Pindan



Pindan chuan bang a nei a, bang a neih avang taka pindan ni thei pawh a ni reng a. Chu bang chuan a lehlam lehlama awm te chu a ping dang a, a lehlam lehlama awm te tan chuan chu bang chu an in pin danna a ni ve bawk. Pindan siam hi mihring te hian engtik hun lai atanga kan lo chin chhuah nge a nih a, eng vanga ching chhuak nge kan nih ang? Ka hre lo! Mahse, hei erawh ka hria. Pindan chuan mi a pin dan miau avangin a chhunga awm te leh pawnlama awm te kan inang thei lo tih hi. Mihring khawsak phung changkang zel leh hmasawn zelah pindan hi tulna pawimawh tak a nei tih chu thil chiang sa a ni a. Pindan a awm loh te chuan chaw kan ei laiin kan chhungkaw zinga pakhat inthiar lai te kan hmu kur dawn asin! Tunge chhungkaw member dang zawng zawng te hmuh leh hriata chhungkaw thuruk sawi duh ang ni! Amaherawhchu, pindan pakhat chhungah pawh pindan hran hran a la awm teuh thei ang hian kan khawvel nun pindan hrang hrang chhunga kawkel awm nuk thin te hian mihring te inlaichinna leh chhungkua inpawhna a ping dang tel thin hi thil pawi tak a ni.
Tunlai khawvelah eizawnna avang te (eirukna avang pawh a ni thei tho!) leh kawng dang dang avangin chhungkaw dinhmun a inang lo ta nuai mai. Hausakna leh retheihna ten mihring leh mihring chu min daidanin min ping dang ta phawt mai. Mi hausa in a thenawm rethei te pawi a hranpaa va sawi chu sawi loh, duhsak em em mahse, dinhmun inthlau lutuk chu nghawngkawl bah a rual thei tak tak tlat lo. Information technology in min nghawng dan te hi? Chhungkaw kimin smart phone kan hum fur tawh mai a. Tun hma anga zanriah ei khama chhungkaw titi ho na hun hlu tak te pawh pin danin a awm ta. Mahni mobile phone theuhah mahni bur burin kan bur fur mai a. Thutthleng khata thu ho vek leh, pindan pakhata awm ho vek siin, technology chuan min ping dang vek hlawm lawi si. Chhungkaw tam tak, tukthuan leh zanriah einaa inhmu khawm kim thei tawk hi eng zah tak kan zoramah hian awm ang maw? Kan eizawnna te, kan sumdawnna te, kan hna leh kan tulna dang hrang hrang te chuan kan mihringpui te tan kan hun a ping dang in, a sat hek nasa tial tial a. Kan mihringpui te tan, chhungkaw tan, kohhran leh khawtlang tan hun kan nei thei ta meuh lo. Midang te tana malsawmna nih chu khawilamah, keimahni tan pawha malsawmna ni hman lek lo khawpin kan phi buai nileng zankhua chu a nih hlawm tak ber hi maw! Ei bar zawnna kawnga dinhmunin min pin danna chuan khawtlang nun honaah mihring theuh theuh dinhmun hrang hrangah min dahin min pin dan hnan ta thluah hlawm a. Tun hma mizo khawtlang nuna thenawm khawveng bai insuah liam liam thin te pawh chu kan in khual en ta hru hlawm a. In khata cheng hote pawh inpawhna tha awm tawh hek suh, mahni mum mumin, mahni duh lam hawi zawng zawngin, mahni duh dan danin kan mimal thinlung pindan theuhah chuan kan inkharkhip ta thap hlawm a. Thinlung pindan hrang theuha tawm im ta hlawm chu midang te che vel leh ningkhawng kan hre tlem tial tial a, mahni chauh inngaihtuahnna nun (self-centred life) ah kan lut thuk tial tial a, mahni dinhmun sawhngheh chu kan thupui ber niin, midang te min thlir dan leh hmuh dan aiin mahni kan inhmuh dan leh in ngaih dan chuan hmun a chang lian ta telh telh zawk a. Chu chuan innhirnghona, inngeih lohna leh sep sep leh se se a hring chhuak ta teuh thin. Chung a hrin chhuah te pawh chuan bang a lo nei leh zel a. Pindan hrang hrangin kan mihringpui te nen min pindan thluah tawh hnuah pawh chung sep sep leh se se te, mahni tanghma haina te chuan a rawn pin thuah zel a, a tawpah chuan mahni chauh lenna, midang tana thut chawlhna tur leh reilote atan chauh pawha hahdamna tur hmun awm lo khawpa pindan tawtah, mahni ngei ngei pawh thaw ipik rum rum khawpa pindan tawtah min dahin, min pin dan hnan ta thin a. Chuti taka hnawhchepa tanna pindan atanga tal chhuak tur chuan a bang chhungril ber atanga thiah a ngai tawh thin si. Theihtawp chhuahin han bei ngial mah ila, bang inthuahthip chu a lo chhah tawh em avangin mihring theihna in a tlin ta lo, a tawpah chuan kan thih chilh leh ta nge nge thin a lo ni.
Mihring te hi Pathianin min din danah hian in mamawh tawn a, intanpui tawn tura a siam te kan ni. Dam chhung khawvela tumah mamawh lova in hria leh a mihringpui te tanpuina pakhatmah mamawh lova in ngai khawpa mahni intodelh pawh nise, a thih ni-ah chuan a ruang vui tu leh thlana phumtu a mamawh dawn tho tho. Hringnuna thil chiang tak pakhat chu nu chhul keu va khawvela kan lo luhin min chhar a, min lo bawihsawm tu kan mamawh a. Khawvel kan chhuah dawn pawhin min phum a, min thlahliam tur kan mamawh leh tho. Midang te tanpuina zarah khawvel eng ka rawn hmu a, midang te tanpuina vekin ka lei taksa thlah leh ka la ngai dawn. Heng thil pahnih inkara kan dam chhunga kan thil tih emaw, midang te tana kan thil tih emaw te chu eng pawh nise, a bultanna leh a tawpah chuan eng ang mi pawh ni ila, kan mamawh ngai loh te bawk hi a ni mihring hian a mamawh leh tur te chu. Chu chu a ni reng asin! Midang te tlawhpawh theih loh leh thlen phak lova nun inkharkhip, midang tumahin an hawn theih loh, mahni chauhvin a hawn theih pindan chhunga a hringnun hmang thin, chuta a mamawh engkim hmu leh neia inhria chuan hei hi hre rawh se-Hringnunah hian pindan chatuan daih, thiah theih loh leh chhe thei lo a awm lo tih hi! Dalai Lama chuan, “Mahni chauh in ngaihtuahna nun (self-centred life) chuan mal ngawih ngawihn min siam a, chumi rah chhuah chu thinrimna leh hlauhna te a ni,” a ti. Kei pawhin heti hian ka ti, “ Midang te len ve lohna nun nei chuan a tan in pindan bang a thuah chhah telh telh a ni!” I daidanna bang siam, midang te laka i in pin danna bang te chu thiat la, i mihringpui te lo leng lut ve tawh rawh se.

Comments

Popular posts from this blog

Tunlai khawvel leh Kristianna

Career Guidance

Tlawmngaihna leh Tunlai Mizo Nun