Thlai Zuartu Nu

Tlai khat ka walk tur chu thil danglam angreng tak, han ti teh hluai ila, a danglamna em em chu ngaihtuah chian chuan a awm lem lo! Tlai tina ka tih thin dan pangngaiin dar li a rik chiahah insiamin, walk (exercise?) tur chuan ka chhuak leh a. Dawr pakhat ka kal pelh lai chuan a chhung atang chuan nu pakha thian footpath-a em phura ding, a thiannu ni awm tak chu, “I va cher em em ve!,” a lo ti lawng lawng a. A ni lah tak a, a biak nu chu a sawi hmaa ka va  hmuh phat khan a cher ka ti khawp mai kei pawhin! Ka kal pelh lai takin chu nu chuan, “Nia, vawiinah damdawiin atangin ka chhuak chauh a,” tiin a lo chhang a. A thusawi ka hriat chuan ka kal pelh tawh hnu, em-a thlai tlem te fun hran thliah, tam lem lo tak phurtu nu chu lehhawi meuhin ka va en leh a, ka rilru ngaihtuahna a luah zui ta reng mai.

Ka pi, a hming pawh ka hriat loh chu vawiin chawhma lamah (a nih ka ring) damdawiin atangin a chhuak hlawt a ni a, eng chena rei nge a awm a, eng natna tuarin nge a awm ka hre lo. Mahse, a taksa pawn lam lan dan en mai pawh khan a natna chu tlang hri leng satliah mai chu a nih a rinawm loh viau. Chuti chung chuan, damdawiin atanga a chhuah hnu lawkah, darkar tam pawh a la liamin ka ring lo, chawhmeh zuarin a vak chhuak leh nghal a nih chu! Eng ang chhungkua nge an nih a, eng ang dinhmuna ding nge an nih pawh ka hre lo. Mahse, hei erawh ka chiang. Damdawiin atanga a chhuah hnu lawka thlai zuara a rawn tei chhuak leh chu a ‘tulna’ in a ur thlu ngang a ni ngei ang. Peihsam lo leh taksa la chak vak lo chung chunga thlai a zawrh chu a fa, naupang te te ten zanriah ei tur an neihna turin a tul a ni thei a, damdawiina a awmna senso atan an sum neih ang ang an hmang zo va, chu vang chuan a theih ang anga sum a lakluh thuai thuai chu a ngaiin a mamawh a ni thei... ‘thei’ leh ‘ang’ a va tam em!

Mi te angin an khawsak han pangngaiin, an dinhmun te han kang ve deuh hlek se zawng, damdawiin atanga a chhuah a, an in a thlen rualin, rilru leh thinlung hahchawlin a tluzal ngeiin ka ring. Mahse, a peih emaw, a peih lo emaw, a vah chhuah leh chu a ngaiin a tul miau si. Mi thenkhat ten (awm thei faten!) fel taka awm awl ringawt pawh peih lova, chhungkaw ti buai thei ang bera suahsual rawng an bawl laiin, kha thlai zuartu nu kha chuan awm awl thlahlel em em chungin, chhungkaw rawng bawlin a chhuah a ngai thung a. Pathian rorel dan hi a lai lo kan ti dawn nge, kan ram roreltute kan dem mai zawk ang?

Mi thenkhat damdawiin awm te chuan an awm man leh senso zawng zawng te sawrkar atangin an thing (bill) let leh vek thei a. A nihna takah phei chuan, chutiang ti thei dinhmuna ding thenkhat te hi chuan, zu in an taksa a ei chhiat man sawrkar an thing a, an suahsual tukkhum pawn man te hi sawrkarin a tumsak a ni ber! Kha thlai zuartu nu erawh kha chu chutiang vanga damdawiin lut chu a ni lo chiang mai. Duh thlang thei nise, harsa taka a thawh chhuah leh  an chhungkaw sum khawlsa te kha damdawi man leh in enkawlna senso a hman a ui dawn tehlul nen; thlai rah leh thlai hnah zuarin chung a sum sen ral tak te chu, mi khawngaihnaa innghat chungin a thing  (bill) let ve leh dawn tihna a ni. Pathian anpuia siam theuh theuh mihring te hi kan lo inthlau thei thin mang e.

Keimah tak pawh chu ka in ngaihtuah a. Thlahtute atanga zunthlum, thisen sang leh lung tha lo tamna thlah te zinga mi, ei that uchuak vang pawh ni lo, ei apiang ngeih em avanga rihna pun chak avanga tlai tin, peih leh peih lova thlan ti tla ziah leh, kha thlai zuartu nu, a hranpaa ei in insum fo ngaihna tur chawhmeh hmeh zen zen lo tih hriat tak, tlaia rawn chhuak nen khan (tlai tin a zuar maithei bawk) kan dinhmun leh kan tlai chhuah chhan chu a va inang lo si em!

Hetiang teh nuai hi mihring te kan nih avang hian kan vanram ngaihtuah dan te, thlen kan chak chhan leh thlen hlan kan nghahhlelh dan te pawh hi a lo inchen lo thei viau dawn a nih hi te ka ti a. Kan Zorama Pathian lo kal a hnaih bik  em em laiin, New York velah chuan a lo la kal maiin a rinawm loh hmel an tih fiamthu fo te hi thil ni thei tak ni dawn ten ka hre ta rum rum mai! Chutiang a nih chuan ram rethei apiangah vanram a hnai ang a, ram hausa apiangah Isua a lo la kal mai dawn lo te pawh a nit a ve ang!

Kha thlai zuartu nu khan engtin tak a hringnun chu hmang chho zel ang maw? Kei hian engtin tak hmang chho ve ang i maw le?!