Mizo Patriotism

1^st March, 1966 zing khua a lo var chuan Mizoram chu ram buai a lo ni ta der mai. Mizo National Front (MNF) chuan an hruaitu, Pu Laldenga hovin Mizo independence an puang a, a hnu lawkah India sawrkar tirhin a sipai rual te Mizoram an lo lut ta bawk nen, a hun lai hre pha in hmu pha ve lo mah ila, a tawng ngei te kam chhuak han hriat leh an thu ziah hrang hrang te han chhiar hian, Mizoram buai lai hun thim leh rapthlak zia kha mitthla hian a hmu ve uai uai thin. Amah Zikpuii pa’n, “Mizoram a hahchhiau chuan tlang hrang hranga Zofate pawh kan lo hritlang ve nghal thin,” a tih angin, kan ram a’n buai meuh chuan Burma ram atanga Shillong tlang, East Pakistan (Bangladesh ni ta) atanga Manipur leh zofa te awmna tawh phawtah chuan ram buai boruakin a nghawng loh leh ngaihven lo zo hnahthlak an awm meuh lo niin an sawi. MNF ten zalenna suala an rammut chhan ber chu ‘Mizo Nationalism/Nationalist Sentiment’a ni tihah hian kan lungrual thup ngei ang. Kan ram, kan hnam chhan nan an rammu a, hrehawm tam tak leh martarna hial tawkin Mizoram tan hnam pasaltha te an che chhuak a. Ram buai avanga mipui nawlpuiin an tawrhna rapthlak tak phena Mizo hnam leh Mizo ram hmangaihna thuk tak inphum kha kan hmuh hmaih thiang lovang.

Eng pawh nise, khang hun thim leh hrehawm te chu a liam zo tawh a, thangthar te tan phei chuan thawnthu ngaihnawm tak ang lek an chang zo ta. Khang hunlai ang khan kan ram hi a buai leh tawhin a rinawm lova, buai leh se kan tih pawh a rinawm loh. Ram buai nghawng tha lo leh runthlak tak tak kara a nghawng tha tak mai pakhat chu Mizo te hnam rilru a kai harh kha a ni awm e. Vawiinah erawh chuan Mizo Nationalism ni lovin, Mizo Patriotism hi kan mamawh tawh zawkin ka hria!

Nationalism leh Patriotism hi thu awmze inhnaih tak leh then hran hleih theih loh, mahse, inpersan angreng fu lawi si an ni a. Mithiam leh mi hrang hrang ten heng thu pahnih te awmzia leh danglamna hi an hrilhfiah tawh a. Mahse, chung hrilhfiahna hrang hrang zingah chuan mi thiam leh mi ril pawh ni hran lo, chanchinbumi pakhat hrilhfiahna hi ka’n la chhuak mauh teh ang. Luke Harding, The Guardian chanchinbu foreign correspondent chuan a lehkhabu ziah, Mafia State ah chuan hetiang hian Nationalism leh Patriotism chu a hrilhfiah a:

”Nationalism chu ram dang zawng zawng aia mahni ram leh hnam dah chungnunna leh ram   dang leh hnam dang te chungtlakna, midang te do leh hneh lak duhna rilru hi a ni a. Patriotism chu mahni ram leh hnam ngaihsanna leh ngaihhlutna rilru, ram leh hnam chawimawina hi a ni. Chuvangin, Patriotism ngaihdan leh rilru, tharum thawh zawnga ram leh hnam hmangaihna rilrua lo chang ta hi nationalism chu a ni. A danglamna hi an hriat pawlh fo thin”

            A chunga hrilhfiahna behchhan khian alawm Mizo Nationalism aiin Mizo Patriotism hi vawiinah chuan kan mamawh tawh zawk e ka tih na chhan chu! Kan Mizo nationalist ten an theihna zawng zawng nen kan ram leh hnam humhalh nan, an nun leh thisen hlanin an lo bei tawh a. Vawiinah hian chung kan hnam pasaltha te hniak chu Mizo patriots te hian kan chhui ve a lo ngai ta a ni.   

Patriotism-ah chuan  ram hi nge pawimawh a, a mihring te hi? He zawhna pawimawh tak hi kan inzawh nawn fo a tulin a lang. Ram hi a pawimawh hmasa zawk lo ti ta ila...mihring hian ka ta bil, ka ram, ka neih chhun tia chhal theih ram bik nei lo ta se chuan, khawiah pawh mikhual a ni dawn tihna a ni a. Heti lo zawng hian, ram bik nei lo vek kan nih chuan khawi lai pawh hi kan ram a ni tihna a ni thei tho bawk! Mahse, chu chu thil theih loh a ni lawi si. Chuvang chu a ni mahna, khawvel chanchin kan chhui phak tirh ata mihring te hian mahni ta bil ram kan lo neih fir fer ni. Chu ram, kan ram ngei mai chuan nihna (identity) min pe in, hnamah min siam a, chu ram chhungah na na na chuan kan vawk lal len ve ngalh ngalh ta thin a ni. Chu kan ram leh ram leilung fa kan nihna humhim chu mihring te mawhphurhna (responsibility) satliah mai ni lovin, kan tih makmawh (duty) a lo ni ta zawk a. Chu chuan ram leh hnam hmangaihna rilru (hetah hian hnam dang leh ram dang te er leh lei do lam ni lovin, kan ram leh hnam ngaihhlut, chawimawi leh ngaihsan zawk a ni kan sawi) patriotism kan tih fo chu a lo hring chhuak ta thin a ni. Chuvangin patriotism-ah chuan ram humhim chu a pawimawh ta ber tihna a ni mai em?

A lehlam zawk, mihring hi i han chhui leh dawn teh ang. Mihring tel lovin ram (nation) a awm thei lo tih chu kan hre chiang sa a. Chutih rualin, khawvel chanchin kan chhiar chuan hmasang lal ram tam tak kha a hnehtu zawk ten an chen chilh zui leh, chung a hnehtu hnam te culture nena inpawlhsawp a, hneha awm te zawk hnam zia leh nih phung boral ta emaw, inchawhpawlh ta an awm nawk mai. Chu chu sakhuana leh thiam leh finna lama Greek, Roman leh Egyptian Civilization te inkungkaih dan atang pawh hian a chiang awm e. Chuti a nih chuan ram chu bo thei leh hloh theih a ni tihna a ni a. A hma lama kan sawi angin, Mizoram ngei pawh mahni-a ding hran ram (independent) a kan inpuan atanga ni 12 hnu vel lekah India thuhnuaiah a kun leh nghal a ni deuh der mai. Chuvang chuan patriotism  pawh hi ram (nation) leh a huam chin (territory) aiin a mihring zawkah hian a innghat lian zawk a ni kan ti thei em? Germany, Israel leh Japan te hi en ta ila. Khawvel indopui pahnihna tantirh lamah kha chuan Hitlera Germany leh a Nazism thuthlung chu Europe khawmualpui a awp vek mai hlauhthawnawm khawpin a rawn hrang kha a ni a. British Prime Minister ropui, Winston Churchill-a kha awm lovin, Japan khan Pearl Harbour run lo ta se chuan, khawvel chanchin hi a danglam dawrh maithei e. Chutiangin Japan pawhin chhak lam atangin thapui a rawn thawh a, Burma ram hial a rawn thleng hman a nih kha. Mahse, indopui a’n tawp meuh chuan Germany chu indonaa a ram lak zawng zawng mai pawh ni lovin, ama ram chin ngei ngei pawh sahthlak sak a ni a, Japan pawh thliarkar te tak te-ah a chhuak ta chauh mai. Chutih laiin, a hmaa anmahni bil ram pawh nei lo leh Hitlera’n a maktaduai tel a suat avanga ram hrang hranga darh Juda hnam chuan, David Ben Gurion-a hovin, United Nations ruahmanna azarah Palestine ram bung khat chu an lo independent pui ve nawlh bawk. Heng ram pathum te hi an history chu kan chhui vek hman lovang. Mahse, thil chiang tak pakhat erawh chu an patriotism hi an ram len leh len loh lam emaw, an leilung hausakna ah emaw ni lovin, a hnam mipui te thinlungah zawk a awm tih a chiang hle. Chuti ni lo se, Germany leh Japan hi vawiinah hian khawvel ram leh hnam changkang leh hmasawn zinga chhiar tel an ni lovang a, Israel pawh hnam huaisen leh tumruh-ah kan chhal hauh lovang (Zionist movement ropui tak te kha a thleng lo hial pawh a ni maithei). Heng rama hnam te hian an ram tun din lehna tura ram danga thiamna leh finna pur chaw leh, ram dang tanpuinaa an innghah lai pawhin, an thinlungah German ram te, Japan ram te, Israel ram te chu an lo din daih tawh a. Ram dang leh khawmualpui danga an awm lai pawhin German ram leh hnam tan, chutiang zelin Japan leh Israel ram leh hnam tan patriotic rilru leh thinlung an lo din thar daih tawh zawk a lo ni. Hemi kawngah hian lei do an nei lova, ram dang leh hnam dang an hnuaichhiahin an hneh chhuh hek lo. Anmahni an in din thar mai a ni. Chu chu alawm patriotism dik tak chu!

A eng chu nge pawimawh ta zawk le? Heti hian i’n khaikhawm ve ngawt dawn teh ang. Mizo patriotism pawh hi kan ram chhung, hnam dang kan tam hnehna leh kan nghawng lennaah ringawt hian a innghat lova, a tawp tur a ni hek lo. Kan thinlung nen hian a tang kawp tlat tur a ni. Chutiang a nih chuan Mizoram chhung leh pawnah leh India ram pawnah pawh awm ila, eng hna pawh thawkin, eng pawh ti ila, ram leh hnam rilru, Mizo patriotism rilru hi kan hransan ngai lovang. Tin, ram hmangaihtu chuan hnam a hmangaih lo thei lo ang bawkin, hnam hmangaihtu chuan a ram a hmangaih ngei ngei tur a ni. Chutiang rilru kan put phawt chuan khawi hmunah pawh kan hnathawhnaah ram leh hnam tan kan rinawm ang a, kan zirnaah ram leh hnam tan thahnem kan ngai ang a, kan ram humhim tur chuan a hnam angin kan tangrual ang a, kan hnam a dam theih nan kan ram kan humhalh tlat thei ang. Chu chu a ni, RAM LEH HNAM tihah hian hnam damna a awm a, ram hmasawnna a inphum tel tlat asin. Chu ram leh hnam hmangaihna rilru tak chu a ni- Mizo Patriotism tak tak chu.

Tin, Mizo Patriotism-ah hian kan chiang meuh em tih pawh hi inzawh nawn fo kan ngai in ka hria. Hemi kan sawifiah lai hian nationalism pawh kan khap tel lo thei lo (inpersan fu mahse, an inzawm ve tlat lawi avangin). Patriotism/Nationalism hi trinity nen hian han tehkhin teh ang! Trinitarian doctrine (Pathian pakhata mi nung pathum awm rinna) ah chuan Pa, Fapa leh Thlarau Thianghlim te chu then hran theih an nih loh thu kan zir thin a( Rev. Walter Martina’n a lehkhabu, Kingdom of the Occult a Trinity awmzia a sawifiahna thailan zauh a chakawm hle mai!). Chutiang chiah chuan Mizo Nationalism/Patriotism rilruah pawh Mizo, Ram leh Hnam te hi a then hran theih miah loh. Entirna han pe ta ila. Assam nen ramri chungchangah buaina kan nei a, ram leh hnam humhalh nan tiin Mizo Zirlai pawl te chuan na takin Mizoram chin nia an hriat, an ram chin ngeia an chhal chu hnam dang ten an luah leh laksak duh lo leh phal lovin na takin an dodal a. Zophai hmuna kal ve lo te pawhin mahni awmna hmun theuhah Mizo tawh phawt chu kan lo insehruh ve tung hlawm a nih kha. MZP te thil tih kha Mizo hnam tan leh Mizoram tana ti an nih thu-ah tumah kan inhnialin ka ring lo. A nih leh an chetdanah khan a khawi lai tak nge a Mizo lai chu ni a, a englai tak kha nge Mizoram an humhalh kan tihna lai tak chu ni ta? Zophaia an zu riah chilh lai kha nge, Assam Police talhfiak leh silaimu an tawn lai kha? An thisen chhuak lai tak kha nge an huaisenna zawk kha? A chhanna tawi te chu ram leh hnam tana an inpekna leh an pen chhuahna, a tawi zawngin (!) ram leh hnam tana an tih zawng zawng te kha a ni mai. An epa awm te (Assam Police) ho tan chuan khang MZP member tlem te te kha Mizo hnam leh Mizoram chu an ni. Chu Mizo hnam leh Mizoramah chuan talhfiaka vuak tuar te leh inlama lo insehruh te, Zophai ramri buai bengkhawn lo hrim hrim chenin, Mizoram chhung a ni emaw, Mizo ram pawn a ni emaw, America khawmualpui daih pawh nise, Mizo zawng zawng min huap zo va, min chhung khung vek a ni.

Mizo te hnam min nihtir tu chu kan ram hi a ni a, kan ram humhalhtu chu kan hnam (Mizo) hi a ni; chu ram leh hnam chu keini Mizo te hi kan ni. Kha maw...Trinity?!