Mizo leh YMA

Mizo khawtlang nun inawp dan hi kan pipute hun lai ata tawh khan saphovin communitarian society tia an sawi, a huhova nunho, chet/thiltih ho leh khawtlang rorelna pawh mimal hmathatna nil ova, khawtlang/vantlang hamthatna ngaihtuah chunga relna a ni a. Mimal pawhin a venthawn ber leh zah ber chu khawtlang/vantlang niin, khawtlang mittlun loh leh vantlang sawi kai nih chu a hlauh ber a ni. Chu rilru puthmanga chu vawiin thlengin kan la chhawm chho ta zel a ni a. He khawtlang inawpna leh inthununna hian vawiina kan khawtlang nunah pawh nghawng thui tak a la nei tih hi a chiang hle a ni.

Kan pipute huna an khawtlang nun leh an khaw din dan hmang hrim hrim kha ngun takin han thlir ila, tum leh ruahmanna fel tak an nei sa tih chiang takin kan hmu thei ngei ang. Ral leh lei do nei reng renga khawsa an nih avangin an khaw hmun tur pawh lui kam leh phaizawl, buh leh thlai thatna hmunah ni lovin, tlang chhip leh hmun chhengchhe takah an din thin niin a lang a. Hei vang te pawh hi a ni mahna, vawiina Mizoram khua reng reng hi han en ila (kan Aizawl khawpui pawh tiamin), a tam zawk chu rem leh rem lova tlang pang leh tlang chhipa khaw din  kan ni deuh fur a nih hi. 

Chutiang dinhmuna ding, ral leh sa laka an himna ngaihtuah reng ngai dinhmuna ding an nih avang chuan khawtlang inawpna leh inkaihhruaina pawh a that a ngai hle reng a. Kawi thin ang thapa phawkhai rual leh inlungruala an chet thinna kha an ralthuam neih that be rte zinga mi a ni awm e.

Amaherawhchu, tunlai anga hlawh neia venghimtu sipai leh Lal leh a khawnbawl Upa te thuchhuak khauh taka kengkawhtu tur dan leh thupek kengkawhtu pawl leh sawrkar hnathawk nei an nih ve loh avangin, Mizo Lal te tan chuan an khawtlang himna leh khawtlang nun humhalhna hnukpui chu an khawtlang mipui, an khaw mite kha an ni nghal mai a. Heti zawnga han ngiahtuah hi chuan kan Mizo Lalte leh an khawnbawl Upa te rorel dan kalhmang (art of governance) thiam zia kha a chiang hle a ni. Vawiina kan ram roreltu tam tak te hian an tluk kherin ka ring lo.

An khawtlang himna leh damkhawchhuahna chu Lal te ngaih pawimawh ber a ni lo thei lo. Vawiin ang tho hian thawhhona tha, khua leh tui tha, dikna leh rinawmna, huaisenna leh taimakna te kha an dam khawchhuahna atana lungphum pawimawh an ni reng tho. An khua leh tuite a chutiang rilru puthmang neihtir leh ngaihsantir, an thinlunga tuha thanlenhnantir chu Lal te tan chuan tihmakmawh a ni reng a ni. Chu chuan Mizo hnam nuna kan neih hlu tak tak-tlawmngaihna, intodelhna, huaisenna, dikna, rinawmna, aia upa zahna adt te hi a rawn hring chhuak ta kan ti lo thei lovang.

Chutih lai chuan, heng Mizo hnam rilru puthmang te siam chhuak a, an khua leh tui te ngaihsantir lhe ngaihhlut tir tur chuan an ngaihsan a, an ngaihhlutna chhan tur tha tawk tak siam leh, an ngaihhlut avanga hamthatna/hmingthatna an dawn theihna tur engemaw tak siam a ngai ta a ni. Hetah hian kan Mizo Lalte politics lo thiam zia a chiang leh khawp mai. Kum khat chhunga chhungkaw ei khawp buh leh bal thar chhuah ngei te kha an inelna (competition) ropui a ni a. Mizo khawtlang nunah thangchhuahpa leh thangchhuahnu ten ngaihsan leh ngaihhlut an hlawh em em chhan te kha kei heti zawng hian ka’n ngaihtuah leh tlat pek a! Thang chhuah kha mi nazawng leh chhungkaw nazawng tan tlin ngaihna a awm lova, chumi avang ngawt pawh chuan an ngaihhlutawm sa tawh hrim hrim mai. Chumi phenah chuan, a hma lama kan sawi tawh, Mizo khawtlang himna (security) leh khuarel chhiatna lo thleng thut thei (tam, khawkheng adt) bakah, ral laka tlawm palh pawha an riltam dang char lohna tura lo ei leh bara lo invalh lawkna (food security) kha Mizo Lalte khan an ngai pawimawh hle tih kan hmu thei awm e. Khawtlanga thang chhuah thei an tam viau chuan khing a chunga kan sawi te khi lo tawk palhin emaw, buh leh bal thar that loh kum, kum chhia ah pawh an khawtlang chuan harsatna tawk lovin an dam khawchhuak thei dawn tih kha kan Mizo Lalte ngaihtuahna fing tak khan a ngaihtuah thleng pha tlat a ni. Chuvang chuan, thang chhuah thei te chu khawtlangin an chawimawi a, chu khawtlang chawimawi hlawhna lawmman tak chu khawtlang zahna leh thununna hmanga hruai Mizo te thinlungah chuan, a aia chawimawina ropui leh hlu dang a awm thei tawh lo hrim hrim a ni. A sap tawng takin, he mechanism- ei leh bara intodelh avanga khawtlang himna leh damkhawchhuahna leh chumi ti thei tura khawtlang mipui te chawhphur leh an rilru put hmang siamrem inkungkaihna leh inchawmtawnna hian Mizo khawtlang nuna hlu em em, intodelhna leh taimakna te a rawn hring chhuak ta chiah a ni. Tunlai khawvel ram ropui ten ram dang nen an inlaichinna (foreign relations) kawnga an ngaih pawimawh ber te zinga mi pawh ei leh bara an ram a intodelhna tur hi a ni a. Chu chu kan Mizo Lalte khan an khawtlang tan an lo ngaihtuah chhuak dim diam tawh a lo ni! Chu chu a civil lam nit a se, a sipai lam han luhchilh ve leh teh ang.

Sawi tak ang khan, kan pipute kha lei do nei leh inrun tawn reng renga khawsa an nih avang khan, ral laka an him theihna tur ngaihtuah kha tihmakmawh a ni bawk a. Chutah pawh chuan, vawiin anga hlawh neia venhimna hna thawktu tura rawih sipai leh police te an neih ve loh avangin, anmahni kha an sipai te leh an police te an ni nghal lo thei lo. Helaiah pawh hian an khawtlang leh nunau te humhim a, anmahni chhanna atana an nunna hial hlan an ngam theihna tur leh an ngamna chhan tur, chhan tha tak an neih a ngai leh ta. Chu chuan pasaltha te, huaisenna leh tlawmngaihna leh aia upa zahna te a rawn hring chhuak leh ta a ni.

Mizo pasaltha te kha khawtlang leh Lal ten an thlamuanpui em em thin. Pasaltha an nih ang ngeiin, ral laka hmahruaitu, khawtlang tana inpe zo leh Lal leh Upa te thachhang dawltu tangkai, khawtlang innghahna-khawtlang pasal tha (nupui te tana pasal tha ang hian) nih an tling hliah hliah a ni. Mahse, a hmalama sawi tawh angin, tu in nge engemaw tal lawmman dawng lova mahni aia khawtlang dah pawimawh hmasa ngawt peih ang? Anni pawhin an ei in tur buh leh bal thar chhuah vet ho an ngai alawm. Chu vang tak chuan an tlangval ten pasaltha nih ngei an tum theihna tur ngaihtuah kha Lal tan chuan a ngai tlat. Chu chawimawina chu Lal Nopui dawm kha a lo ni leh ta. Lal Nopui dawm pha tlangval nih kha tlangval te tan vawiina kan rama sipai chawimawina sang, gallantry awards sang be rte, Britain sipai te chawimawina sang Victoria Cross leh US Sipai te chawimawina sang Silver Star Medal te hlutna ai pawhin a nep bik hauh lo. Chu Lal Nopui dawm pha tur chuan huaisen a ngai a, tlawmngaih a ngai a, a tawi zawngin khawtlang himna atan inpumpek a ngai a ni tawp mai. Chumi atan chuan khawvel military academy tha ber te zinga mi (tiin ka sawi thin!) Zawlbuk an han din ta a. Chu zawlbukah chuan an instructors/trainers, Val Upa ten naupang an nih lai atangin an han hrual ta thin a. Zawlbuk academy chhuak, zawlbuk cadet zinga pasalthaa an chher chhuah te ngat kha chuan US Navy Seals te training pawh zu zawm ve ta se, a nep pawl an ni hauh lovang. Ramin ram tana nunna hial hlantu sipai te vawiin a a chawimawi a, a zah ang hian, pasaltha te pawh kha Mizo khawvelah na na na chuan an hming a thang hat reng a ni. He mechanism- Pasaltha-tlawmngaihna-Lal Nopui infinkhawm hian alawm Mizo khawtlang humhim a, khawtlang mai pawh ni lo, hnam himna hial pawh lo vawnghim thin kha ni.

Tin, tunlai anga dan siam leh ziah (constitution) hmanga rorelna (rule of law) leh a kengkawh a, ngaihtuahtu tur dan hre pawl (judiciary) te a la awm loh avangin, Lal leh Upa ten an rorel leh thu vuakthlak ten awmzia a neih a, an khua leh tui ten an zawm theihna tur kha an ngaihtuah chhuah a ngai leh ta a, chu chu aia upa zahna hi a ni kan ti thei ang. Mizo khawtlang inawpnaah khan kum lama upa te dinhmun kha a zahawm hle. Tlangval rual ten an ngaihchan leh thurawn petu pawimawh tak chu Val Up ate kha an ni. Val Upa te thu leh rorelna kha a kawi a ngilin an zawm a ni ber a, chawi einaah pawh Val Upa ten an bar hma chuan naupang zawk ten an bar khalh ngai lo. Tin, Zawlbuka Val Upa te zilhhauhna tawh kha vawiina court in a hrem tluk zeta thunei a ni tlat a ni. Tin, Lal leh Up ate thu chhuak kengkawhtu leh sawifiahtu (interpreter) ber pawh Val Upa te an ni a. Val Upa te thuneihna kha vawiina kan district bawrhsap te thuneihna nen hian a tehkhin theih viau awm e. Chuvang chuan Lal te pawhin val upa te hi an ngai pawimawh a, an Lal thutthleng ti derthawng theitu leh ti chak thei tu an nih tlat avangin khawtlanga an dinhmun kha an khua leh tui te an zah tir a, an ngaihhluttir kha a ngai a. Chu chu Mizo khawtlang nuna aia upa te zahna hring chhuaktu pawimawh tak a ni kan ti thei ang.

Chutih rual erawh chuan, a chunga kan sawi, Mizo khawtlang nuna dinhmun leh nihna pawimawh tak chelhtu te khian Lal te laina hnai an nih vang emaw, political fitness avang emaw a an dinhmun hi thleng thei an ni ngawt lo, a thawh a an thawh chhuah ve a ngai. A chhan chu, heng dinhmun leh nihna te hi sawrkarin a pek ang nihna (designation) ang hi a ni lova. Chuvang chuan khuang chawi nu leh pa te, pasaltha te leh Val Upa te pawh Lal ten an ruat ni lovin, khawtlang mipui, khua leh tui te zah leh ngaihhlut an hlawhna atanga nihna an neih (a peka pek, confer ni lo) a ni. Chuvangin, an lawmman tia kan sawi, khawtlang ngaihhlut leh ngaihsanna, hmingthatna te kha an chakna thahrui leh inthlahdah thei lova siamtu leh nawrkaltu pawimawh tak an nit el bawk. Helai mechanism pawh hi ngaihtuah chian chuan ropui tak a ni. Chuvang chuan, hetiang dinhmun thleng tur hian taimak, huaisen, inngaihtlawm, a hun leh hmun hriat, a tawi zawngin chhunglam leh pawnlama finna, chakna leh remhriatna nei mi nih a ngai a, chu chu mi bik te chauhin an neih theih a nih avangin ngaihhlut pawh an hlawh reng a ni. Zawhte upata upat ve satliah ringawt avanga Val Upa dinhmun te hi han luah ngawt theih a ni lova, thahrui ngah leh at huai avanga pasaltha nih ngawt theih lah a ni hek lo. Lal Isua’n a zirtir te hnena, “Nangin kei tunge ka ni mi tih?” tia a zawh ang khan, an khua leh tui ten chutiang dinhmuna ding chuan an hmu in, an pawm em? tih zawk kha a pawimawh lai tak chu a ni.

Chutiang chuan kan Mizo pipute khan an khawtlang nun leh khawtlang himna kha an lo vawng himin, an lo vawng nung thin. A chunga kan sawi tak te khi an hmanraw hman zinga tlem te chauh an ni. Chumi avanga Mizo te hi vawiina hnam anga la dam khaw chhuak ve zel kan ni kan ti thei ang. Awle, a chunga kan sawi tak te khi Zawlbuk hun (Zawlbuk era) ni se, tunah chuan Zawlbuk hnu hun (post-Zawlbuk era) lam i’n kai dawn teh ang.

British in Mizoram thutchilh a, min awp hnu, kum 1890 hnulam atang chuan kan Mizo khawtlang nun pawh a lo danglam chho hret hret a. Sap Missionary te an lo lut ta bawk nen, kan khawtlang nun leh rilru put hmang pawh zawi zawiin a lo inher danglam chho va. Mizo khawtlanga hmun pawimawh tak luahtu, Zawlbuk ngei pawh kum 1930 chhoah chuan a tiltiak titih ta mai. Chu chuan, a tawi zawngin, vawiina YMA kan tih tak, an dinlaia Young Lushai Association (YLA) tia an din chu kum 1935 ah a rawn hring chhuak ta a. YMA hi tunlaia kan zawlbuk chu a ni ta ber a nih hi.

Zawlbuk era-ah kha chuan Mizo hnam nun leh nihphung (Mizo identity) chu a hmalama kan sawi tak tlawmngaihna, aia upa zahna, huaisenna adt hmang khan sawifiah a ni thin-Mizo chu an tlawmngai, an huaisen, an rinawm adt. Post-Zawlbuk era-ah pawh heng hmang te hian Mizo hnam chu hriat kan la ni reng tho. Chutih rualin YMA a lo awm tak hnuah hian kan nihna (identity) hi YMA a nit a mah ma hem tih hi ngaihtuah chian ngai tak niin ka hria a, chulai chu sawi uar ka tum lai tak pawh a ni.

Chhiat tawk an awmin Mizo tih dan phung pangngai-thlan laih, tlaivar, khawhar lenpui, chhanchhuah, bawihsawm, tuamhlawm adt kan la kalpui reng a. Chu chu YMA kaihhruaina hnuaiah a ni tlangpui. YMA hi tunlaia kan val upa an ni kan ti thei awm e. Mizo hnam nun leh ngaihhlut zawng vawnhim leh vawnnun kawngah ngat hi chuan YMA hi a va hlu tehreng em. Amaherawhchu, helaiah tak hian hnam nunzia leh chung te ngaihhlut aiin YMA zawka hi kan dah lianin, kan dah ropui zawk pal hang tih a hlauhawm khawp mai. Kan pipute hunlai khawtlang nunah khan val upa leh pasaltha te zah leh ngaihsan an hlawh thu kan sawi a. Chumi ruala sawi tel ngei ngai chu khawtlang hnuaiah an awm a, khawtlang aiin an lian lo tih hi a ni. Khawtlang chu khua leh tui te kha an ni mai a. Kha dinhmuna hlangkaitu kha khua leh tui te an ni. Chuvangin, anmahni mimal kha khawtlang an ni lova, khawtlanga mi an ni zawk.

Vawiinah hian YMA hi khawtlang emaw ti tlat, a bik takin, YMA hruaitu leh a kul a taia inhmang te zingah hian kan awm ta thin em aw tih theih a ni. YMA hi khawtlang ni lovin, khawtlanga mi a ni. Zawlbuk rorelna khan Lal leh Upa te thutlukna a sawhsawn tir chang a awm fo. Chutih rualin, Lal leh Up ate rorelna chungah erawh a awm ngai lo. Vawiinah hian YMA hmalakna thenkhat hi sawi a kai ta fo mai a, a pawi hle. Mizo hnam kan awm chhung chuan YMA hi a ding reng ang a, a hlutna hi a bo tak tak ngai lovang. Mahse, YMA thangchhuah puan sin a, inchhek arbawm kan awm a nih erawh chuan YMA zahawmna leh ropuina hi a tlahniam telh telh thung ang.

Hnam thil leh hnam khawih thil a nih avanga tawngkam dengkhawng tak tak sawi chhuak thin YMA hruaitute kan awm em? Khawtlang tana hnawksak nia kan hriat avanga an in leh lo kalhsak, thiahsak, vuak tawrhtir thin YMA Branch te kan awm em? Mahni thu inpe chawpa hnam dang pawn chhuah leh hnathawh lo khap ve ngawt ang chi te hi? Kan pipute hunah pawh an ti thin a, khawtlangin an tih chuan tumahin an hnial ngam ngai lo tih hi YMA hminga kan thiltihah hian kan changchawi fo thin. Hemi kan sawi ruala kan hriat reng tur pawimawh tak chu khang hunlai khan, tunlai angin ziak dan leh a kengkawhtu tur dan hremi an awm lo tih kha a ni. Khawtlang kha chung zawng zawng kengkawhtu leh khaikhawmtu a ni. Tunlaiah erawh chuan dan fel tak kan nei. YMA hian, kan pipute hunlaia Val Upa ten Lal leh a Up ate rorelna zai an ngai thin ang khan, vawiina dank an neih te hi kan ngaih pawimawh a tul hle mai. Hetia kan sawi hian YMA hian dan a ngai pawimawh ngai lo kan tihna erawh a ni lo.YMA a nih avanga engkim tih thiang ta anga ngai thin te hian inenfiah se kan ti a ni zawk. YMA hi kan pipute huna pasaltha leh val upa ten Lal leh khawnbawl upa te tha an ti chak thin ang khan, vawiinah hian sawrkar leh khawtlang hruaitute tha ti chak lehzual se kan tihna a ni zawk. Sawrkar hi mipui te rawngbawltu a ni an ti thin angin, YMA hi khawtlang rawngbawltu a ni a, rawngbawltu a nih ang ngeiin khawtlang mipui leh chhungkua te chu a dah pawimawh ber tur a ni. YMA a nih avang ngawta pawl zahawm a ni lova, kan zah ngawt tur pawh a ni hek lo. Kan zahna leh ngaihhlutna chhan tur ber zawk chu khawtlang tana YMA in a thawh leh tih thin avang zawk a ni tur a ni. Tin, YMA pawhin a beisei ang chawimawina leh zahna a hmu lo a nih pawhin a vui tur a ni lo. Pasaltha te khan chawimawina an dawn loh pawhin an vuiin, an phun ngai lo. Mi ten an sawiselin an khinglet ngai bawk hek lo. Chutiang rilru chu YMA hian a pu tur a ni. Khawtlangin a hlauh tlawn YMA ni lovin, khawtlangin a muanpui YMA a nih a pawimawh. Chu rilru chu YMA hruaitute leh a kul a ataia inhmang ten nia an inhriatna kha a pawimawh ber a ni lova, khawtlang mipui ten niin an hria em tih lai kha a pawimawh zawk chu a ni. YMA zai ngaia khawtlang kal ni lovin, khawtlang zai ngaiin YMA a kal zawk tur a ni. Chutiang zelin, hnam thil a nih chuan YMA avanga tih ni lovin, Mizo kan nih avanga YMA kaltlanga kan tih a ni tur a ni.

Ka vei em em pakhat chu YMA in ensan a neih thin chungchangah hian a ni a, hei kher hi chu YMA nih phung leh thiltum kalh tlat thil a niin ka hre tlat mai. YMA thil tum leh innghahna lungphum zingah Tanpui ngaite tanpuitu a ni tih a tel a. YMA in a ensan thin te hi khawtlang tana thahnem ngai lo leh mi tam zawk ten hnawksaka kan ngaih an ni tlangpui thin. Chhungkaw tha pangngai te hi YMA hian a ensan ngai lo. Chutih rualin, YMA in a ensan thin chhungkua te hi khawtlanga tanpui mamawh leh tanpui ngai ber chhungkua an ni thin zawk lo maw? Chung mite hawisan leh ensantu bera YMA a tang mauh mai hi a YMA ka ti thei tlat lo a ni. Chutah, an ensan chhungkua ten chhiat an han tawh ngat phei chuan! Hetah tak hian alawm...YMA in a ensan avanga thlan lai lo, khawhar in kal lo, chhiat tawk chhung te tuamhlawm duh lo kan nih chuan Mizo ni lovin YMA kan ni tihna a ni! Heng kan chet chhuahna zawng zawng hi a nihna takah chuan YMA avanga kan tih a ni lova, Mizo kan nih avanga ti zawk kan ni asin. Chu vang chuan alawm post-Zawlbuk era-ah hian Mizo nihphung leh nihna (identity) hi YMA emaw kan ti fo ka tihna chhan chu! Mimal anga kan tih duh loh tur thenkhat YMA hminga kan ti duh tlat leh lawi thin hi a pawi khawp mai. Tin, ‘ensan’ tih tawngkam leh thumal hrim hrim hi YMA nena hmehbel a remin ka hre thei lo. Kei chuan YMA chu ‘ensan’ te tuamhlawmtu leh chhawmdawltu ni zawk turah ka ngai. Pu R. Vanlawma’n, “YMA in min ensan mahse, Mizovin min ensan dawn lo,” tia a sawi hian thu tam tak a sawi. Nun kawng dik zawh tura khalh ngil hi YMA in a tum tur a ni a, chumi kawngah chuan hremna ni lovin, chhawmdawlna hi YMA hmanraw hman tur dik tak niin ka hria. YMA hian Mizo a nih ang ngeiin Mizovin a tih tur a nih avangin, YMA a nih avang ni lovin, a ti tur a ni. Chu tak chu Mizo tana YMA a hlutna leh a ngaihsanawmna lai tak chu a ni ang. Hun a danglam a, nunphung leh rilru puthmang a danglam zel angin, YMA pawh hian Mizo hnam humhim leh vawng nung zel turin a kalsiam a rel that fo va, a ngaihtuah nawn fo a tul a. ‘YMA chang rel a sual ngai lo’ tih thuvawn hi thudik a nih reng theihna turin pasaltha ziarang-a tul huna tlawm thei, a tul huna huaisen, a tul huna tlawmngai, a hun leh a hmun mil zela a tul dan anga inseamrem thin YMA a nih a ngai a ni. Tlawmngaihna pawh hi ennawn a, her rem a tul hle. Mimal anga khawtlang tana tangkaina nei lo chu sawi loh, kan in chhungah pawh lo lawi lut tam lo tura kan duh ruihtheih thil ti leh kutkem nei te, YMA hminga mi tlawmngaia chhiar an han ni leh tlat thin leh chhungkaw pindan chhungril bera YMA hminga luh tlang theihna leh mi ina riah luh theihna (a bikin chhiat tawh chungchangah) an han nei ta ngawt mai thin te hi a fel berin a lang lo. Tlawmngaihna pawh hi kan nun dan mil zel a her rem a, a hun leh a hmun hriat a hunt a viau in a lang.

Eng pawh nise, zawlbuk era a kan hnam humhimtu, chhantu leh vawng nung tu hrang hrang te aiawhtu chu, post-zawlbuk era-ah chuan YMA hi a ni a. Kan pipute huna Lal, Upa te, val upa te leh pasaltha te leh khawtlang, khua leh tui te an in chawm tawn a, an in venghim tawn a, an in awi tawn thin ang khan, vawiinah pawh YMA leh khawtlang hi a inep zawng ni lovin, a in chawm tawn, in venghim tawn leh tangrualin rem takin a kal a ngai a ni. Chutah chuan kan hnam himna leh dam khawchhuahna chu a awm tlat si a.