Ram leh Hnam Humhalhna atan Taimakna

Mizo te hi kan pi leh pute hunlai ata tawh ram leh hnam humhalh kawnga thikthu chhe tak leh inpe zo tak kan ni. Mizo khawtlang nuna langsar tak tak, heng pasaltha, lal ropui leh huaisen kan tih te reng reng pawh hi an ram, hnam leh khawtlang humhalhna kawnga an thawhhlawk vang a ni tlangpui. Kumpinu sawrkar ropui pawh lo hmachhawn a, khawvela democracy ram lian ber India sawrkar meuh pawh chaltauha zalenna min sual tir ngam tu chu he ram leh hnam humhalh duhna thinlung hi a ni tlat a ni. Hei hian Mizo te hi hnam inpumkhat leh ram leh hnam chhanna atan chuan thisen far tawp thlenga tang ral raih duh hnam kan ni tih a ti lang chiang viau a ni. Hnam humhalh tur chuan ram a hmangaih a ngai a. Cutiang bawkin ram hmangaihtu chuan a hnam a humhalh ngei ngei thin. Chuvangin, ram leh hnam humhalh hi inbelhbawm tlat leh pakhat humhalh dawn chuan pakhat pawh humhalh ngai ve tlat a ni tih hi kan hriat a tha awm e.

Tunlai khawvelah Mizo te hian kan thisena bet tlat tawh leh kum za tam liamta atanga kan pi leh pute hunlai ata tawh kan thinlung luah tlattu ram leh hnam humhalh hi kan buaipui nasa in, hma pawh kan la nasa viau mai. A hnam anga kan la tlem zia leh ram kan neih zim zia ngaihtuah chuan hei hi kan tihmakmawh pawh a ni reng a ni. Chtih rualin, ram leh hnam humhalhin a ken tel pawimawh em em mai chu taimakna hi a ni. Kan pi leh pute hunlai kha chuan vawiina kan tawng bungraw hriat bel tak tak-cultural assimilation, economic assimilation etc te hi an hr eve hauh lovang. Mahse, ‘ka ram’ tia an chhal tawh chhunga cheng ni lo tawh phawt chu an tan ‘ram dang mi’ an ni mai a. Chung ram dang mi te chu sap pachal an ni emaw, vai lungfing pawh ni raw sek sek, an ramchhunga thu an rawn neih chu an phal lo bur mai a. Chutiang tuma an ram leilung rawn raptute chuan an nunna an thap tihna tlukah an ngai hmiah a, tam takin kan Mizo lal leh pasalthate kutah an nunna pawh an chan phah reng thin a nih kha.

Tunlaiah erawh chuan khang hunlai anga a pawng ataka tharum hmanga ram (territory) min rawn hnehchhuh tum emaw, min rawn thuhnuai tum emaw, hmelma leh ral hmachhawn tur kan nei ta lem lo. Amaherawhchu, vawiina kan ram leh hnam min rawn runtute te chu chemsen, fei leh silai kengtute ni lovin thluak leh pawis humtute an ni ta tlat mai. Tunhmaa tharum nena min awpbeh tumtute khan tunah chuan ziakfung leh sum hmanga min awpbeh tumin thapui an rawn thawh chho leh tan ta. Vailen thawh khatna leh vailen thawh hnihna ten Mizo ram leh hnam an ti mang zo lova, tharum hmangin kan hnam min suat chimit zo hek lo. Tuna vai len vawi thumna lo lian mek erawh hi chuan kan hnam lungphum tinghingin, kum za tam kalta ata tawha kan ram hmangaih leh humhalh pawh chu a then lai laiah min rawn su thiat tan ta reng mai. Hei hi hria in ram leh hnam hmangaihtuten rawl an chhuahin ke an pen a, sum leh tha tam tak sengin ram leh hnam humhalh beihpui chu a pawl ang leh mimal ang pawhin an thlak tam up mup mai le! Kan ram leh hman hi chhanhim zo tak maw?

Ram leh hnam humhalh kawnga pawl leh mimal ten hma an lo lak tawh leh an lak mek te hi chhunzawmin i tangrual zel ang u. Chumi atana kan hmanraw tangkai, kan fei-thin-dawt atan chuan taimakna hi i hmang bawk ang u. Mimal tinin kan tih theih, sum tam tak sen ngai lo leh hnam dang leh ram dang mi min eiral mektute umchhuahna atana tangkai bera ka hriat chu he taimakna hi a ni tlat. Kan ramchhunga chanvo nei ngai reng reng lo chakma ho kan tuallai ngeia an huangtau tawh zia te hi! Vawiina hnawk kan tih em em chakma tam zawk te hi an thlahtute han chhui ta ila, engtik hunlai emaw atanga Mizo awmpui leh hlawhfaa lo tang tawh, chu chu remchanga hmanga Mizorama inbengbel ta hi an tam hian ka ring tlat zu nia! Kan kutin a thawh theih reng pawh thawk tura awmpui lak duh tlat hi Mizo hnamzia a ni ngai lo. An taimak kan chelh lo em ni dawn le? Mizo mistiri tam tak kara vai mistiri chhawr kan duh zawk tlat mai te hi? Kan Mizo mistiri te u, vai ho ang hian in hnathawh hunbi dik takah thleng ula, hauh leh hrawk dawl ula, a tawi zawngin, vai ho tih theih leh thiam aia tha hret, dawhtheihna nei tam hret, a tawi zawnga anni aia ‘hret’ zel nit a ula, tu Mizo pa hian nge maw a Mizopui aia vai chhawr duh tehlul ang ni? Chutiang zel chu a ni. Zirlai pawhin a hnam dang zirpui te aia hret zelin, politician, sumdawng, officer, hlawhfa, driver etc te pawhin kan ram chhunga an thawh ang thawk ve hnam dang te aia hret zelin tlan khalh zel ila, kan ramah hian nuam an tiin, an cham rei duh hian ka ring lo.

Ram leh hnam hi hnam dang velh, thawn haw, dawr kharsak leh rikrap ringawt chuan a humhalh zo lo. Thinlung atangin intan se, chu chuan kan lei laihna hmunah te, office-a kan thutna hmunah te, kan inhlawhna hmun leh kan sumdawnna hmun, Mizo ten kana wm ve na leh kan thawh ve na hmunah tawh phawt chuan taimakna hian i humhalh ang u. Hnam dang sak in, hnam dang siam kawng, hnam dang siam ei tur, hnam dang siam incheina...heng te hi Mizo siamin thlak ila, chutianga mahni hma zawn theuha kan tih ngat chuan ram leh hnam humhalhna hi lei laih atang te, kut hnathawh atang te leh mipui mimir ban phak leh nitin kan thiltih leh hnathawh atang te hian a takin kan kalpui thei dawn a ni. Political level-a inbiakna, sawrkar mi pawimawh te rorelna leh mi challang te tih atana ram leh hnam humhalh hi khek ngawt lovin kan inhlawhfakna hmun atang te, kan huan thlai enkawlna atang te hian kan humhalh daih thei asin!