ka meizial zuk pawh a lo ral ta bawk nen, inchhung lum lama luh leh tuma ka intintuah lai mekin, ral lehlama thupui sawitu pakhat (a fanu zawk ni ngei tur a ni) chuan thu pakhat, ka beng verh zet mai a rawn sawi chhuak ta a (a thusawi erawh chu tarlang lo mai ila). Chu a thusawi tawi te, ziah thlak tur nise tlar khata ziah zawh theih vek tur, mahse ngaihtuah ti thui zet mai chu chhungkaw chungchang a ni a. Inchhunga ka luh hnuah pawh ‘chhungkua’ tih chuan ka rilru a luah zui ta zel a.

Enge chhungkaw awmzia? Enge a nihphung? Enge a hlutna leh a kaihnawih dang dang te chu kan hre thawkhatin, mi thiam zawk ten an hrilhfiah hnem tawh bawk a, han sawi nawn leh chiam ka tum lo. Ka rilrua lo lut ber zawka chu chhungkua- ‘chhung’ leh ‘kua’ tih lai thumal pahnih tak mai hi a ni mauh mai.

Eng vangin nge chhungkua tih sawina tawngkam atan hian chhungkua tih thumal hi an lo chher chhuah kher kher ni ang le?! He thumal ‘chhungkua’ sawifiahna atan hian sawifiahna/sawizauna/hrilhfiahna ril pui pui leh nalh tak tak a awm teuh tawh ka tih kha. Chungte chu kal kanin, thlarau mite tawngkam hawhin ‘ka dawn dan’ han sawi ve hrim hrim teh ang!

Sawi tak angin chhungkua tih hi thumal pahnih ‘chhung’ leh ‘kua’ tih in belhbawmin a siam a ni a. Thil reng reng, thingrem a ni emaw, mau a ni emaw, eng thil pawh nise, a chhung a kuak chuan a chhung a ruak tihna a ni a, engmah a awm lo tihna a ni phawt mai. Chu chu chhungkua ka sawifiah ve dan pakhatna chu a ni. Chhungkaw tluantling din tur chuan ka ngaihdan, pawm dan, duh dan adt ka bun chhuak hmasa vek tur a ni a, chutiang bawkin chu chhungkuaa rawn lut ve tur reng reng te pawhin an ti ve tur a ni. Tichuan, engmah awm lo atangin awm kan siam ang a, chu chu kan ta, kan din, engkim ‘ka’ ni thin ‘kan’ a lo nih tan theihna tur bultanna pawimawh tak chu a ni.

Pahnihnaah chuan, thil chhung kaw reng reng chu a chhung kuaah chuan awmna turin hmun awl (Space) a awm tihna a ni. Midang te len ve lohna nun neitu tan chhungkua din theih a ni lo. Ka din pawh ti mahse, an chhung chu a kaw lo, kan Bible thianghlim tawngkam takin khakna te, tauhna te, inhauhna ten a kua an hnawh ping tlat zawk thin. Chuvang chuan chhungkua-mitin zalenna leh inhriatthiam tawnna hmun ni lovin, chhung ping an ni zawk tihna a nih chu!

Pathumnaah chuan a hmasa bera kan sawi tawh angin chhungkua chu awm lo ata awma siam, hmun ruak hnawhkhaha a awmna a nih avangin mitinin neitu nihna an chang a. Chu chhungkua chuan natna a tawhin an na vek a, hlimna leh lawmna a tawn pawhin an hlimin an lawm tlang dial dial thin. Hmangaihtu leh inhmangaih tawn theuh an nih avangin rualrem lo lai, insut buai chang leh thu inhmuh loh chang te chu chhungkaw chhungah chuan nei thin mahse, an insiamremin an inngaidam tawn leh thin. A tawi zawngin chhungkaw chhunga awl (Space) la awm luah khah tuma thinurna, huatna leh ze tha lo hrang hrang ten tan an rawn lakna chu ngaihdamna, inremna, hriatthiamna leh zawldawhna ten an lo luah khalh zawk thin a ni. Chutiang chuan chhungkaw chhung kua chu a tha lo lai te paih chhuak a, thian fai a, theihnghilhin, thatna leh hmangaihna in an hnawh khat zawk thin a ni.

Chuti ang chu lo ni ta se, chhungkua ka din, ka/kan chhungkua kan tih ve fo hi chhungkua hi a lo tling tak meuh em? Ngaihtuahna a ti thui ve duh viau lo maw?! Thla eng a mawi tehlul nen, khami zana ral lehlama chhungkaw (?) inhau te kha inhauhna atan chuan a boruak nawmna leh zan mawi zia ka hmuh khan ka ui pui hle mai! Chu ai mah chuan an chhungkuaa awl (space) ah chhungkuaa tel ve lo tur hnawhkhattu awm avanga khatianga inhau kha an ni tih pawh a chiang hle. A pawimawh ber zawk erawh chu an inhauh chhan lam ni lovin, chhungkaw nihphung pawimawh ber pakhat inngaihdam tawnna leh inhriatthiam tawnna hmanga inrem leh lai hi a ni ber zawk.

Kan thu kharna atan chuan, mithiam te ngaihdan ka la in ka rawn lem lo na a, chhungkua hi nupui pasal leh fanau neih atanga din chauh theih leh din chauh tur ni pawhin ka hre hran lo. Thian leh thian inkarah te, thawhpui leh zirpuite nen kan inkarah te, pawl anga kan thawhhonaah leh, a tawi zawngin, midang te nen kan chenhona hun leh hmun reng rengah chuan din theih vekah ka ngai. A nihna takah chuan chutiang hmuna chhungkaw lo din hmasa leh chhungkaw nihphung leh ziarang lo nun chhuahpuitute bawk chu ‘chhungkua’ tia kan sawiin kan kawh tir ber thin, nupui pasal inneih hnua chhungkaw dinah pawh an chhungkua chu a nghetin a tlo bik fo thinin ka hria. American actor Michael J. Fox a thukhawchang hawhin, ‘Chhungkua chu thil pawimawh tak a ni mai lo, engkim a ni zawk (Family is not an important thing. It’s everything),’ a tih ang takin, kan that lai leh vanglaini a kan mimal chhung kua min hnawhkhahpui tura ka sawm, thian chhungkua ka din pui te, thawhpui chhungkua ka dinpui te leh nitin zantin a dam chhung atan chhungkua ka din pui te hi ka nuna thil lo thleng satliah leh pawimawh an mai an ni lo, kan nun innghahna, ka nunna tak zawk leh kan engkim te an lo ni zawk tih hi ka hre chhuak thar leh thin.