Hringnun Part II

Kum sarih lai ka lo thawh ve tawhna Govt. Serchhip College lam pan chuan ni dang ang bawkin hmanni chu ka bike in ka inkhalh chhuak leh a. Ka kawng zawh chu kum sarih chhung, a fur a thala ka lo zawh tawh a nih avangin, ka kalkawnga thil awm te pawh, mihring chenin ka bel viau mai. Mahse, chumi tum ka college kal tur chu ni danga ka lo tlan pelh fo leh ka lo thlir liam fo tawh te zinga pakhat chuan ka ngaihtuahna a la ta riau mai a. Office pana ka tlan chhoh lai mek chuan ni dang ang bawkin thlang lam kawng dungzuia in ding tlar thla thlanga la awm, thlanmual chuan ngawi rengin min lo thlir leh a. Chu thlanmualah chuan ka hmelhriat te, ka thian te, thenkhat phei chu ka ngainat em em te pawh an ni; an zalna lei thuahthip hnuai atang chuan nitin ka college kal tur chu min lo chhawn thin ni hian ka hria. Office chu ka thleng a, ka dawhkan lam ka pan ding nghal a. Chutah pawh chuan tukverh atangin chu thlanmual bawk chu ka thlir leh ta reng a. Chulai hmunah chuan engtik ni-ah emaw chuan zalhin ka la awm ve ngei dawn a ni tih te ka ngaihtuah a. Mahse, ka rilru ngaihtuahna luahtu ber zawk erawh thil dang a ni.

Ka thut mekna hmun chu college professors’ common room a ni. Chu ka thutna in leh thlanmual chu inep chiaha awm niin, chu pindan atang chuan thlanmual chu kan zu chhuk thlir a. Helai hmun (college) ah hian thalai leh tleirawl rual, an dam chhung hun thui tak la hman tur neia inngai leh beisei ten, he khawvela rual an pawl nan leh an nun khawchhuahna kawng sialtu atana tangkai tur thiam leh finna zirin kumpui lingletin an lo kal khawm thin a. Tam tak phei chuan he zirna in hmang hian an nun kawng leh hmakhua an lo sial kaw tawh reng bawk. Helai hmuna rawn kal zirlai te hi zirna avangin an rawn kal khawm ngei e. Mahse, zirna hi helai hmun an rawn pan khawm chhan bulpui ber ni-ah ka ngai lo mauh mai. An lo kal chhan zawk nia ka ngaih chu ‘beiseina’ a ni. He college-ah hian an hma huna an beiseina te ti hlawhtling turin an rawn intat hriam a. An lungtat chu ‘zirna’ a ni. Chu beiseina chu awm ta lovin, nei ta lo se, engvang tehlulin nge he hmuna kawla ni chhuak chhiar a kumpui lingleta an rawn kal tehlul ang ni?

Chutih rual chuan, kan ep thlang lama thlanmualah chuan beisei nei mihring te an awm ve bawk a, mahse beisei an nei tawh lo! Chu hmuna zal thenkhat te chuan an damlaiin an beisei leh tum te an ti hlawhtling a, thenkhat erawh chuan an ti hlawhtling hman lova. Thenkhat phei chu beiseina pawh nei hman lo khawpin hringnun khawvelah hian an cham rei lo bawk. Chu chuan nunna hlutzia min hriat chhuah tir a. Chumi nia college campus a zirlai te chiar nak nak leh nui hlim ri ka hmuh a, ka han hriat te chuan mi nung kan nih avanga beiseina nei thei mai chauh kan ni tih min hriat chian thar tir hle. Eng anga beiseina sang leh tumruhna pawh nei ila, kan thih miau chuan chung zawng zawng te chu thihna in kan mit a chhin rual rualin a zam ral ve nghal thin. Chuvang pawh chu a ni mahna, kan Pathian Lehkhabu Thianghlim ngei pawhin nun hlutizia leh rei loh zia hria a, duh thawh taka vanglai chen tura min lo fuih tawk tawk ni. A chen dan tur lam erawh chu sawi zui lo mai ila.

Hei, vawiinah ngei pawh beiseina sang tak nena college a lo kal, thla leh maia graduate val ni mai tawh tur kan zirlai tlangval pakhat chu beiseina khawvel atangin thih hnu piah lam rama lawi turin kan thlah liam leh tak ngawt hi. Tun thawhtanni liam ta mai pawh khan ka class ah rawn thu in, a hringnun hman tur thui tak atana a beiseina mei ti nung zel turin zirtirna a rawn dawng kha a ni a. Amah lah kum 22 chauh a la ni lehnghal! Aw.....a vanglai nun a hmang tan mek chauh a la ni si a! La damin nunna la nei ni sela, a hma hunah tih tur, nih tum leh beisei a la ngah ve dawn vei nen! Mahse, a nung tawh miau lova, chuvang chuan a thian, a zirpui leh lenrual ten ui tak chungin thlanmual lam an panpui a ngai ta. Chumi rual chiah chuan hringnuna a beiseina leh hmachhawp te pawh a thamral zui bawk. Vanram kawtchhuah a, a Lalpa a tawh hunah a la inpeih loh zia leh leia hmabak a la ngahzia te hrilhin, mi nung khawvela let leh hial te pawh a dil mahna le. Mahse, hringnun hian hrin loh hun a nei a, kan lei taksa hi lei mai a nih hun leh kan sakruang pawh ruang chauh a nih hun hi kan la thleng vek dawn si. Chu chu a ni. Mi nung dam i nih lai, mi nung khawvela i la chen lai ngei hian beiseina nen hmalam pan zel phawt mai teh. I address thlanmual a nih hnuah chuan eng ruai i ang tawh dawn si lo. Beiseina nei lo mihring chu mitthi nen angkhat reng an ni. Mitthi pawh mi nung nen angkhat reng an ni, mitthi a la ni ve dawn tho si a. Hriatthiam a har a, chhut chhuah hleih theih pawh a ni lo. Mahse, chu chu hringnun a ni.

Kan lo pianin puanin min lo tuam a, khawvel kan chhuahsan ni-ah puana tuam bawkin min thlahliam leh a. Kan thatni-ah lawmpuitute an lo kal a, kan chhiatni-ah chung mite tho chu min tuarpui turin an lo kal leh a. Tap chungin, nu chhul keuvin khawvel kan rawn dai lut a, hlim takin min lo lawm a. Chu khawvel bawk chu kan chhuahsan leh dawnah min lo lawmtute bawk chuan tap chungin min thlah leh a. Kan hlimni-ah hlimthla atan thla kan la a, kan lungngaih ni-ah hlimthla (lungngaih thla?) atan thla kan la leh a. Pangpar te pawh hi thatni-ah chuan an parmawiin, hlimna tizualtu an ni a, lungngaih ni-ah erawh mittui ti tla tam tu an ni leh lawi a. Chu chu a ni hringnun chu. Kan hun tawn azir zel hian thil hi a mawiin a lo thar a, chutiang bawkin a lo hluiin a lo chuai thin mai zawk a lo ni. ‘Mangtha’ tih tawngkam a rik tawh chuan kan hun a tawp a, kan inthlah tihna a ni. ‘Chibai’ tih tawngkam a rik erawh chuan kan hun a intan tihna a ni. Chu chu a ni hringnun chu. Mi nung hi mitthi kan la ni dawn a, beiseina nei pawh beiseina kan neih theih tawh loh hun a la awm ang. Au Revoir (kan inhmuh kan intawh leh hma zawng dam takin le) tiin a mal te te in kan la inthlah zel dawn a nih hi...hringnun a ni miau alawm le!