Lehkha Chhiar leh Zirna

Zirna hi mihring nuna a pawimawhna chu sawi chiam pawh a tul tawh lem awm love. Tlai ni a tla a, kum a liam a, hun a kal a. Chung zawng zawng hnuah chuan ni thar, kum thar leh hun thar a lo inher chhuak tiin kan sawi thin. Kan hun bi chhiar leh ni leh kum chhiar danah pawh a let/hnungtawlh zawng ni lova, a hmasawn zawnga kan chhiar tlat hian khuarel rorelna pawh hmalam panin a kal zel tih a ti lang a. Chuvangin, zirna kan tih pawh hian a tum ber chu mihring/zirtu tih hmasawn leh hmalam pana ke pen tir a ni kan ti thei ang.

Hringnun pumpui hi zirna in a khat an ti thin a,  a dik hle in a lang. Mihring taksa, pianphung leh rilru put zia te than chhoh leh hmasawn dan hian he thu ril dikna hi a nemnghet chiang hle. Kan lo piang a, hun inher zelah kan lo thanglian a, chhiah leh tha hriatna, ngaihtuahna hman dan te kan lo thiam zel a, kan taksa pawh a lo thang zel a, puitling kan lo ni ta thin. Amaherawhchu, hetah tak hian mihring te ah inan lohna/danglamna a lo lang thin. Taksa puitling ve uaih, rilru puitling mang lo te, kum leh pianphunga puitling tia chhiar theih tawh, rilru puthmang lamah erawh a puitling lo mang e tih ruk kan nei fo lawi si thin. Hei vang tak hian zirna hi a pawimawh ta em em reng a ni.

Vun rawng avanga inthliarna nasa tak Apartheid tih bo kawnga sulsutu tu leh hruaitu ropui Nelson Mandela chuan, ‘Zirna hi khawvel ti danglam tura ralthuam chak leh tha ber a ni,’ tiin a sawi a. Martin Luther King Jr pawhin, ‘Zirna in min pek a tum ber leh tih hlawhtlin a tum ber chu mifinga min siam leh nungchang/ze puitling min neih tir hi a ni,’ a ti bawk. John Dewey, American philosopher leh psychologist phei chuan, ‘Zirna hi dam khawchhuahna atana inpuahchahna a ni mai lo. Amah hi dam khawchhuahna a ni zawk ti hialin a sawi.’ Hnam fing leh ropui apiang ten zirna hi an ngai pawimawh a, khawvel huapa mi ropui leh langsar tak tak te hi zirna ngaisang tu an ni chawk. Chutih rualin, keini Mizo ten kan hmuh thelh leh hmaih thelh fo nia ka hriat chu ‘Enge zirna?’ tih zawhna kan chhan dan leh ngaihdan chungchangah hian a ni. Miin sikulah zirtirh bu atanga tanin pawl a sawn chho zel a, zirna sang tak thlengin degree sang tak tak a nei a, lehkha thiam, zir sang tih a lo hlawh ta thin. Chung mi te chu lehkha zir an ni a, an chhuanawm na meuh mai e. Mahse, helai ah tak hian kan hmuh thelh fo thin chu ‘lehkha zir’ leh ‘zirna’ awmzia hi a ni. Ni e, zirna kan tih, education-in min zirtir (educate) dawn emaw, kan zir dawn emaw a nih chuan lehkha kan zir ve chu a ngai na meuh mai. Chutih rualin, zirna leh thiamna sang zawk nei tur hian mi fate anga lehkha zirna kawnga a vawrtawp han thlen ve kher ngaia kan inhriat tlatna ngaihdan leh rilru hi kan paih bo a hun hle mai. Hemi kan sawi rual hian, mi thiam ni tur hian zirna sang kan zir a ngai kher lo kan tihna a ni lo. Chhan hrang hrang avangin lehkha zirna kawngah hian a sang lam emaw, a vawrtawp kan han thleng pha lo a ni thei. Ka sawi tum tak zawk chu thiamna tak tak nei tur hian lehkha zir san hi thil pawimawh tak a nih rualin, a zirtu rilru puthmang leh tumruhna, taihmakna leh inpekna zawk hi a pawimawh a ni tih hi a ni.  John Dewey sawi ang hian zirna in a tum ber chu mi puitling, thiamna leh nunze kawnga mi puitling chher chhuah hi a ni. He thufing tak ril tak mai hi darthlalanga hmanga zirna lama mi puitling nia kan hriat tam tak te han en hian zirna in a tum tak mihringah chherchhuah an ni em? tih hi zawhna chhan har tak a ni thei tlat! Officer hna sang tak chelh te, degree leh certificate ropui tak tak kawltu te zingah hian an zir sanna mil leh phu hian an nunziaa lang lo fe fe an awm nuk thei. Chutiang mite chu eng anga zirna kawnga thleng thui leh thiam sang pawh nise mi thiam (educated) huangah an leng lo. Tin, Mizoram pawh hian ziak leh chhiar thiam lama kan percentage sanna (literacy rate) ang hu hian professionalism (eizawnna nghet leh mi puitling, hman tlak chherchhuahna) lamah hian kan sang ve em? tih pawh hi chhut ngun a ngai hle mai.

Engpawh nise, ka sawi tum lamah lo kir leh tawh ila! Lehkha i zir sang lo a ni maithei, zirna sang zawk i chhunzawm ta lo a ni thei. Mahse, chu chuan mithiam i nihna tur te, zirna hmanga mi puitlinga i inchherchhuahna tur kawng te hi a dal lo tih hi lo hre tawh ang che. Khawvel mihring zinga hausa ber Microsoft corporation neitupa Bill Gates te, Apple CEO leh Information Technology hmasawnna kawnga thawhhlawk em em Steve Jobs (fam) te kha college pawh chhuak lo, graduate lo an ni tih i hria em? Chutiang bawkin talk show host lar Oprah Winfrey te, cricketer lar Sachin Tendulkar te hian college an rap reng reng lo! Anni chu sawi loh, Mizo zinga English thiam ber te zinga kan neih leh Mizo literature-a thawhhlawk em em mai pahnih, J.F Laldailova (fam) leh Mafaa Hauhnar te pawh hian doctorate degree an nei reng reng hleinem! Heti zawnga sawi tur hi mi tam tak an la awm. A chunga kan sawi tak te khian an lehkha zirna kawngah a vawrtawp leh sang tak an thleng hauh lo. Mahse, eng vangin nge an kalna kawng theuha mi bik, mi thiam leh ropui tiha kan hriat si? A chhan chu lehkha/lehkhabu an chhiar tam a ni. Chu tak chu zirna in mihring puitlinga a chherchhuahna tur che a a chahbi awmchhun chu a ni. Chhiar tam rawh! Abraham Lincoln khan a awmna mel hnih biala chhiar theih tawh phawt chu a chhiar vek an ti thin. US President Barack Obama pawh kha kum khata lehkhabu 40-50 chhiar thin a ni a, India PM hlui Dr. Manmohan Singh-a pawh kha a dawhkanah a lehkhabu chhiar lai hi engtik lai pawhin hmuh tur a awm reng e an tih chu! Investor leh Businessman hausa tawntaw Warren Buffett pawh khan nitin lehkhabu/lehkha phek 500 tal a chhiar thin asin! Vawiin thlenga a ngaihdan ril tak tak khawvelin a la buaipui leh zir reng, Communism thuthlung ngaihtuah chhuaktu mi ril leh ropui German philosopher Karl Marx-a khan a damchhung hmun thuma thena hmun hnih chu lehkha chhiarin library ah hun a hmang e an tih chu mawle! Lehkhabu chhiar tam ila, chhiar zau ila, chu chuan lehkha kan zir san leh san loh hian kan finna leh thiamna, a tawi zawngin kan puitlinna kawngah kawngro a sut tir lo mai dawn ani.

Enge zirna atanga kan hmuh thiamna chu? Scientist ropui Albert Einstein chuan, ‘Thiamna leh finna chu kan thil chhiar leh  zir zawng zawng zinga kan hriat reng naa la chambang te hi an ni,’ tiin a sawi. Lehkhabu sawmnga i chhiara a thumal zawng zawng kha i damchhungin vawn pawh tum la a theih kher lovang. Mahse, chhiar tam na na na chu an rilru ngaihtuahnaah hian chambang tawk a lo awm tlat thin. Chumi chambang tak chu  ‘finna’ chu a ni tih hi i lo hre reng dawn nia. Chhiar tlem chu chambang a tlem ang a, finna a tlem dawn tihna a ni mai a. Chhiar tam leh chhiar zau te hi an ngaihtuahna leh rilrua khawl khawm leh chambang an ngah thin avang hian alawm ‘mifing’ leh ‘mithiam’ tia kan lo sawi mai mai thin le! Khai le, lehkhabu la la, mi fing ni turin inchhiar ve tan rawh le!