Kut Hnathawh


 
            Kan pi leh pute hun laia an eizawnna leh ei hmuhna ber chu lo neih kha a ni a. Tin, khang hun lai kha chuan engkim kha mahni kut kawiha tih vek ngai leh khawl tanpuina tel lo/awm lo a nih avang khan hna an thawk a nih pawhin kuta hna thawk-kut hnathawk kha an ni lo thei lova. Tin, an thil tih reng reng pawh an kut hmanga an tih-kut thil tih vek a ni kan ti thei ang chu. Kan hnam nun leh khawtlang dam khawchhuahna pawimawh tak a nih miau avangin ‘kut hnathawh’ tih thumal hi vawiin thlenga Mizo tawh phawt thinlunga la cham reng leh hmun lailum la luah reng a ni ta zel mai. Vawiin thlenga Mizoram mipui tam zawk ten lo neia ei an la zawn avang pawh hian hmun pawimawh chang awm reng pawh a ni awm e.
            He thu mal mawi tak leh kan hnam nun nena in belhbawm tlat ‘kut hnathawh’ hi khawvel danglam zelah hian a awmze lai ril (core meaning) hi ngaihtuah that a, her rem hret a hun tawh em? tih lai hi ka han sawi tum ber chu a ni. Mipui mimir rilruah hian kut hnathawh han tih hian lo leh ram lam hna, biang thlan tui far ngeia thawh hi kan kawh tir deuh bik thin niin a lang a. Dik pawh a dik viau reng a. Chutih rual chuan kan tunlai khawvelah chuan ei kan zawnna te a lo danglam chho va, lo leh ram lama kawla ni chhuak chhiara ei zawng tam tak la awm mah ila, thangthar zawk te chuan mahni phak tawk theuhah, a sang emaw, a hniam emaw, lo leh ram lam hna ni lo, hna dang hahdam zawk leh thiamna sang hmanga thawh theih tam tak thawkin, ei kan lo zawng ta fer fur hlawm a. Hetiang hi kan khawvel lo kal leh zel turah pawh kan nun phung leh kan hnam kalsiam rel dan tur pawh a ni zel tawh ang. Kan hna thawh lai theuh kalsan a, lo leh ram lama kan liam leh vek chu a rinawm tawh loh. He hmasawnna leh changkanna in a rawn hrin tel, eizawnna kawng dang a rawn hrinchhuah te hmanga kan intodelh chhoh mekna hian a lehlamah chuan Mizo hnam nuna hmun pawimawh tak chang thin ‘kut hnathawh’ hlutna leh pawimawhna hi a rawn ti hniamin a rawn hnawl ta niin kan sawi thin. A dik chiah em?
            Sawi tawh ang khan kan pi leh pute hunah kha chuan engkim kha kuta thawh leh tih a nih vek avang khan khawtlanga pa awm thei leh khuangchawi nu leh pate pawh khan an thawhrim rah, an kut ngeia an thawh rah sengin khuang an chawi thei kha a ni a. Tunlai chu nise kut hnathawktu hlawhtling kan ti ngeiin a rinawm! Helaiah hian ngunthluk zawkin I han ngaihtuah teh ang. Kan pi leh pute khan kut hnathawh kha an ngaisang a, kut hnathawh hmanga khuangchawi thei nih kha an khawtlang nuna an chak ber pawh a niin a rinawm. Chutih rual chuan a kut hnathawh ngawr ngawr kha an ngaihsan leh an hlut lai ber a ni ang em? Kut hnathawh kan tih ruala rilrua lo lang tel ve ziah thin lo leh ram lam hna te, sa kah te kha an ei leh bar zawnna kawng awm chhun kha a ni miau a. Chumi kawnga hlawhtling leh ding chhuak tur chuan taimakna, chhelna leh tumruhna nasa tak neih a ngai a. Kan pipu te kha a thuhrimin thu chhia leh tha sawina kawnga thu khuh taka sawi thin an nih angin kut hnathawh phena taimakna, tumruhna leh chhelna inphum ru zawk te kha chawisan an tum leh an ngaihhlut ber zawka chu niin a lang. A nihna takah te chuan hna rum thawh aia eizawnna hahdam zawk te chu hmu in, nei ve sela, ni tla van vuaia hah thi kula lo leh ram lama chhuah nitin kha an peih bik dawn em ni?!
            Tunlai khawvelah kut hnathawh hi chawisan a, ngaihhlut thar leh tumin tan han khawh viau thin mah ila, a sawngsawhlawt loh zia hre chiangtu vek kan ni. A sawngsawhlawt lohna chhan hi kut hnathawh kan ngaihdan leh huam tir chin dikhlel hi a ni thei ang em? Kut hnathawh sawifiahna atan hian sawrkar hna/office hna ni lo, ram leh lo lam hna, nitin inhlawh chawpa eizawng te hna chauh kan huap tir hian thangthar te-ah kut hnathawh hmuh hniamna leh ngaihnepna a hring zawk em? Heti lo hian kut hnathawh chu, ‘Mahni kutkawih ngei eizawnna hmanga ding chhuak, taimakna, tumruh leh chhel vanga intodelh,’ ti te hian sawifiah ta ila. Chu chuan hna rum leh ram lam hna chauh huam tir lovin, political fitness tel lo, tihpuitu tha neih vang ni lo, thamna vang ni lo etc, mahni thawhrim rah avang liau liau a sawrkar hna sang chelh te, sumdawnna leh mahni eizawnna zawn theuha dik taka thil kalpui thin te hi huam tir ta ila kan ngaihdan hi a her danglam deuh thei ang em? Hetia kan tih rual hian chutiang tak pawh chuan lo ti thei ta tehrengin, kan ngaihdan leh pawm dan zawng (value perception) pawh chu lo siam rem/siam tha thei ta tehreng pawh ni ila, kan tu te, tun chhuan atanga chhuan hnih chhuan thum velah chuan a tak ram kan hmu thei chauh maithei. Mahse, kan hnam rilru a siamthat tho chuan a pawi lem em ni? A nihna takah chuan sawi tawh angin, a pawng a taka tunlai techno-world-a kut hnathawh sawifiahna atana kan hman-lo neih, huan thlai siam, inhlawh etc ngaisang tura han inzilh viau chu sawt mawh tur pawh a ni reng alawm. Pen hmawr hmanga eizawng, computer leh internet hmanga bazaar, khawl hmanga hnathawhna khawvel a ni tawh miau si a. Chu ai chuan kut hnathawh hmanga intodelh tura taimakna, thahnemngaihna, tawrhchhel a ngaihna etc zawka te hi thangtharte rilruah a hlutzia leh pawimawhzia tuh ngheh tum ta zawk ila. Chutiang a nih chuan lo-ram hna, hna rum an thawk a nih pawhin mahni kutkawih ngei hmanga an intodelh a nih chuan an zak lo ang a, eizawnna dang hahdam leh hlawk zawk thawk te pawhin chutiang dinhmuna an ding thei chu a hlutzia leh an vanneih zia an lo hriat chian phah ang a. Chu chuan mahni hna theuhah rinawm leh taima taka thawk zel turin tan a pe ngeiin ka ring tlat a ni. Tin, chumi piahah chuan kut tling lova sum ngah tia kan sawi mi pamham, eiru leh midangte chanai eisak chingte chu eng dinhmun sangah pawh ding se, kan itin kan awt bik lo tawp ag tih hi ka ring tlat a ni. Mahni rila rah fanau rochan ngat te chu chhe bawk lil lel pawh nise, thenawm te fa chum buang ai chuan kan hmangaih fe zawk a ni lawm ni? Kan hmangaihna chu an pianze nalh leh nalh loh, vun dik leh dik loh lam ni lovin kan rila rah an nih vang zawk a ni. Chutiang chuan kut-hna-thawh kan tih pawh hian keimahni kut kawih ngeia kan din leh sual chhuah eng thil pawh hi huam tir tai la mahni chan tawk theuhah mahni kut ngeia kan din chhuah leh chan tawk theuh chu kan lungawi pui ngei dawn lawm ni?!
            Han sawi kai ta zel ila. Hringfate hringnun hi mak ve deuh asin. Kum naupang te, vanglai hun leh mihring kum chhiara dam chhung ni chhiar tur kum engemawzat la nei te, nun thlakhlelhna nei lo leh an tan nunna in hlutna reng nei tawh lova hria a mahni nunna chhat te kan tam ta hle mai. Tin, mihring tu mai pawh hian kan dam chhung hian tum khat tal chu dam aia thih mai thlahlel hial zawk khawpa harsatna nen kan inbuan chang kan tawng theuh tawhin ka ring. Heti hian ka ngaihtuah thin. Kut hnathawh hlutzia leh a rah thlumzia hre fiah tak tak tur leh ngaihlu tak tak tur chuan kut hnathawh kan sawifiah dan leh a nihna ril tak hriat fiah leh siam rem a ngai kan tih ang bawk khan, nun leh nunna hlut zia hre fiah tak tak tur hi chuan enge nun chu ni tih hi a hrilhfiahna leh kan thinlungin a pawm dan tur dik tak hi kan in hrilhfiah a, kan inzirtir thar fo a ngai ni te pawhin a lang. Hemi chungchang kan sawi kai chuan kan thu ziah a thui lutuk palh ang! Heti zawng hian, kan ngaihtuahna ril kawngka min hawnsaktu atan han sawi teh ang. Nunna leh Nun hlutzia chu mihringin he khawvel a chhuahsan dawn a, a thihna khuma a thawk tawp ber thlenga nung tura a taksaa chakna awm zawng zawng sawm khawm a a beih dan hi en mai rawh!    

             

Comments

Popular posts from this blog

Tunlai khawvel leh Kristianna

Career Guidance

Tlawmngaihna leh Tunlai Mizo Nun