East Pakistan atangin Bethlehem Tlangah



Nipui vanglai, thuthleng nghenchhan pawh thlan ngah mi nih nen, thlan rim a nam huam hunlaia Bethlehem tlang lam han thlir dawn chu (h)! Kei pawhin mak ka ti! A ni lah tak a. He thu ka ziah mek lai pawh hian ka tukkhum lam chu ka lehkha chhiarna dawhkan chunga inchhem daihna khawl vir chuan a rawn chhem hem hem reng mai. Mahse, rilruah a lang miau si ale!
Kum 1966 Ramtuk thla zanlai atangin Pu Laldenga leh a thuihruai MNF te chuan Mizoram zalenna puangin ralthuam nen chet an thawh ta thut  mai a. Chumiin a nghawng chhuah thil hrang hrang avanga Zoramin kum sawmhnih chuang teh meuh hrehawmna, manganna, thlabarna leh lungngaihna a tawh chungchang leh chanchin te chu a taka tem tu kan nu leh pa te leh keini, thawnthu hriata hria te pawhin kan hre bel thawkhat viau awm e. Tin, kha zalenna sual, rambuai tia kan hriat larin kan Mizo hlaphuah thiam te rilru a chawh thawh atanga khatih hunlaia kan ram thim leh hrehawm zia tarlang thei hla lungkuai tak tak leh Pathian auhna leh van lam ngaih hla a hrin chhuah te pawh kan hre ngeiin ka ring. Chutih rualin, kha rambuai hun thim leh harsatna namen lovin Mizo ten krismas hla kan neih that ber te zinga pakhat a lo hrin chhuah ve nawlh thu hi i lo hre tawh ngai em? Chu hla chu ‘Kum sul liam hnu kan nun ngaih lai tho leh thin’ tih hla, Pu Lalkhawliana phuah kha a ni. Ni e, he hla ngei hi a ni tun tuma chip nawi a, East Pakistan ramri leh Bethlehem tlang zawm tir ka han tum tak chu ni!
Rambuai avanga harsatna a tam telh telh avang leh India sipai ten chet an lak nat tak em  avang khan kum 1967 kumtawp leh kum 1968 chho velah chuan Mizo hnam sipai tam zawk te chu sahimna zawngin East Pakistan(tuna Bangladesh ni ta) lamah an tawlh lut thla a. Ramri hrula khaw hrang hrang-Chhippui, Mahmuam adt behchhana inbeng belin awmhmun an khuar a. An chhuk thlak tirh lamah chuan ei leh barah leh nitin khawsakah pawh an ziaawm viau. Mahse, patling zanga rual dawn lai mai, chutia mi ram (foreign land) a eizawnna mumal leh nghet pawh nei lova kumpui lingleta tam tal ta chu kum 1969 a rawn inherchhuah meuh chuan, ralpui do nen an harsa chho tan ta viau mai a. An thawmhnaw hak te a lo tet chhe zova, ei leh barah an lo harsa ta a. Ramhnuaia ei chi tawh phawt chu duh thlang thei dinhmunah ding hek lo le, an eiin an in bawrh bawrhlo thei ta lova. Chu chuan an zingah damlohna hrang hrang a rawn thlen a, inenkawlna turin damdawi leh hmanraw tha an nei leh chuang bawk si lo. East Pakistan damdawiinah te han inthawn liam ve thin bawk mahse, sum leh paiah an harsa leh bawk si. Retheihna chu an hausakna awmchhun ve a ni ta emaw tih tur khawpin kil tin kil tangah harsatna leh buaina Mizo hnam sipai te chuan an tawk chho tan ta a. Chutiang dinhmuna an han din takah chuan mihring miziaa harsatna leh buaina mihringin a tawh a, khel lova lo thleng tel ve ziah phunnawina leh phunchiarna te a lo tam ta hle mai a. Mizo hnam sipai chhuanawm tak tak thenkhat te nunna pawh chu an ralpui do ber India sipai te kutah pawh ni lo, chu hmuh theih loh ral chuan a chhat ta nual reng a ni. Hnam sipai te inlungrualna leh phurna a tlahniam nasa em em a, inthikna leh inhmuhmawhna a lian sawtin, an ram neih chhun, ram leh hnam hmangaih avanga an kalsan tak an hmangaih te lenna ram, Zoram chu an ngai thar ta vawng vawng mai. Ni a liam a, thla a liam a, an harsatna erawh a pung telh telh mai si. ‘Ber’ thla an chuangkai a, thlasik rim a rawn nam tan a, Israel fate Babulon sala man an niha an ram ngaia an kiu vawng vawng ang mai khan kum 1969 Sahmulphah thla a lo her chhuah meuh chuan hnam sipai rothap tak tak te ngaihtuahna pawh sikni eng leh thlasik rim chuan khel lova mihring te a rawn zem thar leh thinna  Bethlehem tlang zun hmang chuan a rawn zem leh ta chiai chiai a. Chutah tak chuan alawm Mizo te tana Krismas hla chuai thei ngai tawh lo tur, he hla hi khatih hunlaia MNF Finance  Minister, Pu Lalkhawliana’n a rawn phuah chhuah tak ni. Khatih hunlai taka Mizo hnam sipai te rilru leh thinlung kha chu zu hmu tlangin zu hre fiah thei ngat ila chu, Indopui pakhatna hunlai, 1914 Krismas kar (week) a French, German leh British sipai, kumtluana indo a, in that tawn ten an inhmelmakna dahthaa Lal pian hun champha urlawka hlim taka hun an hman ho, khawvelin ‘The Christmas Truce (Krismas inkahhaina)’ tia a hriat lar tak huna sipai te rilru nen khan a inzawl viau te pawhin ka ring. Eng pawh chu nise, chu East Pakistan ram thlasik boruak atanga Mizo hnam sipai ten an ram, Zoram leh Bethlehem tlang an fan dan chu i han zeldin dawn ang hmiang:
Kum sul liam hnu kan nun ngaih lai tho leh thin
Rem Lal pian hun champha hmatiangah kan thlir
Sikni eng mawi leh zan boruak thiang leng vel
Ngaih lai tizual tur renga’n maw
Ram leh Hnam chhan tura nunna thap leh mahni inlum, nupui fanau leh lungdi te kalsan a an chhuahna atang pawhin kum hnih a lo vei dawn ta reng  mai. Chu achhapah, mahni ramah pawh awm ngam lovin, mi ramah, inthlahrung leh ralti tak leh retheihna namen lo karah an la khawsa zui a. Chutiang dinhmun atang chuan kum liam ta leh hun ral ta te dawn kirin, chhung kim leh lungmuanga Krismas hun an hman te an han ngaihtuah chhuahin, chu sikni eng mawi leh thlasik zan boruak vawt thiang tak lo her chhuak leh ta chuan an thinlai mu hnu leh hlimlai ni te a ngaih tir vawng vawng hi an demawm love!

Leng zawng thinlai dam te’n lawm kim tak ang maw?
Rual duh kal ta suihlung rualpui te zawng kha
Ngai mah ila, koh kir leh theih awm si lo
Rem Lal piang chuan thinlai hnem rawh
Ram leh hnam tana an rammut pui, an thian tha te , ram daia an nun hlana martar ta te, a hma kum lawka krismas hlim taka an hmanpui leh, hrehawmna, harsatna leh hmelma silaimu te nen lama an lo tawrh chhuah pui mual liam ta te an rilruah a thar a. Ngaiin koh kir chak mahse, a rem tawh si lo. Chu rilru chhungril hnim ruai mai chuan Bethlehem tlang a thlir tir lo thei lo. Chung an thian mual liam ta te tel lova hunpui han ur leh han hman leh dawn chu an lawm a kim thei ngang lo a ni.
Chhung tin lawm lai par ang vul ni leh hun te
Engtin hmang maw, kar hlaa leng rual duh ten
Thinlai dam ten hmang la, he hun lawmawm hi
Hlimin lawm la, Lal lo piang chu
Ral rama ral do tura an chhuah hnuah an chhung leh khat, nupui fanau leh an thinlai luahtu te an dam leh dam loh, an chanchin pawh hre mumal lovin an lo khawsa rei ta hle mai. Dam takin chu krismas lo thleng leh tur te chu an hmang ve ang em tiin suangtuahna in an in leh lo, an khum laizawl leh an hmangaih te lenna chu an fang thin a. Ngaiin thlahlel eng ang mahse, an ram neihchhuna let chu chutih hunlai chuan mahni intihhlum tluk thawthang a ni si. Karhla duhsakna biahthu hlan mai loh chu an tan  tih theih dang awm chuang hek lo le.
Keini pawhin lawmna zai hla i rem ang
Tumah thin na leh lunglen pawh sawi lovin
Bethlehem-a nau lo piang Imanuela
Chibai bukin i kal ang u
Ram dangah, sum nei lo, ei tur nei mumal bawk si lo, silhfen nei tha tawh bawk si lo, hrisel bawk si lo, ral do ngai bawk si...retheihna in a ken tel zawng zawng chu an pumhmawm ta vek emaw tih tur khawpa an harsatna hmuna an rilru hnual leh phunnawina zawng zawng te thawidam a, tuam dam a, suihkhawm leh thei tu awmchhun chu Bethlehema nau lo piang lungrual taka, an hrehawmna leh harsatna te theihngilh leh dahthaa chibai buk a, chu hunpui chhung na na na chu an phak tawka hlim taka hman chu a ni lo thei lo.




Aw, thlir zel ila, Bethlehem tlangpui
Ran in tlawma Chhandamtu piang chu
Hmana miten lawm lo mah sela
Lalpa, kan thinlungah lal ber ang che
Chung zawng zawg avanga East Pakistan atanga Bethlehem tlang han thlir chu a fiah duh hian ka’n ring khawp a(h)! Meipui chheh chunga arsa hem thut hual leh carola khawlai dung fang a, Advance Christmas leh krismas pual programme hrang hranga thianho, mipui leh zaithiam ten an sak ai chuan kum 1969 krismas dawna Mizo hnam sipai ten East Pakistan ramhnuai ngaw reh ruih maia  rinnaa Bethlehem thlir chunga an sak ho kha he hla hlut lai ber leh a thluk mawi lai ber, a hla thu ten an nihna leh awmzia tak tak phawkchhuak a, mihring te thinlunga thu a sawi nasat lai ber a nih hi ka ring lo thei lo a ni!










Comments

Popular posts from this blog

Tunlai khawvel leh Kristianna

Career Guidance

Tlawmngaihna leh Tunlai Mizo Nun