Culture

Culture?

            Cambridge dictionary chuan Culture chu ‘ hun khata mihring cheng ho nun dan phung, a bikin chin than/hnam zia leh rin dan phung te hi a ni’ tiin a hrilhfiah a. Oxford Dictionary chuan ‘mipui emaw, vantlang emaw rilru putzia, chin dan/chin than leh nunhona kawng hrang hrang’ tiin a hrilhfiah bawk. Heng kan tarlan bakah hian culture sawifiahna leh sawizauna hi tam tak a awm. A khaikhawmnaah chuan culture chu hun khat (period/epoch) a mihringin a mihringpui/chenho pui te nen tih dan phung, nun dan phung leh ngaihtuahna hrang hrang an neih infin khawm ten a siam chhuah a ni kan ti thei awm e. Chu chu a sawifiahna chu a ni emaw, sawifiah dan awm chhun a ni tiin emaw culture hi hrilhfiah ngawt theih a ni lo. A chhan chu a huam zau em em a. A chunga hrilhfiahna/sawifiahna kan tarlan bakah khian chaw ei dan phung, incheina, sakhuana, tawng adt tam tak culture hian a huam a. Chuvangin, hun khata mihring cheng ho leh awm ho ten an nitin khawsakna leh dam chhunga an thiltih leh ngaihtuah, sakhuana, chet chhuah dan leh pawm dan zawng zawng te hi culture chuan a chhung khung vek a ni.  

Clash of Cultures

            Khawvel chanchinah hian culture insut buai (clash of cultures) avanga buaina namen lo chhuak chanchin hi kan hmu nual tawh a. Culture chuan mihring chu hlawm khatah siamin, chumi atang chuan hnam fing leh ropui tak (civilization) a lo piang chhuak thin. Hnam tin ten culture hrang hrang kan nei ang bawkin kan hnam chu kan culture bulthuta hmangin kan din chho ta thin a. Tichuan, khawvela hming dai tawh lo tur hnam ropui leh fing, a sap tawng takin civilization ropui tak tak, heng Egyptian civilization, Mesopotamian civilization, Greek civilization adt hi an lo piang chhuak ta a ni. Heng hnam ropui leh hmingthang te innghahna lung phum chu an culture-ah vek a ni kan ti thei ang. Mahni tawka fing leh ropuia inngai, kan chungah ni (sun) bak a leng lo ti hial khawpa inngai ropui civilization te chuan an anpui, an mihringpui te zingah an aia ropui leh thiltithei an awm theiah an ngai lo mai ni lovin, awm turin an duh lo theuh a. Hnehtu leh awpbettu zawk nih tumin indona leh thisen chhuahna hial an inkarah a lo chhuak ta thin a. Culture inang lo pahnih (sakhua, nun dan, chet phung, mizia/hnam zia adt) insu buai (clash of cultures) avanga indona atang chuan hnehna changtu zawk hnam culture leh civilization chu hneha awm te culture leh civilization a lo nih ve zel a ngai ta; Indonaa an tlawm rualin an culture leh civilization pawh hneha a awm nghal thin avangin. Chutih rual chuan, hneha awm te culture leh civilization chu a zavaia ral thum a awm rualin, a hnehtu hnam ten an culture-a an seng luh leh chhawm zui tak tam tak a awm ve bawk. Greek hoten hmangaihna Pathian  Aphrodite an neih ang chiaha Roman hovin Venus tia hming hran vuaha hmangaihna Pathian an neih ve tho te, sik leh sa zawng zawng thunutu Pathian, Greek hovin Zeus tia an koh, Roman hovin Jupiter tia an vuah leh Egyptian hoten Amun tia an sawi, Pathian thuhmun vek sawina ni si atang te hian a chunga clash of cultures kan sawiin culture inpawlhsawp a thlen dan chu a chiang mai awm e. Tin, indona vang ni lem lo, insumdawn tawnna leh chhan dang vanga intlawhtawn/inpawhna avangin culture hi sem darha awmin, a tai darh thei bawk. India ram state pakhat Goa a cheng te hminga Portuguese hming tam em em hi entirna tha tak a ni thei ang. Heng te hian a tarlan chiang tak pakhat leh mithiam te pawhin an sawi fo reng chu culture hi danglam reng (ever evolving), inthlak thleng reng, thang leh nung reng a ni tih hi a ni. Heta culture hi a nung reng tia kan sawi rual hian a culture neitu hnam an ral rualin an culture chu a ral ve nghal thin (a chunga kan sawi anga hnam dang te kaltlanga chhawm nun a lo nih pawhin a neitu dik tak hnam, ral ta te culture ni tawh lovin, a chhawmnungtu hnam, hnam dang culture a lo ni tawh a, a chhawmnungtu hnam te ta a lo ni ta zawk) tih kan hriat a tha awm e.

            Tin, culture pakhat chhungah hian (hnam khat culture chhungah hian) chi bil angin culture dang tenau zawk a awm ve thei bawk a. Chu chu sub-culture tiin an sawi thin. Mizo hnam zinga Mara hnamin anmahni chi bil tih dan phung, kal dan phung (culture) an nei ang hi a ni. A tlangpui thu in sub-cultures te hi an innghahna hnam (Entirna; Mizo chhunga Mara) behchhan leh rinchhana lo piang chhuak an ni tlangpui a. Chutih rualin, an bulpui culture (parent culture) atanga peng hrang a, culture thara insiam (evolve) chhuak ta te pawh a awm theihin a rinawm (sociologists ten sawifiahin sawi zau rawh se!).

Mizo Culture?

            Tun hnu khawvela Mizo zinga ngaih dan leh pawm dan pakhat, culture zia (?) pakhat lo piang chhuak chu hmanlai thil/pipu te hunlai thil (incheina, pawm leh ngaihhlut zawng (values) adt) hmuh leh ngaih Mizo riauna leh tunlai Mizo te nun dan phung leh ngaihtuahna te hmuh Mizo lohna, kan culture pensanna anga ngaihna hi a ni. Hei hian inhnialna leh ngaihdan hrang hrang a siam chhuak hnem hle. A thenin kan Mizo hnam nih phung pensanna leh bosalna nia ngai an awm laiin, Mizo culture a ni vek tho tih ngaihdan nei kan awm bawk a. Hemi chungchang hi mahni tawka han chhui zau hlek ka’n tum leh ka’n thlur bing tur tak chu a ni. Chutih rual chuan, kan thupui hi social science huang chhung, thu (theory) a innghat a nih miau avang leh physical leh life sciences huang chhunga pakhat leh pakhat belh pahnih tih anga thu dik awm sa leh awm reng tawh tur ang a nih loh avangin ka ngaihdan pawh hi mi tam tak chuan an pawm lo ang a, a dik lo an ti ngei ang. Chu tak chu social science nih phung leh kalphung chu a ni reng a ni!

            Mizo culture hi eng ber nge a nih? He zawhna hi kawng thumin i lo chhang dawn teh ang. Culture hi chi thum-Culture chhawm loh chi/chhawm chi loh, Culture dah that/vawn that chi, Culture vawn/chhawm nun chi ah te lo then hrang ta ila (Culture hian zia rang/lan chhuah dan, in tarlan dan a nei a-sakhuana, incheina, puithuna, ngaihhlut zawng leh pawm dan adt. Chung chu cultural traits tiin an sawi thin. Tuna kan sawi tur pawh hi culture rawn lan chhuah dan, cultural traits ti pawhin a sawi theih bawk ang). Heng hmang hian Mizo culture hi han sawifiah dawn teh ang.

Culture chhawm loh chi/Chhawm chi loh

            Sawi tak angin culture huam hi a zau em em a. Mihringin kan thil tih dan phung, inchei dan phung, sakhua dan phung, a tawi zawngin nitin nuna kan ngaihtuahna leh chet vel dan zawng zawng hi a huam vek a ni. Heta thil pawimawh tak pakhat chu ‘phung’ tih thumal hi a ni. A hma chiaha kan sawi te hi a tawpa phung tih kan belh zel hian a ti culture a ni! Kan thil tih hrim hrim hi culture a ni satliah ngawt lova, chutiang bawkin kan inchei dan emaw, kan sakhuan ngawr ngawr hi kan culture a ni ngawt lo. Entir nan, kan hnam nuna bet tel tlat chu khuang a ni. Kristian kan nih hma leh nih hnuah pawh vawiin thlengin khuang chu kan la hmang. A khuang hrim hrim-a siam dan, a savun adt kha kan culture innghahna leh tifiahtu a ni lo. Mizo culture leh khuang suihzawmtu erawh chu a khuang kan hman dan phung zawka kha a ni. Hnam dang te pawhin khuang hrim hrim chu an nei. A siam dan kal hmang leh pianzia pawh khuang theuh theuh si a inang lo nuai mai. A pianzia avanga culture kengtu ni lovin kan culture-a kan hman dan khan a khuang pianzia leh nihphung kha a keng tel a. Chu zawka chu kan culture nen a inzawmna lai tak chu a ni. Vai ho tabla pawh khuang a nih ang bawkin, Mizo te khuang pawh khuang tho a ni!

            Kan sawi tum takah lut ang! Culture zia rang (cultural traits) ah hian khawvel danglam zel leh nun phung inthlak thleng zel (culture chu danglam leh inthlak thleng thin a ni kan tih kha) avanga chhawm zui loh chi hi a awm. Mizo te chuan tun hma chuan hnahah chaw kan ei thin. Nun phung danglam zel avangin tunah chuan thleng, bowl leh fian hrang theuh hmangin chaw kan lo ei ta. Hmun thenkhatah chuan Mizona riaua ngaiin thleng aiah hnah hmang ten chaw ei kan ching thar leh a. A tha reng mai. Chutih rualin kan hnam a lo changkangin a lo fing chho ve zel a, kan eiin phung, kan food culture/habit a lo danglam tawh a. Chu chu in lak tunlai leh in tih changkan lam ni lovin, kan culture danglam leh inthlak thlengin a rawn ken tel zawk a ni. Ka sawi tum tak zawk chu tunhmaa changel hnaha chaw kan ei thin a Mizo em em ang bawk khan tuna thlenga chaw kan ei hi a Mizo em em tho tih hi a ni! Kan nun dan inthlak thleng avangin kan culture huang chhunga kan chaw ei dan phung-hnaha chaw ei hnam kha thlenga chaw ei hnamah kan lo inseam rem ta tihna a ni a. Hnaha chaw kan ei thin kha chu culture chhawm nun loh chi (a aia tha zawk, felfai zawk leh thianghlim zawk kan lo neih tak avangin) a ni tihna a nih chu. Chutiang zelin, kan eizawnna bulpui ber ni thin pakhat lo neih, kan hnam nuna bet tlat thin zu leh zuk leh hmuam leh thil dang hrang hrang te pawh, chhawm nun zel loh tha zawk tam tak a awm thei ang. Chung thil te kan bansan avang chuan kan culture kan bansan/kalsan a ni lova, hun inher mil zelin kan culture kan siam rem zawk tihna a ni.

Culture dah that/Vawn that chi

            Hemi chungchang thu hi culture chungchanga inhnialna chawk chhuaktu lian ber niin a lang. Thenkhat chuan thangchhuah kawr/diar, kawr chei leh puan chei, a tawi zawngin, kan hnam bil incheina te Mizo bik riau leh hnam dang/ram dang siam incheina hmuh dahlau, hmuh Mizo lohna riau rilru kan pu thin. A hmaa sawi tawh ang bawk khan incheina chungchanga Mizona lai tak hi a thawmhnaw emaw, a siamna hmanrua emaw ah a innghat lova, kan hman dan phung a innghat zawk. A chunga thawmhnaw/incheina kan sawi hrang hrang te siam dan leh hmanrua te khi Mizo te hmuh chhuah leh siam chhuah a ni kher lo.Mahse, kan ngai Mizo em em thung si. A chhan chu kan hnam incheinaa kan pawm tlat vang leh kan hman tlat vang a ni. Heng thawmhnaw te hi a hatu Mizo a nih avanga Mizo ta riau pawh an ni chuang lo! Kan culture-a kan incheina bik liau liaua kan hman tlat avang leh kan ngaih tlat avanga hnam incheinaa lo chhuak chho ta leh vawiin thlenga kan lo neih hlen tak mai an ni. A siamtute chu vai an ni emaw, sap emaw pawh nise, a neitu hnam awm chhun kan nih miau avangin thangchhuah diar/kawr, puan chei, kawr chei, ngotekherh adt a nih chhung chuan Mizo hnam incheina a ni kumkhua tawh dawn. Mi thenkhat chuan Mizo mizona tak emaw tiin tunlaiin hetiang incheina uar thar tur leh heng thawmhnaw chauha inchei sawi mawi te pawh an awm. A tha reng mai. Mahse, heng incheinaa Mizona bet tel tlat hi a incheina rawng leh puan zia lam ni lovin, hnam incheinaa kan neih tlatna zawkah hian a ni tih kan hriat a pawimawh. Kolkata khawlaia vai vaibelchhe tel khuan inbel vek mahse, Kolkata khawpui khu kawr chei leh puancheiin chei chhuak vekin, Bengali nula ho khu vakiria zu khim tir vek pawh ni ila, an incheinaah Mizona a bet tel chuang lo. American siam Jeans leh England siam pheikhawk bun a, tunlai incheina chhuak thar ber bera kan inthuam hian kan culture kan kalsan tihna a ni lova, kan Mizona a ti dal lo. Heng avanga tun hma Mizo incheina leh thuam inbel tir leh tum hian min ti Mizo lehzual ta thut bawk hek lo. A tawi zawngin sawi ta ila, incheina hmanga culture sawifiah kan tum ang khian hmanlai thil a nih hrim hrim avanga Mizo ta bik riau ni lovin, hnam anga kan ta bil, hnam dang neih ve loh/an hnam ta bila an chhal ve loh thil an nih vang zawkin thil reng reng hi  Mizo thil an lo ni mai zawk a ni. Chuvangin, kan tun hma Mizo culture tam tak, heng incheina, rimawi, nun dan phung, ei in phung leh thil dang hrang hrang te hi culture vawn that chi an ni. Vantlang mithmuhah va lek chhuak fo lo mah ila, Mizo hnam a ral hma chuan kan hnam ta bil, kan Mizona nen inzawm tlat thil an ni tho tho dawn. Tunlaia zaipawl ten kan uar tak em em poncho pawh hi Mizo hlang awmna zaipawl in an hak pawhin kan rilruah chuan Mexico a lang tho tho! European ho inchei dana incheiin, South East Asian ho hmai leh sam sawngbawl dan pawhin in suasam kual mah ila, kan hnam tih dan phung leh kan ta bil reng reng chu kan ta bik liau liau an ni reng tho dawn! Chhiatni leh thatni insawngbawl dan (sawi zau chiam a chakawm!) leh tlawmngaihna (hei pawh!) kan kalpui dan leh ngaih dan thenkhat pawh hi culture vawn that chi huanga kan khung that tawh zawk mai tur a awmin ka hria! Entirna pakhat siam leh lawk teh ang. Mizo te chu kut lawnga bara chaw ei chi kan ni. Tunlaiah chuan thirfian leh thirkut hmanga chaw ei kan awm ve ta. Hei pawh hi tam tak chuan in tih changkanna, in tih sapna kan lo ti leh hmanhmawh tawh! Thirfian leh thirkut hmanga chaw ei hi sapho khuan an civilization tan tirh lamah khan an chin ka ring miah lo. An hnam a lo fingin an lo changkang zel a, ei in dan thar hrisel leh felfai zawk a ni tih hria in khutiang khuan an lo ei ta a ni mai. Sawi tawh angin thirkut leh thirfianah khan sap culture a bet lo. An hnamin ei dan phung/hman dan phunga an ta neih avang chauha an thirkut leh thirfian hman te pawh lo sap ve ta mai zawk an ni. Chutiang bawkin kut lawnga bar ringawtah hian Mizona a bet tel hran lo. Kan hnamin chawei dan phunga kan hman avanga Mizo chaw ei dan lo ni ve mai zawk a ni (vai ho pawhin an kutin an bar ve tho!). Hun lo kalin thirkut leh thirfian hmanga kan ei hun te pawh a lo la thleng mai thei. Chu chu hnam zia bosalna leh in lak sapna lam ni lovin, kan culture a lo inthlak danglam ve ta tihna  a ni mai a. Thirkut leh thirfian hmang thin hnama kan lo in let a nih chuan, chumi hnulama kan chhuan thar lo chhuak te chuan sap ram an zin hunah sap tih dan kan lo la chhawng tih hre lovin, sap hovin kan tih dan an lo la chhawng zawkah an ngai daih maithei asin. Chuvangin, kan hnam nun zia, ngaihhlut zawng leh chet phung thenkhat, tuna kan nun phung, khawsak phung leh khawvel kalphung nen in mil chiah tawh lo te kan chhawm zui loh hian an ral ta vek a ni lo, kan vawng tha in kan dah tha mai zawk a ni. A tul hunah chuan chhuang takin kan lek chhuak leh mai thin ang. Tunge pheikhawk thar neih vanga zan mutna nen lama bun reng ngai?!

Culture Chhawm nun chi

            Hei hi chu sawi zau vak ka tum lo. Mihring chhia leh tha hria vek kan nih angin eng te nge kan culture-a thil tha, vawiinah pawh kan la tangkaipui a, kan la sawt pui tih chu kan hre tlangpui turah ka ngai. Kan tawng hi entirna tha tak pakhat chu a ni. Chumi kan sawi rual chuan heta ‘chhawm nung’ kan tih hi han sawi belh hlek ila. Kan mei chhem chu a alh a rem mai lohna turin kan chhawm nung thin. Chuta kan chhawmnunna atan chuan thuka thing kan tuah sa, alh/vam mek te chu thing thar, mei pawhin a la hliau eih loh te chuan kan vur/tuah belh a. A tir lamah chuan chung thing tuah thar te chuan kan mei tih alh belh chu sawi loh, a ti hlum zawk mai ang tih hlauhthawnawm khawpin khu a’n chhuah ta thin. Mahse, a tuahtu in thahnem ngai taka a’n chhem a, a’n tuah rem a’n tuah rem hnuah chuan mei chu a lo alh leh mai pawh ni lovin, a hma aia nasa zawkin a lo alh chhuak leh thin. Kan hnam tawng hi kan culture vawn nun zel chi pakhat chu a ni a, kan humhalh tur pawh a ni. Chutih rualin, humhalh kan tum luatah hian kan chesual ve thei. Mei pawh chhem alh tum lutuk avanga thing kan tuah teuh chuan mei alh sa pawh a timit thei a, chutiang chiahin mei alh a mit kan hlauh luattuk avanga thing kan tuah that loh chuan a mit phah zawk thei bawk. Tunlaiin, thangthar ten Mizo tawng an sawisa, Mizo tawng hman dan dik leh dik lo adt chungchangah thahnemngaihna leh selna thu kan hre tam hle. Sawi ang khian tawng humhalh kan tum avanga Mizo tawng thumal awmsa, a awmze bo chang si lova kaihleka awmze dang han neih tir te hi Mizo tawng suasamna ni lovin, kan tawng tih hausak belhna a ni thei zawk em? Kan entawn fo sap ho tawng ngei pawh Latin leh Greek atanga a nihna ang anga English-a an hman zui (an hnam tawnga an seng luh) tak a tam viau tho hi! Tawng humhalh tum luatah kan tawng te hi kan humhalh mit zo palh ang tih a hlauhawm tho em?! Tin, Mizo tawng tho alawm tih vanga kaihlek chiam chiam pawh hian kan Mizo tawng zia rang dik tak a ti chhe ve thei tho bawk (Hei pawh English leh Linguistics thiam ho sawiah dah ang!). Tawng bakah kan sakhuana te, a hun leh hmuna aia upa zahna (aia upa zahna satliah ni ringawt lo!), rinawmna adt, kan culture leh Mizo hnam timawitu tam tak te hi culture paih then leh dah that/vawn that loh chi, culture chhawm nun chi te chu an ni.   

Mizo Mizona tak hi khawiah nge a awm?

            A huam leh a huap a zauh em avangin kan hnam culture thenkhat leh chumi chhunga awm thenkhat tlem te entirnaa hmangin culture chungchang chu kan lo zir ta a. Mizo Mizona tak hi khawiah nge a awm tih hi chhangin hnu i’n khar dawn teh ang.

            Sociologists te chuan, ‘Culture chu thinlungah a awm,’ tiin an sawi thin. Hei hian a sawifiah tawk viau mai. Mizona (identity) chawi san tum avanga kan tunlai nun phung, incheina leh rilru put hmang, a tawi zawngin, tun huna kan Mizo culture hnualsuat leh sawisel ngawt hi a dik ber lo. Mizo kan nihna, kan Mizona tak chu kan thinlungah leh Mizo kan nih hretute thinlungah zawk a ni. Mizo thuam kan inbelah hian kan Mizona a awm lova, hnah chunga chawhlui kan kil emaw, Mizo tawng upaa kan tawng fuk fuk emawah kan Mizona hi a innghat hek lo. Heng zawng zawng te hi kan culture siamtu leh lan chhuahtirtu/zia rang (cultural traits) te an ni zawk a. Chuvang chuan alawm, eng ang pawhin vai chuan Mizo tawng thiamin, Mizo hnam thuam inbel leh Mizo anga nungin, Zohmingliana pawh inti tehreng se, a vai tlat chhan! Engtikah mah Mizo a ni ngai kumkhua dawn lova, a nih teuh theih ber chu ‘Mizo ang (Mizo ni lovin)’ nih a ni mai! Kan Mizona, Mizo hnam kan nihna a saptawng takin, kan identity leh cultural identity/affinity chu thinlungah zawk hian a awm a, chutah chuan kan chiang bawk tur a ni. Sap hming phuahin min ti sap lova, phuah loh pawhin min ti Mizo zual chuang hek lo. Korean vun rawng ang ka neih avangin Korean ka nih phah chuang lo ang bawkin, chutiang vun rawng ka nih loh avang chuan ka Mizo viau chuang hek lo. Hnam dang nih tumin chak eng ang mah ila, ‘ang’ hi anmahni kan nih teuh theihna ber leh awm chhun chu a ni mai! A hranpaa va Mizo viau tum pawh a ngai lo. Mizo hming kan pu reng chunga a tawpa ‘Mizo’ tih lo belh leh hranpa pawh a tul lo! Hetia ka awm tawp hi ka Mizo em em a ni. Sap thawmhnaw hak leh tih dan, nunphung leh rilru putzia te chu sap tih dan/nun zia/incheina/rilru put hmang a nih ang chiahin, chutiang chiah chu kei, Mizo hian ka lo neih ve emaw, entawn ve emaw chuan Mizo tih dan a ni ve leh mai. Culture hi tu ta bil bik mah a ni lova. Kan thinlunga kan lo ta chei avanga kan ta lo ni mai zawk a ni.  Chuvangin,  Kan nun phung leh chet phung hrang hranga hnam changkang zawk te tih dan entawn (a tha lo lam entawn chu tel lovin) hi kan culture than zelna leh danglam zelna kawnga kan hman tangkai thiam a pawimawh. Culture inthlak danglam hi khawvel kalphung leh culture nih phung a nih avangin, kan lo dan theih leh lo hnawl ngawt theih pawh a ni em em lo. Kan lo in siamrem zel a ngai zawk a ni. Hetia kan sawi hian kan hnam nunphung hi tha lai reng a awm tawh lo, chuvangin, hnam changkang zawk te tih dan hi i entawnin, kan hnam culture hi i thlak ang u tihna a ni lo. Kan culture, kan Mizo culture ah hian i chiang ang u kan ti zawk a ni. Kan culture awmna, nihna leh culture awmzia kan hriat loh leh chian loh thin avanga buai lohna tura kan buai thin leh do leh sel tul lo kan lo beih let chiam thin hi kan hun leh tha khawhralna mai a ni tih i hre zawk ang u kan ti a ni ber!