Vanneihna

Pathian chuan mahni in tanpui te hi a tanpui thin kan ti. Sikul kan kal ve laia kan nu leh pa te leh kan zirtirtute min fuihna tawngkam lar pawl tak a ni awm e. Ni, a dik a ni. Hringnunah hian a tawpkhawkah chuan mi tumruh, mi taima, tuarchhel leh teirei peih te bawk hi mi dingchang leh mi hlawhtling an ni leh fo thin. Chung mite chu hlawhtlinna tlangchhipa an ding kan han hmuh hian an ‘vannei’, an nihlawh kan lo ti ta thin a ni.

Vanneihna, a saptawnga ‘luck’ kan tih hi mihring te hian kan lo mamawh na meuh mai. Chetsualna (accident) a tel, thih ngei ngei na tura ngaiha dam chhuak te, mak tak maia thihna pumpelh te, hriat lawk hauh loha hausa ta thut, lottery/lucky ticket adt man fuh te, zan khat thilthu-a dinhmun inthlak ta thut te..sawi tur a tam awm e. Chutiang thil tawng te chu ‘vannei’ tiin kan sawi bawk thin a. Tin, lawmna lam, a bikin hlawhtlinna lam kan han chan hian Mizo te chuan vanneih vangah kan puh bawk thin. Hei hi ‘vannei’ tawngkamin a sawi tum tak leh a nihna dik tak ‘vanneihna’ hi a lo ni meuh em?

Vanneihna kan sawi hian emaw, vannei kan tih hian a chunga kan han sawi tak te khi a huam thei tho mai a. Amaherawhchu, keiin vannei tia ka sawi tum leh vanneihna ka hriat/sawi fiah thiam dan nen chuan a inang lo deuh tlat mai a. A chunga mi vannei/vanneihna kan han sawi te khi vannei/vanneihna an ni love chu ka ti hauh lo. Mahse, tuna ka vanneihna sawi tum nen hi chuan danglamna an nei tlat thung si. A chunga kan han tarlan ang vanneihna (?) ah khi chuan ka vanneihna sawi ve tura tel lo a awm tlat mai a. Chu chu ‘mak’ leh ‘thut’ te khi an ni! Khing thil te khi mihringin duh kan thlan theih loh leh a lo thlen danah pawh sawi theih leh tih theih kan neih miah loh te an ni a. Chuvang chuan khitiang thil kan han tawn khian a lo ‘mak’ a, min ‘thawng thut’ ta thin. Chuvangin kei chuan a chunga kan han sawi te khi chu vanneihna ni lovin, mak tak maia vannei pawh ni hek lovin, thil mak danglam bik (extraordinary) an ni tiin ka vanneihna sawi tur huang atangin ka’n sawn chhuak ve ngawt mai a ni (Vanneihna an ni lo hulhual ka ti lo ka tih tawh kha!).

Hmasang Rom mifing, BC 5na hunlai vela khawsa Seneca khan vanneihna chu inpuahchahna tha leh remchanna intawhna hi a ni (Luck is when preparation meets opportunity) tiin a sawi a. Hei chiah hi keipawhin vannei/vanneihnaa ka chhiar chu a ni (Ka ngaihtuah chhuah pawh ni chuang lovin mi fing thusawi ka rawn thlawp mai zawk a nih chu!). Khawvelah hian vanneihna hi a vantla a awm lo ti ila kan sawi sual thui lo khawp ang. Mi awm mai mai te hi hringnunah hian an vannei ngawt mawh khawp nia! Chik takin han chhut chiah mah teh. Mi vannei tia kan chhiar leh vanneihna khum nasa bik nia kan hriat te hi an vanneihna phenah hian nasa taka thawhrimna, inpekna leh taimakna te hi a lo inphum ru duh khawp mai. Chung an thawhrimna leh tumruhna leh remchanna (opportunity) a intawn fuh chiah chuan motor khawlpui kan han tinung dawn a, a chhunga a khawl tesep (part) hrang hrang ten an hna theuh thawka an inchuktuah khawm a, an tankhawm a, motor a lo nung ta hluah thin ang hian, an lo inpuahchah thatna leh beih tang tang na leh remchanna tang khawm chuan mi vanneiah a lo siam chhuak ta mai thin a lo ni. Midanga chhut lo pawhin nangmahah khan ngun takin i hringnun kha han chhui let chhin teh. I vanneih lai ber nia i hriat kha han ngaihtuah vang vang la, i vanneihna phenah khan nangmah lamin i theihtawp i lo chhuah ve na emaw, engemaw tal i lo tih ve a awm ngei ngei ka ring. A lo awm lo emaw, engmah i tih awm lo leh nangmah lam atanga thawh (contribution) ve awm lova i lo vannei a nih hlauh chuan kei chuan i vannei ni lovin, thil mak danglam bik i tawng fuh ah ka la puh tho tho!

Tin, mi vannei te hian mi vannei an nih hma leh vanneihna an khum hma hian lung bang chhah/sang tak an hmachhawn in, chu lung bang sang/chhah tak chu an lawn liam emaw, an sutlang hmasa fo. An hel ngai meuh lo! Chu an hmaa thil awm an sut tlang/lawn liamna kawngah chuan tawnhriat an lo neih phah ta thin. A nihna takah chuan tawnhriat (experience) kan tih te pawh hi hlawhchhamna leh harsatna tam tak lo paltlang tawh te chanchin lek alawm lo ni le! Hringnuna tluang purh te hian tawnhriat an nei tlem duh khawp. Professor Randy Pausch, kum 2008 a cancer natna avanga boral ta leh a thuziah leh kamchhuak ka chhiar leh hriat  atanga ka ngaihsan tak em em chuan, “Tawnhriat (experience) chu i thil duh em em leh neih i duh ngawih ngawih laia i duh loh zawk i hnena lo thleng thin/i neih thin hi a ni,” tiin a sawi a, a dik leh fu mai! Chutianga duh loh zawk leh thlan loh zawk an chunga lo thleng thin chuan tawnhriat a neih tir ta chiah a. A hmaa an tih sual siamthatna hun, a hma aia thawhrim theihna hun, a tawi zawngin remchanna/hun (opportunity) a rawn pe ta thin a. Chu hun rangkachak hman tangkai tuma an thawhrimna leh beih hram hramna chuan a hmaa kan sawi ang bawkin ‘vanneihna/mi vannei’ ah a chhuah leh ta mai thin a ni. Chuvangin, chhiarkawp thiam te tihdan entawnin heti hian i han ti ve ngawt teh ang! Vanneihna/vannei nihna thuruk (formula) chu:

            Thawhrimna/inpuahchahna+remchanna/hun = vanneihna

A tawp berah chuan animation industry a mi ropui, Walt Disney khan intihhlimna hmunpui, Disneyland leh Disney World theme park te a din dawn khan chung a park din te chu siam zawh ni awm lo tura ruahman chu a tum ber a ni mauh mai. A chhan chu chung a theme park te chu sak zawh, siam zawh tura ruahman an nih chuan hmasawnna an neih theih tawh loh a hlau a ni! Chuvangin, khawvel thiamna thang zel leh hmasawnna kal zel mila chung a theme park te chu tih ropui leh tih hmasawn reng a, tawp chin leh zawh chin nei lova sak/siam kal reng a duh a. Chutiang tak chuan vawiin thlengin a hming chawia a din Walt Disney company chuan kawng hrang hrangin hma a la sawn in, an la insiam kal chho ta reng zel a ni. Mi vannei chu a va ni tehlul em!

Vanneihna hi tu ta bil mah a ni lova, mi zawng zawng ta a ni. Vawiinah i vannei lo a ni thei e. Mahse, vawiin chauh hi khawvel a awm dawn lo tih hria la, naktuka vannei turin vawiinah hian lo inpuahchah tha hle ang che. Pathian chuan mahni intanpui te hi a tanpui thin kan tih tawh kha. I va vannei dawn tehlul em!