Nge Nge Vs Ve Si



Mihring reng reng hi nu chhul keu va he khawvel eng kan rawn hmuh rual rual hian ngaih dan leh pawm dan nei, chhut thiam leh chhia leh tha hriatna nei (conceptual animal) in kan lo piang chhuak nghal a. Nausen leh naupang te pawh hian chung ziarang chu an nei vek a, an hmang thiam lo mai zawk a ni. Mihring mihring kan nihna (nature) ah hian chutiang ze neia piang chhuak a, lo seilian a, lo puitling thin kan nih miau avangin kan phak tawk leh thiam tawk zelah engkim hi kan teh a, kan chhut a, kan ngaihtuah a, chuta tang chuan mahni pawm dan leh ngaih dan kan lo in chher chhuah ta thin a ni. Nausen chu a kuta chemte kan hum tir chuan a chhia leh tha hriatna a la hman thiam miau loh avangin a tan hriamhrei hlauhawm a ni. Chu chemte vek chu hmeichhe tleirawl kuta kan pek erawh chuan chawhmeh channa hmanraw tangkai tak a lo ni leh thung a.Hetah hian a chemte-ah khan a hlauhawmna/tangkaina a awm lova, a hmangtu rilru puthmang leh pawm dan (perception) khan chemte chu hmanraw tangkai leh hmanraw hlauhawmah a siam mai zawk a ni. Chu chu alawm, khawvela mi firfiak tam tak te pawhin an chung en, kum 2001 a World Trade Center thlawhna hmanga bei a, mi 3000 chuang nunna suattu, ‘Terrorist Lalpa’ tih hiala mawi khawpa thisen chhuah hreh lo Osama Bin Laden pawh kha khawvelin mi sual turu-a an chhuah lai leh an hlauh em em laiin a nupui fanau te tan chuan an thlamuanna, pa nih tling leh zaidam tawp a ni ve tlat asin! Misual leh mi fel kan lo awm ringawt mai te, mi rinawm leh duham, hmeltha leh hmelchhia...engkima side A leh B kan lo neih zung zung na chhan te pawh hi han chhut neuh neuh chuan mihringin pawm dan, hmuh dan leh ngaih dan nei tura chhia leh tha hriatna thluak fim tak kan lo neih vang hi a lo ni a. Chu thluak fim chuan alawm kan thil hmuh, hriat, khawsak phung, ei leh in leh kan mihringpui te nen kan nunhona thleng hian’zawng’ leh ‘dan’ a rawn belh a. Chu chuan mihring mimal tinah duh zawng, ngainat zawng, ngei zawng, hmangaih zawng, duh dan, ngaih dan adt...a tawi zawngin thu kharna (conclusion) kan nunkawngah hian min lo siam sak ta thin a ni.
Chutiang chuan mihring hian kan bul vela thil awm, mihring leh nunna nei atanga nunna nei lo thlengin kan chhut a, kan teh a, kan khaikhin a. Chu chuan mi ropui leh hnuaihnung te, rethei leh hausa, hmun nuam leh hmun hrehawm adt a lo siam chhuak ta thin. Chu mihring thluak fim ngaihtuahna (reasonable thinking) hmanga tehna, khaikhinna leh chhutna chuan thil tum pakhat a nei a, chu chu ‘a rah chhuah (result)’ hmuh a ni. Chung tehna leh chhutna hrang hrang te chuan rah chhuah/hmuh chhuah tam tak a nei thei a. Chung zinga mimal tinin, kan hausa emaw, rethei emaw, thluak tha bik kan nei emaw, nei lo emaw, eng dinhmunah pawha kan kova kan phurh vek thin pakhat chu ‘Ve si’ tih leh ‘Nge nge’ hi a ni.
He thu pahnih, inpersan em em lawi si te hi mihring te kan damchhung hian vawi khat tal chu hmeh bel kan ni theuh tawhin ka ring! ‘Nge nge’ tih hi chu fakna leh chawimawina (compliment) lam atan kan hmang tlangpui a. ‘Ve si’ tih erawh hi chu sawiselna (criticism), diriamna leh hmuhsitna tawngkam atan kan hmang tlangpui bawk (Vishal Mega Mart chungchanga ‘MZP ve si’ tih tawngkam in a hrin chhuah atang khan a chiang mai awm e!). Thumal tawi te ni si, mahse a nghawng na em em lawi si an ni a. Mihring pui te laka ‘nge nge’ kan hmeh belna ah hi chuan buaina leh innghirnghona a chhuak mawh khawp mai. Chutih laiin ‘ve si’ kan in hmeh belna hmunah erawh chuan buaina leh inhnialna a chhuak lo khat khawp thung! Eng pawh chu nise, heng thumal pahnih, pakhat a dawngtu tana hriat nuam leh inchhuan veng veng na tham, pakhat erawh damchhung inhmelmakna thlen thei khawpa zum leh hriam te hi duh hun hun leh tu lakah pawh chelek thlak zen ngawt theih an ni bik hauh lo. Heng thumal pahnih te nena hmeh bel hlawh tur chuan a phenah chhan tha tak a awm a ngai ve tlat. Ti hian han chhut ve mah teh. Lehkhathiam em em mai pahnih an awm a. Pakhat chu a hria apiangin ‘lehkhathiam nge nge’ an tih laiin, pakhat erawh chu ‘lehkhathiam ve si’ an ti tlat thung. Heng mi pahnih te hi thiamna lamah chuan an intluk tawk khawp mai, sang zawk an awm lo. Mahse, engtizia nge pakhatin ‘nge nge’ a hlawh laia pakhatin ‘ve si’ tih a hlawh tlat le? Hemi te pahnih phenah hian ‘nge nge’ leh ‘ve si’ rawn siam chhuak tur hian thil tam tak-nunzia, tawngkam, chezia adt an in chuktuah khawm a ngai a. Chung thil hrang hrang te in chuktuah rem thlap chuan ‘nge nge’ a rawn siam a, inpelhsawlh palh a awm chuan ‘ve si’ a rawn siam chhuak ta thin a ni.
Kan thiltihna kawng engkim-hnathawhna, zirna, rawngbawlna adt ah hian kan duh emaw, duh lo emaw, he ‘nge nge’ leh ‘ve si’ te ah hian a engemaw zawk zawk nena hmeh bel hi kan ni fo thin dawn. Eng zawk nena hmeh bel nge kan duh? Mimal mawhphurhna theuh a ni. Darthlalang hian keimahni lo in ngaihdan lam thlu hlek lovin, kan nihna ang ang hi min lo hmuh let tir mai; chei mawi emaw, siam that hlek leh siam chhiat hlek emaw a nei ngai lo. Kan bula mite hi kan darthlalang tha ber te an nih si chuan, mimala kan lo in ngaihdan-in duhtawkna a ni emaw, in duhkhawp lohna a ni emaw, kawngro hi a lo su viau lo angreng khawp mai kan mihringpui te nen  kan nunhona kawngah hian. Chuvang chuan mimala ‘nge nge’ kan lo inbel ve a, kan lo inngaih ‘nge nge’ ve viau lai hian kan darthlalang (kan bula mite-min hrechiangtu leh belchiangtute) ah erawh chuan ‘ve si’ hian kan lang fo  reng a ni. Chutiang mite chu khawvel leh an mihringpui te ngaihsan an hlawh ngai lova, zah an kai ngai hek lo. A lehlamah, chutiang chiah chuan mahnia ‘ve si’ nena lo inhmeh bel a, engkima mi dang te hnung zela awm tura in ngai tam tak te pawh hi kan darthlalang (mihringpui te) hian ‘nge nge’ nen min lo hmeh bel ve reng thei tho mai. Chuvangin, hringnun darthlalang tha ber, kan mihringpui, min hrechiangtu te leh kan bul hnaia awm tam te ah hian kan in ennawn fo thin a pawimawh reng a ni. Darthlalanga in en tha peih lo chu kan hmai leh incheinaah pawh tha inti tawk taka kan len chhuah a, kan kal vah vah pawhin fel tawk lo, darthlalanga in en loh vanga kan lo hmuh loh vanga mi dang te nuih ruk tet tet kan awm fo thin hi!
Thu dang alai chuan titi dang ka’n vawr daih teh ang! British Prime Minister rothap leh cigar heh zet mai, Winston Churchill khan, “Mi hlawhtling kan tih te hi hlawhchhamna pakhat atanga hlawhchhamna danga beidawng miah lova kal zel thin te hi an ni,’ a lo ti a. Hringnun hian a chang chuan min vaw thlu der thei a, thla tliak hnawpa min paih thluk chang te leh che sawn thei ngawr ngawr khawpa thichhawnga min hliam chang te a awm thin. Chutah tak chuan ( a pawi miah lo kan tihna ni lovin) tluk kha thil pawi ber a ni lo, thawh leh tum tawh loh kha a pawi ber zawk chu a ni. Thla tliah kha a pawi ber a ni lo, thlawh leh tum tawh loh kha a pawi ber zawk. Thichhawnga chauh der kha a pawi ber a ni lo, dam leh tumna neih tawh loh kha thil pawi ber chu a ni zawk! A pawimawh ber chu chawl lova i kal zel kha a ni. Chawl lova kal na na na tum ram thleng lo an la awm ngai lo he khawvelah hian!

 

Comments