Intodelh

 

A awmzia

            ‘Intodelh’ tih hi Mizo tawng bungraw zinga sawi hlawh tak leh hriat hlawh tak a nih rualin, a awmzia, a nih phung dik tak hi tawi fel taka sawi har zet mai a ni lawi a. Tin, he thu mal hian awmze kan tel hrang hrang a nei ti pawhin a sawi theih awm e. Mi ngo ho tak pawh hian intodelh tih sawifiahna tawngkam thu mal pakhat hi an nei chiah bik lo nge, self-sufficient, self-supporting, self-reliant adt tiin an sawifiah ve duah tho mai a. Chu chu Mizo tawnga kan leh chhawn veleh chuan midang tumah behchhan lova mahni mamawh thawh chhuah/neihna, mahni inrintawkna adt tiin kan sawifiah thei mai awm e. Hei hian a ti lang chiang em em a ka hriat pakhat chu, intodelh hi thil pakhat/kawng pakhat tih/zawh dika fel mai thei leh neih mai theih thil ni lovin, kawng/thil hrang hrang in chuktuah khawm leh rem taka luang khawm atanga neih theih a ni tih hi a ni. Chu vangin, intodelh tur chuan thil hrang hrang hlen chhuah hmasak ngai a awm a, chung thil hrang hrang te hlen chhuak hmasa lo chuan intodelh theih a ni lo ti te pawhin sawi ta ila…intodelh tur chuan thil hrang hrangah kan intodelh hmasak a ngai kan ti a nih ber chu!

Intodelh hi zir chi leh in zirtir theih a ni em?

            ‘Intodelh’ hi eng vanga pawimawh nge ni a, a zira zir chi leh inzirtir a, in kawhhmuh chi a ni em tih hi ngaihtuah fe tham a awmin ka hria. Tin, intodelh hi zirin, in zirtir dawn ila, eng chin hi nge a huam a, eng chinah nge kan reh bun dawn tih te thleng hian khel tham zet a awm a. A tlangpuiin, intodelh chungchang kan sawi leh kan in zirtir a, kan sawi tam ber chu sum leh pai, ei leh bara intodelh hi a ni tlangpui thin in a lang a, tin, han ngaihtuah mai pawh hian chu chu tu rilru ah pawh lang hmasa ber hi a ni tlangpui zelin ka hria. Tin, sum leh paia intodelh te, ei leh bara intodelh te hi kan buaina tam tak ching feltu a nih piah lamah a lo langsar sam bawk nen, helam kawnga intodelh hi mitin ten kan tih makmawh tur ni pawhin a lang a. Chu tih rual chuan, sum leh pai leh ei leh bara intodelh tur pawh hian ‘thil hmasa’ hi a awm tlat mai a, chu vang tak chuan intodelh tura a kawng te, a kal hmang te hi in kawhhmuh ngai, in hrilh hriat ngai leh zir ngai a ni a, kan zir a, kan tih chhin a, hlawhtlinpui ngei kan tum hi a ngai ta a ni. Heta pawimawh ta chu, intodelh tur chuan engnge kan zir ang a, eng eng nge kan mamawh hmasak chu ni ta tih hi a ni a, chu chu kan thu khel ber tur pawh a ni dawn a ni.

Intodelh tur chuan…

1.      Rilru/Ngaihtuahna dah dik hmasak a ngai:

Khawvela thil ropui lo chhuak tawh zawng zawng hi ngaihtuahna (idea) atanga intan vek an ni an ti thin a, chu ti ang chiah chuan, intodelh tura kan zin kawng pawh hi rilru/ngaihtuahna atanga intan a ni I han ti hmasa phawt teh ang. Mihring te hian khawvela kan awm chhung hian engnge kan zawn ber a, kan duh ber tiin inzawt ta ila, tawi te-a chhanna fun kim ber ni a ka hriat chu ‘hlimna tluantling (lifelong happiness)’ leh ‘mahni tum dan leh beisei dan ang taka hmuingil taka awm (prosper/prosperity)’ hi a ni kan ti thei ang. Duh zawng han in zawh hian mita hmuh theih leh kuta khawih theih (physical objects) kan sawi duah thin a, mahse chu thil kan duh chhan tak zawk chu a phenah khan a lo awm khiau thin a, chu chu a pawimawh lai tak chu a ni. A chunga kan sawi atang khian hausakna (wealth) leh prosperity awmzia chu kan thliar hrang thiam mai awm e (Prosperity hian wealth hi a chhung khung vek a, prosperity nei tur hian mi hausa leh neinung nih kher a ngai lo).

Zir mite chuan ‘mihring’ hi thil chi hnihin a siam niin an sawi a. Pakhatna chu kan taksa, pianhmang leh ruangam nei hi a ni a, pahnihna chu mihring mihrinna, thil nung, chhia leh tha hria kan nihna (aliveness), keimah min ti keimahtu (I/self) hi a ni an ti a. Taksa chu keimah min ti keimahtu in a duh duh a tihna tura a hmanrua chauh a ni an ti a. Chu keimah min ti keimah tu chu kan rilru ngaihtuahna hi a ni. Chu vangin, mihring tluantling ni tur chuan kan taksa leh rilru mamawh chu kan phuhruk tur a ni a, a eng emaw zawk zawk kan phuhruk lo a nih chuan hlimna leh hmuingilna tluan tling kan nei thei lo tih a ni a, a dik thui hle pawhin a lang. Chu tih rualin, kan taksa mamawh phuhruk dan leh rilru mamawh phuhruk dan kawng chu a inang ta lo thung a, hei tak hi intodelh tura rilru dah dik a pawimawh kan tihna chhan tak pawh a ni ta a ni. Entirna atan, taksa mamawh chu a kumhlun lova, hun bik nei a ni. Thawmhnaw hi sik leh sa inthlak dan azirin kan mamawh dan a inang lova, chaw pawh riltam lai chauhin kan mamawh a, puar tawh hnuah chuan tangkaina a nei lova, riltam leh hunah a tangkai chauh thin. Mahse, rilru in a mamawh, hlimna, thlamuanna, hlutna adt erawh chu mihringin eng tik lai pawh a kan mamawh a ni thung a, khawih leh hmuh theih thil (material objects) te hian thui tak chu kan mamawh chu min phuhruk thei mahse, a bo/ral hun emaw, a aia tha zawkin a rawn hliahkhuh hunah a tangkaina chu a bo lehnghal mai thin (Mobile handset chhuak thar ber I nei a, I hlimna kha a aia tha zawk dang a rawn chhuah a, I neih leh hunah chuan a hmaa I mobile handset neih hmasak avanga I hlimna kha chu a bo nghal ang). Chu vang chuan, intodelh tur chuan rilru dah dik hmasak a ngai kan tih hian, kan sawi tum leh awmzia ber chu, khawvelah hian engnge I mamawh ber tih zawhna hi uluk taka mahni in zawh a, chhanna mumal tak kan inpek hmasak a ngai a ni kan tihna a ni ber. Kan rilru ngaihtuahna hian kan taksa chet phung leh chet chhuah dan a thunun tlat avangin, chu rilru ngaihtuahna (keimah min ti keimahtu) chu kan dah/siam dik hmasak phawt a ngai a ni. Rilrua mamawh ngah a in hriat na na na chuan mamawh kan ngah tihna a ni mai a, mamawh kan ngah na na na chuan kan mamawh nei tura mamawh kan ngah tihna a ni. Kawng danga sawi chuan, mamawh ngaha in hriatna rilru chuan mamawh neihna turin mamawh ngahna rilru bawk a hring chhuak a, a tlem zawng ni lo, a tam zawng zelin ngaihtuahna a kal a, rilru ngaihtuahna chu mamawh mamawhna, chu mamawhna tura mamawh lehna…mamawh, mamawh, mamawh hlirin a lo khat ta thin a, chu rilru ti hlawhtling tur chuan a thuhnuaia awm, taksa chu a che a che ta lo thei lova, hei tak hi intodelh lohna bul chu a lo ni ta thin a ni. Chu tih rualin, hetia kan sawi hian, mita hmuh leh khawih theih thil  (pawisa, in leh lo, thawmhnaw, scooty, car, mobile handset adt) kan mamawh te hi kan hnualsuat thei chuang hauh lo tih hriat erawh a pawimawh a. Kan sawi tawh ang khan, hlimna tluan tling nei tur chuan kan taksa leh rilru mamawh te hi phuhruk an ngai ve ve kan tih tawh kha…a pawimawh ber chu kan taksa leh rilru mamawh inbuk tawk tir thiam hi a ni a, chu tah tak chuan, taksa thununtu, rilru ngaihtuahna hi kan her dik hmasak a ngai kan ti ta zawk a nih chu. Tin, hlimna tluantling leh hmuingilna, intodelh tura neih hmasak ngai kan tih te hi kan rilru leh taksa mamawh phuruk ve ve na atang chauh a neih theih a ni tih kan hriat pawh a tha awm e.

2.      Intodelh tur chuan taimak/thawhrim leh dawhtheih a ngai:

Intodelh tur chuan rilru lam dah dik a duhtawk mai a tawk lova, rilru dik pu chunga thawhrim a ngai. Thufingte 13:11 ah chuan, “Engmah lo mai maia sum deh chhuah chu tih riral a ni ang a, thawhrimnaa khawl erawh chu a pung ang,” tih kan hmu a. Ka rilrua zawhna awm chu, eng vangin nge thufingte ziaktu hian thawhrimnaa khawl chauh hi a pung ang a tih, kut tling lova sum leh pai hai lut a, in siam mi lian te hi khawvela a khawl tam tam, a nei tam tam an ni zawk lo em ni tih hi a ni. Mahse, ngun zawka ka ngaihtuah hian, he thu ziaktu rilru ngaihtuahna leh a ziah chhan ni awm chu heti hian a ngaihtuah theihin ka hre ta:

“Awlsam taka kan neih theih thil reng reng chu, sum leh pai leh thil dang pawh nise,awlsam taka neih theih a ni tih kan hriat tlat tawh avangin, hman ral mai mai pawh kan pawi ti lem lova, kan ui hran lem lo. Mahse, harsa taka beih hnu-a kan neih chauh theih thil, rim taka beih fe hnu a kan neih leh hlawh chhuah chauh theih thil te reng reng chu kan rohin kan hlut a, kan ui em em a, chu ti taka kan hlut leh roh chu a nih avangin, kan neih belh a nih pawhin, ren takin, ui tak chungin kan hmang thin a,thawhrim leh taimak ngai miah lova thil neitu, a hman ral pawh a awlsam taka nei leh mai thin te angin holam takin kan ti riral phal ngai lova. Ren taka hmangtu na na na chuan ren baksak lova hmang raltu ai chuan a khawl tam zawk lo thei lo a ni”

a ti ni berin ka hria! Mi tam zawk kan intodelh lohna chhan hi chu dawhtheihna kan tlakchham vang hi a ni duh khawp mai. Taimak leh thawhrim ngaihna reng reng hi chu vawilehkhat leh ni hnih khata a rah hmuh mai theih a lo ni thin si lova, chu chuan kawng tawi leh awlsam zawk min zawn tir a, a chunga thufingte ziak kan sawi ang khian, kawng awlsam hmuh tawh chuan ngaih a lo sam lo thei lova, ngaih a sam na na na chuan holam takin engkim hi kan khawhral tawh mai thin a, kan intodelh hlei thei ta thin lo a ni. Chu vangin, intodelh tur chuan taimak leh thawhrim a ngai a, thawkrim tur chuan dawhtheih/tawrhchhel a ngai bawk. Ngun takin a let zawngin han chhiar leh teh!

Intodelhna kawng dik: Dawhtheih/tawrhchhel > thawhrim leh taimak > Intodelh

Intodelhna kawng dik lo: Intodelh < thawhrim leh taimak < Dawhtheih/tawrhchhel

            Intodelh kan tumna kawngah hian a kal kawng hi kan zawh letling thin a, dawhthei taka chhel leh rim taka bei chunga intodelh hi a kumhlun zawk em em laiin, a letling chiah hian bulk an tan a, thawhrimna leh taimakna tel lova intodelh kan tum thin avangin kan dawhthei lovin, kan chhel tawk lova, kawng awlsam zawnga intodelh kan tum a, awlsamna chuan harsatna aiin awlsamna bawk a hring leh thin si a, a tawpah chuan kan intodelh lo leh nge nge thin (awlsam taka hmuh theih tawh hnuah tunge harsa takin I thawkrim leh teh ang ti leh tawh ngai?!)

3.      Lak luh tih pun aiin mamawh tih tlem:

Intodelhna kawng awlsam ber chu lak luh tih pun ai chuan mamawh tih tlem hi a ni an ti thin a, dik pawh a dik thui hle in ka hria. A nihna takah chuan, mihring hian dam khaw chhuak tura kan mamawh hi chu thil tam a ni hauh lo… ‘nuam’ tura kan mamawh hi a tam em a ni!. Dam chhung tawi te ah hian mamawh ngawr ngawr neiin, in ren leh insum reng rengin hun I hmang ang u kan ti hauh lo. Tin, intodelh tur hian mamawh chiah chiah neih hi a rem lova, mamawh baka tam ‘hret’ neih ve te pawh a ngai. Chu tih rualin, a chuang liam lutuk neih kher hi kan mamawh hran lem lo kan tihna a ni zawk. Entirna pakhat han siam lawk teh ang. Rasgula hi pum khat ei chuan a thlum dep dep a, a tui vawng vawng mai a. Pum hnih, thum, a thei deuhin pum sawm lai pawh ei ila, a la tui viau zel. Mahse, rasgula hi a tui em mai tiin ei ta char char ila, a tira tui tak kha a hnuah chuan hne lamah a kal a, ei luih zel phei chuan pum te a ti na a, thil tui tak kha a tui tawh loh chu sawi loh, a tawpah phei chuan a hnawksak mai pawh ni lovin, a huatthlalawm ngawih ngawih tawh mai dawn a ni. Chu vangin, lak luh tih pun hi kan hnualsuat ngawr ngawr ni lovin, mamawh tih tlem mai hian intodelh a awlsam zawk kan ti a ni ber. Chu mi atan chuan a hnuaia formula hi lo hmang ve chhin mai mai teh ang u.

Thil eng pawh, kan mamawh tawk/intodelhna tawk ni lo…

  

 a chuang liama kan nei teuh hian

     ↓

a tirah chuan mamawh leh tangkai a ni a

                                                                                             ↓ 

A hnuah chuan mamawh ni chiah lo, tangkai tho si a ni a

 

    ↓ 

A hnu lehah chuan mamawh loh leh tangkai lo a ni a

 

  ↓

A tawpah phei chuan thil huatthla la leh tawrhhlelhawm a ni

 

4.      Inkhawl aiin tih pun/pei pun:

Mizo te hian hnam dang te kan tluk lohna lian tak ni a ka hriat pakhat chu in khawl (saving) leh peipun (investment) nachang hriat kawngah hian a ni a, a hnam anga kan intodelh hleitheih loh chhan lian tak pawh hi a niin ka hria. Chu tih rualin, tunlai khawvelah chuan kan rilru put hmang pawh a changkang chho ve zel tawh a, tun hma anga ei chawp dap chawp lutuk a kumpui lingleta nitin hun chhiar kan tlem ve tak telh telh bakah, kan khaw hawi pawh a zau ve telh telh a, tun hun mai ni lo, nakin hun thlenga thlir leh inhmakhua te pawh kan ching chho ve ta a, hei hian in khawl leh kan thil neih peipun nachang min hriattir a, a lawmawm hle a ni. Khawvela mi hlawhtling leh intodelh te reng reng hi an bult anna han chhut ila, intodelh sa-a bul tan hi an lo ni lo tlangpui. An neih tlem te khawl keuh keuh a, fing taka peipung a, ding chhuak a, lo intodelh ta hi an ni deuh zel. Thil eng pawh kan khawl a, kan dah that hian a him a, mamawh hun a lo thlenin awlsam takin kan hmang leh thei mai zel a. Chu tih rualin, neih sa vawn that ringawt ai hian neih sa peipun hi intodelhna atan chuan a la tangkai leh zawkin a lang a. A chhan chu, neih sa khawl chu a pung lova, a kiam lo bawk a, kan khawl belh a nih loh chuan a pun loh bakah pung pawh nise, a pun dan a chak lutuk lo thin. Neih sa peipun erawh chuan kan neih a pung a ni satliah mai lova, a hlutna a lo pung tel ve zel a, hei vang hian intodelh tur chuan neih sa peipun thiam hi neih sa khawl aiin a hlawk bik te pawh kan ti thei ang chu. A pung awma sum puk (loan lak) te hi intodelh tum tan chuan in nghahna tha tak a ni thei. Chu tih rualin, rilru dah dik phawt erawh a ngai tih kan sawi tawh kha!

 

5.      Intodelhna hi sum leh pai neih tam lama ni lova, mamawh neih kim leh kim loh hi a ni zawk:

‘Intodelh’ leh a tir lama kan sawi, ‘prosperity (mahni tum dan leh beisei dan ang taka hmuingil taka awm)’ hi thil kal dun tlat a ni a, intodelh tur chuan mahni tum dan leh beisei dan ang taka hmuingil taka awm hmasak theih phawt hi tul hmasa chu a ni ti zawng pawhin kan sawi thei ang. Kan mamawh hi kan rilru ngaihtuahna in mamawh ni a a hriat ang ang hi a ni mai a, sum hi kan mamawh zinga a lansarh chhan leh intodelh chungchang kan sawi pawh a kan sawi tam ber a nih chhan chu, kan mamawh (taksa mamawh) tam zawk kan neih theihna hmanrua a nih vang a ni mai a, chu tih rualin, kan mamawh ber ni lovin kan mamawh neih theihna atana ‘hmanrua’ (means to an end) mai a ni tih hi kan hriat reng a pawimawh. Tin, taksa mamawh tam zawk hi rilru mamawh phuhrukna a ni theih rualin, rilru in a mamawh zawng zawng, entirna atan, thlamuanna, lawmna, zahawmna adt phuhrukna leh phuhruk thei a ni lo tih kan hriat reng a pawimawh bawk a. Chu vangin, a hma lama kan sawi tawh ang khan, mihring hian kan dam chhung atana kan mamawh tak tak hi chu thil tam tak a ni lem lova, chung kan mamawh te kan neih kim chuan, kan hausa emaw, rethei emaw, kan intodelh tihna chu a ni mai a, sum leh pai ngah leh ngah loh te, hman thiam leh thiam loh lam kawng ringawt hi intodelh leh intodelh loh tehna atana tehkhawng awm chhun a ni lo tih kan hriat a pawimawh hle a. Car nalh tak lei ila, khalh thiam leh si lovin, chhuah dawn apiangin midangin min khalhsak/hruai ngai ziah ila, emaw, khalh thiam loh avangin ke-a kal la ngai zel tho si se, kan rilru-a mamawha kan in hriat avanga car nalh tak kan lei chuan a tirah rilru hlimna min thlen mahse, a rei chuan, a hma lama formula kan sawi ang khan, a tirah mamawh leh tangkai a ni ang a, a hnuah mamawh chiah loh, tangkai ve tho si, a hnu lehah mamawh loh leh tangkaina awm lo leh a tawpah phei chuan hnawksak a chang mai dawn a ni. Chu vangin, intodelh tur chuan engnge ka mamawh ka hriat chian a, ka mamawh neihna tur ‘hmanrua’ ni lo, ka mamawh ka neih kim leh kim loh atanga mahni leh mahni ka in chhut a, ka in the fo a ngai tihna a nih chu.

A khaikhawmnaah chuan, sawi tawh angin, intodelh tih hi thu mal pakhat lek mah nise, sawifiah har tak, a huam chin leh huap chin pawh then fel har zet mai a ni a. Chu mai chu ni lovin, a kawng in kawhhmuh leh in zirtir dan pawh buaithlak ru deuh mai a ni. Tuna kan sawi chinah hian intodelh tura kan mamawh zawng zawng emaw, a kawng zawng zawng emaw a kim lo nasa tih ka hria a, sawi kim vek theih a nih loh piah lamah mi zawng zawng tana hman tur inang tlang (one size fits all) hmanga in zirtir theih ni pawhin a lang chiah lo. Eng pawh nise, intodelh sawifiahna tha ber, nun hlimna tluan tling leh mahni tum dan leh beisei dan anga hmuingil taka awm entirna tha ber chu KA PA KHUMA kha a ni!