Farewell Obama

            Kum 2004 a Senator atana thlan tlin leh kum 2008  leh 2012 a khawvela hna hautak ber te zinga an sawi thin, United States of America President dinhmun chelh tura America mipui ten an thlan tlin, a thusawi ropui leh ril tak tak te avanga American thalai te ngaihsan rawn, Barack Obama chuan US President a nih chhunga a tawpna atan kum 2004 a politics khawvel a luhchilh theihna tura kawngka hawnsak tu, Senate membera thlan tlin a nihna Chicago khawpuiah ngei mai thlahna thuchah (farewell message) chu 10^th February, 2016 (Thawhlehni) khan a sawi ta a. A dan pangngaiin a tawngkam chhuak thenkhat te chu American chu sawi loh, khawvel letliama televisiona lo thlirtu tam tak te thinlunga cham hlen tur a awm leh nual mai! An President ngainat hun hnuhnung hmanpui a, thlah tura lo kal mi 18,000 chuang te pawh standing ovation pe reng rengin a thusawi chhung kha chuan hun an hmang tluan deuh thaw tih a lo thlir ve te chuan kan hre awm e. 20^th January, 2016 a President-elect, Donald J. Trump hnena a lalthutthleng hlan tawh mai tur a ni a. Chutih rualin, minute sawmthum emaw lek chhunga President Obama thuchah hnuhnung atang khan chhenfakawm zual nia ka hriat te ka han tarlang ve reng reng teh ang.

            President Obama chuan, “Politics chu a nihna takah chuan thluak/ngaihtuahna hmanga inbeihna/indona (battle of ideas) a ni a, chu chu democracy kalphung reng a ni. Chu indona chu indona dang nen a inang lova. Keinin ngaihtuahna tha tak tak kan neih ang bawkin kan bitum te pawhin ngaihtuahna tha leh ropui tak tak an nei ve tho. Ram tana tha tur a nih chuan an ngaihtuahna (idea) chu kan hmang tangkai mai tur a ni. Kan hman tangkai sak duh lo a nih chuan chung idea ropui tak tak te chuan min kal pel mai dawn tho va, ramin hma a sawn thei ngai lovang,” tiin a sawi. A thusawi dikna ti lang tu pakhat chu kum 2008 inthlan dawna Democratic party presidential candidate nih inchuha a elpui ber, Senator Hillary Clinton, President a nih hnua cabinet portfolio pawimawh tak, Secretary of State atana a ruat kha a ni. Kan ram politics hian he a thusawi tawi te ah hian zir tur kan nei em le?!

            Hei bakah hian President Obama chuan racism leh corruption chungchang pawh sawilangin, zawhna pawimawh tak leh ngaihtuahna ti thui tak mai, “ Mi thenkhat te aia American bika inngai te leh in dah chungnung te hian democracy ruhrel an ti nghing a. Tin, kan political system zawng zawng corrupt vek a ngai leh puh a, mahni thut hmun atanga keimahni thlan tlin ram hruaitute dem leh puhchhe tu te hian an sawisel hruaitute thlan tlin kawnga an tel ve na leh an mawhphurhna hi an ngaihtuah ngai em?” tiin America mipui te chu a zawt a. Nakum maiah khian Mizoram pawhin kan hruaitu tur te kan thlang leh tawh dawn a. Kan ram hruaitu te leh a thlang tlingtu mipui ten President Obama thusawi hi darthlalangah hmang a, chiang taka in enfiah nan hmang ila a va duhawm em. Racism chungchang a sawi paha President-elect Donald Trump, a campaign auhlaa America rama Muslim te luh khap tura intiam khen nana Muslim te a pawng a taka a huat loh thu a’n zep tel zeuh khan lawm a hlawh hle a nih kha. Politician tha chu mi cheng dek thiam leh palai thiam, a tawi zawngin diplomat tha tak a nih tel a ngai a. Chutiang ni thei tur chuan politics a thawh (khel lovin thawk se!) thiam-political diplomacy a thiam a ngai bawk. Kan politician rual te leh an thachhang dawl tur te zingah hian ‘diplomatic politician’ tha tak hi eng zah nge kan neih a, eng zah nge hun lo kal tura lo chawr chhuak tura beiseiawm kan neih le?

            A thusawi dang leh pakhat, ram sum leh pai chungchang (economic issues) a sawinaah President Obama chuan, “Ram hausakna leh sum leh pai dinhmun chungchang zawng zawng hi rim taka hna thawk thin middle class te leh an lak luh phu lova hausa te inbeihna chungchang ringawt sawina a nih chuan, chung mite, rim leh hah taka hnathawktu te chuan an lak luh phu lova hausa te hausakna chuang liam tlem te chu an inchuh reng mai dawn tihna a ni,” tiin a sawi. He a thusawi hi chu a practical-in a khal tha telh tawlh hlein ka hria. Mizo te hi a sawia sawi lamah chuan kan chak viau mai a. Social media forum hrang hrangah te pawh thu hrang hrang hi kan khel peih viau. Corruption chungchang, zu chungchang, sawrkar tha chungchang etc. Chutih rualin, thua sawi piahl ama a thawha thawh leh a tiha tih hlawhtlin zawk chi hi a awm. Chumi tih hlawhtlin kan tumna kawngah chuan hlawhchham chang te pawh a awm negi dawn a ni tih President Obama vek hian ti hian a sawi a. “Ram inrelbawl dan kalphung (system) avangin a chang chuan in hlawhtling ang a, a chang chuan in hlawhchham bawk ang. Mahse, in tuma in chian a, nghet taka in din tlat phawt chuan eng system mahin a tichhe hlen lovang che u.” Ram veitu leh siam that duhtu tak tak te tan chuan bultanna innghahna lungphuma hman tlak a niin ka hria.A thusawi dang tha tak tak te pawh la awm nual mahse, a sei lutuk loh nan, a nupui Michelle Obama, “Kum 25 chhung kha ka nupui i ni mai lova, ka thian tha ber i ni,” tia a sawi te, a thachhang dawltu ber Vice President Joe Biden, “Ka unaupa (my brother),” tia America mipui te hmaa a sawi te kha hriat a nuam ve hrim hrim.

            Awle, President Obama hian khawvela office thiltithei leh ropui bera mi tam takin an ngaih, US President office kum riat a luah chhung khan hnuhma ropui tak tak a hnutchhiah a. A healthcare policy Obamacare te, President George W. Bush hunlaia America in sum harsatna nasa tak a tawh, chumi khaichhuahna tur American Recovery and Reinvestment Act, 2009, Stimulus Package tia an sawi bawk a kalpui te, Iran Nuclear Deal ziah a nih theihna kawnga a hmalakna te, climate change chungchanga khawvel ram dang hruaitu lian te nena an hmalakna leh chumi rahchhuah Paris Accord te, Iraq atanga US sipai hnuhkir te, American automobile industry thenkhat sum neih loh avanga tluchhe mai tur a tundin leh te, Cuba nena US inlaichinna siam that kawnga a hmalak na te, global terrorism do kawnga a hmalakna te, Middle East buaina chin fel dan kawng zawnga a beihna te, US-Russo-Chinese inlaichinna tih that kawnga hma a lakna te leh kawng dang tam tak sawi tur a awm. Chutih rualin a hlawhchhamna hrang hrang-a intiamna anga Guantanamo Bay a khar theih loh te, ram leh ram insumdawn tawnna kawnga agreement pawimawh tak Trans-Pacific Partnership (TTP), a nih tur ang ni zo ta lo te, Libya tualchhung buaina chinfel kawnga a hmalakna beisei pha ta lo te, America mipui 70% chuangin an thlawp lo chunga Afghanistan rama sipai a thawn luh belh te, US a hnathawh tur nei lo (unemployed) chungchanga a hmalakna leh a dang te pawh a awm ve bawk.

            Eng pawh chu nise, a thil tih that leh sawisel a kaina zawng zawng te nen US President 44 na, Barack Hussein Obama chu khawvelin a mangtha a lo ngai ta a. A thuchah hnuhnunga a tawp kharna leh America mipui te hnena President nia a thu chah hnuhnung ber hi i ngaihtuah zui teh ang. “In President ka nih chhunga a tawp ber atana ka chah duh leh ngen duh che u chu President ka nih tan tirha ka ngenna tho che u kha a ni. Danglamna (change) hi thlen tir theih a ni tih ring ula, ka theihnaa ka thlentir ni lovin, nangmahni theihnaa thlen tir theih a ni tih hi.” ‘Yes we can, Yes, we did.’